ശരിയാണ്, ജീവിത സമരത്തെക്കാള്‍ വലിയ സമരമില്ല

ജനസമ്പര്‍ക്ക പരിപാടിയുടെ രണ്ടാംഘട്ടം സമാപിക്കുമ്പോള്‍ മുഖ്യമന്ത്രി ഉമ്മന്‍ചാണ്ടി തന്റെ രാഷ്ട്രീയ കൗശലത്തിന്റെ ഒരധ്യായം കൂടി പൂര്‍ത്തിയാക്കുകയായിരുന്നു. കണ്ണടച്ചു പാല്‍ കുടിക്കുമ്പോള്‍ പൂച്ച ചുറ്റുമുള്ളതൊന്നും കാണുകയില്ല. നക്കി നക്കി കുടിക്കുന്ന പാലിന്റെ രുചി മാത്രമേ പൂച്ച അപ്പോള്‍ അറിയുന്നുള്ളു. ആ സ്ഥിതിയിലെത്തിയിരിക്കുന്നു കേരളത്തിന്റെ മുഖ്യമന്ത്രി. അടിമുടി അഴിമതിയില്‍ മുങ്ങിക്കിടക്കുന്ന ഒരു ഭരണത്തിന്റെ തലവനാണ് താന്‍ എന്ന സത്യത്തിന്റെ നേര്‍ക്ക് അദ്ദേഹം കണ്ണിറുക്കി അടച്ചിരിക്കുകയാണ്. താന്‍ നയിക്കുന്ന ഗവണ്‍മെന്റിന് കൂട്ടുത്തരവാദിത്വം നഷ്ടപ്പെട്ടുവെന്ന വസ്തുത അദ്ദേഹത്തെ അലട്ടുന്നില്ല. ഭരണം നയിക്കുന്ന പാര്‍ട്ടികളുടെ 'കൂട്ടുകെട്ടി' ല്‍ കൂട്ടും കെട്ടും പൊട്ടിത്തകര്‍ന്നിട്ട് കാലമേറെയായി എന്ന വസ്തുതയ്ക്കു മുമ്പിലും അറിയാത്ത ഭാവത്തിലാണ് ഈ ഖദറിട്ട കൗശലക്കാരന്‍ നില്‍ക്കുന്നത്. താന്‍ നടത്തിയ ജനസമ്പര്‍ക്ക പരിപാടിയില്‍ ആയിരങ്ങള്‍ ഓടിക്കൂടിയതിനെക്കുറിച്ചാണ് പത്രങ്ങളില്‍ പ്രസിദ്ധീകരിക്കാനായി തയ്യാറാക്കിയ ലേഖനത്തില്‍ മുഖ്യമന്ത്രി വാചാലനാകുന്നത്. ആ നിസഹായരായ ജനതയാകെ മുഖ്യമന്ത്രിയുടെയും ഗവണ്‍മെന്റിന്റെയും മാസ്മരികമായ ജനകീയതയില്‍ മയങ്ങിപ്പോയവരാണെന്ന് അദ്ദേഹം സ്വയം വിശ്വസിപ്പിക്കാന്‍ ശ്രമിക്കുന്നു. തനിക്കുചുറ്റും തിടം വച്ചു വളരുന്ന യാഥാര്‍ഥ്യങ്ങളെ അംഗീകരിക്കാന്‍ വിസമ്മതിക്കുന്ന ഒരു ഭരണാധികാരിയുടെ മനോഗതം മനസിലാക്കണമെങ്കില്‍ മുഖ്യമന്ത്രിയുടെ 'പ്രകാശം ചൊരിഞ്ഞ ജനകീയ കൂട്ടായ്മ' എന്ന ലേഖനം വായിച്ചാല്‍ മതിയാകും.

ജനസമ്പര്‍ക്ക പരിപാടിക്കെത്തിയതുമൂലം സംസ്ഥാനത്തിന്റെ വിവിധ ഭാഗങ്ങളിലുള്ള ആറു പേര്‍ക്കു കൈവന്ന ഭാഗ്യത്തെക്കുറിച്ച് മുഖ്യമന്ത്രി ലേഖനത്തില്‍ വിവരിച്ചു. ആ ഭാഗ്യം കൈവരുന്നതിനായി അവര്‍ ആറുപേര്‍ക്കും അനുഷ്ഠിക്കേണ്ടിവന്ന കഷ്ടപ്പാടുകളെക്കുറിച്ചും മുഖ്യമന്ത്രി പറയുന്നുണ്ട്. അവര്‍ ആറുപേരും ആനുകൂല്യങ്ങള്‍ക്ക് അര്‍ഹര്‍ തന്നെയാണ്. അവരെപ്പോലെ തന്നെ ഭാഗ്യത്തിന്റെ കടാക്ഷത്തിന് അര്‍ഹരായ എത്രയോ പേര്‍ക്ക് മുഖ്യമന്ത്രിയെ മുഖം കാണിക്കാനാകാതെ തിരിച്ചുപോകേണ്ടിവന്നു! മുഖ്യമന്ത്രി സ്വയം ചോദിക്കേണ്ട ഒരു ചോദ്യം ചോദിക്കാതിരിക്കുന്നേടത്തു നിന്നാണ് ജനസമ്പര്‍ക്ക പരിപാടിയുടെ നൈതികത ചോദ്യം ചെയ്യപ്പെടുന്നത്: തികച്ചും അര്‍ഹമായ സഹായങ്ങള്‍ സര്‍ക്കാരില്‍ നിന്നു ലഭ്യമാകണമെങ്കില്‍ അവര്‍ പുലര്‍ച്ച മുതല്‍ പാതിരാവരെ കാത്തുകെട്ടി കിടന്ന് മുഖ്യമന്ത്രിയെ മുഖം കാണിച്ചാല്‍ മാത്രമേ നടക്കുകയുള്ളോ? പത്തുമുപ്പതാളുകള്‍ അവരെ ചുമന്നു കൊണ്ടുവരുന്ന സ്ഥിതി പത്രങ്ങള്‍ക്കു നല്ല ഫോട്ടോ വിഷയവും മുഖ്യമന്ത്രിക്കു നല്ല ലേഖനവിഷയവുമായിരിക്കാം. അതുപക്ഷേ എങ്ങനെയാണ് കരുതലുള്ള ഭരണത്തിന്റെ കാര്യക്ഷമതയ്ക്കു തെളിവാകുന്നത്? ഏറ്റവും ന്യായമാണെന്നു മുഖ്യമന്ത്രി ആവര്‍ത്തിച്ചു പറയുന്ന ഇത്തരം ജനകീയ വിഷയങ്ങളില്‍ ഏക പരിഹാരം മുഖ്യമന്ത്രിയെ കാണിക്കുക മാത്രമാണെന്ന സിദ്ധാന്തമാണോ ഉമ്മന്‍ചാണ്ടി മുന്നോട്ടു വയ്ക്കുന്നത്?

വില്ലേജ് ഓഫീസുകള്‍ വരെയുള്ള സര്‍ക്കാര്‍ സംവിധാനങ്ങള്‍ മുഖേന പാവങ്ങള്‍ക്ക് ലഭിക്കേണ്ട ആനുകൂല്യങ്ങള്‍ ലഭിക്കാന്‍ ആണ്ടിലൊരിക്കല്‍ നടക്കുന്ന ജനസമ്പര്‍ക്ക പരിപാടിക്കായി കാത്തിരിക്കണമെന്ന സന്ദേശമാണ് ഉമ്മന്‍ചാണ്ടി കൈമാറുന്നത്. രാജവാഴ്ചക്കാലത്തെ അനുസ്മരിപ്പിക്കുന്ന ഈ ഭരണശൈലി വ്യവസ്ഥാപിതമായ ഭരണസംവിധാനത്തെ മുഴുവന്‍ അവഹേളിക്കുകയും അപ്രസക്തമാക്കുകയുമാണ് ചെയ്യുന്നത്. ജനങ്ങള്‍ക്ക് പ്രകാശം എത്തിക്കേണ്ട ഭരണവ്യവസ്ഥയെ ഉറക്കിക്കിടത്തുന്ന മുഖ്യമന്ത്രി ആണ്ടിലൊരിക്കല്‍ 'ജനകീയ കൂട്ടായ്മയില്‍ അവതരിച്ച് പ്രകാശം ചൊരിയു' മെന്നാണ് അദ്ദേഹത്തിന്റെ ലേഖനം സൂചിപ്പിക്കുന്നത്. പതിനായിരക്കണക്കിന് അംഗബലമുള്ള സര്‍ക്കാര്‍ ഭരണയന്ത്രം ഇത്രയേറെ ജനവിരുദ്ധമായതിനു പിറകില്‍ ഉമ്മന്‍ചാണ്ടിമാരുടെ ഇത്തരം സമീപനങ്ങളും പങ്കുവഹിച്ചിട്ടുണ്ടെന്നുറപ്പാണ്.

കുറേ പേര്‍ക്ക് സാമ്പത്തികാനുകൂല്യം കുറേപ്പേര്‍ക്ക് ചികിത്സാ സഹായം, കുറേപേര്‍ക്ക് മുച്ചക്രവാഹനം, കുറേപേര്‍ക്ക് ബി പി എല്‍ കാര്‍ഡ് - ജനസമ്പര്‍ക്ക പരിപാടിയില്‍ ഇതാണ് പൊതുവില്‍ സംഭവിച്ചത്! സര്‍ക്കാരിന്റെ ഭരണയന്ത്രം സുതാര്യമായി നേരാംവണ്ണം പ്രവര്‍ത്തിച്ചിരുന്നെങ്കില്‍ ജില്ലാ കേന്ദ്രങ്ങളിലെ മാമാങ്കങ്ങളിലേയ്ക്കു മുപ്പതുപേര്‍ ചേര്‍ന്ന് ചുമന്ന് എത്തിക്കാതെ പാവങ്ങള്‍ക്ക് ഇത് ലഭിക്കുമായിരുന്നു. അതു നടക്കാത്തത് പാവങ്ങളുടെ കുറ്റം കൊണ്ടല്ല, ഭരണം നടത്തുന്നവരുടെ അക്ഷന്തവ്യമായ കുറ്റം കൊണ്ടാണ്.

ഇത്തരം ദുരിതങ്ങളുടെ കയത്തിലാണ് നാട്ടിലെ ഗണ്യമായ ഒരു ഭാഗം പാവങ്ങള്‍ ജീവിക്കുന്നതെന്നു മുഖ്യമന്ത്രിക്ക് ഇപ്പോഴാണത്രെ മനസിലായത്! അഞ്ചു ദശാബ്ദത്തിലേറെ നീണ്ട പൊതുപ്രവര്‍ത്തന പാരമ്പര്യമുള്ള മുഖ്യമന്ത്രി ഇങ്ങനെ പറയുമ്പോള്‍ അത്ഭുതം തോന്നാതിരിക്കുന്നതെങ്ങനെ? ഖജനാവില്‍ നിന്ന് എത്ര കോടികള്‍ വാരിയെറിഞ്ഞപ്പോഴാണ് മുഖ്യമന്ത്രിക്ക് ഈ 'ബോധോദയം' ഉണ്ടായത്? അതിന്റെ 'സുതാര്യമായ' കണക്കുകള്‍ എന്നാണ് ജനങ്ങളെ അറിയിക്കുന്നത്?

കണ്ണൂര്‍ നഗരത്തിലെ ഗതാഗതം ദുഷ്‌ക്കരമായിട്ട് മാസങ്ങളായത്രെ! അതുനന്നാക്കാന്‍ അഞ്ച് കോടി അനുവദിക്കാന്‍ ജനസമ്പര്‍ക്കത്തിന്റെ പിറ്റേന്നുകൂടിയ മന്ത്രിസഭാ യോഗംവരെ കാത്തിരിക്കേണ്ടിവന്നുവെന്നും മുഖ്യമന്ത്രി വ്യക്തമാക്കുന്നു. ഒരു ജില്ലാ ആസ്ഥാനത്തെ റോഡുകള്‍ താറുമാറായിക്കിടന്നപ്പോള്‍ അവിടത്തെ എം എല്‍ എ യും എം പി യും മുനിസിപ്പാലിറ്റിയും എന്തുചെയ്യുകയായിരുന്നു? ജനസമ്പര്‍ക്ക വേദിയില്‍ ഒരു നിവേദനം കൊടുത്തപ്പോള്‍ കാര്യം ശരിയായിയെങ്കില്‍ ആ നിവേദനം പോലും കൊടുക്കാത്ത എം പിയേയും എം എല്‍ എ യേയും ജനപ്രതിനിധികളായി കാണാനാകുന്നതെങ്ങനെ? അവരുടെ പാര്‍ട്ടിയും ഗ്രൂപ്പും ഏതുമാകട്ടെ. അവര്‍ക്കെതിരായ കുറ്റപത്രമായി മാറുകയാണ് മുഖ്യമന്ത്രിയുടെ ലേഖനം.

മുഖ്യമന്ത്രി ഉമ്മന്‍ചാണ്ടി നിയമസഭാ രേഖകള്‍ പരിശോധിച്ചുനോക്കട്ടെ. ആണ്‍മക്കളുള്ള മാതാപിതാക്കള്‍ക്കും വാര്‍ധക്യകാല/വിധവാ പെന്‍ഷന്‍ ബാധകമാക്കണമെന്നും വികലാംഗ പെന്‍ഷന്‍ വരുമാനപരിധി വര്‍ധിപ്പിക്കണമെന്നും ക്ഷേമപെന്‍ഷനുകള്‍ ശുപാര്‍ശ ചെയ്യാന്‍ ഗ്രാമസഭകളെ അധികാരപ്പെടുത്തണമെന്നും അര്‍ഹതപ്പെട്ടവര്‍ക്കെല്ലാം പട്ടയം നല്‍കണമെന്നും സഭാവേദിയിലും വിവിധ കമ്മിറ്റികളിലും എത്രയോ തവണ ആവശ്യമുയര്‍ന്നതാണ്. എന്നിട്ടും ജനസമ്പര്‍ക്ക പരിപാടിയിലാണ് ഇത്തരം കാര്യങ്ങള്‍ ആദ്യമായി കേള്‍ക്കുന്നതെന്ന രീതിയില്‍ ഉമ്മന്‍ചാണ്ടി എഴുതുമ്പോള്‍ 'അഹോ, ഭയങ്കരം' എന്ന് ഭരണപക്ഷ-പ്രതിപക്ഷ എം എല്‍ എമാര്‍ ഒന്നിച്ചുപറഞ്ഞേക്കും. സര്‍ക്കാരും ജനങ്ങളും തമ്മിലുള്ള അകലം കുറയുമ്പോള്‍ മാത്രമാണ് ജനങ്ങള്‍ ഭരണകൂടത്തെ വിശ്വസിക്കുന്നതെന്ന് ഉമ്മന്‍ചാണ്ടി പറയുന്നു. അദ്ദേഹം വ്യക്തമാക്കേണ്ടത് ജനസമ്പര്‍ക്കത്തിന്റെ ആ ഒറ്റ ദിവസം മാത്രം ഈ ദൂരം കുറഞ്ഞാല്‍ മതിയോ എന്നാണ്.

തന്റെ ലേഖനത്തില്‍ ഉമ്മന്‍ചാണ്ടി എഴുതി: ''ജനസമ്പര്‍ക്ക പരിപാടികൊണ്ട് ഒരുപാട് പേര്‍ക്ക് കിട്ടിയതിനെക്കാള്‍ കൂടുതല്‍ പ്രയോജനം എനിക്കാണു കിട്ടിയത്. നമ്മുടെ നാടിന്റെ അടിത്തട്ടിലുള്ളവരെ എനിക്കു വീണ്ടും മുഖാമുഖം കാണാന്‍ സാധിച്ചു. ഇങ്ങനെയൊരു പരിപാടി ഇല്ലായിരുന്നെങ്കില്‍ എനിക്കവരെയോ അവര്‍ക്ക് എന്നെയോ കാണാന്‍ സാധിക്കുമായിരുന്നില്ല...'' അങ്ങനെ ഒരാവശ്യത്തിനുവേണ്ടി ഇത്രയേറെ പണം വാരിയെറിഞ്ഞത് എന്തിനാണെന്നു ഇടതുപക്ഷം മുഖ്യമന്ത്രിയോട് ചോദിക്കുന്നു. അതു ജനങ്ങളുടെയാകെ ചോദ്യമാണ്. അഴിമതി ഇല്ലാത്ത ജീവിതം കൊതിക്കുന്ന മനുഷ്യരുടെ ജീവിതസമരത്തിന്റെ ഭാഗമാണ് ആ ചോദ്യം.

*
ജനയുഗം മുഖപ്രസംഗം

പശ്ചിമബംഗാള്‍ ഇന്ത്യയിലല്ലേ?

പശ്ചിമബംഗാള്‍ ഇന്ന് രാജ്യത്തിനുമുന്നില്‍ ഒരു ചോദ്യചിഹ്നമാണ്. ജനാധിപത്യത്തില്‍ തരിമ്പും വിശ്വാസമില്ലാത്ത ഒരു സംഘത്തിന്റെ കൈപ്പിടിയില്‍ സംസ്ഥാനത്തിന്റെ ഭരണം എത്തിയതോടെ ബംഗാളിന്റെ അധഃപതനം തുടങ്ങിയതാണ്. കേന്ദ്രസര്‍ക്കാരിനു കീഴില്‍, അവരുടെ നയങ്ങള്‍ സൃഷ്ടിക്കുന്ന കെടുതികള്‍ നേരിട്ടുകൊണ്ടാണെങ്കിലും ജനക്ഷേമപരമായ ഭരണം നടത്തിവന്ന ഇടതുമുന്നണിയെ കുപ്രചാരണങ്ങളുടെ പ്രളയത്തിലൂടെ അട്ടിമറിച്ചാണ് മമത ബാനര്‍ജിയും സംഘവും ബംഗാളില്‍ അധികാരം പിടിച്ചത്. മുഖ്യധാരാ മാധ്യമങ്ങളും അവരുടെ കൂട്ടുകക്ഷിയായ കോണ്‍ഗ്രസും ഈ അട്ടിമറിക്ക് തൃണമൂലിന് ഒത്താശചെയ്തു. മാവോയിസ്റ്റുകളുമായി ഗൂഢാലോചന നടത്തി സംസ്ഥാനത്ത് രക്തപ്പുഴ ഒഴുക്കി. ഒടുവില്‍ അധികാരം ലഭിച്ചതോടെ രാഷ്ട്രീയ എതിരാളികളെ കായികമായി നേരിടുകയെന്ന ശൈലിയാണ് തൃണമൂല്‍ കോണ്‍ഗ്രസ് സ്വീകരിച്ചുവരുന്നത്. സംസ്ഥാനത്ത് ജനാധിപത്യപരമായ രാഷ്ട്രീയപ്രവര്‍ത്തനം നടത്താന്‍ ഇതരകക്ഷികളെയും അനുവദിക്കില്ലെന്ന അഹന്തയാണ് തൃണമൂല്‍ കോണ്‍ഗ്രസ് കാട്ടുന്നത്.

സ്വതന്ത്രമായും നിര്‍ഭയമായും വോട്ടുചെയ്യാനുള്ള അവസരം കിട്ടുമ്പോഴാണ് ജനാധിപത്യം അര്‍ഥപൂര്‍ണമാകുന്നത്. എന്നാല്‍, ഈ അര്‍ഥത്തില്‍ നോക്കുമ്പോള്‍ ഇന്ന് ബംഗാളില്‍ ജനാധിപത്യം പുസ്തകത്താളുകളില്‍മാത്രമാണെന്ന് ബോധ്യപ്പെടും. പഞ്ചായത്തുകളിലും മുനിസിപ്പാലിറ്റികളിലും നടന്ന തെരഞ്ഞെടുപ്പുകളില്‍ ജനാധിപത്യപരമായ എല്ലാ സംവിധാനങ്ങളും ചട്ടങ്ങളും അട്ടിമറിക്കപ്പെട്ടു. സംസ്ഥാന തെരഞ്ഞെടുപ്പ് കമീഷന്‍ ഉദ്യോഗസ്ഥര്‍, തെരഞ്ഞെടുപ്പ് നിരീക്ഷകര്‍, പോളിങ് ഉദ്യോഗസ്ഥര്‍ എന്നിവരെല്ലാം ആക്രമണത്തിനിരയായി. തെരഞ്ഞെടുപ്പ് നിഷ്പക്ഷമായി നടത്താനുള്ള സുരക്ഷാസംവിധാനം ഏര്‍പ്പെടുത്തണമെന്ന് ആവശ്യപ്പെട്ട് സംസ്ഥാന തെരഞ്ഞെടുപ്പ് കമീഷനുതന്നെ ഹൈക്കോടതിയെയും സുപ്രീംകോടതിയെയും സമീപിക്കേണ്ടിവന്നു. രാജ്യത്തെ പരമോന്നതകോടതി ഇക്കാര്യത്തില്‍ പുറപ്പെടുവിച്ച ഉത്തരവ് പോലും സംസ്ഥാനസര്‍ക്കാര്‍ നടപ്പാക്കിയില്ല.

തദ്ദേശതെരഞ്ഞെടുപ്പുകാലത്ത് തൃണമൂല്‍ കോണ്‍ഗ്രസുകാര്‍ പൊലീസിന്റെ സഹായത്തോടെ സിപിഐ എമ്മിന്റെയും ഇടതുമുന്നണിയുടെയും പ്രവര്‍ത്തകരെ വ്യാപകമായി ആക്രമിച്ചു. നാമനിര്‍ദേശപത്രിക സമര്‍പ്പണം ഭീഷണിയും അക്രമവും വഴി തടസ്സപ്പെടുത്തുക, പത്രിക നല്‍കിക്കഴിഞ്ഞ സ്ഥാനാര്‍ഥികളുടെ കുടുംബാംഗങ്ങളെ തട്ടിക്കൊണ്ടുപോവുക എന്നിവയെല്ലാം അരങ്ങേറി. തെരഞ്ഞെടുപ്പ് കമീഷന്റെ വിലക്ക് മാനിക്കാതെ അക്രമിസംഘങ്ങള്‍ ബൈക്കുകളില്‍ സായുധരായി സഞ്ചരിച്ച് സംസ്ഥാനത്തുടനീളം ആക്രമണം നടത്തി. വോട്ടെടുപ്പ് നാളില്‍ ബൂത്തുകള്‍ പിടിച്ചെടുത്ത് കള്ളവോട്ടുകള്‍ചെയ്തു. ഇതുകാരണം പല വാര്‍ഡുകളിലെയും സ്ഥാനാര്‍ഥികള്‍ക്ക് ലഭിച്ച വോട്ടിന്റെ എണ്ണം ഔദ്യോഗികമായി പ്രഖ്യാപിക്കാന്‍ തെരഞ്ഞെടുപ്പ് കമീഷന് ഇതുവരെ സാധിച്ചിട്ടില്ല. വോട്ടെണ്ണല്‍ പൂര്‍ത്തിയായശേഷം ഭരണകക്ഷിക്കാരെ വിജയികളായി പ്രഖ്യാപിക്കാന്‍ ചിലയിടങ്ങളില്‍ വീണ്ടും വോട്ടെടുപ്പ് വേണ്ടിവന്നു!

ഇതെല്ലാം അതിജീവിച്ച് വിജയിച്ച ഇടതുമുന്നണി പ്രവര്‍ത്തകരെയും വെറുതെ വിടുന്നില്ല. തദ്ദേശസ്ഥാപനങ്ങളുടെ ഭാരവാഹികളായ മൂന്നുപേരുള്‍പ്പെടെ അഞ്ച് ജനപ്രതിനിധികളെ തൃണമൂലുകാര്‍ നിഷ്ഠുരമായി വധിച്ചു. ഹൂഗ്ലി, പൂര്‍വ മേദിനിപ്പുര്‍, ഉത്തര 24 പര്‍ഗാനാസ് ജില്ലകളില്‍ പഞ്ചായത്ത് ഭരണം പിടിച്ചെടുക്കാന്‍ ഇടതുമുന്നണിയില്‍പ്പെട്ട ജനപ്രതിനിധികളെ ഭീഷണിപ്പെടുത്തി രാജിവയ്പിക്കാനോ കൂറുമാറ്റാനോ ശ്രമിക്കുന്നു. കോണ്‍ഗ്രസ് ഭരിക്കുന്ന തദ്ദേശസ്ഥാപനങ്ങളിലും തൃണമൂല്‍ ഹീനമായ ഇതേ തന്ത്രം പ്രയോഗിക്കുന്നു. കഴിഞ്ഞ എട്ടിന് ഇടതുമുന്നണിയുടെ മുതിര്‍ന്ന നേതാവും മുന്‍മന്ത്രിയുമായ നരേന്‍ ഡേ(78)യെ തൃണമൂല്‍സംഘം ക്രൂരമായി ആക്രമിച്ച് പരിക്കേല്‍പ്പിച്ചു. അദ്ദേഹത്തിന് യഥാസമയം ചികിത്സ ലഭ്യമാക്കുന്നതിനുപോലും അക്രമികള്‍ തടസ്സം സൃഷ്ടിച്ചു.

2011 മെയ് മാസത്തില്‍ തൃണമൂല്‍ സര്‍ക്കാര്‍ അധികാരത്തില്‍വന്നശേഷം കഴിഞ്ഞ നവംബര്‍വരെ രണ്ട് മുന്‍ എംഎല്‍എമാര്‍ ഉള്‍പ്പെടെ 142 സിപിഐ എം നേതാക്കളെയും പ്രവര്‍ത്തകരെയുമാണ് തൃണമൂലുകാര്‍ വധിച്ചത്. ഗുരുതരമായി പരിക്കേറ്റവരുടെ എണ്ണം 7433. ബലാത്സംഗത്തിനും സമാനമായ ആക്രമണങ്ങള്‍ക്കും വിധേയരായവര്‍ 1865. കിടപ്പാടം നഷ്ടപ്പെട്ടവരുടെ എണ്ണം 46,937. ഇടതുമുന്നണി പ്രവര്‍ത്തകരുടെ 5547 വീടും 2170 പാര്‍ടി-ട്രേഡ് യൂണിയന്‍ ഓഫീസുകളും കൊള്ളയടിക്കുകയും തീയിടുകയുംചെയ്തു. 54,938 പ്രവര്‍ത്തകരെയാണ് കള്ളക്കേസുകളില്‍ കുടുക്കിയത്. ഇടതുമുന്നണി സര്‍ക്കാര്‍ നടപ്പാക്കിയ ഭൂപരിഷ്കരണം അട്ടിമറിച്ച് മുന്‍ ജന്മിമാര്‍ക്ക് ഭൂമി തിരിച്ചുനല്‍കുന്നു.

ഇടതുമുന്നണിക്കുനേരെ മാത്രമല്ല അക്രമം. ഒരു കോണ്‍ഗ്രസ് എംഎല്‍എയെ പരസ്യമായി ആക്രമിച്ചു. തൃണമൂല്‍ കോണ്‍ഗ്രസ് നേതാവ് കൊല്ലപ്പെട്ട സംഭവത്തില്‍ തൃണമൂല്‍ എംഎല്‍എയ്ക്കെതിരെ ഹൈക്കോടതി സിബിഐ അന്വേഷണത്തിന് ഉത്തരവിട്ടിരിക്കയാണ്. മാധ്യമപ്രവര്‍ത്തകരെയും തൃണമൂലുകാര്‍ വെറുതെവിടുന്നില്ല. ഇത്തരത്തില്‍ ഭരണകക്ഷിതന്നെ ബംഗാളില്‍ ഭീകരത സൃഷ്ടിച്ചിരിക്കുന്നു. സംസ്ഥാനത്ത് പല നിയമസഭാ മണ്ഡലങ്ങളിലും പൂര്‍ണമായ ഭീകരാന്തരീക്ഷമാണ്.

ഇതിനുപുറമെ ബംഗാളിലെ മുഖ്യതെരഞ്ഞെടുപ്പ് ഓഫീസറുടെ ഓഫീസ് സംസ്ഥാന സര്‍ക്കാരിന്റെ നിര്‍ദേശപ്രകാരം പക്ഷപാതപരമായാണ് പ്രവര്‍ത്തിക്കുന്നത്. ഈ സാഹചര്യത്തിലാണ് ബംഗാളില്‍ നീതിപൂര്‍വമായ തെരഞ്ഞെടുപ്പ് നടത്താനുളള സാഹചര്യം ഒരുക്കണമെന്ന് ആവശ്യപ്പെട്ട് ഇടതുമുന്നണി തെരഞ്ഞെടുപ്പ് കമീഷനെ സമീപിച്ചിരിക്കുന്നത്. കൂടുതല്‍ ശക്തമായ ജനാധിപത്യത്തിന് കൂടുതല്‍ വിപുലമായ പങ്കാളിത്തം എന്ന മുദ്രാവാക്യം തെരഞ്ഞെടുപ്പ് കമീഷന്‍ പ്രചരിപ്പിച്ചുവരികയാണ്. ബംഗാളില്‍ ഈ മുദ്രാവാക്യം വിജയിക്കണമെങ്കില്‍ കമീഷന്റെ ശക്തവും സത്വരവുമായ ഇടപെടല്‍ ആവശ്യമാണ്.

*
Deshabhimani Editorial

കാടിന്റെ മക്കളുടെ അരക്ഷിത ജീവിതം

കേരളത്തിലെ ആദിവാസികള്‍ സമസ്ത മേഖലയിലും പിന്നോട്ടടി നേരിടുന്നു. ആദിവാസികളുടെ ജീവിതപുരോഗതിക്ക് അത്യന്താപേക്ഷിതം വിദ്യാഭ്യാസമാണ്. മുന്‍ യുഡിഎഫ് സര്‍ക്കാര്‍ വിദ്യാഭ്യാസ ആനുകൂല്യങ്ങള്‍ മൂന്ന് കോടിയിലധികം കുടിശ്ശിക വരുത്തി. കുടിശ്ശികയായ ആനുകൂല്യങ്ങള്‍ എല്‍ഡിഎഫ് അധികാരത്തിലെത്തിയപ്പോള്‍ സമയബന്ധിതമായി കൊടുത്തുതീര്‍ത്തു. വിദ്യാഭ്യാസ ആനുകൂല്യങ്ങള്‍ 50 ശതമാനം വര്‍ധന വരുത്തി യഥാസമയം നല്‍കുന്നതിനും നടപടി സ്വീകരിച്ചു. ഇപ്പോള്‍ പ്രീമെട്രിക് തലത്തിലും പോസ്റ്റ് മെട്രിക് തലത്തിലും വിദ്യാര്‍ഥികള്‍ക്ക് അധ്യയനവര്‍ഷം അവസാനിക്കുന്ന ഘട്ടത്തിലും ആനുകൂല്യങ്ങള്‍ ലഭിച്ചിട്ടില്ല.

2008 ലാണ് ഹോസ്റ്റലില്‍ താമസിക്കുന്ന ആദിവാസിവിദ്യാര്‍ഥികളുടെ മെസ്സ് അലവന്‍സും മറ്റും അവസാനമായി വര്‍ധിപ്പിച്ചത്. അതിനുശേഷം ഒരു വര്‍ധനയും ഉണ്ടായിട്ടില്ല. ഹോസ്റ്റലുകളാകട്ടെ ഇന്ന് അഴിമതികേന്ദ്രങ്ങളായി മാറുകയുംചെയ്തു. തൊഴില്‍ മേഖലയിലും ആദിവാസികള്‍ പിന്തള്ളപ്പെട്ടു. കേന്ദ്രസംസ്ഥാന സര്‍ക്കാരുകള്‍ നടപ്പാക്കുന്ന നിയമന നിരോധനത്തിന്റെയും സ്വകാര്യവല്‍ക്കരണത്തിന്റെയും തിക്തഫലങ്ങള്‍ അനുഭവിക്കുന്നത് അഭ്യസ്തവിദ്യരായ തൊഴില്‍ തേടുന്ന ആദിവാസി യുവതീ-യുവാക്കളാണ്. തങ്ങള്‍ക്ക് സംവരണതത്വം അനുസരിച്ചുള്ള തൊഴിലവസരങ്ങള്‍മാത്രമാണ് ലഭിക്കുന്നത്. നിയമന നിരോധനത്തിന്റെയും തസ്തിക വെട്ടിക്കുറച്ചതിന്റെയും ഫലമായി സംവരണവും അട്ടിമറിക്കപ്പെട്ടു.

അഭ്യസ്തവിദ്യരായ ആദിവാസി യുവാക്കളുടെ എണ്ണം അനുദിനം വര്‍ധിക്കുന്നു. ആദിവാസികള്‍ക്ക് ലഭിച്ചുകൊണ്ടിരുന്ന തൊഴിലവസരം നിലനിര്‍ത്തുന്നതിന് സമസ്ത മേഖലയിലും പുതിയ സംവരണ മാനദണ്ഡം കൊണ്ടുവരണം. അതോടൊപ്പം എയ്ഡഡ് മേഖലയിലും സ്വകാര്യവല്‍ക്കരണം നടപ്പാക്കിയ മേഖലയിലും സംവരണം ബാധകമാക്കുന്ന നിയമനിര്‍മാണം നടത്താന്‍ കേന്ദ്ര സംസ്ഥാന സര്‍ക്കാരുകള്‍ തയ്യാറാകണം. ആരോഗ്യമേഖലയിലും ആദിവാസികള്‍ പിന്തള്ളപ്പെടുന്നതിന്റെ തെളിവാണ് അട്ടപ്പാടിയിലും സംസ്ഥാനത്തിന്റെ ഇതരഭഭാഗങ്ങളിലും നടക്കുന്ന നവജാത ശിശുക്കളുടെയും ആദിവാസികളുടെയും മരണം.

കഴിഞ്ഞ എല്‍ഡിഎഫ് സര്‍ക്കാര്‍ തുടങ്ങിയ സമ്പൂര്‍ണ ചികിത്സാ പദ്ധതി ഇന്ന് അട്ടിമറിക്കപ്പെട്ടു. ആദിവാസികളുടെ ആരോഗ്യവും ജീവനും സംരക്ഷിക്കാന്‍ എല്ലാ ആദിവാസി മേഖലയിലെ ആശുപത്രികളിലും ഡോക്ടര്‍മാരുടെ സേവനവും ജീവന്‍ രക്ഷാമരുന്നുകളും യഥാസമയം ലഭ്യമാക്കാന്‍ സര്‍ക്കാര്‍ തയ്യാറാകണം. ആദിവാസികളുടെ ആരോഗ്യം സംരക്ഷിക്കാന്‍ അവര്‍ക്ക് മതിയായ അളവില്‍ പോഷകാഹാരങ്ങള്‍ എല്ലാ കുടുംബങ്ങള്‍ക്കും ലഭ്യമാക്കണം. അവിവാഹിതരായ ആദിവാസിഅമ്മമാരുടെ എണ്ണം വര്‍ധിക്കുന്നു. ഇതു തടയാന്‍ കര്‍ശനമായ നിയമനിര്‍മാണം കൊണ്ടുവരണം. ഇത്തരം അമ്മമാര്‍ക്ക് വീടും ഭൂമിയും പെന്‍ഷനും നല്‍കി അവരെ പുനരധിവസിപ്പിക്കാനും അവരുടെ കുട്ടികളുടെ വിദ്യാഭ്യാസത്തിനായും സര്‍ക്കാര്‍ പദ്ധതികള്‍ ആവിഷ്കരിക്കണം. ആദിവാസികളുടെ അന്യാധീനപ്പെട്ട ഭൂമി തിരിച്ചു പിടിച്ചു നല്‍കുന്നതിന് രാഷ്ട്രപതി ഒപ്പുവച്ച നിയമം 1975 ല്‍ നിലവില്‍ വന്നെങ്കിലും ആ നിയമം അനുസരിച്ച് ഇന്ത്യയില്‍ ഒരിടത്തും ഭൂമി തിരിച്ചു പിടിച്ചു നല്‍കാന്‍ കഴിഞ്ഞിട്ടില്ല.

കേരളത്തില്‍ 1999 ല്‍ അന്യാധീനപ്പെട്ട ഭൂമിക്ക് പകരം ഭൂമി നല്‍കാന്‍ വ്യവസ്ഥചെയ്യുന്ന നിയമവും അന്ത്യവിശ്രമം കൊള്ളുന്നു. ഈ സാഹചര്യത്തിലാണ് 2002 മാര്‍ച്ച് മുതല്‍ ആദിവാസി ക്ഷേമസമിതി ഭൂരഹിതരായ ആദിവാസികളെ അണിനിരത്തി സംസ്ഥാനത്ത് വയനാട് ജില്ലയിലും മറ്റു ജില്ലകളിലും ഭൂസമരം ആരംഭിച്ചത്. ഭൂസമരത്തെ ചോരയില്‍ മുക്കിക്കൊല്ലാന്‍ അന്നത്തെ യുഡിഎഫ് സര്‍ക്കാര്‍ എല്ലാ മാര്‍ഗവും നടത്തി. ജയിലിലടച്ചു. പക്ഷേ, അടിയുറച്ച ആദിവാസി പോരാളികളുടെ മുന്നില്‍ സര്‍ക്കാരിന് മുട്ടുമടക്കേണ്ടി വന്നു. അവരെ ജയിലില്‍നിന്ന് നിരുപാധികമായി വിട്ടയച്ചു. ജയിലില്‍നിന്ന് വിട്ടയച്ച ആദിവാസികള്‍ മറ്റൊന്നും ചിന്തിക്കാതെ അവര്‍ അവകാശം സ്ഥാപിച്ച മണ്ണിലേക്കുതന്നെ മടങ്ങി. ഭൂമിയില്‍ എല്ലാ പ്രതിസന്ധികളെയും അതിജീവിച്ച് സമരപാതയില്‍ ഉറച്ചു നിന്ന വയനാട് ജില്ലയിലെ അയ്യായിരത്തിലധികം ആദിവാസി കുടുംബങ്ങള്‍ക്ക് കഴിഞ്ഞ എല്‍ഡിഎഫ് സര്‍ക്കാര്‍ അവര്‍ അവകാശം സ്ഥാപിച്ചിരുന്ന ഭൂമിക്ക് രേഖ നല്‍കി ഭൂമിയുടെ ഉടമകളാക്കി.

വീടും വൈദ്യുതിയും കുടിവെള്ളവും നല്‍കി. വയനാട് ജില്ലയില്‍ ഭൂരഹിതരായ ആദിവാസികള്‍ക്ക് വിതരണംചെയ്യാന്‍ സര്‍ക്കാര്‍ ഭൂമി ലഭ്യമല്ല എന്ന വാദം ഉയര്‍ന്നപ്പോള്‍ ഭൂമി വിലയ്ക്കു വാങ്ങി നല്‍കുന്നതിന് എല്‍ഡിഎഫ് സര്‍ക്കാരിന്റെ അവസാന കാലഘട്ടത്തില്‍ 50 കോടി രൂപ ട്രൈബല്‍ ഡിപ്പാര്‍ട്മെന്റിനു കൈമാറി. പക്ഷേ, ആ തുക ഉപയോഗിച്ച് ഭൂമി വാങ്ങി നല്‍കുന്നതിന് ഇപ്പോഴത്തെ യുഡിഎഫ് സര്‍ക്കാര്‍ ഒരു നടപടിയും സ്വീകരിക്കുന്നില്ല. വയനാട്ടില്‍ ആറായിരത്തോളം കുടുംബങ്ങളും തിരുവനന്തപുരം ചെറ്റച്ചലില്‍ 97 കുടുംബവും ഇടുക്കിയില്‍ 142 കുടുംബവും ഭൂമിക്കായി സമരം തുടരുന്നു. കേരളത്തില്‍ വനാവകാശനിയമം നടപ്പാക്കുന്ന കാര്യത്തില്‍ എല്‍ഡിഎഫ് സര്‍ക്കാര്‍ ശക്തമായ നടപടികള്‍ സ്വീകരിക്കുകയും 24426 കുടുംബത്തിന് വനാവകാശനിയമമനുസരിച്ച് രേഖ നല്‍കുകയും ചെയ്തിരുന്നു. അവശേഷിക്കുന്ന കുടുംബങ്ങളുടെ കാര്യത്തില്‍ ഇപ്പോഴത്തെ യുഡിഎഫ് സര്‍ക്കാര്‍ അവരുടെ ഭൂമിക്ക് രേഖ നല്‍കുന്നതിനോ, കൈവശഭൂമി സര്‍വേ ചെയ്യുന്നതിനോ ഒരു നടപടിയും സ്വീകരിക്കുന്നില്ല.

വനാവകാശനിയമമനുസരിച്ച് നല്‍കിയ രേഖകളിലെ തെറ്റുകള്‍ പരിഹരിക്കുന്നതിന് എഫ്ആര്‍സി കമ്മിറ്റിയോ സബ്ഡിവിഷണല്‍ കമ്മിറ്റിയോ, സ്റ്റേറ്റ് ലെവല്‍ കമ്മിറ്റിയോ വിളിച്ചു ചേര്‍ക്കുന്നില്ല. രേഖ ലഭിച്ച കുടുംബങ്ങള്‍ക്ക് തങ്ങളുടെ ഭൂമിയില്‍ ഇപ്പോഴും ഒരുവിധ സ്വാതന്ത്ര്യവും വനംവകുപ്പ് അനുവദിക്കുന്നില്ല. ഇത് ആദിവാസികള്‍ക്കിടയില്‍ പ്രശ്നങ്ങള്‍ സൃഷ്ടിക്കുന്നു. ഇത് മുതലെടുക്കാന്‍ മാവോയിസ്റ്റുകളും ഡിഎച്ച്ആര്‍എംപോലുള്ള സംഘടനകളും&ാറമവെ; ആദിവാസിമേഖലയില്‍ നടത്തുന്ന ശ്രമംഭഭരണാധികാരി വര്‍ഗം തിരിച്ചറിയണം. വനഭൂമി അന്യാധീനപ്പെട്ടതിന്റെ പാപഭാരം തലമുറകളായി വനത്തില്‍ അധിവസിക്കുന്ന ആദിവാസികളുടെ തലയില്‍ കെട്ടിവയ്ക്കാനുള്ള ശ്രമം അംഗീകരിക്കാന്‍ പറ്റില്ല. കഴിഞ്ഞ മൂന്ന് വര്‍ഷത്തിനുള്ളില്‍ സംസ്ഥാനത്ത് 45000 ഏക്കര്‍ വനഭൂമി നഷ്ടമായതായി സര്‍ക്കാര്‍ കണക്കുകള്‍ വെളിപ്പെടുത്തുന്നു. ഇത് ആദിവാസികളുടെ കൈകളിലില്ല. സംസ്ഥാനത്തെ 24426 ആദിവാസി കുടുംബങ്ങള്‍ക്ക് കൈവശമുള്ള ഭൂമി 32958 ഏക്കറാണ്.

ശരാശരി ഒന്നരയേക്കറിന് താഴെമാത്രമാണ് ഓരോ കുടുംബത്തിന്റെയും കൈവശമുള്ളത്. വനഭൂമിയെല്ലാം സമൂഹത്തിന്റെ ഉന്നത ശ്രേണിയിലുള്ളവരുടെ കൈകളിലാണ്. ഭൂമി തിരിച്ചുപിടിച്ച്&ാറമവെ;ആദിവാസി കുടുംബങ്ങള്‍ക്ക് നല്‍കണം. ആദിവാസി കുടുംബങ്ങളെ തങ്ങളുടെ ആവാസകേന്ദ്രങ്ങളില്‍ മനുഷ്യരായി ജീവിക്കാന്‍ അനുവദിക്കണം. ആദിവാസികള്‍ ഇന്ന് അഭിമുഖീകരിക്കുന്ന മറ്റൊരു വിപത്ത് കസ്തൂരി രംഗന്‍ റിപ്പോര്‍ട്ടാണ്. സംസ്ഥാനത്ത് നല്ലൊരു ശതമാനം ആദിവാസി കുടുംബങ്ങള്‍ പരമ്പരാഗതമായി പശ്ചിമഘട്ട വനമേഖലയില്‍ അധിവസിച്ചു വരുന്നവരാണ്. ഈ സാഹചര്യത്തില്‍ കസ്തൂരിരംഗന്‍ റിപ്പോര്‍ട്ട് നടപ്പായാല്‍ ആദിവാസികളുടെ ജീവിതംതന്നെ പ്രതിസന്ധിയിലാകും.

ഈ റിപ്പോര്‍ട്ട് വനംവകുപ്പുകാര്‍ക്ക് ആദിവാസികളുടെമേല്‍ കടന്നാക്രമണം ശക്തിപ്പെടുത്താനുള്ള പഴുതായി മാറും. ആദിവാസികളുടെ ക്ഷേമത്തിനു വേണ്ടി ടിഎസ്പി ഫണ്ട് വകയിരുത്തുമ്പോള്‍ പാലിക്കേണ്ട മാനദണ്ഡം പാലിക്കുന്നില്ല. ഓരോ സാമ്പത്തിക വര്‍ഷവും കേന്ദ്ര ബജറ്റില്‍ ആദിവാസി ജനവിഭാഗത്തിന് ലഭിക്കേണ്ട പദ്ധതിവിഹിതത്തിലും ശരാശരി 22000 കോടി രൂപയുടെ കുറവുണ്ട്. വകയിരുത്തുന്ന പദ്ധതിവിഹിതം വകമാറ്റി ചെലവഴിക്കുന്നുമുണ്ട്. ആദിവാസി ക്ഷേമപ്രവര്‍ത്തനം ഇത്രയും കുത്തഴിഞ്ഞ കാലഘട്ടം വേറെയില്ല. കേരളത്തിലെ ആദിവാസി വനിതാമന്ത്രി ആദിവാസി സമൂഹത്തിന് അപമാനകരമായ നിലയിലാണ്ഭഭരണം കൈയാളുന്നത്. സംസ്ഥാനത്തെ ട്രൈബല്‍ ഡിപ്പാര്‍ട്മെന്റ് ഒരു നാഥനില്ലാക്കളരിയാണ്. ഇതിന്റെ ഫലമായി ആദിവാസി ക്ഷേമപ്രവര്‍ത്തനം അവതാളത്തിലാണ്. ഭൂരഹിതര്‍ക്കും നാമമാത്രഭഭൂമിയുള്ള ആദിവാസി കുടുംബങ്ങള്‍ക്കും ഭൂമി നല്‍കാന്‍ ഒരു നടപടിയും ഇല്ല.

എല്‍ഡിഎഫ് സര്‍ക്കാര്‍ ഭൂമി വാങ്ങി നല്‍കാന്‍ ട്രൈബല്‍ വകുപ്പിന് കൈമാറിയ 50 കോടി രൂപ കെട്ടിക്കിടക്കുന്നു. ആരോഗ്യപരിപാലനം നടക്കുന്നില്ല. ശിശുമരണം തുടര്‍ക്കഥയായി. വിദ്യാഭ്യാസരംഗം തകര്‍ച്ചയുടെ പാതയില്‍. വനാവകാശ നിയമം നടപ്പാക്കാന്‍ തുടര്‍നടപടികളില്ല. കുടിവെള്ളം കിട്ടാക്കനിയായി. വൈദ്യുതിയും ഗതാഗത സൗകര്യവും ലഭ്യമാക്കാന്‍ നടപടിയില്ല. ഇങ്ങനെ നീളുന്നു ആദിവാസികളോടുള്ള അവഗണന. ഇതിനെതിരെ ശക്തമായ പ്രക്ഷോഭം ഉയര്‍ന്നുവരികതന്നെ വേണം.

*
ബി വിദ്യാധരന്‍ കാണി (എകെഎസ് സംസ്ഥാനസെക്രട്ടറിയാണ് ലേഖകന്‍) deshabhimani

ആക്രമിക്കപ്പെടുന്ന യുവജനങ്ങള്‍

തൊഴിലെടുക്കാനുള്ള അവകാശം ഇന്ത്യന്‍ ഭരണഘടന ഉറപ്പുനല്‍കുന്ന മൗലികാവകാശമാണ്. മൗലികാവകാശങ്ങള്‍പോലും നിര്‍ലജ്ജം ലംഘിക്കപ്പെടുമ്പോള്‍ പോരാട്ടമല്ലാതെ പോംവഴിയില്ല. നവലിബറല്‍ നയങ്ങളുടെ ചുവടുപിടിച്ച് കേന്ദ്ര-സംസ്ഥാന സര്‍ക്കാരുകള്‍ ആവിഷ്കരിച്ച് നടപ്പാക്കുന്ന നയങ്ങള്‍ രാജ്യത്തെ യുവാക്കളെയാകെ തൊഴിലില്ലായ്മയുടെ ആഴക്കടലിലേക്ക് തള്ളിയിടുന്നു. രാജ്യത്തെ തൊഴില്‍ സംസ്കാരത്തില്‍ത്തന്നെ ഇപ്പോള്‍ കാതലായ മാറ്റമുണ്ടായി. പൊതുമേഖലയും സര്‍ക്കാര്‍ സേവനസംവിധാനങ്ങളും നാള്‍ക്കുനാള്‍ ചുരുങ്ങിച്ചുരുങ്ങിവരുന്നു. നിയമന നിരോധനം രാജ്യത്താകെ നയമായി മാറി. സ്വകാര്യമേഖലകള്‍ രാജ്യത്തെ വിഴുങ്ങുന്നു. കരാര്‍ജോലിയും ദിവസക്കൂലി ജോലിയും വര്‍ധിച്ചു. സ്ഥിരംജോലിയും സ്ഥിരംജീവനക്കാരും പഴങ്കഥയായി മാറി.

പെന്‍ഷനും തൊഴില്‍സുരക്ഷയും മറ്റാനുകൂല്യങ്ങളും ഇല്ലാത്ത സഹചര്യം സൃഷ്ടിക്കപ്പെടുന്നു. സാമൂഹ്യസുരക്ഷിതത്വത്തിന്റെയും സാമൂഹിക വളര്‍ച്ചയുടെയും അവശ്യഘടകമായ സംവരണം നവതൊഴില്‍മേഖലയില്‍ തീരെയില്ല. ലോകത്തിലെ ഏറ്റവും വലിയ പൊതുമേഖലാ വ്യവസായമായ ഇന്ത്യന്‍ റെയില്‍വേയില്‍ 1990-91 കാലഘട്ടത്തില്‍ 16.51 ലക്ഷം ജീവനക്കാരാണ് ഉണ്ടായിരുന്നത്. 2013ല്‍ ഇത് 11.82 ലക്ഷമായി കുറഞ്ഞു. 20 വര്‍ഷംകൊണ്ട് പുതിയ റെയില്‍വേസ്റ്റേഷനുകള്‍, നിരവധി കിലോമീറ്റര്‍ ദൈര്‍ഘ്യമുള്ള പാളങ്ങള്‍, നിരവധി പുതിയ വണ്ടികള്‍ തുടങ്ങി ഇന്ത്യന്‍ റെയില്‍വേ അനുദിനം വികസിച്ചിട്ടും തൊഴിലാളികളുടെ എണ്ണത്തിലുണ്ടായ ഭീമമായ കുറവ് നവലിബറല്‍നയങ്ങളുടെ തൊഴില്‍മേഖലയിലെ സ്വാധീനം തുറന്നുകാണിക്കുന്നു.

സമാനസ്ഥിതിയാണ് ബാങ്കിങ്, ഇന്‍ഷുറന്‍സ് മേഖലകളിലും മറ്റു പൊതുമേഖലാ വ്യവസായങ്ങളിലും. പൊതുമേഖലാ ബാങ്കുകളില്‍ ഒന്നരലക്ഷത്തിലധികം ഒഴിവുകളാണ് നികത്തപ്പെടാതിരിക്കുന്നത്. കേരളത്തിലെ ആകെ കേന്ദ്രസര്‍ക്കാര്‍ ജീവനക്കാരുടെ എണ്ണം 71,134 ആണ്. ആകെ വേണ്ടത് 1,07,000 പേരും. 36,000ല്‍പരം ഒഴിവാണ് കേരളത്തില്‍മാത്രമുള്ളത്. അസംഘടിതമേഖലയിലെ തൊഴിലാളികളുടെ എണ്ണം അനുദിനം പെരുകുന്നു. അവിടെയാകട്ടെ തൊഴില്‍സുരക്ഷയോ, മിനിമം കൂലിയോ, മറ്റാനുകൂല്യങ്ങളോ ഇല്ല. കേരളത്തില്‍ 37.09 ലക്ഷം അഭ്യസ്തവിദ്യരാണ് എംപ്ലോയ്മെന്റ്എക്സ്ചേഞ്ചില്‍ പേര് രജിസ്റ്റര്‍ചെയ്ത് ജോലിക്കായി കാത്തിരിക്കുന്നത്. ലോകത്തിലേറ്റവും കൂടുതല്‍ തൊഴിലില്ലായ്മയുടെ സാന്ദ്രതയുള്ളത് കേരളത്തിലാണ്. ഒഴിവുകള്‍ ഇപ്പോള്‍ സമയബന്ധിതമായി റിപ്പോര്‍ട്ട് ചെയ്യപ്പെടുന്നില്ല.

പിഎസ്സിയുടെ കണക്കുപ്രകാരം 19,541 ഒഴിവുകളാണ് റിപ്പോര്‍ട്ട് ചെയ്തത്. എന്നാല്‍, ഈ ഒഴിവുകളില്‍ നിയമനം നടത്താനുള്ള ഒരുവിധ നടപടിയുമില്ല. വിവിധ റാങ്ക് ലിസ്റ്റുകളില്‍ നിയമനം കാത്തിരിക്കുന്നവര്‍ 32,877 പേരുണ്ട്. ജോലിക്ക് അപേക്ഷിക്കുന്നവരുടെ പ്രായപരിധിയും റാങ്ക് ലിസ്റ്റുകളുടെ കാലാവധിയും നീട്ടുന്ന സര്‍ക്കാര്‍ യുവാക്കളെ വ്യോമോഹങ്ങളില്‍ തളച്ചിടുകയാണ്. നിയമനങ്ങള്‍ നടത്താതെ ലിസ്റ്റുകളുടെ കാലാവധി നീട്ടുന്നത് വഞ്ചനയാണ്. പിഎസ്സി വഴി നിയമനങ്ങളൊന്നും നടത്താത്ത സര്‍ക്കാരായി യുഡിഎഫ് സര്‍ക്കാര്‍ മാറി. പിഎസ്സി വഴിയുള്ള നിയമനങ്ങള്‍ക്ക് അപ്രഖ്യാപിത നിരോധനം ഏര്‍പ്പെടുത്തിയ യുഡിഎഫ് സര്‍ക്കാര്‍ അധികാരത്തില്‍ വന്നതിനുശേഷം ഏകദേശം 50,000 പേര്‍ക്ക് പിന്‍വാതിലിലൂടെ നിയമനം കൊടുത്തു. മാനദണ്ഡങ്ങളെല്ലാം ലംഘിച്ച് യോഗ്യതയില്ലാത്തവരെ വിവിധ വകുപ്പുകളില്‍ തിരുകിക്കയറ്റുന്നത് പതിവായി. വിവിധ വകുപ്പുകളില്‍ ദീര്‍ഘകാലമായി ജോലിചെയ്യുന്ന താല്‍ക്കാലിക ജീവനക്കാരെ അന്യായമായി പിരിച്ചുവിടുന്നതും നിത്യസംഭവമായിരിക്കുന്നു.

ഏറ്റവുമൊടുവില്‍ ഓപ്പണ്‍ സ്കൂളില്‍ നിയമാനുസൃതം പൊതുനിയമന മാനദണ്ഡങ്ങളനുസരിച്ച് നിയമനം ലഭിച്ചവരും അഞ്ചു മുതല്‍ 13 വര്‍ഷംവരെ സര്‍വീസുള്ളവരുമായ 65 ജീവനക്കാരെ 2013 നവംബര്‍ 19 മുതല്‍ കൂട്ടത്തോടെ പിരിച്ചുവിട്ടിരിക്കുന്നു. വിദ്യാഭ്യാസമന്ത്രിയുടെ താല്‍പ്പര്യപ്രകാരമാണ് തൊഴിലാളിവിരുദ്ധവും അന്യായവുമായ പിരിച്ചുവിടല്‍ ഉത്തരവ് പുറപ്പെടുവിച്ചത്. ദീര്‍ഘകാലമായി താല്‍ക്കാലികമായി ജോലിചെയ്യുന്നവരെയും കെഎസ്ആര്‍ടിസി എംപാനല്‍ ജീവനക്കാരെയും സ്ഥിരപ്പെടുത്താനും സര്‍ക്കാര്‍ തയ്യാറായിട്ടില്ല. രണ്ടാം യുപിഎയുടെഭഭരണത്തിന്‍ കീഴില്‍ ഇന്ത്യ അഴിമതിയുടെ രാജ്യമായി മാറി. 2ജി സ്പെക്ട്രം, കല്‍ക്കരി ഖനനം, കോമണ്‍വെല്‍ത്ത് ഗെയിംസ് അഴിമതി, ഐപിഎല്‍ കോഴ, ആദര്‍ശ് ഫ്ളാറ്റ്, ടട്ര ട്രക്ക് ഇടപാട് തുടങ്ങി അഴിമതിയുടെ പട്ടികയില്‍ ലോകത്തിനുമുന്നില്‍ ഇന്ത്യയെ ഒന്നാമതെത്തിക്കാന്‍ കോണ്‍ഗ്രസിനായി.

മുന്‍ കേന്ദ്രമന്ത്രിമാരും കോണ്‍ഗ്രസ് എംപിമാരും അഴിമതിക്കേസില്‍ ജയിലിലടയ്ക്കപ്പെട്ടതും പ്രധാനമന്ത്രിയുടെ ഓഫീസുപോലും അഴിമതിയുടെ നിഴലില്‍ നില്‍ക്കുന്നതും പ്രശ്നത്തിന്റെ ഗൗരവം വര്‍ധിപ്പിക്കുന്നു. അഴിമതിയുടെ കാര്യത്തില്‍ തങ്ങളും ഒട്ടും പിറകിലല്ലെന്ന് ഉമ്മന്‍ചാണ്ടി സര്‍ക്കാരും തെളിയിച്ചു. സോളാര്‍തട്ടിപ്പ്, ഭൂമികുംഭകോണം, സ്വര്‍ണക്കടത്ത് തുടങ്ങിയ എല്ലാ അഴിമതികളുടെയും കേന്ദ്രം മുഖ്യമന്ത്രിയുടെ ഓഫീസാണ്. മുഖ്യമന്ത്രിയുടെ പേഴ്സണല്‍ സ്റ്റാഫ് ഉള്‍പ്പെടെയുള്ളവര്‍ അഴിമതിക്കേസില്‍ ജയിലിലടയ്ക്കപ്പെട്ടു. അധികാരം ഉപയോഗിച്ച് അഴിമതിക്കേസുകള്‍ അട്ടിമറിക്കാനുള്ള ശ്രമമാണ് മുഖ്യമന്ത്രിയുടെ നേതൃത്വത്തില്‍ ഇപ്പോള്‍ നടക്കുന്നത്. സംസ്ഥാനത്ത് കഴിഞ്ഞ എല്‍ഡിഎഫ് ഭരണകാലത്ത് വിലക്കയറ്റം പിടിച്ചുനിര്‍ത്താന്‍ സിവില്‍സപ്ലൈസ് വഴി സ്വീകരിച്ച നടപടികള്‍ രാജ്യത്തിന്റെയാകെ പ്രശംസ പിടിച്ചുപറ്റിയിരുന്നു.

എന്നാല്‍, യുഡിഎഫ് സര്‍ക്കാര്‍ അധികാരത്തില്‍ വന്നതിനുശേഷം പൊതുവിതരണമേഖലതന്നെ അഴിമതിയുടെ കൂത്തരങ്ങായി. എഫ്സിഐ ഗോഡൗണുകളില്‍ ഭക്ഷ്യധാന്യങ്ങള്‍ കെട്ടിക്കിടന്ന് നശിച്ചു. അഴിമതി ആരോപണത്തില്‍ മുങ്ങിയ സിവില്‍സപ്ലൈസ് എംഡിക്ക് രാജിവയ്ക്കേണ്ടിവന്നു. ഉത്സവകാലങ്ങളില്‍ വിലക്കയറ്റം നിയന്ത്രിക്കാന്‍ സ്ഥാപിച്ച പ്രത്യേക വിപണനകേന്ദ്രങ്ങളുടെ പ്രവര്‍ത്തനങ്ങള്‍ അവതാളത്തിലായി. മുഖ്യമന്ത്രിമുതല്‍ മന്ത്രിസഭയിലെ എല്ലാവരും അഴിമതി ആരോപണത്തിന് വിധേയരായിരിക്കുന്നു. കയര്‍വികസനത്തിന്റെ പേരില്‍ മന്ത്രി അടൂര്‍ പ്രകാശും കയര്‍വകുപ്പ് സെക്രട്ടറി റാണി ജോര്‍ജും പരിവാരങ്ങളും കോടികള്‍ പൊടിച്ചുനടത്തിയ വിദേശയാത്രകള്‍ വിജിലന്‍സ് അന്വേഷണത്തിലാണ്. കോര്‍പറേറ്റുകള്‍ക്ക് വര്‍ഷാവര്‍ഷം ലക്ഷക്കണക്കിനു കോടി രൂപ നികുതിയിളവ് നല്‍കുന്ന കേന്ദ്രസര്‍ക്കാര്‍ പാവപ്പെട്ടവര്‍ക്കുള്ള എല്ലാവിധ സബ്സിഡികളും എടുത്തുകളയുന്നു. സ്റ്റാറ്റ്യൂട്ടറി റേഷന്‍ സമ്പ്രദായവും രാസവള സബ്സിഡിയും അട്ടിമറിക്കപ്പെട്ടു.

രാജ്യത്ത് കര്‍ഷക ആത്മഹത്യ പെരുകുന്നു. രാജ്യത്തിന്റെ വിപണിയുടെ നിയന്ത്രണം സ്വകാര്യമേഖലയ്ക്ക് വിട്ടുകൊടുത്ത കേന്ദ്രസര്‍ക്കാരിന് വിലക്കയറ്റം തടയാന്‍ ഒരു നടപടിയും സ്വീകരിക്കാന്‍ കഴിയുന്നില്ല. കോണ്‍ഗ്രസിനും ബിജെപിക്കും കോര്‍പറേറ്റുകള്‍ വന്‍തോതില്‍ ഫണ്ട് നല്‍കുന്നുണ്ട്. 2008 മുതല്‍ 2011 വരെയുള്ള കാലയളവില്‍ കോണ്‍ഗ്രസിന് 1492.36 കോടി രൂപയും ബിജെപിക്ക് 769.82 കോടി രൂപയും കോര്‍പറേറ്റുകളില്‍നിന്ന് ഫണ്ട് ലഭിച്ചു. അതുകൊണ്ടുതന്നെ ഈ രണ്ടു കക്ഷികളുടെയും ഭരണത്തില്‍നിന്ന് പാവപ്പെട്ടവര്‍ക്ക് കൂടുതലൊന്നും പ്രതീക്ഷിക്കാനില്ല. ധനകമ്മി ചുരുക്കാനെന്ന പേരില്‍ വിദ്യാഭ്യാസമേഖലയുടെ പദ്ധതിവിഹിതത്തില്‍നിന്ന് 4000 കോടി രൂപയാണ് കേന്ദ്രസര്‍ക്കാര്‍ വെട്ടിക്കുറച്ചിരിക്കുന്നത്. ഇത് പഠിക്കാനുള്ള അവകാശത്തോടുള്ള വെല്ലുവിളിയാണ്.

വിലക്കയറ്റത്തിന്റെ മുഖ്യകാരണം അടിക്കടിയുണ്ടാകുന്ന പെട്രോള്‍, ഡീസല്‍ വിലവര്‍ധനയാണ്. പാചകവാതകത്തിന്റെ വില കുത്തനെ വര്‍ധിപ്പിച്ചതിനുശേഷം വിറക് കത്തിച്ച് പാചകംചെയ്യാനാണ് പ്രധാനമന്ത്രി ആഹ്വാനംചെയ്യുന്നത്. റിലയന്‍സ് ഉള്‍പ്പെടെയുള്ള പെട്രോളിയം ഖനനമേഖലയിലെ സ്വകാര്യകുത്തകകളുടെ ലാഭം വര്‍ധിപ്പിക്കാനാണ് സര്‍ക്കാര്‍ ജനവിരുദ്ധ നടപടിയുമായി മുന്നോട്ടുപോകുന്നത്. ജനവിരുദ്ധതയുടെ പ്രതീകമായി കേന്ദ്ര-കേരള സര്‍ക്കാരുകള്‍ അധഃപതിക്കുമ്പോള്‍ ക്ഷുഭിതയൗവ്വനത്തിന് തെരുവിലിറങ്ങേണ്ടി വരുന്നു. സമരമല്ലാതെ, ജീവിതം മുന്നോട്ടുകൊണ്ടു പോകാന്‍ മറ്റുവഴികളില്ലെന്ന തിരിച്ചറിവില്‍ പ്രക്ഷോഭത്തിന്റെ പതാകയേന്തുകയാണ്.

*
എം സ്വരാജ്