കോട്ടാത്തല സുരേന്ദ്രന്‍, ശ്രീവല്ലഭമേനോന്‍, ചെല്ലപ്പന്‍ തുടങ്ങിയവരുമായുള്ള ബന്ധം ബാലകൃഷ്ണനെയും കമ്യൂണിസ്റ്റ് പാര്‍ടിയില്‍ എത്തിച്ചു. സ്റ്റുഡന്റ്സ് ഫെഡറേഷനിലൂടെ രാഷ്ട്രീയരംഗത്ത് സജീവമായി. 1949 മാര്‍ച്ച് 19ന് ആദ്യമായി അറസ്റ്റിലായി. വൈക്കത്ത് യോഗത്തില്‍ പ്രസംഗിക്കാനായി പോകുമ്പോള്‍ ബസില്‍നിന്നു പിടിച്ചിറക്കിയായിരുന്നു ആദ്യ അറസ്റ്റ്. മജിസ്ട്രേട്ടിന്റെ മുന്നില്‍ ഹാജരാക്കി റിമാന്‍ഡ് ചെയ്ത തെങ്ങമത്തെ കസബ സ്റ്റേഷനിലെ ലോക്കപ്പിലാക്കി. ഒരുവര്‍ഷവും അഞ്ചുമാസവും കഴിഞ്ഞാണ് ജയില്‍ മോചിതനായത്. ഇതോടെ യൂണിവേഴ്സിറ്റിയില്‍നിന്നു പുറത്താക്കി. എസ്എന്‍ കോളേജില്‍ പൊലീസ് ക്രൂരമായ ലാത്തിചാര്‍ജ് നടത്തിയതറിഞ്ഞ് ജയിലില്‍ തെങ്ങമം നിരാഹാരം കിടന്നു. ഒമ്പതാം ദിവസം ആശുപത്രിയിലാക്കിയെങ്കിലും അവിടെയും നിരാഹാരം തുടര്‍ന്നു. 18-ാമത്തെ ദിവസമാണ് നിരാഹാരം അവസാനിപ്പിച്ചത്. രാഷ്ട്രീയത്തില്‍ പ്രവര്‍ത്തിക്കില്ലെന്ന് എഴുതിക്കൊടുത്താല്‍ വിട്ടയയ്ക്കാമെന്നായിരുന്നു അന്നത്തെ ഐജി ചന്ദ്രശേഖരന്‍നായരുടെ വാഗ്ദാനം. അത് വേണ്ടെന്നായിരുന്നു തെങ്ങമത്തിന്റെ മറുപടി.
തെങ്ങമം: സമരതീക്ഷ്ണകാലത്തിന്റെ പ്രതീകം - പിണറായി
തിരു: സമരതീക്ഷ്ണമായ ഒരു കാലഘട്ടത്തിന്റെ ഉജ്വല പ്രതിനിധിയായ സിപിഐ നേതാവായിരുന്നു തെങ്ങമം ബാലകൃഷ്ണനെന്ന് സിപിഐ എം സംസ്ഥാനസെക്രട്ടറി പിണറായി വിജയന്‍ അനുശോചനസന്ദേശത്തില്‍ പറഞ്ഞു. കേരളത്തിലെ കമ്യൂണിസ്റ്റ്പാര്‍ടി നിരോധനം നേരിട്ട കാലഘട്ടത്തില്‍ വിദ്യാര്‍ഥിപ്രസ്ഥാനത്തിന്റെ നേതാവായി രാഷ്ട്രീയത്തിലെത്തിയ തെങ്ങമം, ക്രൂരമായ പൊലീസ് പീഡനങ്ങളെയടക്കം നേരിട്ടാണ് മുന്നോട്ടുപോയത്. മികച്ച പ്രഭാഷകനും എഴുത്തുകാരനും പത്രാധിപരും സാമൂഹ്യപ്രവര്‍ത്തകനും നിയമസഭാസാമാജികനുമായിരുന്നു. രാഷ്ട്രീയമായി തെങ്ങമവും താനും രണ്ടു തട്ടില്‍നിന്ന ഘട്ടത്തില്‍ തങ്ങള്‍ ഒരേ കാലയളവില്‍ നിയമസഭാംഗങ്ങളായിരുന്നു. അന്ന്, തന്റെ രാഷ്ട്രീയനിലപാടുകള്‍ക്കുവേണ്ടി മൂര്‍ച്ചയേറിയ വാദമുഖങ്ങള്‍ അവതരിപ്പിക്കുന്നതില്‍ അദ്ദേഹം സാമര്‍ഥ്യം കാട്ടി. അപ്പോഴും വ്യക്തിപരമായ സൗഹൃദം കാത്തുസൂക്ഷിക്കുന്നതില്‍ ശ്രദ്ധിച്ചു. അന്ധവിശ്വാസങ്ങള്‍ക്കും അനാചാരങ്ങള്‍ക്കുമെതിരെ കരളുറപ്പോടെയുള്ള സാംസ്കാരിക ഇടപെടലുകള്‍ നടത്തി. ഇടതുപക്ഷപ്രസ്ഥാനത്തിന്റെ മുന്നേറ്റത്തിനായി വാക്കും പേനയും സംഘടനാപ്രവര്‍ത്തനവും സമര്‍ഥമായി പ്രയോഗിച്ച നേതാവായിരുന്നു അദ്ദേഹം. തെങ്ങമത്തിന്റെ പെട്ടെന്നുള്ള വേര്‍പാടില്‍ അതിയായ ദുഃഖവും അനുശോചനവും പിണറായി അറിയിച്ചു.
വി എസ് അനുശോചിച്ചു
തിരു: കമ്യൂണിസ്റ്റ് പാര്‍ടി നേതാവും പ്രശസ്ത എഴുത്തുകാരനുമായ തെങ്ങമം ബാലകൃഷ്ണന്റെ നിര്യാണത്തില്‍ പ്രതിപക്ഷനേതാവ് വി എസ് അച്യുതാനന്ദന്‍ അനുശോചനം രേഖപ്പെടുത്തി. ജനയുഗം പത്രാധിപര്‍, മികച്ച വാഗ്മി, പിഎസ്സി അംഗം എന്നീ നിലകളിലും തെങ്ങമം നല്‍കിയ സംഭാവനകള്‍ ശ്രദ്ധേയമാണ്. പിഎസ്സിയുടെ പ്രവര്‍ത്തനം കൂടുതല്‍ ജനകീയവല്‍ക്കരിക്കുന്നതില്‍ നിര്‍ണായക പങ്ക് വഹിക്കാനും അദ്ദേഹത്തിന് കഴിഞ്ഞിട്ടുണ്ടെന്ന് വി എസ് അനുശോചന സന്ദേശത്തില്‍ പറഞ്ഞു.
Posts
No comments:
Post a Comment