വിശ്വാസ തൃതീയ

സീന്‍ 1

രമേശന്റെ തുണിക്കട - പകല്‍

കടയില്‍ ഈച്ചയടിച്ചിരിക്കുന്ന രമേശന്‍. അസിസ്റ്റന്റ് ഇട്ടൂപ്പ്.

രമേശന്‍: ഈശ്വരാ. ജീവിതത്തില്‍ ഒന്നുരക്ഷപ്പെടാമെന്നുവച്ചാണ് കട തുടങ്ങിയത്. ക്വാളിറ്റി സാധനങ്ങള്‍തന്നെ എടുത്തുവച്ചു. പക്ഷെ ആരും ഇങ്ങോട്ടു തിരിഞ്ഞുനോക്കുന്നില്ലല്ലോടാ ഇട്ടൂപ്പേ.

ഇട്ടൂപ്പ്: എന്റെ രമേശന്‍ സാറെ. "ഓരോന്നിനും അതിന്റെ ഒരു സമയമുണ്ട് ദാസാ'' എന്ന് നാടോടിക്കാറ്റ് സിനിമേല് വിജയന്‍ ദാസനോട് പറഞ്ഞിട്ടുണ്ട്. സാറിനും വരും ഒരു സമയം.

രമേശന്‍: പക്ഷെ ആ ദിവസം വരുമ്പോള്‍ കടയും സാധനങ്ങളും ബാങ്കുകാര് കൊണ്ടുപോവും.

ദയനീയമായിരിക്കുന്ന രമേശന്‍. മുതലാളിയുടെ ദുഃഖത്തില്‍ പങ്കുചേരാനെന്നമട്ടില്‍ ദുഃഖം അഭിനയിക്കുന്ന ഇട്ടൂപ്പ്.

കട്ട്.

സീന്‍ 2

രമേശന്റെ വീട് - രാത്രി

കടപൂട്ടി വീട്ടിലെത്തുന്ന രമേശന്‍. ആകെ തകര്‍ന്ന അവസ്ഥ. വീട്ടില്‍ ഭാര്യ തന്നെ കാത്തെന്നപോലെ ഉല്‍സാഹത്തില്‍ നില്‍ക്കുന്നു.

ഭാര്യ: ങാ. എത്തിയോ ചേട്ടാ. ദേ. ഭക്ഷണംകഴിച്ച് ഉടന്‍ നമുക്കിറങ്ങണം.

രമേശന്‍: രാത്രി എവിടെ പോകാനാ.

ഭാര്യ: ഈശ്വരാ. ഏട്ടന്‍ ഈ നാട്ടിലല്ലേ. നാളെ അക്ഷയതൃതീയ ആണ്. ദേ നാളെ സ്വര്‍ണം വാങ്ങാന്‍ ഇന്നു രാത്രിമുതലേ ജൂവലറികളില്‍ ക്യൂവാ. ഈ അക്ഷയതൃതീയനാളില്‍ സ്വര്‍ണം വാങ്ങാന്‍ രണ്ടുവര്‍ഷംമുമ്പേ ബുക്കുചെയ്തവരുണ്ട്. വരണം. ഊണുകഴിച്ച് ഉടനെ ഇറങ്ങാം. (അകത്തേയ്ക്കുനോക്കി) മക്കളേ അപ്പൂ. ആ സഞ്ചിയൊക്കെ റെഡിയാണല്ലോ. രണ്ടു സഞ്ചീം ഒരു കിറ്റും എടുത്തുവച്ചിട്ടുണ്ട്. അതില് കൊള്ളുന്നതുമതി.

രമേശന്‍: എടീ നോക്ക്

ഭാര്യ: വേണ്ട വേണ്ട. ചേട്ടന്‍ എന്നെ പറഞ്ഞോ. കേള്‍ക്കാം. എന്റെ വീട്ടുകാരെ പറഞ്ഞാലും കേള്‍ക്കാം. പക്ഷെ അക്ഷയതൃതീയേ കുത്തിപ്പറയരുതേ - കുന്നംകുളത്തൊരാള്‍ അക്ഷയതൃതീയയേ കുത്തിപ്പറഞ്ഞു. കഴിഞ്ഞ തൃതീയയ്ക്കാ പറഞ്ഞത്. ഈ തൃതീയക്ക് ഒന്നാംചരമവാര്‍ഷികം.

എന്തോപറയാന്‍ വന്ന രമേശന്റെ വായ താനേ അടയുന്നു.

കട്ട്.

സീന്‍ 3

ജുവലറി രാത്രി രണ്ടുമണി

ജുവലറിയുടെ നടയില്‍ തള്ളല്‍. ജനത്തെ നിയന്ത്രിക്കാന്‍ പൊലീസ്. കണ്ണീര്‍ വാതകം പ്രയോഗിക്കുമെന്ന് മൈക്കിലൂടെ പൊലീസിന്റെ വിളിച്ചുപറയല്‍. വെടിവച്ചാലും പിരിയില്ലെന്ന് ജനം. ബ്രേക്ക്ഫാസ്റ്റ്, ലഞ്ച്, സപ്പറുകളുമായിട്ട് നില്‍ക്കുന്ന ജനങ്ങളുടെ ഷോട്ട്. ജനത്തിന്റെ ഇടയില്‍പെട്ട് രമേശന്‍.

തള്ളലിനിടയില്‍ രമേശന്‍ മുന്നില്‍നില്‍ക്കുന്ന ആളോട് ചോദിക്കുന്നു. 'അല്ല ചേട്ടാ. അടുത്തകാലംവരെ ഈ തൃതീയയെക്കുറിച്ച് അങ്ങനങ്ങ് അറിയാന്‍ വയ്യായിരുന്നല്ലോ. പെട്ടെന്നാണല്ലോ ഒരു ഓളം'.

ഞെരുങ്ങലിനിടയില്‍ അയാള്‍: വിശ്വാസത്തിനെ കൂട്ടുപിടിച്ച് മാര്‍ക്കറ്റിങ് നടത്തിയാല്‍ എവിടെയും ഉണ്ടാകും ഈ ഓളം. അതുംപറഞ്ഞ് അയാള്‍ എന്തോ പിറുപിറുത്തു. കഷ്ടം എന്നോ മറ്റോ - ഒരു നിമിഷം. രമേശന്റെ തലയില്‍ ഒരു മിന്നല്‍. 'യുറേേേക്കാ' എന്നൊരു വിളി.

കട്ട്.

സീന്‍ 4

ഒരു വീട് - പകല്‍

വീട്ടിലെ ഗൃഹനാഥപത്രം നോക്കുന്നു. ഒരു കൊച്ചു പരസ്യം. അടുത്ത വെള്ളിയാഴ്ച 'ഉടയാട ചതുഷ്ട്യ'ദിനം. 'ഉടയാട ചതുഷ്ട്യ' ദിനത്തില്‍ സാരിയും ചുരിദാറും വാങ്ങൂ. ഒരു വര്‍ഷം മുഴുവനും ക്ഷേമൈശ്വര്യങ്ങള്‍ അനുഭവിക്കൂ. ഉടയാടചതുഷ്ട്യദിനത്തില്‍ രമേശന്‍ ടെക്സ്റ്റയില്‍സില്‍ പ്രത്യേക കൌണ്ടറുകള്‍ തുറന്നുപ്രവര്‍ത്തിക്കുന്നു. ബുക്കിങ് ആരംഭിച്ചുകഴിഞ്ഞു.

പത്രം വായിച്ച സ്ത്രീ ഭര്‍ത്താവിനോട്: ഈശ്വരാ ഉടയാടചതുഷ്ട്യദിനം ഇങ്ങെത്തിയല്ലോ.

ഭര്‍ത്താവ്: ഉടയാട ചതുഷ്ട്യദിനമോ?

ഭാര്യ: ഉവ്വ്. വസ്ത്രം വാങ്ങാന്‍ വിശിഷ്ടമായ ദിവസമാ. ദേ, പരസ്യങ്ങള്‍ വന്നുതുടങ്ങി.

ഭര്‍ത്താവ്: ഹ! ഉടയാട ചതുഷ്ട്യദിനമെന്നുവച്ചാല്‍...

ഭാര്യ: ദേ... ആവശ്യമില്ലാതെ ഓരോന്നു സംശയിക്കരുതേ. വടകരയില്‍ ഒരാള് ഉടയാടദിനത്തിനെ കളിയാക്കി. അതുവഴി ഇഴഞ്ഞുപോയ ഒരു പാമ്പ് അതുകേട്ട് കയറിവന്ന് കൊത്തീട്ടുപോയി.

ഭര്‍ത്താവ്: എന്നാല്‍ ഇന്നുതന്നെ പോയി ബുക്ക് ചെയ്യാം.

കട്ട്.

സീന്‍ 5

രമേശന്റെ കട - പകല്‍

കയറിവരുന്ന ജനസഞ്ചയത്തെക്കണ്ട് അമ്പരപ്പോടെ ഇട്ടൂപ്പ്: സാറേ ഓടിക്കോ. കടം കൊടുത്ത കാശ് തിരികെ വാങ്ങാനായി കട ആക്രമിക്കാന്‍ ആള്‍ക്കാര് വരുന്നു. ആള്‍ക്കാര്‍ ഇളകിവരികയാണ്.

രമേശന്‍ ഒരു മന്ദഹാസം.

കടയിലേക്ക് ഇരച്ചുകയറുന്ന ജനങ്ങള്‍.

കട്ട്.

സീന്‍ 6

രമേശന്റെ കട - രാത്രി

സ്റ്റോക്ക് മൊത്തം സോള്‍ഡ് ഔട്ട് ആയിക്കഴിഞ്ഞിരിക്കുന്നു. കാശിന്റെ കൂമ്പാരം.

ഇട്ടൂപ്പ്: സാറെ... എനിക്കെന്റെ കണ്ണുകളെ വിശ്വസിക്കാന്‍ പറ്റുന്നില്ല. ഇതെന്താണ് സാറെ...

രമേശന്‍: താന്‍ തല്‍ക്കാലം ഇത്രയും അറിഞ്ഞാല്‍ മതി. ഞാന്‍ ബിസിനസ്സ് വ്യാപിപ്പിക്കുകയാണ്. നിരവധി ബിസിനസ്സുകള്‍ ഒരുമിച്ചുതുടങ്ങുന്നു.

കട്ട്.

സീന്‍ 7

പത്രപരസ്യങ്ങളുടെയും നോട്ടീസുകളുടെയും ദൃശ്യം. ജനബാഹുല്യം പ്രമാണിച്ച് അഷ്ടദ്രവ്യദിനത്തില്‍ രമേശന്റെ പലവ്യഞ്ജനക്കട രാത്രിയും പകലും തുറന്നുപ്രവര്‍ത്തിക്കുന്നു.

"അടുത്ത മധുമക്ഷികാദിനത്തില്‍ മദ്യത്തിന്റെ രുചി നുണഞ്ഞ് മനസ്സ് സമ്പുഷ്ടമാക്കാന്‍ ഇന്നേ ബുക്ക് ചെയ്യാം.''

"സംഗീതക്ഷിദിനത്തില്‍ വിസിഡി പ്ളേയര്‍ വാങ്ങാനുള്ളവരുടെ തിരക്കുനിമിത്തം ഇനി ഓര്‍ഡര്‍ എടുക്കുന്നില്ല.''

ചിരിക്കുന്ന രമേശന്റെ ക്ളോസപ്പ്. ആ ചിരിയില്‍ ഓവര്‍ലാപ് ചെയ്യുന്ന ഇട്ടൂപ്പിന്റെ ചോദ്യം.

"വിശ്വാസം രക്ഷിക്കുമെന്നുപറയുന്നത് നേരാ അല്ലേ സാറേ.''

കട്ട്.

-കൃഷ്ണപൂജപ്പുര