എട്ടു കേന്ദ്രമന്ത്രിമാരുണ്ടായിട്ട് കേരളത്തിനെന്ത്?

കേന്ദ്ര മന്ത്രിസഭാ പുനഃസംഘടനയില്‍ കേരളത്തിന് അധികമായി രണ്ടു മന്ത്രിമാരെ ലഭിച്ചതാണ് ഇപ്പോള്‍ പ്രധാന ചര്‍ച്ചാവിഷയം. ശശി തരൂരും കൊടിക്കുന്നില്‍ സുരേഷും മന്ത്രിമാരായതോടെ കേരളത്തില്‍നിന്നുള്ള കേന്ദ്രമന്ത്രിമാരുടെ എണ്ണം എട്ടായി. രണ്ടു ക്യാബിനറ്റ് മന്ത്രിമാരും ആറു സഹമന്ത്രിമാരും. കേന്ദ്രമന്ത്രിമാരുടെ എണ്ണം വര്‍ധിക്കുന്നത് കേരളത്തിന്റെ വികസന സ്വപ്നങ്ങള്‍ക്ക് കരുത്തുപകരുമെന്നും സംസ്ഥാനത്തിന്റെ സ്വപ്നപദ്ധതികള്‍ വേഗത്തില്‍ പൂര്‍ത്തീകരിക്കാന്‍ സഹായകരമാകുമെന്നും പ്രതീക്ഷിക്കുന്നവരുണ്ട്. മന്ത്രിമാരുടെ എണ്ണം കൂടുന്നത് കേരളത്തിന്റെ വികസനത്തിന് സഹായകരമാകുമെന്ന് കോണ്‍ഗ്രസ് നേതാക്കളും ഒരുകൂട്ടം മാധ്യമങ്ങളും ആവര്‍ത്തിച്ച് പറയുന്നു. ഈ വാചക കസര്‍ത്തു കേട്ടാല്‍ തോന്നുക, കൊടിക്കുന്നില്‍ സുരേഷും ശശി തരൂരും മന്ത്രിമാരാകാതിരുന്നതുകൊണ്ടാണ് കേരളത്തില്‍ വികസനം വരാതിരുന്നതെന്നും ഇനി വികസനം വളരെവേഗം കേരളത്തില്‍ എത്തുമെന്നുമാണ്.

മന്ത്രിസഭാ വികസനം കേരളത്തിന് എന്തെങ്കിലും നേട്ടം സമ്മാനിക്കുമോ? ഇതുവരെയുള്ള നമ്മുടെ അനുഭവംവച്ച് ഇല്ലെന്നുതന്നെ പറയേണ്ടി വരും. രണ്ടാം യുപിഎ സര്‍ക്കാര്‍ മൂന്നുവര്‍ഷം പിന്നിട്ട ഘട്ടത്തിലാണ് മന്ത്രിസഭ അഴിച്ചുപണിതത്. മൂന്നു വര്‍ഷത്തെ അനുഭവങ്ങള്‍ പരിശോധിക്കുക- ആറു മന്ത്രിമാരുള്ള കേരളത്തിന്റെ ഏത് പ്രധാന വികസന ആവശ്യത്തിനാണ് പരിഹാരം കാണാന്‍ കേന്ദ്രസര്‍ക്കാരിനായത്. ഭക്ഷ്യവകുപ്പ് കൈകാര്യംചെയ്യുന്നത് കേരളത്തില്‍നിന്നുള്ള പ്രൊഫ. കെ വി തോമസാണ്. കേന്ദ്രം നല്‍കിവന്ന അരിയുടെയും ഗോതമ്പിന്റെയും ക്വോട്ട പടിപടിയായി വെട്ടിക്കുറച്ചു. കേരളത്തിനുള്ള പഞ്ചസാരവിഹിതം വെട്ടിക്കുറച്ചു. ഏറ്റവും ഒടുവിലായി സംസ്ഥാനത്തിനുള്ള റേഷന്‍ മണ്ണെണ്ണയുടെ വിഹിതവും വെട്ടിക്കുറച്ചു. എപിഎല്‍ വിഭാഗത്തിനുള്ള അരിയുടെ കേന്ദ്രവിഹിതം പൂര്‍ണമായി പുനഃസ്ഥാപിക്കാന്‍ ഇതുവരെ തയ്യാറായിട്ടില്ല. മണ്ണെണ്ണവിഹിതം വെട്ടിക്കുറച്ചതിനെതിരെ വലിയ പ്രക്ഷോഭം നടക്കുമ്പോഴും പുനഃസ്ഥാപിക്കാനുള്ള നടപടിയും സ്വീകരിച്ചിട്ടില്ല.

കേരളത്തിന്റെ റെയില്‍വേ വികസനം എന്നും ഗൗരവമുള്ള ചര്‍ച്ചാവിഷയമാണ്. റെയില്‍വേ സോണ്‍ വേണമെന്ന ആവശ്യത്തിന് പതിറ്റാണ്ടുകളുടെ പഴക്കമുണ്ട്. അത് യാഥാര്‍ഥ്യമാക്കാന്‍ കേരളത്തില്‍നിന്നുള്ള കേന്ദ്രമന്ത്രിമാര്‍ ചെയ്തസേവനം എന്താണ്? പാലക്കാട് റെയില്‍വേ കോച്ച് ഫാക്ടറി എന്ന കേന്ദ്ര വാഗ്ദാനത്തിന് കാല്‍ നൂറ്റാണ്ടിലധികം പഴക്കമുണ്ട്. അതിനുള്ള സ്ഥലമെടുപ്പ് ഉള്‍പ്പെടെയുള്ള കാര്യങ്ങള്‍ എല്‍ഡിഎഫ് ഭരണകാലത്ത് പൂര്‍ത്തിയാക്കി. ഫാക്ടറി ഇപ്പോഴും കടലാസില്‍ത്തന്നെ. ചേര്‍ത്തലയില്‍ വാഗണ്‍ ഫാക്ടറി വരുമെന്ന് പ്രഖ്യാപിച്ചിട്ട് വര്‍ഷങ്ങളായി. മന്ത്രിമാരുടെ സ്വന്തം തട്ടകമായാണ് ചേര്‍ത്തല അറിയപ്പെടുന്നത്. വാഗണ്‍ ഫാക്ടറി ഇപ്പോഴും സ്വപ്നം. പാത ഇരട്ടിപ്പിക്കലും സ്റ്റേഷനുകളുടെ നവീകരണവും പുതിയ തീവണ്ടികളും അടക്കമുള്ള ആവശ്യങ്ങളൊന്നും കേന്ദ്രം കേട്ടതായിപ്പോലും ഭാവിക്കുന്നില്ല. പാലക്കാട് റെയില്‍വേ ഡിവിഷന്‍ വെട്ടിമുറിച്ച് കേരളത്തിന്റെ റെയില്‍വേ വികസനത്തിന് തുരങ്കംവയ്ക്കാന്‍ കേന്ദ്രം ശ്രമിച്ചപ്പോഴും കേരളത്തില്‍നിന്നുള്ള കേന്ദ്രമന്ത്രിമാര്‍ നിശബ്ദരായിരുന്നു.

കേരളം സ്വപ്നപദ്ധതിയായി അവതരിപ്പിച്ചതാണ് വിഴിഞ്ഞം തുറമുഖം. ചെയ്യാവുന്ന എല്ലാ നടപടികളും എല്‍ഡിഎഫ് സര്‍ക്കാര്‍പൂര്‍ത്തിയാക്കി. വിഴിഞ്ഞം പദ്ധതി ഇപ്പോള്‍ അനിശ്ചിതത്വത്തിലാണ്. കേരളത്തിന്റെ മാത്രമല്ല, രാജ്യത്തിന്റെതന്നെ വികസനത്തിന് വലിയ സംഭാവനകള്‍ നല്‍കാന്‍ കഴിയുന്ന വിഴിഞ്ഞംപോലൊരു ബൃഹത് പദ്ധതി, പലവിധ പ്രശ്നങ്ങളില്‍പ്പെട്ട് അനിശ്ചിതത്വത്തിലാകുമ്പോള്‍ സത്വര ഇടപെടല്‍ നടത്താന്‍ കേന്ദ്രമന്ത്രിമാരെ ആരെയും കണ്ടില്ല.

മെട്രോ റെയില്‍ പദ്ധതിതന്നെ ഇല്ലാതാകുമോ എന്ന ആശങ്ക ശക്തമാകുകയാണ്. അതിന്റെ പ്രവര്‍ത്തനങ്ങള്‍ അട്ടിമറിക്കാനും ഡിഎംആര്‍സിയെയും ഇ ശ്രീധരനെയും ഒഴിവാക്കാനും ശ്രമം നടത്തുന്ന ലോബികളെ നിലയ്ക്കു നിര്‍ത്താന്‍ ഒരു കേന്ദ്രമന്ത്രിയെയും കാണുന്നില്ല. മുഖ്യമന്ത്രിയുടെ നിലപാടുതന്നെ ഇക്കാര്യത്തില്‍ സംശയമുയര്‍ത്തുന്നു.

പ്രവാസികള്‍ ഉള്‍പ്പെടെയുള്ള മലയാളി വിമാനയാത്രക്കാരെ ചൂഷണംചെയ്യുന്ന വിമാനക്കമ്പനികള്‍ക്കെതിരെ കേന്ദ്രമന്ത്രിമാര്‍ എന്തെങ്കിലും ചെയ്യുന്നുണ്ടോ? വിമാനയാത്രക്കാരായ മലയാളികള്‍ കൊടിയ പീഡനം നേരിടുമ്പോള്‍ പ്രവാസിവകുപ്പ് ഭരിക്കുന്ന മലയാളിയായ വയലാര്‍ രവിക്ക് ഒന്നും ചെയ്യാനായില്ല. കേരളം ജീവന്മരണ പോരാട്ടം നടത്തുന്ന പ്രധാന വിഷയമായ മുല്ലപ്പെരിയാറിന്റെ കാര്യത്തില്‍പ്പോലും കേരളത്തിന് അനുകൂലമായി ചെറുവിരല്‍ അനക്കാന്‍ ആന്റണി അടക്കം ഒരു കേന്ദ്രമന്ത്രിയെയും കണ്ടില്ല.

മന്ത്രിപദവി ആസ്വദിച്ച് കേരളത്തില്‍ ചുറ്റിത്തിരിഞ്ഞ് നിലവാരമില്ലാത്ത രാഷ്ട്രീയ കവലപ്രസംഗങ്ങളുമായി കാലംകഴിക്കുന്നവരാണ് കേരളത്തില്‍നിന്നുള്ള കേന്ദ്രമന്ത്രിമാരില്‍ മിക്കവരും. തിരുവനന്തപുരത്തെ ഹൈക്കോടതി ബെഞ്ച്, കേരളത്തിന്റെ ചിരകാല സ്വപ്നമായ ഐഐടി തുടങ്ങി എത്രയെത്ര ആവശ്യങ്ങളാണ് കടലാസില്‍ വിശ്രമിക്കുന്നത്. ഉന്നത വിദ്യാഭ്യാസരംഗത്ത് വലിയ നേട്ടങ്ങള്‍ കൈവരിച്ച കേരളത്തിന് ഐഐടി പ്രതീക്ഷയ്ക്ക് വകയില്ലെന്ന് ആസൂത്രണ കമീഷന്‍ വ്യക്തമാക്കികഴിഞ്ഞു.

ക്യാബിനറ്റിലെ മുഖ്യ നടത്തിപ്പുകാരനായി മാധ്യമങ്ങളും കോണ്‍ഗ്രസും വാഴ്ത്തുന്ന എ കെ ആന്റണി അടക്കം ആറു മന്ത്രിമാര്‍ മൂന്നു വര്‍ഷത്തിലധികം ഭരിച്ചിട്ടും കേരളത്തിന് ദുരിതംമാത്രമേ ബാക്കിയുള്ളൂ. കുട്ടനാട്- ഇടുക്കി പാക്കേജുകളുടെ കാര്യത്തില്‍ കേരളം ഇപ്പോഴും നിന്നിടത്തുതന്നെ നില്‍ക്കുന്നു. തൊഴില്‍വകുപ്പിലും മാനവ വിഭവശേഷിവകുപ്പിലും ഓരോ സഹമന്ത്രിമാര്‍കൂടി വരുന്നതോടെ കേരളത്തിന്റെ ഏത് സ്വപ്നമാണ് സഫലമാകാന്‍ പോകുന്നത്. സോണിയയുടെയും രാഹുലിന്റെയും കിച്ചന്‍ സിന്‍ഡിക്കറ്റിലെ അടുപ്പക്കാര്‍ക്ക് കിട്ടിയ ഈ മന്ത്രിപദവികള്‍ക്ക് ഒരു വിലയും പ്രസക്തിയും ആരും കല്‍പ്പിക്കുമെന്നു തോന്നുന്നില്ല.

 

 

*****

 

സി എന്‍ ചന്ദ്രന്‍

 

പരല്‍മീനുകളെ പിടിച്ചാല്‍ പോരാ

മോന്തായം വളഞ്ഞാല്‍ ഒരു കഴുക്കോല്‍പോലും നേരെ നില്‍ക്കില്ല. യുഡിഎഫ് സര്‍ക്കാരിന്റെ മോന്തായം വളഞ്ഞു തിരിഞ്ഞു കിടക്കുകയാണ്. അതുകൊണ്ടുതന്നെ മന്ത്രിമാരുടെ ഓഫീസിന്റെ തൂണിനുപോലും കൈക്കൂലി വാങ്ങാന്‍ മടിയില്ല. സുതാര്യ ഭരണമെന്നാണ് ഉമ്മന്‍ചാണ്ടി ഇടയ്ക്കിടെ പറയുന്നത്. അത് തെളിയിക്കാന്‍ സ്വന്തം ഓഫീസില്‍ വെബ്ക്യാമറകള്‍ ഘടിപ്പിച്ച് നാട്ടുകാരുടെ കണ്ണില്‍ പൊടിയിട്ടു. കാശ് വാങ്ങാന്‍ ക്യാമറ തടസ്സമല്ല എന്ന് ഇപ്പോള്‍ മുഖ്യമന്ത്രിയുടെ വിശ്വസ്തര്‍തന്നെ തെളിയിച്ചു. മുഖ്യമന്ത്രിയുടെ പേഴ്സണല്‍ സ്റ്റാഫില്‍പ്പെട്ടവര്‍ കൈക്കൂലി വാങ്ങുന്നതിന്റെ ദൃശ്യങ്ങളാണ് സെക്രട്ടറിയറ്റില്‍ സ്ഥാപിച്ച നിരീക്ഷണ ക്യാമറയില്‍ പതിഞ്ഞത്. കൈക്കൂലി വാങ്ങുന്നതിന്റെ തെളിവ് കൈയോടെ ലഭിച്ചപ്പോള്‍ രണ്ടുപേരെയും പേഴ്സണല്‍ സ്റ്റാഫില്‍നിന്ന് സെക്രട്ടറിയറ്റില്‍ നേരത്തെ ജോലിചെയ്ത വകുപ്പുകളിലേക്ക് തിരിച്ചയക്കാനേ മുഖ്യമന്ത്രി തയ്യാറായുള്ളൂ. പൊലീസില്‍ കേസ് കൊടുത്തിട്ടില്ല.

മുഖ്യമന്ത്രിയുടെ ഓഫീസിലെ നിരീക്ഷണ ക്യാമറ കുറച്ചുനാളായി പ്രവര്‍ത്തിക്കുന്നില്ല. അതിന്റെ മറവില്‍ എന്തെല്ലാം നടക്കുന്നുവെന്ന് ആര്‍ക്കും അറിയുകയുമില്ല. കേരളത്തിന്റെ ഭരണസിരാകേന്ദ്രമായ സെക്രട്ടറിയറ്റ് ഏറെക്കാലമായി നിലനിര്‍ത്തുന്ന അഴിമതിവിമുക്തമെന്ന പേരാണ് ഉമ്മന്‍ചാണ്ടിഭരണം കളഞ്ഞുകുളിച്ചത്. പിടിക്കപ്പെട്ടത് താഴെക്കിടിയിലുള്ള രണ്ട് ജീവനക്കാരാണെന്നത് പ്രശ്നത്തിന്റെ ഗൗരവം വര്‍ധിപ്പിക്കുന്നതേയുള്ളൂ. മാലിന്യം കെട്ടിക്കിടക്കുന്ന വെള്ളത്തിലാണ് ലാര്‍വ തിമിര്‍ത്ത് വളരുക. അഴിമതിയുടെ ലാര്‍വ പെറ്റുപെരുകി വളരാനുള്ള മാലിന്യം ഉമ്മന്‍ചാണ്ടിഭരണത്തില്‍ സമൃദ്ധിയോടെ കെട്ടിക്കിടക്കുന്നു. മുഖ്യമന്ത്രിതന്നെ അഴിമതി ആരോപണ വിധേയനാണ്. സംസ്ഥാനത്തിന്റെ സ്വപ്നപദ്ധതിയെന്ന് ഉദ്ഘോഷിക്കപ്പെട്ട കൊച്ചി മെട്രോപദ്ധതി കമീഷന്റെ കനം വര്‍ധിപ്പിക്കുക എന്ന ഒറ്റലക്ഷ്യത്തോടെ അട്ടിമറിക്കാന്‍ മടിയില്ലാത്തിടത്തോളം വളര്‍ന്നിരിക്കുന്നു സര്‍ക്കാരിന്റെ ആര്‍ത്തി.

അഴിമതിയില്ലാത്ത വകുപ്പുകളില്ല; അവിശുദ്ധ ധനസമ്പാദനത്തിന് വഴി വെട്ടിക്കൊടുക്കാത്ത മന്ത്രിമാരില്ല; മാഫിയകള്‍ കടന്നുചെല്ലാത്ത ഇടനാഴികള്‍ ഭരണകേന്ദ്രത്തില്‍ അവശേഷിപ്പില്ല. അഴിമതി ഭരണനിര്‍വഹണത്തിന്റെ ഭാഗമാക്കിയിരിക്കുന്നു. ഭക്ഷ്യമന്ത്രിയുടെ വസതിയില്‍ കൈക്കൂലി വാങ്ങാന്‍ മൂന്ന് കൗണ്ടര്‍ പ്രവര്‍ത്തിക്കുന്നുവെന്ന് വെളിപ്പെടുത്തിയത് അദ്ദേഹത്തിന്റെ പാര്‍ടിക്കാരന്‍ തന്നെയാണ്. മണല്‍കള്ളക്കടത്തുകാരനെ പിടികൂടിയ പൊലീസുകാരെ പരസ്യമായി അവഹേളിച്ചും ഭയപ്പെടുത്തിയും പരസ്യപ്രകടനം നടത്താന്‍ യുഡിഎഫിന്റെ പ്രമുഖ നേതാവിന് മടിയുണ്ടാകാത്തത് ഉമ്മന്‍ചാണ്ടി ഒരുക്കിയ സവിശേഷ സാഹചര്യത്തിന്റെ ഫലമായാണ്. അഴിമതിയും അതിക്രമവും പിടിക്കപ്പെട്ടാലും കുറ്റവാളികള്‍ക്ക് രക്ഷാകവചമൊരുക്കുന്നു. അന്വേഷണം അട്ടിമറിക്കാനും സാങ്കേതിക ന്യായങ്ങളില്‍ കുരുക്കി കേസുകളെ നിര്‍വീര്യമാക്കാനും ഏജന്റുമാര്‍ പ്രവര്‍ത്തിക്കുന്നു. കോടതി മുമ്പാകെ എത്തുന്ന കേസിന്റെ വിചാരണപോലും ഇങ്ങനെ അട്ടിമറിക്കുകയാണ്.

മുഖ്യമന്ത്രി ഉമ്മന്‍ചാണ്ടിയിലേക്ക് തെളിവുകള്‍ നീണ്ട അഞ്ഞൂറുകോടി രൂപയുടെ സൈന്‍ബോര്‍ഡ് അഴിമതി കേസ് അട്ടിമറിക്കുന്നതില്‍ യുഡിഎഫ് സര്‍ക്കാര്‍ കാണിക്കുന്ന അമിതാവേശം ഇതിന്റെ ചൂണ്ടുപലകയാണ്. ഉമ്മന്‍ചാണ്ടിക്കെതിരെ ആരോപണമുന്നയിച്ചത്, യുഡിഎഫ് ഘടകകക്ഷിയുടെ സമുന്നത നേതാവായിരുന്ന അന്തരിച്ച ടി എം ജേക്കബ്ബാണെന്നതും ഓര്‍ക്കണം. മന്ത്രിസഭയിലെ അഴിമതിക്കാരെ സംരക്ഷിക്കുന്നു; താനുള്‍പ്പെട്ട അഴിമതിക്കേസുകള്‍ മുഖ്യമന്ത്രിയുടെ സവിശേഷമായ അധികാരമുപയോഗിച്ച് ഇല്ലാതാക്കുന്നു. പാമൊലിന്‍ കേസില്‍ ഉമ്മന്‍ചാണ്ടി നേരിട്ട് കുടുങ്ങുമെന്നായപ്പോള്‍ അമ്പരപ്പിക്കുന്ന രാഷ്ട്രീയ ഇടപെടലിലൂടെ കേസ് തകര്‍ത്തു. ട്രാവന്‍കൂര്‍ ടൈറ്റാനിയത്തില്‍ 256 കോടി രൂപയുടെ മലിനീകരണ നിയന്ത്രണസംവിധാനം സ്ഥാപിക്കുന്നതിന്റെ പേരില്‍ അരങ്ങേറിയ തട്ടിപ്പിലും മുഖ്യമന്ത്രി ആരോപണവിധേയനാണ്. അഴിമതിയുടെ ഘോഷയാത്രയ്ക്കാണ് എമര്‍ജിങ് കേരളയിലൂടെ പച്ചക്കൊടി വീശിയത്. ഭൂമാഫിയയുടെ സംരക്ഷകരാണ് മന്ത്രിസഭയിലിരിക്കുന്നത്. നെല്ലിയാമ്പതിയടക്കമുള്ള കേരളത്തിന്റെ ഹരിതസമൃദ്ധിയെ വിഴുങ്ങാനുള്ള ഭൂമാഫിയയുടെ ശ്രമങ്ങള്‍ക്കെതിരെ കലാപക്കൊടി ഉയര്‍ത്തി യുഡിഎഫ് എംഎല്‍എമാര്‍തന്നെ രംഗത്തുവന്നു. എവിടെയാണ് അഴിമതി ഇല്ലാത്തത് എന്ന ചോദ്യത്തിനേ ഉമ്മന്‍ചാണ്ടിയുടെ ഭരണത്തില്‍ പ്രസക്തിയുള്ളൂ. സര്‍വകലാശാലയുടേതടക്കം ഭൂമി അടിച്ചുമാറ്റാനും കുടുംബശ്രീയില്‍ അണിനിരന്ന പാവപ്പെട്ട വനിതകളുടെ പിച്ചച്ചട്ടിയില്‍ കൈയിട്ടുവാരാനും മടിക്കാത്തവര്‍ക്ക് മറ്റെന്താണ് ചെയ്യരുതാത്തത്. അത്തരമൊരവസ്ഥയില്‍ മുഖ്യമന്ത്രിയുടെ ഓഫീസിലുള്ളവര്‍ കൈക്കൂലി വാങ്ങിയതിലും അവര്‍ക്ക് ശിക്ഷ നല്‍കാതെ സംരക്ഷിക്കുന്നതിലും അതിശയമൊന്നുമില്ല. അഴിമതിക്കാരെ ശിക്ഷിക്കാനുള്ളതാണ് യുഡിഎഫിന്റെ നയമെങ്കില്‍, ആദ്യം ലോക്കപ്പിന്റെ പൂട്ട് തുറക്കപ്പെടുന്നത് മുഖ്യമന്ത്രിയടക്കമുള്ള സമുന്നത ഭരണാധികാരികള്‍ക്കു മുന്നില്‍തന്നെയാകും.

കൈക്കൂലി വാങ്ങുമ്പോള്‍ സെക്രട്ടറിയറ്റിലെ ക്യാമറയില്‍ പതിഞ്ഞവര്‍ വലിയൊരു മലയുടെ ചെറിയൊരറ്റമാണ്. അഴിമതിയുടെ കൂറ്റന്‍ പര്‍വതം വേറെ കിടപ്പുണ്ട്. അതിനെയാണ് നശിപ്പിക്കേണ്ടത്. മുഖ്യമന്ത്രിയുടെ ഓഫീസിലെ ഏറ്റവും താഴ്ന്ന ജീവനക്കാര്‍ക്ക് സെക്രട്ടറിയറ്റിനകത്തുവച്ച് പണംവാങ്ങാന്‍ ധൈര്യം ലഭിച്ചത് തങ്ങളുടെ യജമാനന്മാര്‍ അഴിമതിയുടെ ആശാന്മാരാണ് എന്ന ബോധത്തില്‍നിന്നാണ്. ആ വമ്പന്‍ സ്രാവുകളെ പിടിക്കണം. അതിന് ഇന്നത്തെ സര്‍ക്കാര്‍ സ്വമേധയാ തയ്യാറാവില്ല. ശക്തമായ ജനകീയ പ്രക്ഷോഭമുയരണം. ജനജീവിതം ദുസ്സഹമാക്കുന്ന വികലനയങ്ങള്‍ക്കൊപ്പം കൊള്ളയും കൈമുതലാക്കിയവര്‍ക്കെതിരെ കേരളത്തിന്റെ രോഷം അലയടിച്ചുയരണം.

കേരള ചരിത്രത്തിലൂടെ

കണ്ടോത്തെ കുറുവടിയും കേരളീയന്റെ മരണമൊഴിയും

റഷ്യന്‍ വിപ്ലവത്തിനുംമുമ്പേ മാര്‍ക്സിനെയും പുരോഗമന ആശയങ്ങളെയും കുറിച്ച് വേവലാതി പൂണ്ട നാടാണ് കേരളം. കണ്ണൂര്‍ ജില്ലയിലെ തളിപ്പറമ്പില്‍ ജന്മി പ്രതിനിധി പ്രഭാകര തമ്പാന്‍ നടത്തിയ പ്രതികരണം അതിന് തെളിവ്. കുടിയാന്മാര്‍ക്ക് പ്രതിഫലം നല്‍കുന്നതിനെതിരെ സ്ട്രെച്ച് സായ്പിന് എഴുതിയ കുറിപ്പിലാണ് ആ ഭയപ്രകടനം. പ്രതിഫലം അനുവദിക്കുന്നത് കാള്‍ മാര്‍ക്സിന്റെ കമ്യൂണിസ്റ്റ് തത്വപ്രകാരമാണെന്നും അക്കാരണത്താല്‍ താന്‍ അതിനെ എതിര്‍ക്കുന്നുവെന്നും അയാള്‍ പ്രഖ്യാപിച്ചു. മന്നത്ത് കൃഷ്ണന്‍നായര്‍ അവതരിപ്പിച്ച കുടിയാന്‍ബില്ലിനെക്കുറിച്ച് ജന്മിയായ തമ്പാന്‍ പറഞ്ഞത്, അത് ബോള്‍ഷെവിക് തത്വം സ്ഥാപിക്കാനുള്ള തന്ത്രമാണെന്നാണ്. ജാതീയമായ ഉച്ചനീചത്വങ്ങളെ തുടച്ചുനീക്കാനുള്ള പ്രവര്‍ത്തനങ്ങള്‍മുതല്‍ വര്‍ഗീയതയെ ചെറുക്കാനുള്ള നിശ്ചയദാര്‍ഢ്യംതൊട്ട് പുതിയ കേരളത്തെ നിര്‍വചിക്കാനുള്ള അന്വേഷണങ്ങള്‍വരെ ഇടതുപക്ഷത്തിന്റെയും കമ്യൂണിസ്റ്റ് പാര്‍ടിയുടെയും സംഭാവനയാണ്.

നവോത്ഥാനത്തിന്റെ സന്ദേശങ്ങളും അത് ഏറ്റെടുക്കാനാകാത്ത കോണ്‍ഗ്രസിന്റെ ബലഹീനതയും തിരിച്ചറിഞ്ഞതും കമ്യൂണിസ്റ്റുകാരാണ്. താന്‍ ഒരു ഈഴവനൊപ്പം ചോറുണ്ടതില്‍ നായര്‍പ്രമാണിമാര്‍ നെറ്റിചുളിച്ച കഥ എന്‍ സി ശേഖര്‍ ഓര്‍ത്തെടുത്തിട്ടുണ്ട്. കള്ളുഷാപ്പിലുണ്ടാക്കുന്ന മീനും കപ്പയും തിന്നുന്നവര്‍ വീട്ടിലിരുന്ന് ഊണുകഴിക്കുമ്പോള്‍ ഞെട്ടുന്നതെന്തിനെന്നും അദ്ദേഹം ചോദിച്ചു. പയ്യന്നൂരിനടുത്ത കണ്ടോത്തെ പൊതുനിരത്തില്‍ സാധാരണക്കാര്‍ക്ക് നടക്കാന്‍ അവകാശമില്ലായിരുന്നു. അവിടത്തെ ക്ഷേത്രം അശുദ്ധമാകുമെന്ന് ഭയപ്പെട്ടായിരുന്നു വിലക്ക്.

എ കെ ജിയുടെയും കെ എ കേരളീയന്റെയും നേതൃത്വത്തില്‍ അവിടേക്ക് ഘോഷയാത്ര നടത്തി. ധാരാളം ഹരിജനങ്ങളും സ്ത്രീകളും അക്കൂട്ടത്തിലുണ്ടായിരുന്നു. ഘോഷയാത്രയെ യാഥാസ്ഥിതികര്‍ കടന്നാക്രമിച്ചു. വലിയ ഉലക്കയുമായി സവര്‍ണസ്ത്രീകളടക്കം അതില്‍ പങ്കെടുത്തു. അരമണിക്കൂറിലേറെ മര്‍ദനം തുടര്‍ന്നു. കണ്ടോത്തെ കുറുവടി എന്ന പ്രയോഗംപോലും പിന്നീടുണ്ടായി. എ കെ ജിയും കേരളീയനും ബോധമറ്റുവീണു. മരണം സുനിശ്ചിതമായെന്നു തോന്നിയതിനാല്‍ കേരളീയന്റെ മരണമൊഴിപോലും രേഖപ്പെടുത്തുകയുണ്ടായി. വൈക്കം- ഗുരുവായൂര്‍ സത്യഗ്രഹങ്ങള്‍ പകര്‍ന്നുനല്‍കിയ ഉണര്‍വ് കേരളമാകെ ഒട്ടേറെ മുന്നേറ്റങ്ങള്‍ക്ക് വഴികാട്ടി. അതിന്റെ ഉള്ളടക്കം വിപുലമാക്കിയതാകട്ടെ കമ്യൂണിസ്റ്റുകാരും. എ കെ ജിയുടെ നേതൃത്വത്തില്‍ നടന്ന പാലിയം സത്യഗ്രഹം മറ്റൊരു നാഴികക്കല്ല്. കടുത്ത അതിക്രമങ്ങളും അറസ്റ്റും ലാത്തിച്ചാര്‍ജും തുടര്‍ന്നുകൊണ്ടിരുന്ന അവസ്ഥയില്‍ അതിസാഹസികമായിട്ടാണ് അദ്ദേഹം സ്ഥലത്തെത്തിയത്. സമരം നേരിടാന്‍ പട്ടാളത്തെ ഇറക്കിയെന്ന വാര്‍ത്ത കേട്ടിട്ടും വളന്റിയര്‍മാര്‍ പിന്‍വാങ്ങിയില്ല. പാലിയെത്തെ റോഡില്‍ സഞ്ചാരസ്വാതന്ത്ര്യം ആവശ്യപ്പെട്ടുകൊണ്ടുള്ള സമരങ്ങളില്‍ കുറെ അന്തര്‍ജനങ്ങളും പങ്കെടുത്തു. പൊലീസ് അവരെ അതിക്രൂരമായാണ് നേരിട്ടത്. പ്രിയദത്തയ്ക്കും സാവിത്രിക്കും ഗുരുതരമായ പരിക്കേറ്റു. പൊലീസ് നടപടിക്കെതിരെ നാടുണര്‍ന്നു. എങ്ങും പ്രക്ഷോഭം. ഏറ്റമുട്ടലില്‍ എ ജി വേലായുധന്‍ രക്തസാക്ഷിയായി. ജാതികാര്‍ക്കശ്യങ്ങള്‍ അലിച്ചുകളഞ്ഞ കമ്യൂണിസ്റ്റ് അനുഭവങ്ങളിലൊന്നായിരുന്നു കമ്യൂണ്‍.

1942ല്‍ ബോംബെ രാജ്ഭവനിലാണ് ആദ്യത്തേത്. പിന്നെ കേരളത്തില്‍ കോഴിക്കോടും. ഏറ്റവും ലളിതജീവിതം. ജീവന്‍ നിലനിര്‍ത്താന്‍മാത്രമുള്ള ഭക്ഷണം. മീററ്റ് ഗൂഢാലോചനക്കേസിനെത്തുടര്‍ന്നുള്ള ജയില്‍വാസകാലത്ത് നല്‍കിയിരുന്ന നീളംകുറഞ്ഞ വസ്ത്രങ്ങള്‍ അനുകരിച്ചായിരുന്നു യൂണിഫോം. പട്ടാളച്ചിട്ടയോടെയുള്ള കമ്യൂണ്‍ പ്രവര്‍ത്തനം പല സ്ത്രീപ്പോരാളികളെയും രൂപപ്പെടുത്തി. 1917ല്‍ സഹോദരന്‍ അയ്യപ്പന്‍ ചെറായിയില്‍ നടത്തിയ പന്തിഭോജനം ചരിത്രപരമാണ്. അദ്ദേഹത്തെയും 23 കൂട്ടുകാരെയും ജാതിയില്‍നിന്ന് പുറത്താക്കിയാണ് സവര്‍ണ മനോഭാവക്കാര്‍ പ്രതികാരം തീര്‍ത്തത്. ഭക്ഷണമെന്നതിലുപരി സാമൂഹ്യവിലക്കുകള്‍ ലംഘിച്ച ആ പ്രതീകാത്മക പ്രതിഷേധത്തിന് അനുബന്ധമുണ്ടാക്കിയത് കമ്യൂണിസ്റ്റുകാരും കര്‍ഷകസംഘം പ്രവര്‍ത്തകരുമായിരുന്നു.

കൊടക്കാട്ടും പൊന്നാനിയിലും കാട്ടാമ്പള്ളിയിലും കളര്‍കോട്ടും കൊല്ലത്തും അന്തിക്കാട്ടുമെല്ലാം ധീരതയുടെ പുതിയ കൊടിയുയരുകയുമുണ്ടായി. കല്യാശേരി എലിമെന്ററി സ്കൂളില്‍ ഒരു ഹരിജന്‍ ബാലന്‍ പഠിക്കാനെത്തിയത് മേലാളര്‍ക്ക് സഹിക്കാവുന്നതിനപ്പുറമായിരുന്നു. കുമാരന്‍ എന്ന വിദ്യാര്‍ഥിയെ നായര്‍പ്രമാണിമാര്‍ തല്ലിയോടിച്ചു. ഇതിനെതിരായ പ്രതിഷേധമാണ് കെ പി ആര്‍ ഗോപാലനെപ്പോലെയുള്ളവരെ ദേശീയമുന്നേറ്റത്തിനൊപ്പം ഉറപ്പിച്ചത്.

കുടിയാന്‍ പ്രക്ഷോഭവും കുട്ടികൃഷ്ണമേനോന്‍ കമ്മിറ്റിയും

1921ലെ മലബാര്‍ കലാപത്തിന്റെ പ്രേരകശക്തികളില്‍ പ്രധാനം കുടിയാന്‍ പ്രക്ഷോഭമായിരുന്നു. 1920കളിലെ മുന്നേറ്റം കുടിയാന്മാരുടെ പേരില്‍ സംഘടിപ്പിക്കപ്പെട്ടതായിരുന്നെങ്കിലും അത് അവരില്‍ ചെറുന്യൂനപക്ഷത്തെ മാത്രമേ പ്രതിനിധീകരിച്ചിരുന്നുള്ളൂ. വെറുംപാട്ടക്കാരായ ബഹുഭൂരിപക്ഷം കൃഷിക്കാരുടെയും പ്രശ്നങ്ങളുയര്‍ത്തിയത് കോണ്‍ഗ്രസ് സോഷ്യലിസ്റ്റ് പാര്‍ടിയാണ്. പിന്നെ അതിന്റെ നേതൃത്വത്തില്‍ വന്ന കര്‍ഷകസംഘം. ആദ്യകാല ദേശീയവാദികളുടെ കുടിയാന്‍പ്രസ്ഥാനങ്ങള്‍ ജന്മിവിരുദ്ധമുന്നേറ്റങ്ങളെ സഹായിച്ചെങ്കിലും വെറുംപാട്ടക്കാരുടെ രക്ഷയ്ക്ക് അതൊന്നും ചെയ്തില്ല. 1931ലെ കുടിയാന്‍ നിയമ പരിഷ്കാരങ്ങള്‍ കാണക്കുടിയാന്മാര്‍ക്ക് രക്ഷയായിരുന്നു. എന്നാല്‍, വെറുംപാട്ടക്കാരുടെ അവകാശത്തെക്കുറിച്ച് നിയമം നിശബ്ദമായിരുന്നു. ഈ യാഥാര്‍ഥ്യം തിരിച്ചറിഞ്ഞത് കര്‍ഷകസംഘവും കമ്യൂണിസ്റ്റ് പാര്‍ടിയുമായിരുന്നു. കര്‍ഷകസംഘം പ്രവര്‍ത്തകര്‍ സംഘടനാപരമായി കോണ്‍ഗ്രസിനകത്തുതന്നെയായിരുന്നതിനാല്‍, കുടിയാന്‍പ്രശ്നം സംബന്ധിക്കുന്ന പ്രചാരണങ്ങളുടെ അല കോണ്‍ഗ്രസിലും പ്രതിധ്വനിച്ചു. 1937ലെ മദിരാശി നിയമസഭാ തെരഞ്ഞെടുപ്പില്‍ അത് ഉയര്‍ന്നുവരികയുംചെയ്തു. കോണ്‍ഗ്രസ് സര്‍ക്കാര്‍ അധികാരത്തിലെത്തിയപ്പോള്‍ അതിന്റെ മുന്നിലും പ്രശ്നം സജീവമായി. കോണ്‍ഗ്രസ് സോഷ്യലിസ്റ്റുകാരുടെ നേതൃത്വത്തിലായ കെപിസിസിയും കുടിയാന്‍ നിയമപരിഷ്കാരത്തിനായി ശബ്ദമുയര്‍ത്തി. ഇതൊക്കെയാണ് കുട്ടികൃഷ്ണമേനോന്‍ അധ്യക്ഷനായ കമ്മിറ്റി രൂപീകരിക്കുന്നതിലേക്ക് സര്‍ക്കാരിനെ നയിച്ചത്.

കെപിസിസി പ്രസിഡന്റ് മുഹമ്മദ് അബ്ദുറഹിമാന്‍ സാഹിബും ഇ കണ്ണനും ഇ എം എസുമായിരുന്നു കമ്മിറ്റിയിലെ കര്‍ഷകസംഘം പ്രതിനിധികള്‍. കമ്മിറ്റിയുടെ റിപ്പോര്‍ട്ട് ഏകകണ്ഠമായിരുന്നില്ല. ജന്മി പ്രതിനിധിയായ ആര്‍ എം പാലാട്ട് അടക്കം ഭൂരിപക്ഷം അംഗങ്ങള്‍ ഒരുവശത്തും ഇ എം എസ് ഉള്‍പ്പെടെയുള്ള ഇടതുപക്ഷ കോണ്‍ഗ്രസുകാര്‍ മറുഭാഗത്തുമായി രൂക്ഷമായ അഭിപ്രായവ്യത്യാസങ്ങളുണ്ടായി. അങ്ങനെ ഭൂരിപക്ഷ- ന്യൂനപക്ഷ റിപ്പോര്‍ട്ടുകള്‍ തയ്യാറാക്കിക്കൊണ്ടാണ് കമ്മിറ്റി പ്രവര്‍ത്തനം അവസാനിപ്പിച്ചത്. മലബാറിലെ സമ്പദ്വ്യവസ്ഥയില്‍ ബ്രിട്ടീഷ് ഭരണം വരുത്തിയ ഫലങ്ങള്‍ പരിശോധിച്ച ഇ എം എസ് തയ്യാറാക്കിയ ന്യൂനപക്ഷ റിപ്പോര്‍ട്ട്, ജന്മി- കുടിയാന്‍ ബന്ധത്തിലെ സാമ്പത്തിക ചൂഷണമാണ് ഗ്രാമീണ സമ്പദ് വ്യവസ്ഥയുടെ കാതലായ പ്രശ്നമെന്ന് തിരിച്ചറിഞ്ഞു. സമ്പദ് വ്യവസ്ഥയുടെ സ്വയംപരിഷ്കാരത്തിനും ആധുനികതയിലേക്കുള്ള വികാസത്തിനും ജന്മിത്വത്തിന്റെ നിലനില്‍പ്പ് തടസ്സമാണെന്നും നിരീക്ഷിച്ചു.

ഈ ബദല്‍ സാമ്പത്തിക കാഴ്ചപ്പാടിന്റെ ഉള്‍ക്കാഴ്ച മതവിശകലനത്തില്‍ പ്രയോഗിച്ചതിന്റെ ആദ്യ ഉദാഹരണമാണ് മലബാര്‍കലാപം. സെക്കുലര്‍ ഗവേഷണത്തിന്റെയും ശാസ്ത്രീയപഠനത്തിന്റെയും ദേശാഭിമാന വീക്ഷണത്തിന്റെയും വെളിച്ചത്തില്‍ അതിന്റെ പ്രാധാന്യം വിലയിരുത്തിയ ആദ്യശ്രമം ഇ എം എസിന്റേതായിരുന്നു. 1943ല്‍ പുറത്തുവന്ന അദ്ദേഹത്തിന്റെ "മലബാറിലെ കര്‍ഷകപ്രസ്ഥാനത്തിന്റെ ചരിത്രം" എന്ന ലഘുകൃതി അതിനാലാണ് ശ്രദ്ധേയമായത്. 1921ലെ കലാപം തുടങ്ങിയ ആഗസ്ത് മാസത്തിന്റെ ഓര്‍മ പുതുക്കി 1946 ആഗസ്തില്‍ കമ്യൂണിസ്റ്റ് പാര്‍ടി ആഹ്വാനവും താക്കീതും എന്ന പ്രസ്താവന പുറത്തിറക്കി. മതനിരപേക്ഷയുടെ അടിസ്ഥാനത്തില്‍ തുടങ്ങിയ കോണ്‍ഗ്രസ്- ഖിലാഫത്ത് പ്രസ്ഥാനം മലബാര്‍പ്രദേശത്ത് "മാപ്പിള ലഹള"യായി മാറിയതിനു തുല്യമായ സ്ഥിതിഗതികള്‍ 1946ല്‍ രാജ്യത്തിലാകെ വളരുകയാണെന്ന സൂചന നല്‍കുന്നതായി പ്രസ്താവന. സാമ്രാജ്യത്വത്തിനെതിരെ ജനങ്ങളുടെ ഏകീകൃത സമരം നയിക്കുന്നതിനുപകരം ഒരു സമുദായം മറ്റൊന്നിനെതിരായി പോരാടി ഇരുകൂട്ടരും സാമാജ്യത്വ ഭക്തന്മാരായിത്തീരുകയെന്ന ആപത്ത് മുന്നറിയിപ്പായി സൂചിപ്പിക്കുകയും ചെയ്തു.

പെണ്‍ മുന്നേറ്റങ്ങളുടെ ഇന്നലെകള്‍

സ്ത്രീകളുടെ അവകാശബോധം ജ്വലിപ്പിച്ചുണര്‍ത്തുന്നതില്‍ നിര്‍ണായകമായിരുന്നു 1945 ജൂണില്‍ തലശേരിയില്‍ ചേര്‍ന്ന ദേശീയ മഹിളാ സംഘം ഒന്നാം വാര്‍ഷിക സമ്മേളനം. സാധാരണ മനുഷ്യരുടെ പൊതുരംഗത്തേക്കുള്ള പ്രവേശനം കോണ്‍ഗ്രസ് പാര്‍ടി സംശയദൃഷ്ടിയോടെ കാണുന്ന കാലവുമായിരുന്നു അത്. ദരിദ്ര സ്ത്രീകള്‍ സംഘടനകളില്‍ കൂടുതല്‍ അണിചേരുന്നതിനെതിരെ കോണ്‍ഗ്രസുകാര്‍ മുന്‍കരുതലുകളെടുത്ത കഥയും അക്കാലത്തുണ്ടായി. പാപ്പിനിശേരിഭാഗത്ത് മഹിളാ സംഘടനയ്ക്ക് അംഗത്വഫീസ് ഏര്‍പ്പെടുത്തിയ ഗ്രേസി ആറോണിന്റെ തന്ത്രം അതിലൊന്ന്. ഈ തീരുമാനത്തെ പി യശോദയെപ്പോലുള്ള കമ്യൂണിസ്റ്റുകാര്‍ എതിര്‍ത്തതും പ്രധാനം. പുരാണപാരായണവും ശീലാവതിപോലുള്ള കൃതികളുടെ വായനയും മാത്രമായിരുന്നു അക്കാലത്ത് സ്ത്രീകളുടെ ലോകപരിചയം. ഈ സ്ഥിതിയിലേക്കാണ് സമൂഹവൈരുധ്യങ്ങള്‍ പാട്ടുകളായും ഗാനങ്ങളായും വന്നെത്തുന്നത്.

""അക്കൂട്ടരെങ്ങാനും നാട്ടി കണ്ടോ അക്കൂട്ടരെങ്ങാനും ഞാറ് തൊട്ട്വോ""

പോലുള്ള വരികള്‍ വ്യവസ്ഥയുടെ കരള്‍ പിളര്‍ക്കുന്നതായിരുന്നു.

ആലപ്പുഴയില്‍ ഈഴവ സാമൂഹ്യ പരിഷ്കരണത്തിന്റെ നിശ്വാസങ്ങളുമായി പുറത്തുവന്ന സംഘടനകളുടെ പരിമിതികളെ മറികടന്നത് ട്രേഡ് യൂണിയനുകളാണ്. തിരുവിതാംകൂര്‍ കയര്‍ ഫാക്ടറി വര്‍ക്കേഴ്സ് യൂണിയന്റെ മേല്‍നോട്ടത്തില്‍ തൊഴിലാളി സാംസ്കാരികകേന്ദ്രവും നിലവില്‍ വന്നു. ലൈബ്രറി, നിശാപാഠശാല, വായനമുറി തുടങ്ങിയവയും കേന്ദ്രത്തിന്റെ അനുബന്ധം. ആര്‍ സുഗതന്റെ നേതൃത്വത്തില്‍ രൂപംകൊണ്ട യുവജനസംഘം മറ്റൊരു ചുവടുവയ്പായി. മരണവീടുകളില്‍ അക്കാലത്ത് പുരാണപാരായണം ചടങ്ങുകളുടെ അനുബന്ധമായിരുന്നു. വീണപുവൂം പ്രരോദനവും പാരായണംചെയ്യുന്ന പതിവിലേക്ക് യുവജനസംഘം പ്രവര്‍ത്തകര്‍ അത് മാറ്റി. സ്ത്രീകള്‍ക്കും കുട്ടികള്‍ക്കും കയര്‍മേഖലയില്‍ പുരുഷന്മാരെ അപേക്ഷിച്ച് തുച്ഛമായ കൂലിയായിരുന്നു. ഈ പ്രതിസന്ധിയുടെ ഘട്ടത്തിലാണ് 1934ല്‍ കയര്‍ത്തൊഴിലാളി പണിമുടക്കിനെത്തുടര്‍ന്ന് പ്രത്യേക സ്ത്രീ സംഘടനയുണ്ടാകുന്നത്.

കളര്‍കോട് യോഗം ചേര്‍ന്ന് കെ ദേവയാനി സെക്രട്ടറിയും സൈമണ്‍ ആശാന്‍ പ്രസിഡന്റുമായി അമ്പലപ്പുഴ താലൂക്ക് കയര്‍പിരി തൊഴിലാളി യൂണിയന്‍ സ്ഥാപിതമായി. പണിക്കെത്തുന്ന സ്ത്രീകള്‍ക്ക് പ്രാഥമികാവശ്യങ്ങള്‍ നിറവേറ്റാന്‍പോലും സംവിധാനമുണ്ടായിരുന്നില്ല. മുട്ടുനിറയുന്ന വെള്ളത്തില്‍നിന്നായിരുന്നു കളപറിക്കലും മറ്റും. ഈ വെള്ളത്തില്‍ പ്രാഥമിക കൃത്യങ്ങള്‍ നിര്‍വഹിക്കാന്‍ അവര്‍ നിര്‍ബന്ധിതരായി. ദാഹിക്കുമ്പോള്‍ ആ കെടുവെള്ളത്തില്‍നിന്ന് കൈകള്‍കൂട്ടി പായലും അഴുക്കും വകഞ്ഞുമാറ്റി വെള്ളം കുടിച്ചു. ചെറിയ രാഷ്ട്രീയ മുദ്രാവാക്യങ്ങള്‍ക്കൊപ്പം പ്രസവകാലാനുകൂല്യങ്ങള്‍, കുട്ടികളുടെ വിദ്യാഭ്യാസം, ആരോഗ്യസഹായം തുടങ്ങിയ അവകാശങ്ങളും യൂണിയന്‍ ഉന്നയിച്ചു. പുന്നപ്രയിലും മറ്റും ആത്മവിദ്യാസംഘത്തിന്റെ നവീനാശയങ്ങള്‍ കൊടുങ്കാറ്റായി. വിഗ്രഹാരാധനയ്ക്കും അതിനെ മറച്ചുപിടിച്ചിരുന്ന വിശ്വാസങ്ങളുടെ കരിമ്പടങ്ങള്‍ക്കും തുളവീഴാന്‍ തുടങ്ങി. യാഥാസ്ഥിതിക ഹിന്ദുനേതൃത്വം എതിര്‍ പ്രചാരണങ്ങള്‍ തുറന്നുവിട്ടു. സ്ത്രീകളുടെ പൊതുജീവിത പ്രവേശനത്തിലൂടെ മാത്രമേ സമൂഹത്തെ മുന്നോട്ട് നയിക്കാനാവൂ എന്ന് ആത്മവിദ്യാസംഘം പഠിപ്പിച്ചു. പ്രാമാണിക സമൂഹത്തിനും യാഥാസ്ഥിതിക ഹിന്ദുമതത്തിനുമെതിരായ സാമൂഹ്യ പ്രതിഷേധത്തില്‍ നാരായണഗുരുവിന്റെ തത്വശാസ്ത്രം തീയരിലെയും ഈഴവരിലെയും മറ്റും പ്രമാണിവര്‍ഗം പുതിയൊരു ആയുധമായിട്ടാണ് കരുതിയത്. ഈഴവവരുടെയും തീയരുടെയും സംസ്കൃതവല്‍ക്കരണത്തിനുള്ള ഉപാധിയായാണ് എസ്എന്‍ഡിപി പ്രവര്‍ത്തിച്ചതും. ഇതിന് നേര്‍വിപരീതമായ ലോകവീക്ഷണമായിരുന്നു ആത്മവിദ്യാസംഘത്തിന്റേത്. അത് മുന്നോട്ടു കൊണ്ടുപോയത് കമ്യൂണിസ്റ്റ് പാര്‍ടിയും.

കുതിപ്പേകിയത് ആദ്യ കമ്യൂണിസ്റ്റ് സര്‍ക്കാര്‍

കേരളം മൂന്നാംലോകത്തിനും ഇന്ത്യക്കും വിസ്മയമാണ്. ജീവിത ഗുണമേന്മാ സൂചകങ്ങളുടെ അസൂയാവഹമായ പുരോഗതി സാമൂഹ്യ ശാസ്ത്രജ്ഞരുടെ ശ്രദ്ധാകേന്ദ്രമായി ഈ കൊച്ചു സംസ്ഥാനത്തെ മാറ്റുന്നു. ഉന്നത പുരോഗമന പാരമ്പര്യത്തിന്റെ ഉറവിടമായും കേരളം പരിഗണിക്കപ്പെട്ടു. ചരിത്രത്തിലേക്ക് വേരുള്ള ഈ മുന്നേറ്റങ്ങള്‍ക്ക് അടിത്തറ പാകിയത് സാമൂഹ്യ പ്രസ്ഥാനങ്ങളിലൂടെ ആര്‍ജിച്ച രാഷ്ട്രീയാവബോധമാണ്. അതോടൊപ്പം കമ്യൂണിസ്റ്റ് സര്‍ക്കാരുകള്‍ കൊണ്ടുവന്ന പുരോഗമനാത്മക നിയമനിര്‍മാണങ്ങളും. ഇരുപത്തെട്ട് മാസംമാത്രം നിലനിന്ന പ്രഥമ കമ്യൂണിസ്റ്റ് സര്‍ക്കാര്‍ അംഗീകരിച്ചതും പിന്നീട് സംസ്ഥാനത്തിന്റെ സര്‍വതോമുഖമായ പുരോഗതിക്കാകമാനം ഊര്‍ജവുമായി വര്‍ത്തിച്ചത് കാര്‍ഷിക ബന്ധബില്ലാണ്. അത് അവതരിപ്പിക്കും മുമ്പ് ഒഴിപ്പിക്കലും കുടിയിറക്കലും തടയുന്ന ഓര്‍ഡിനന്‍സ് പാസാക്കിയിരുന്നു. ചൂഷണത്തിന്റെ സാധ്യതകള്‍ നിലനിര്‍ത്തിക്കൊണ്ടുള്ള നാമമാത്ര പരിഷ്കാരമെന്ന കോണ്‍ഗ്രസ് രീതിയില്‍നിന്ന് വ്യത്യസ്ത സാഹചര്യത്തിലേക്ക് ഇത് നയിച്ചു. ഫലപ്രദമായ നിലയില്‍ പരിഷ്കാരത്തിന് തുടക്കമിടണമെന്ന് കണ്ടാണ് ഒഴിപ്പിക്കലും കുടിയിറക്കലും തടഞ്ഞുകൊണ്ടുള്ള ഓര്‍ഡിനന്‍സ് ആദ്യം പുറപ്പെടുവിച്ചത്. നിയമത്തിന്റെ പഴുതും ഭരണത്തിന്റെ ശക്തിയും കൊണ്ട് ഒഴിപ്പിക്കലിന് വേറൊരു തരത്തില്‍ സാധുത നല്‍കുന്നതായിരുന്നു കോണ്‍ഗ്രസ് വിഭാവനംചെയ്ത കാര്‍ഷിക പരിഷ്കരണം.

കേരളത്തിലെ പുതിയ ഓര്‍ഡിനന്‍സും കാര്‍ഷികബന്ധ ബില്ലും ഈയര്‍ഥത്തില്‍ വിവാദങ്ങള്‍ക്ക് തിരികൊളുത്തി. കേന്ദ്രവും സംസ്ഥാന പ്രതിപക്ഷവും അതിലെ വ്യവസ്ഥകള്‍ക്ക് ജന്മിത്വത്തിന്റെ ചായ്വ് നല്‍കുന്നതിന് ആകുന്നതെല്ലാം ചെയ്തു. കാര്‍ഷികബന്ധം പരിഷ്കരിക്കുന്നതും അതിന്റെ മുന്നോടിയെന്ന നിലയ്ക്ക് ഒഴിപ്പിക്കലും കുടിയിറക്കലും തടയുന്നതും സ്വാഗതാര്‍ഹമാണ്. പക്ഷേ ചെറുകിടക്കാരും ഇടത്തരക്കാരുമായ ഭൂവുടമകളുടെ ജീവിതം നശിപ്പിക്കരുത് എന്ന വാദത്തിന്റെ രൂപത്തില്‍ കോണ്‍ഗ്രസിന്റെ ജന്മിപക്ഷപാതം ആവര്‍ത്തിച്ച് തലപൊക്കി. നിയമസഭയില്‍ ബില്‍ ചര്‍ച്ചക്കെടുത്തപ്പോഴും 1969ല്‍ ഭൂനിയമം പാസാക്കിയതിനുശേഷവും ഇത് തുടര്‍ന്നു. ഇതിന്റെ അടിസ്ഥാനത്തിലുള്ള പ്രക്ഷോഭങ്ങളാണ് പിന്നീട് ജന്മിപീഡിത സംഘത്തിന്റെ രൂപീകരണത്തിലെത്തിയത്. കോണ്‍ഗ്രസ് സംസ്ഥാനങ്ങളിലെന്നപോലെ നിയമനിര്‍മാണ പ്രക്രിയ പൂര്‍ത്തിയായി വരുമ്പോഴേക്ക് അതിന്റെ ഫലം നുകരേണ്ടവര്‍ക്ക് അതിന് കഴിയാതാവുന്ന സ്ഥിതി കേരളത്തില്‍ ഒഴിവാക്കപ്പെട്ടു. പുതിയ നിയമവും അതിന്റെ പ്രേരകശക്തിയായ കമ്യൂണിസ്റ്റ് പാര്‍ടിയും കര്‍ഷക പ്രസ്ഥാനവും പുതിയ മാനങ്ങളിലേക്കുയര്‍ന്നു. കോണ്‍ഗ്രസ് സര്‍ക്കാരും കമ്യൂണിസ്റ്റ് സര്‍ക്കാരും തമ്മില്‍ മൗലികമായി വ്യത്യാസമുണ്ടെന്ന് ബോധ്യപ്പെടുത്താന്‍ കേരളത്തിലെ ഓര്‍ഡിനന്‍സും നിയമനിര്‍മാണവും സഹായകമായി.
പ്രഥമ കമ്യൂണിസ്റ്റ് സര്‍ക്കാരിന്റെ തൊപ്പിയില്‍ നേട്ടങ്ങളുടെ മറ്റൊരു തൂവലായത് വിദ്യാഭ്യാസ ബില്ലായിരുന്നു. സ്വകാര്യ താല്‍പ്പര്യങ്ങളുടെ കച്ചവടമനഃസ്ഥിതിക്ക് കടിഞ്ഞാണിട്ട നിയമം നമ്മുടെ സാമൂഹ്യ ചരിത്രത്തില്‍ നാഴികക്കല്ലായി. ബ്രിട്ടീഷ് നയങ്ങളുടെ തുടര്‍ച്ചയെന്നോണം വിദ്യാഭ്യാസം സാര്‍വത്രികമാക്കുന്നതിന്റെ ഉത്തരവാദിത്തം ഇല്ലെന്ന അര്‍ഥത്തിലാണ് കൊച്ചി- തിരുവിതാംകൂര്‍ നാട്ടുരാജ്യങ്ങളിലെ സര്‍ക്കാരുകള്‍ പെരുമാറിയത്. വിദ്യാഭ്യാസ കാര്യത്തില്‍ സര്‍ക്കാരിന് ബാധ്യതയില്ലെന്ന നിലപാടിനോട് പുരോഗമനകാരികള്‍ക്ക് യോജിക്കാനായില്ല. വിദ്യാഭ്യാസ സ്ഥാപനങ്ങള്‍ കൈയടക്കിവച്ച ജാതി- മത പ്രമാണിമാര്‍ വരേണ്യവും കച്ചവടാധിഷ്ഠിതവുമായ നയങ്ങളാണ് പിന്തുടര്‍ന്നത്. ഇതോടുള്ള പ്രതിഷേധങ്ങള്‍ പുതിയ രൂപഭാവങ്ങളാര്‍ജിച്ചു. 1930കള്‍ തൊട്ട് അധ്യാപക സംഘടന പ്രതികരിക്കാനും തുടങ്ങി സ്വകാര്യ മാനേജ്മെന്റിന്റെ കച്ചവടതാല്‍പ്പര്യങ്ങള്‍ക്കും ജാതി - മത പരിഗണനകള്‍ക്കും കടിഞ്ഞാണിട്ട വിദ്യാഭ്യാസ ബില്ല് പിന്തിരിപ്പന്മാരുടെ അണിയറയില്‍ ഉല്‍ക്കണ്ഠയുണ്ടാക്കി. മതത്തിനെതിരായ കടന്നാക്രമണമാണിതെന്നും ന്യൂനപക്ഷാവകാശ ധ്വംസനമാണെന്നും പ്രചാരണം നടന്നു. സംഘടിത മതനേതൃത്വത്തിന്റെ സഖ്യശക്തികളായ പത്രങ്ങള്‍ ഈ മുറവിളി ഏറ്റെടുക്കുകയും ചെയ്തു.

ഭരണഘടനയുടെ പരിധിക്കുള്ളില്‍ വിദ്യാഭ്യാസ രംഗത്തെ ജനാധിപത്യവല്‍ക്കരിക്കാനാണ് കമ്യൂണിസ്റ്റ് പാര്‍ടി അന്ന് ശ്രമിച്ചത്. അധ്യാപക നിയമനം, ശമ്പള വ്യവസ്ഥ, പിരിച്ചുവിടാനും ശിക്ഷാനടപടികള്‍ കൈക്കൊള്ളാനും മാനേജ്മെന്റിനുള്ള അവകാശം - മുതലായവയില്‍ പരിമിത നിയന്ത്രണം കൊണ്ടുവരിക മാത്രമായിരുന്നു കരട് ബില്‍. അത് നിയമസഭയില്‍ അവതരിപ്പിക്കുമ്പോള്‍ സ്വകാര്യ വിദ്യാഭ്യാസ കച്ചവടക്കാരും ജാതി - മത മേധാവികളും നടത്തിയ റാലി രണ്ടുവര്‍ഷത്തിനിടയ്ക്ക് തുടങ്ങാനിരുന്ന "വിമോചന സമര"ത്തിന്റെ കേളികൊട്ടും. ഈ സങ്കുചിത രാഷ്ട്രീയാഭാസത്തിന് എല്ലാ തരത്തിലും ഉത്തേജനമാവുകയായിരുന്നു കേന്ദ്ര കോണ്‍ഗ്രസ് നേതൃത്വവും ഒരു പരിധിവരെ പ്രധാനമന്ത്രി ജവഹര്‍ലാല്‍ നെഹ്റുവും. പഴയ "വിമോചന സമര"ത്തിന്റെ മാതൃകയിലാണ് ഇപ്പോഴും കേരളത്തിലെ വലതുപക്ഷ രാഷ്ട്രീയം കിതയ്ക്കുന്നതും.

*****

എ വി അനില്‍കുമാര്‍, കടപ്പാട് :ദേശാഭിമാനി

ജാതിപ്പിശാചിന്റെ അസ്ഥിപഞ്ജരം

മതനിരപേക്ഷമായ ഭരണഘടന നിലവിലിരിക്കുന്ന ഒരു രാജ്യത്തിലെ ഒരു ചെറിയ സംസ്ഥാനത്തിലെ നിയമസഭ, മതത്തിന്റെയും ഈശ്വരവിശ്വാസത്തിന്റെയും അടിസ്ഥാനത്തില്‍ നിയമനിര്‍മാണ പ്രക്രിയയില്‍ അംഗങ്ങള്‍ക്കുള്ള അധികാരം പരിമിതപ്പെടുത്തുന്നത് ഭരണഘടനാവിരുദ്ധമാണ്. മതത്തിലും ദൈവത്തിലുമുള്ള വിശ്വാസമാണ് നിയമനിര്‍മാണത്തിനുള്ള മാനദണ്ഡമെങ്കില്‍ ക്രിസ്ത്യാനിയായ മുഖ്യമന്ത്രി അധ്യക്ഷംവഹിച്ച മന്ത്രിസഭയ്ക്ക് ദേവസ്വം ഓര്‍ഡിനന്‍സിന് അംഗീകാരം നല്‍കാനും ഗവര്‍ണറോട് അംഗീകരിക്കണമെന്ന് ശുപാര്‍ശചെയ്യാനും എന്താണധികാരം? ആ മന്ത്രിസഭയിലെ ക്രിസ്ത്യാനിക്കും മുസ്ലിമിനും എന്താണധികാരം?

എച്ച് ആര്‍ ഭരദ്വാജിന്റെ സ്ഥാനത്ത് ഒരു മുസല്‍മാനായിരുന്നു ഗവര്‍ണറെങ്കില്‍ ഓര്‍ഡിനന്‍സില്‍ ഒപ്പുവയ്ക്കാന്‍ അദ്ദേഹത്തിന് എന്താണധികാരം? ഈ ചോദ്യം മതനിരപേക്ഷതയില്‍ വിശ്വസിക്കുന്ന ആരും ഉന്നയിക്കുകയില്ല. കാരണം ജനാധിപത്യ വ്യവസ്ഥയില്‍ നിയമനിര്‍മാണാധികാരത്തില്‍ മതവിശ്വാസവും ഈശ്വരവിശ്വാസവും പ്രതിബന്ധങ്ങളല്ലായെന്ന ഭരണഘടനാതത്വം അവര്‍ അംഗീകരിക്കുന്നു. വ്യത്യസ്ത രാഷ്ട്രീയ ഭരണഖണ്ഡങ്ങള്‍ക്ക് കീഴിലായിരുന്ന മലയാളികളെ ഏകീകരിച്ച് കേരള സംസ്ഥാനമായി തീര്‍ന്നതിന്റെ 56-ാം വാര്‍ഷികാഘോഷവേളയില്‍ മലയാളികളെ ക്രിസ്ത്യാനിയും മുസല്‍മാനും ഹിന്ദുവും നിരീശ്വരവാദിയുമായി ഛിന്നഭിന്നമാക്കുന്ന ഭരണമാണ് യുഡിഎഫിന്റേത്. ആദ്യം നിയമസഭയിലെ എംഎല്‍എമാര്‍ തമ്മില്‍ ചോദിക്കും- ഹിന്ദുവാണോയെന്ന്, പിന്നെ ചോദിക്കും ഈശ്വരവിശ്വാസിയാണോയെന്ന്. പിന്നീട് സര്‍ക്കാരുദ്യോഗസ്ഥര്‍ ഈ ചോദ്യം ആവര്‍ത്തിക്കും. പിന്നീട് മലയാളികളാകെയും. പിന്നീടിവിടെ കേരളീയരുണ്ടാവില്ല; ക്രിസ്ത്യാനിയും മുസല്‍മാനും ഹിന്ദുവും നായരും ഈഴവനും പുലയനും മറ്റും മാത്രമേ ഉണ്ടാകൂ; കേരളമുണ്ടാകില്ല, ഭ്രാന്താലയമേ ഉണ്ടാകൂ. നവോത്ഥാന നായകന്മാര്‍ കുഴിച്ചുമൂടിയ ജാതിപ്പിശാചിന്റെ അസ്ഥിപഞ്ജരം കുഴിമാടത്തില്‍നിന്ന് തോണ്ടിയെടുത്ത് ആഭിചാരക്രിയയിലൂടെ ജീവന്‍വയ്പിച്ച് കേരളീയന്റെ മാനവികതയുടെ ചോര കുടിക്കാന്‍ അയക്കുകയാണ് യുഡിഎഫ് ഭരണം.

തിരുവിതാംകൂറിലെ ക്ഷേത്രങ്ങളുടെ സ്വത്തും പണവും അപഹരിക്കപ്പെടുന്നുവെന്ന വ്യാപകമായ ആക്ഷേപം വന്നപ്പോള്‍, ദിവാനായിരുന്ന ജോണ്‍ മണ്‍റോ 348 ക്ഷേത്രങ്ങള്‍ സര്‍ക്കാരിലേക്ക് ഏറ്റെടുക്കുകയും അവയുടെ സ്വത്ത് കണ്ടുകെട്ടി രാഷ്ട്രത്തിന്റേതാക്കുകയുംചെയ്തു. ക്ഷേത്രങ്ങളുടെ നിത്യനിദാനച്ചെലവിന്റെയും ഭരണത്തിന്റെയും കാര്യങ്ങള്‍ നോക്കുന്നതിന് ദേവസ്വംവകുപ്പും രൂപീകരിച്ചു. ക്ഷേത്രങ്ങളുടെ ഭരണം സര്‍ക്കാരിന്റെ ചുമതലയായി. എന്നാല്‍, പൂജാദി കാര്യങ്ങളിലോ ആചാരാനുഷ്ഠാനങ്ങളിലോ സര്‍ക്കാര്‍ ഇടപെട്ടില്ല. മണ്‍റോ കൊച്ചിയില്‍ ദിവാനായിരുന്നപ്പോള്‍ അവിടെയും 117 ക്ഷേത്രങ്ങള്‍ സര്‍ക്കാര്‍ ഏറ്റെടുക്കുകയും സ്വത്ത് സര്‍ക്കാരിന്റേതാക്കുകയുംചെയ്തു. 1936ല്‍ ക്ഷേത്രപ്രവേശന വിളംബരത്തിലൂടെ തിരുവിതാംകൂറില്‍ അവര്‍ണര്‍ക്ക് ആരാധനാസ്വാതന്ത്ര്യം ലഭിച്ചത് മണ്‍റോ ഏറ്റെടുത്ത് സര്‍ക്കാരിന്റേതാക്കിയ ക്ഷേത്രങ്ങളില്‍മാത്രമാണ്. മറ്റു ക്ഷേത്രങ്ങളില്‍ അവര്‍ണര്‍ക്ക് പ്രവേശനാനുമതി ലഭിച്ചില്ല എന്ന കാര്യം ഓര്‍ക്കണം. സര്‍ക്കാര്‍ ഖജനാവില്‍നിന്ന് പണമെടുത്ത് ക്ഷേത്രത്തിന്റെ ചെലവ് നിര്‍വഹിച്ചപ്പോള്‍ ആ ഖജനാവിലേക്ക് നികുതിയിനത്തില്‍ പണം നിറച്ചിരുന്നത് അവര്‍ണനും അവിശ്വാസിയും അഹിന്ദുക്കളുമായ പ്രജകളും കൂടിയായിരുന്നു എന്ന കാര്യവും ഓര്‍ക്കുക. അതായത്, ക്ഷേത്രപ്രവേശനം നിഷിദ്ധമായിരുന്ന അവര്‍ണന്റെയും അഹിന്ദുവിന്റെയും അധ്വാനമിച്ചംകൂടിയെടുത്താണ് വിശ്വാസികളുടെ ക്ഷേത്രങ്ങളെ സര്‍ക്കാര്‍ സംരക്ഷിച്ചത് എന്ന്. സ്വാതന്ത്ര്യലബ്ധിക്കുശേഷം, 1949 ജൂലൈയില്‍ തിരുക്കൊച്ചി സംയുക്ത സംസ്ഥാനം നിലവില്‍വന്നു. രണ്ടു രാജാക്കന്മാരും തമ്മിലുണ്ടാക്കിയ കരാര്‍- കവനന്റ് അനുസരിച്ചാണ് ലയനം പൂര്‍ണമായത്. കരാറില്‍ സാക്ഷിയായി ഒപ്പിട്ടത് ഭാരതസര്‍ക്കാരിന്റെ നാട്ടുരാജ്യവകുപ്പിന്റെ സെക്രട്ടറിയായിരുന്ന വാപ്പാല പങ്കുണ്ണിമേനോന്‍. ഈ കവനന്റ് പ്രകാരമാണ് തിരുവിതാംകൂര്‍, കൊച്ചി ദേവസ്വം ബോര്‍ഡ് രൂപീകൃതമായത്. തൃപ്പൂണിത്തുറയിലെ പൂര്‍ണത്രയീശക്ഷേത്രവും തിരുവനന്തപുരത്തെ പത്മനാഭ സ്വാമിക്ഷേത്രവും പ്രത്യേക ഭരണസമിതിയുടെ കീഴിലാക്കിയതും ഇതേ കവനന്റ് പ്രകാരമാണ്. രണ്ടു ദേവസ്വം ബോര്‍ഡും 1950ല്‍ നിലവില്‍വന്നു. മലബാറിലെ ക്ഷേത്രങ്ങള്‍ സര്‍ക്കാര്‍ ഏറ്റെടുത്തിട്ടില്ലായിരുന്നതിനാല്‍ അവിടെ ദേവസ്വംബോര്‍ഡ് രൂപീകരിക്കേണ്ടതായി വന്നില്ല. ഭഗവാന്റെ സ്വത്ത് ഭരിക്കാനാണ് ദേവസ്വം ബോര്‍ഡ് എന്ന ഭരണ സമിതിയെ ചുമതലപ്പെടുത്തിയത്. അല്ലാതെ ബോര്‍ഡ് അംഗങ്ങള്‍ ശാന്തിക്കാരാവുന്നില്ല. സ്വത്ത് എന്ന ഭൗതികവസ്തുവിന്റെ ഭരണം ഭൗതികമായിട്ടേ നിര്‍വഹിക്കാനാവൂ. അതിനുള്ള അധികാരം ഭരണകൂടത്തിനാണ്. അവിടെ വിശ്വാസവും അവിശ്വാസവും പരിഗണനാ വിഷയങ്ങളാകാന്‍ പാടില്ല. നിയുക്ത ദേവസ്വം നിയമത്തിന്റെ രാഷ്ട്രീയ പശ്ചാത്തലമെന്താണ്? മുസ്ലിം ലീഗും കേരള കോണ്‍ഗ്രസും കൂടി കേരളഭരണത്തെ കൈപ്പിടിയിലൊതുക്കിയിരിക്കുന്നു എന്ന് കോണ്‍ഗ്രസ് നേതൃത്വത്തില്‍നിന്നുതന്നെ ആക്ഷേപമുയര്‍ന്നു. പ്രതിഷേധമെന്നോണം ഭൂരിപക്ഷ ജാതികളായ നായരും ഈഴവരും സംയോജിക്കണമെന്ന ആഹ്വാനമുയരുന്നു. ചിലര്‍, ക്രിസ്ത്യാനിക്കും മുസല്‍മാനുമെതിരെ ഹിന്ദുവിന്റെ ഐക്യം എന്ന സമവാക്യമുയര്‍ത്തുന്നു. ഹിന്ദുക്കള്‍ യുഡിഎഫില്‍നിന്ന് അകലുന്നുവെന്ന തോന്നലുണ്ടായപ്പോള്‍ തിരിച്ചുപിടിക്കാനുള്ള ചൂണ്ടയില്‍ കോര്‍ത്ത ഇരയാണ് ആ അര്‍ഥത്തില്‍ ദേവസ്വംനിയമം.

രാഷ്ട്രീയ സൃഗാലബുദ്ധിയാണ് ഉമ്മന്‍ചാണ്ടി പയറ്റുന്നത്. പ്രതിപക്ഷത്തുള്ളവര്‍ ഇതിനെ എതിര്‍ക്കുമെന്നതുകൊണ്ട് ഹിന്ദുക്കളെ അവര്‍ക്കെതിരായിത്തീര്‍ക്കുകയും ചെയ്യാം. എമര്‍ജിങ് കേരളയുടെ മറവില്‍ കേരളത്തിന്റെ വിഭവങ്ങളെ വിദേശ കോര്‍പറേറ്റുകള്‍ക്ക് വിറ്റ് കമീഷന്‍ വാങ്ങാനുള്ള നീക്കം ദേവസ്വം നിയമത്തിനെതിരെയുള്ള സമരത്തിന്റെ മറവില്‍ ശ്രദ്ധിക്കാതെ പോകുമെന്നും ഭരണനേതൃത്വം കണക്കുകൂട്ടുന്നുണ്ട്. വിശ്വാസ സംരക്ഷണത്തിനായി അരയും തലയും മുറുക്കി മുറവിളി കൂട്ടുമ്പോള്‍ വയലും തണ്ണീര്‍ത്തടങ്ങളും കാവുകളും കുളങ്ങളും ടൂറിസം വികസനത്തിന്റെ മറവില്‍ ഭൂമാഫിയകള്‍ അപഹരിക്കുന്നത് അറിയുകയേ ഇല്ല. മണ്ണും വെള്ളവും വായുവും പോയാലെന്ത്, വിശ്വാസം അതല്ലേ എല്ലാം. ഇവിടെ വിശ്വാസവും അവിശ്വാസവുമല്ല പ്രശ്നം; പട്ടിണിയും വിലക്കയറ്റവും തൊഴിലില്ലായ്മയുമാണ്. ഹിന്ദുവിനും അഹിന്ദുവിനും നാസ്തികനും പട്ടിണി ഒരുപോലെതന്നെയാണ്. പട്ടിണിക്കാരെ വിശ്വാസത്തിന്റെ പേരില്‍ ഭിന്നിപ്പിക്കാനാകില്ല.


*****

വി കാര്‍ത്തികേയന്‍നായര്‍, കടപ്പാട് :ദേശാഭിമാനി