ഡയറിക്കുറിപ്പുകള്‍ കഥ പറയുന്നു

രഘുനാഥന്റെ ഡയറി
(1-2-2007)

അനുമോളുടെ വിവാഹം നിശ്ചയിച്ചു. ആഘോഷം അടിപൊളിയാക്കണം. ഓഫീസിലെ സുദേവന്റെ മോള്‍ടെ കല്യാണത്തെക്കാള്‍ കൊഴുപ്പിക്കണം. എല്ലാ കാര്യങ്ങളിലും എന്നോട് മത്സരിക്കുന്ന സുരേഷ്‌കുമാര്‍ ഞെട്ടണം. കാശ് പ്രശ്‌നമാകാന്‍ പാടില്ല. കൊഴുക്കണം. മൊത്തം കൊഴുപ്പിക്കണം.

ബാങ്ക് മാനേജരുടെ ഡയറി
(12-2-2007)

ഇന്ന് ലോണ്‍ അപേക്ഷയുമായി വന്ന ഇരുപത്താറുപേരില്‍ രണ്ടുപേര്‍ക്ക് ലോണ്‍ പാസാക്കാന്‍ തീരുമാനിച്ചു. അതില്‍ ഒരാള്‍ രഘുനാഥന്‍ എന്ന ആളാണ്. മകളുടെ കല്യാണത്തിന്റെ എന്‍ഗേജ്‌മെന്റ് ആഘോഷത്തിനാണ് ലോണ്‍. മൂന്നുലക്ഷം. എന്‍ഗേജ്‌മെന്റിന് മൂന്നുലക്ഷം രൂപയൊക്കെ ചെലവാക്കണമോ എന്ന് ഞാന്‍ ചോദിച്ചു. അപ്പോഴാണ് അറിഞ്ഞത്. മൊത്തം അഞ്ചു ലക്ഷമാണ് ബജറ്റ്. മൂന്നു ലക്ഷം ബാങ്കില്‍നിന്ന്. രണ്ടുലക്ഷം അയാളുടെ പിഎഫില്‍നിന്ന്. വല്ലാത്ത ധൂര്‍ത്തുതന്നെ. ഇപ്പോള്‍ അതൊരു ട്രെന്റാണത്രെ. മെയിന്‍ ആഘോഷത്തിന് മുന്നോടിയായി മെയിനിനെക്കാള്‍ കേമമായി സബ് ആഘോഷങ്ങള്‍.

ബ്രോയ്‌ലര്‍ ചിക്കന്റെ ഡയറിയില്‍നിന്ന്
(22-2-2007)

ഇന്ന് അഴിയടിച്ച കൂട്ടില്‍ കിടന്നപ്പോള്‍ പുറത്ത് ഞങ്ങളുടെ ഉടമസ്ഥനോട് ആരോ പറയുന്നതു കേട്ടു. "അടുത്ത ബുധനാഴ്‌ച രഘുനാഥന്‍ സാറിന്റെ മോളുടെ നിശ്ചയമാണ്. 500 കിലോ ചിക്കന്‍ വേണം.'' എന്റെ സഹചിക്കനുകള്‍ ഞെട്ടിവിറച്ചു. ക്രിസ്‌മസ് വന്നാലും ദീപാവലി വന്നാലും എന്‍ഗേജ്‌മെന്റ് വന്നാലും റാങ്ക് കിട്ടിയാലും പ്രൊമോഷന്‍ വന്നാലും ഞങ്ങള്‍ ബ്രോയ്ലയ്‌ലര്‍ ചിക്കനുകള്‍ക്ക് കിടക്കപ്പൊറുതിയില്ല. മുമ്പ് സസ്യാഹാരം മാത്രം പാലിച്ചിരുന്ന സന്ദര്‍ഭങ്ങളാണ്.....ഇപ്പോള്‍ ചിക്കനില്ലാതെ ഇവന്മാര്‍ക്ക് ശരിയാകില്ല. കുളിക്കാനും പല്ലുതേക്കാനും ഒഴികെ ബാക്കി എല്ലാറ്റിനും ചിക്കന്‍. കൊളസ്‌ട്രോള്‍ എന്നൊരസുഖം വാസ്‌തവത്തില്‍ ഞങ്ങള്‍ക്കുവേണ്ടിയാണ് സൃഷ്‌ടിക്കപ്പെട്ടേക്കുന്നത്. അതുംകൂടി ഇല്ലായിരുന്നെങ്കില്‍ ഇവന്മാര്‍ ഒറ്റദിവസംകൊണ്ട് ഭൂമിയിലെ മൊത്തം ബ്രോയ്‌ലര്‍ ചിക്കനും തിന്നുതീര്‍ത്ത്, എന്നിട്ടും ആര്‍ത്തി തീരാതെ ആട്, മാട്, പൂച്ച, പട്ടി, കരടി, കാണ്ടാമൃഗം...തുടങ്ങി സകല ജീവികളെയും വെട്ടിവിഴുങ്ങുമായിരുന്നു. ഹോ! കൊളസ്‌ട്രോളേ, നിനക്ക് സ്‌തുതി.....രാത്രി എട്ടുമണിക്ക് ഉടമസ്ഥന്‍ തവിടും ഭക്ഷണവും വെള്ളവും തന്നു. ഞങ്ങള്‍ തിന്നു. അടുത്ത ബുധനാഴ്‌ച രഘുനാഥന്‍ സാറിന്റെ മകളുടെ എന്‍ഗേജ്‌മെന്റ് കൊഴുപ്പിക്കാന്‍ ഞങ്ങള്‍ ഒരുങ്ങുകയാണ്. "അന്യര്‍ക്ക് സന്തോഷം വരുന്നതിനുവേണ്ടീട്ടാണെങ്കില്‍ നൂറാവര്‍ത്തി ചത്തീടുവിന്‍' എന്നോ മറ്റോ അര്‍ഥത്തില്‍ ഇവന്മാരുടെ ഇടയില്‍ വന്നു ജനിച്ചുപോയ നല്ലവനായ ഒരു കവി എഴുതിയിട്ടുണ്ടത്രെ. ഞങ്ങളെ ഉദ്ദേശിച്ചായിരിക്കും.

രഘുനാഥന്റെ ഡയറി
(2-3-2007)

കിടുങ്ങി. എല്ലാവന്മാരും കിടുങ്ങി. അടിപൊളി എന്നു പറഞ്ഞാല്‍ ഇതാണ് അടിപൊളി. ഹോ ഡെക്കറേഷന് ഇരുപത്തയ്യായിരം കൊടുത്തെങ്കിലെന്ത്. സദ്യക്ക് ഒന്നര പോയെങ്കിലെന്ത്., ഒരു പേരായില്ലേ. സദ്യ വെജിറ്റേറിയനും നോണ്‍വെജിറ്റേറിയനും പ്രത്യേകം പ്രത്യേകമുണ്ടായിരുന്നു. ഇരുന്നൂറില്‍ ചില്വാനം കാറാണ് നിരന്നത്. എന്‍ഗേജ്‌മെന്റിന് ഇരുന്നൂറ് കാറാണെങ്കില്‍ കല്യാണത്തിന് എഴുന്നൂറെങ്കിലും വേണം. എംഎല്‍എ വന്നില്ല. മഴവെള്ളക്കെടുതിയില്‍പ്പെട്ടവരെ സന്ദര്‍ശിക്കാന്‍ പോയിരുന്നത്രെ. ഇലക്ഷന്‍ വരുമല്ലോ. അപ്പോള്‍ രണ്ടു ചോദിക്കണം.

രഘുനാഥന്റെ അച്‌ഛന്റെ ഡയറി
(2-3-2007)

കഷ്‌ടം! ഇതെന്തൊരു ധൂര്‍ത്താണ്. വിവാഹനിശ്ചയംമുതല്‍ തുടങ്ങിയ ആര്‍ഭാടം കാണിക്കലാണ്. ആരെങ്കിലും ഒരാള്‍ ഒരു ശീലം തുടങ്ങിവയ്‌ക്കുന്നു. വേറൊരാള്‍ അത് ഏറ്റുപിടിക്കുന്നു. മൂന്നാമത്തെയാള്‍ ഇരട്ടിയാക്കുന്നു. ലളിതമാകുമ്പോഴാണ് ഏതും ആഹ്ലാദകരമാകുന്നത്, ഉള്‍ക്കൊള്ളാന്‍ സാധിക്കുന്നത്...കല്യാണം നടക്കാന്‍ ഇനി രണ്ടു മാസംകൂടിയേ ഉള്ളു. അതിനിടയില്‍ എന്തിനാണ് ഇത്രയും വലിയ ഒരു ആര്‍ഭാട എന്‍ഗേജ്‌മെന്റ്? കല്യാണത്തിന് ക്ഷണിക്കുംപോലെ ആള്‍ക്കാരെയും ക്ഷണിച്ചേക്കുന്നു. തുണിയെടുക്കല്‍, വീഡിയോ, സിഡിയോ, ഗാനമേള....ഇടത്തരക്കാരനായ എന്റെ മോന്‍ ഇപ്പോള്‍ത്തന്നെ ഇതിനുവേണ്ടി കുറേ ലോണെടുത്തു. ഇവന്റെ ചാട്ടം കണ്ട് ഇനി മറ്റ് എത്ര ഇടത്തരക്കാരും പാവങ്ങളുമായിരിക്കും ആ വഴിക്ക് വരാന്‍ പോകുന്നത്.

ജോണിച്ചന്റെ ഡയറി
(3-3-2007)

ഇന്ന് സിറ്റി ഹോട്ടലില്‍ രഘുവിന്റെ വക തകഴ്പ്പന്‍ പാഴ്‌ടിയായിരുന്നു. 12 കുപ്പി പൊട്ടിച്ചു. ഇന്നലെ എന്‍ഗേജ്‌മെന്റിന് ലിക്കഴ് ഇല്ലായിരുന്നു. ലിക്കഴ് ഉപയോഗിക്കുന്നവര്‍ക്കുവേണ്ടി ഒരു പ്രത്യേക പാര്‍ട്ടി പറഞ്ഞിട്ടുണ്ടായിരുന്നു. ഞങ്ങള്‍ 25പേര്‍ ഉണ്ടായിരുന്നു. എല്ലാംകൂഴി മുപ്പഴിനായിരം ഴൂപയായി. നാഴെ ദിനേശന്റെ സെന്റോഫ് പാഴ്‌ടിയാണ്. അകത്ത് പെണ്ണുമ്പിള്ളയുടെ കഴച്ചിലും ശകാഴവും. പതിവു ഴീതികള്‍. ആഴോ പറഞ്ഞതുപോലെ "ഈ മനോഹഴ തീഴത്തു തഴുമോ ഇനിയൊഴു ജന്മം കൂഴി'' ഒരു ജന്മം പോഴ. ഒന്നൊന്നഴ ജന്മം വേണം. എന്നാഴേ കുപ്പികഴൊക്കെ കുഴിച്ചു വറ്റിക്കാന്‍ പറ്റൂ.

ബാങ്ക് മാനേജരുടെ ഡയറി
(28-4-2007)

രഘുനാഥന്‍ എന്ന ആള്‍ വീണ്ടും വന്നു. വീടും പ്രമാണവും ഈടുവച്ച് അഞ്ചുലക്ഷംകൂടി ലോണ്‍ വേണമത്രെ. എന്‍ഗേജ്‌മെന്റിനെക്കാള്‍ ഗംഭീരമായി കല്യാണം നടത്തണം. കഴിഞ്ഞമാസത്തെ തവണ മുടങ്ങിയത് ഓര്‍മിപ്പിച്ചു. എല്ലാംകൂടി ഒന്നിച്ചടയ്‌ക്കാമെന്ന് അയാള്‍ പറഞ്ഞു.

പത്മിനിയുടെ ഡയറി
(8-5-2007)

ഇന്ന് രേണുകയും രഘുച്ചേട്ടനും കല്യാണം വിളിക്കാന്‍ വന്നു. സിറ്റിയിലെ ഏറ്റവും വലിയ കല്യാണമണ്ഡപത്തില്‍വച്ചാണ് കല്യാണം. കല്യാണം വിളിച്ചപ്പോള്‍ എന്നെ തോല്‍പ്പിക്കുന്ന മട്ടില്‍ ഒരു ചിരി രേണുകയുടെ മുഖത്തു കണ്ടു. എന്റെ മോള്‍ടെ കല്യാണത്തെക്കാള്‍ കെങ്കേമമാക്കുന്നതിന്റെ നെഗളിപ്പാണ്. ഗാനമേള ലൈവ് ടെലികാസ്റ്റ് ഒക്കെ ഉണ്ടത്രെ. കാര്‍ഡ് ഒന്നിന് അമ്പതു രൂപയായി. ഹോ! തല കറങ്ങുന്നു. അവള്‍ എന്നെ തോല്‍പ്പിച്ചു കളഞ്ഞു. ഇല്ല, ഗ്രേഷ്‌മമോളുടെ കല്യാണം വരുന്നുണ്ടല്ലോ. അതിനു പകരം വീട്ടണം.

പലിശക്കാരന്റെ ഡയറി
(15-5-2007)

രഘുനാഥന്‍ സാറിന് ഒരു ലക്ഷം രൂപ കൊടുത്തു. കല്യാണത്തിന്റെ ബജറ്റ് പത്തുലക്ഷം കവിഞ്ഞത്രെ. അഞ്ചുരൂപ പലിശയാകുമെന്ന് പറഞ്ഞു. മുദ്രപത്രത്തില്‍ എഴുതി ഒപ്പിട്ടുവാങ്ങി.

രഘുനാഥന്റെ ഡയറി
(18-5-2007)

തുണിയെടുക്കാനുള്ള കാശ് കണ്ടുപിടിക്കേണ്ടിയിരിക്കുന്നു. പലിശക്കെടുത്തതും പിഎഫും ലോണുമൊക്കെ ആഭരണത്തിനും ഹാളിനുമൊക്കെ കൂടിയായി....പോട്ടെ....കാശൊരു പ്രശ്‌നമല്ല....പ്രസ്റ്റീജാണ് പ്രശ്നം.

റഹിമിന്റെ ഡയറി
(19-5-2007)

രഘുനാഥന്‍ചേട്ടന് അമ്പതിനായിരം കടം കൊടുത്തു.

സുധാകരന്റെ ഡയറി
(20-5-2007)

മിസ്റ്റര്‍ രഘുനാഥന് എഴുപത്തയ്യായിരം കടം കൊടുത്തു.

രഘുനാഥന്റെ അച്‌ഛന്റെ ഡയറി
(2-6-2007)

ഇന്ന് കല്യാണം കഴിഞ്ഞു. കഴിഞ്ഞ ഒരാഴ്‌ചമുതല്‍ തുടങ്ങിയ ആഘോഷവും പാര്‍ട്ടിയും മേളവുമൊക്കെയായിരുന്നു. കല്യാണത്തെക്കാള്‍ ആഘോഷം കല്യാണത്തലേന്നായിരുന്നു. ആഭരണത്തിന്റെ ഭാരം കാരണം മോള്‍ടെ കഴുത്ത് കുനിഞ്ഞുപോയി. എന്തൊക്കെ കണ്ടാല്‍ കണ്ണടയുമോ ആവോ.

രഘുനാഥന്റെ ഡയറി
(10-6-2007)

......ഇത്രയും രൂപ ഞാന്‍ എങ്ങനെ കൊടുത്തുതീര്‍ക്കും. ഒരെത്തും പിടിയും കിട്ടുന്നില്ല. ലളിതമായി നടത്തിയാല്‍ മതിയായിരുന്നു.

ബാങ്ക് മാനേജരുടെ ഡയറി
(12-9-2007)

മൂന്നുമാസമായി രഘുനാഥന്റെ ഇഎംഐ മുടങ്ങിക്കിടക്കുകയാണ്. നാളെ ആളിനെ അയക്കേണ്ടിയിരിക്കുന്നു.

പലിശക്കാരന്റെ ഡയറി
(13-10-2007)

സര്‍ക്കാരുദ്യോഗസ്ഥനല്ലേ എന്നു കരുതിയാണ് ഇതുവരെ ക്ഷമിച്ചത്. ഇന്ന് പൊതുനിരത്തില്‍വച്ച് തെറിവിളിക്കേണ്ടി വന്നു. അഞ്ചുദിവസത്തിനുള്ളില്‍ മുതലും പലിശേം തിരികെ തന്നില്ലെങ്കില്‍ വീട്ടിലേക്ക് ഗുണ്ടകള്‍ വരുമെന്ന അവസാനതാക്കീത് കൊടുത്തു.

റഹിമിന്റെയും സുധാകരന്റെയും ഡയറി
(16-10-2007)

എത്ര മുങ്ങിനടന്നാലും രഘുനാഥനെ പിടിക്കും.

ജോണിച്ചന്റെ ഡയറി
(17-10-2007)

ഇന്നും അഴിപൊളി പാഴ്‌ടി. ഴഘുനാഥന്‍ ഷാറിന്റെ വക. ഷാറിന് കടക്കാഴെ പേടിച്ച് നില്‍ക്കാന്‍ വയ്യ. അതിന്റെ ദുഃഖം. ദുഃഖം കാരണം മദ്യപിക്കാന്‍ ബാറില്‍പോയി. ഞങ്ങള്‍ കമ്പനി കൊടുത്തു. നാല് കുപ്പി പൊഴ്‌ടി. ലിക്കഴിന് കാശ് ഞങ്ങള്‍ കഴം കൊടുത്തു. ഉഗ്രന്‍ സാധനം. പെട്ടെന്നുതന്നെ പിടിച്ചു. അകത്ത് ഭാഴ്യ കഴയുന്നു. ഡയറിയില്‍ എഴുതാന്‍ കൈ നേഴേ നില്‍ക്കുന്നില്ല.

കോടതി ആമീന്റെ ഡയറി
(22-11-2007)

നാളെ രാവിലെ രഘുനാഥന്റെ വീട്ടില്‍ ജപ്‌തി നോട്ടീസ് പതിക്കാന്‍ പോണം. അതുകഴിഞ്ഞ് മറ്റ് നാലുപേരുടെ വീട്ടിലും. കല്യാണം, കാറുവാങ്ങല്‍, ആവശ്യമില്ലെങ്കിലും ക്രെഡിറ്റ് കാര്‍ഡെടുക്കല്‍, ഓവര്‍ പര്‍ച്ചേസ്, ആര്‍ഭാടം...അങ്ങനെ കുത്തുപാളയെടുത്തവരാണ് ഏവരും.

പത്മിനിയുടെ ഡയറി
(1-1-2008)

ഹാ! നല്ല വാര്‍ത്തയുമായാണ് പുതുവര്‍ഷം പിറന്നിരിക്കുന്നത്. രേണുകയുടെ വീട് ജപ്‌തിചെയ്തു. രഘുനാഥന്‍ ചേട്ടനെ വണ്ടിച്ചെക്ക് കൊടുത്തതിന് അറസ്റ്റ് ചെയ്തു. ഇതിനെയൊക്കെച്ചൊല്ലി കല്യാണം കഴിഞ്ഞുപോയ മകളുടെ വീട്ടില്‍ അസ്വാരസ്യം. ഹോ! മനസ്സ് സന്തോഷംകൊണ്ട് വിങ്ങുന്നു. ഈശ്വരാ...ഗ്രേഷ്‌മമോളുടെ കല്യാണം നാളെ ഉറപ്പിക്കും...അതുകഴിഞ്ഞാല്‍ രേണുക നടത്തിയതിലും കെങ്കേമമായി ഒരു എന്‍ഗേജ്‌മെന്റും കല്യാണവും.


*****

കൃഷ്ണ പൂജപ്പുര