നവഉദാരവല്‍ക്കരണ നയങ്ങളും മെലിയുന്ന സിവില്‍ സര്‍വീസും

രണ്ടു ദശകക്കാലമായി കോണ്‍ഗ്രസ് നേതൃത്വത്തില്‍ ഇന്ത്യയില്‍ നടപ്പിലാക്കിവരുന്ന നവലിബറല്‍ സാമ്പത്തികനയങ്ങള്‍ സിവില്‍സര്‍വീസിനെ കാര്‍ന്നു തിന്നുകയാണ്. സേവനമേഖലകളും പശ്ചാത്തല വികസനമേഖലകളും സര്‍ക്കാര്‍ കൈയൊഴിഞ്ഞ് പകരം സ്വകാര്യമൂലധനത്തിന് കൈമാറണമെന്നാണ് ഈ നയങ്ങള്‍ അനുശാസിക്കുന്നത്. ഇതിന്റെയടിസ്ഥാനത്തില്‍ ആഗോളവല്‍ക്കരണനയങ്ങളുടെ ഉപാസകരായ കേന്ദ്ര-സംസ്ഥാന സര്‍ക്കാരുകള്‍ സിവില്‍സര്‍വീസിനെ വെട്ടിച്ചുരുക്കുന്നതിനുള്ള നടപടികളാണ് തുടര്‍ച്ചയായി സ്വീകരിക്കുന്നത്. 2001 ലെ ജനസംഖ്യാ റിപ്പോര്‍ട്ട് പ്രകാരം ഇന്ത്യന്‍ റെയില്‍വെയടക്കം കേന്ദ്രസര്‍വീസില്‍ 38.76 ലക്ഷം ജീവനക്കാരുണ്ടായിരുന്നത് 2011 ലെ റിപ്പോര്‍ട്ട് പ്രകാരം 31.46 ലക്ഷമായി കുറഞ്ഞു. 7 ലക്ഷത്തിലധികം തസ്തികകള്‍ പത്തുവര്‍ഷക്കാലയളവിനുള്ളില്‍ കേന്ദ്രസര്‍വീസില്‍ മാത്രം ഇല്ലാതായി. ഇതില്‍ 2 ലക്ഷം തസ്തികകള്‍ ഇന്ത്യയിലെ ഏറ്റവും വലിയ പൊതു ഗതാഗതസംവിധാനമായ റെയില്‍വെയിലാണ്.

ജനസംഖ്യാവര്‍ദ്ധനവിനും സാമൂഹ്യവളര്‍ച്ചയ്ക്കും അനുരോധമായി സിവില്‍സര്‍വീസിന്റെ പ്രവര്‍ത്തനങ്ങള്‍ വിപുലീകരിക്കുന്നതിനുപകരം, ലക്ഷക്കണക്കിന് തസ്തികകള്‍ ഇല്ലാതാക്കി സിവില്‍സര്‍വീസിനെ വെട്ടിച്ചുരുക്കുന്ന നയം ഗുരുതരമായ സാമൂഹ്യപ്രശ്നങ്ങളാണ് രാജ്യത്ത് സൃഷ്ടിച്ചിട്ടുള്ളത്. സ്വാതന്ത്ര്യാനന്തര ഭാരതം ആറരപതിറ്റാണ്ടുകള്‍ പിന്നിടുമ്പോഴും രാജ്യത്തെ 35% ജനങ്ങള്‍ നിരക്ഷരരാണ്. അഞ്ചുവയസ്സിന് താഴെയുള്ള കുട്ടികളില്‍ പകുതി പേര്‍ക്കും മതിയായ പോഷകാഹാരം ലഭിക്കുന്നില്ല. 40 ശതമാനം സ്ത്രീകളും വിളര്‍ച്ച ബാധിച്ചവരാണ്. 33 ശതമാനം കുടുംബങ്ങള്‍ക്ക് ഇന്ന് ശുദ്ധജലം ലഭ്യമല്ല. 40 ശതമാനം കുടുംബങ്ങള്‍ക്കും സ്വന്തമായി വീടോ, കക്കൂസോ ഇല്ല. 34 ശതമാനം വീടുകളില്‍ വൈദ്യുതി എത്തിയിട്ടില്ല. 70 ശതമാനം ജനങ്ങളുടെയും പ്രതിദിനവരുമാനം 20 രൂപയില്‍ താഴെയാണ്. അതി ദാരുണമായ ഇത്തരം ജീവിതാവസ്ഥയില്‍ നിന്നും ഇവരെ മോചിപ്പിച്ച് മനുഷ്യോചിതമായി ജീവിക്കാനാവശ്യമായ സൗകര്യങ്ങള്‍ ഒരുക്കിക്കൊടുക്കേണ്ടത് സര്‍ക്കാരിന്റെ ബാധ്യതയും ഉത്തരവാദിത്വവുമാണ്. സിവില്‍ സര്‍വീസ് പരിമിതപ്പെടുന്നതിന്റെ ഫലമായി സാമൂഹ്യനീതിയും അട്ടിമറിക്കപ്പെടുകയാണ്. സംവരണാടിസ്ഥാനത്തില്‍ ജോലി ലഭിക്കുന്നത് സിവില്‍സര്‍വീസിലും പൊതുമേഖലയിലും മാത്രമാണ്. സാമൂഹ്യമായും സാമ്പത്തികമായും പിന്നോക്കാവസ്ഥയില്‍ കഴിയുന്ന ജനവിഭാഗങ്ങള്‍ക്ക് സംവരണത്തിന്റെ പിന്‍ബലത്തില്‍ സിവില്‍സര്‍വീസില്‍ ജോലി ലഭിക്കുന്നതിനും സമൂഹത്തിന്റെ മുഖ്യധാരയിലെത്തുന്നതിനുമുള്ള അവസരങ്ങള്‍ സിവില്‍സര്‍വീസിന്റെ തകര്‍ച്ചയോടെ ഇല്ലാതാകുന്നു.

സംവരണത്തിന്റെ പേരില്‍ ബഹളം സൃഷ്ടിക്കുന്നവര്‍ ഈ യാഥാര്‍ത്ഥ്യം തിരിച്ചറിയാന്‍ തയ്യാറാവുന്നില്ല. കേന്ദ്രസര്‍ക്കാരിന്റെ പാത പിന്തുടര്‍ന്ന് യുഡിഎഫ് സര്‍ക്കാര്‍ വിനാശകരമായ നവഉദാരവല്‍ക്കരണ നയങ്ങള്‍ സംസ്ഥാനത്തും അടിച്ചേല്‍പ്പിക്കുകയാണ്. 2001-06 യുഡിഎഫ് സര്‍ക്കാര്‍ അധികാരത്തിലിരുന്ന കാലയളവിലും ഇതേ നയങ്ങള്‍ തന്നെയാണ് നടപ്പിലാക്കാന്‍ ശ്രമിച്ചത്. റവന്യൂവരുമാനത്തിന്റെ സിംഹഭാഗവും ശമ്പളത്തിനും പെന്‍ഷനും വേണ്ടി ചെലവഴിക്കുന്നുവെന്ന പ്രചരണം അഴിച്ചുവിട്ട് പൊതുസമൂഹത്തില്‍ തെറ്റിദ്ധാരണ പരത്താന്‍ ശ്രമിച്ച സര്‍ക്കാര്‍, കര്‍ഷകരെ രക്ഷിക്കുന്നതിനുവേണ്ടി ജീവനക്കാരുടെ ആനുകൂല്യങ്ങളും തസ്തികകളും വെട്ടിക്കുറയ്ക്കുന്നുവെന്ന പ്രചരണമാണ് അഴിച്ചുവിട്ടത്. സര്‍ക്കാരിന്റെ വ്യാജപ്രചരണങ്ങളില്‍ കുടുങ്ങി, സിവില്‍സര്‍വീസിനെതിരെ നിലപാടെടുത്ത നിരവധി വ്യക്തികളും പ്രസ്ഥാനങ്ങളും തങ്ങള്‍ കബളിപ്പിക്കുകയായിരുന്നുവെന്ന യാഥാര്‍ത്ഥ്യം പിന്നീട് തിരിച്ചറിഞ്ഞു. 2002 ല്‍ നടപ്പിലാക്കാന്‍ ശ്രമിച്ച് പരാജയപ്പെട്ട നയങ്ങള്‍ വീണ്ടും നടപ്പിലാക്കുന്നതിനാണ് യുഡിഎഫ് സര്‍ക്കാര്‍ പരിശ്രമിക്കുന്നത്. സര്‍വീസ് മേഖലയില്‍ വ്യാപകമായ സ്വകാര്യവല്‍ക്കരണമാണ് സര്‍ക്കാര്‍ ലക്ഷ്യമിടുന്നത്. എല്‍.ഡി.എഫ് സര്‍ക്കാര്‍ സിവില്‍സര്‍വീസിന്റെ വ്യാപനത്തിലൂടെ കൈവരിച്ച നേട്ടങ്ങളാകെ ഇല്ലാതാക്കുകയാണ്. മലയാളിയെ വിശ്വപൗരനാക്കി മാറ്റിയ കേരളത്തിലെ പൊതുവിദ്യാഭ്യാസമേഖല വാണിജ്യവല്‍ക്കരിക്കാനുള്ള ശ്രമങ്ങളാണ് സര്‍ക്കാര്‍ തുടര്‍ച്ചയായി നടത്തുന്നത്. ഉന്നതവിദ്യാഭ്യാസമേഖലയില്‍ സ്വയംഭരണകോളേജുകള്‍ക്ക് അനുമതി നല്‍കിയും സര്‍വ്വകലാശാലകളുടെ ജനാധിപത്യസ്വഭാവം തകര്‍ത്തും, വിദ്യാഭ്യാസപ്രവര്‍ത്തനങ്ങളുടെ ഉത്തരവാദിത്വത്തില്‍ നിന്നും സര്‍ക്കാര്‍ പിന്‍വാങ്ങുകയാണ്. സംസ്ഥാനത്തെ പൊതുജനാരോഗ്യമേഖലയും കടുത്ത പ്രതിസന്ധിയിലാണ്. ഡോക്ടര്‍മാരുടേതടക്കമുള്ള ഒഴിവുകള്‍ നികത്താന്‍ തയ്യാറാകാതെ, ദിവസക്കൂലി സമ്പ്രദായം ആരോഗ്യമേഖലയിലും വ്യാപകമാക്കി. മരുന്നു സംഭരണത്തിലെ അഴിമതി ഇല്ലാതാക്കുന്നതിനും ജീവന്‍രക്ഷാ മരുന്നന്നുകളുടെയടക്കം ലഭ്യത സര്‍ക്കാര്‍ ആശുപത്രികളില്‍ ഉറപ്പുവരുത്തുന്നതിനും ലക്ഷ്യമിട്ട് എല്‍ഡിഎഫ് സര്‍ക്കാര്‍ ഏര്‍പ്പെടുത്തിയ മെഡിക്കല്‍ സര്‍വീസ് കോര്‍പ്പറേഷന്റെ പ്രവര്‍ത്തനം അട്ടിമറിച്ചു. ആശുപത്രികളില്‍ ജീവന്‍രക്ഷാമരുന്നുകള്‍ ലഭ്യമല്ലാതായി. ദേശീയതലത്തില്‍ പ്രശംസ പിടിച്ചുപറ്റിയ കേരളത്തിലെ പൊതുവിതരണരംഗം താറുമാറാക്കി. വിലക്കയറ്റം നിയന്ത്രിക്കുന്നതിനും വിപണിയില്‍ ഇടപെടുന്നതിനും എല്‍.ഡി.എഫ് സര്‍ക്കാര്‍ സിവില്‍സപ്ലൈസ് വകുപ്പിന് ബജറ്റ് വിഹിതമായി 150 കോടി അനുവദിച്ചിരുന്നു. ഇത് 65 കോടിയായി വെട്ടിക്കുറച്ചു. അതിരൂക്ഷമായ വിലക്കയറ്റത്തിന്റെ ഫലമായി ജീവിതം പൊറുതിമുട്ടുമ്പോള്‍ ഭക്ഷ്യസബ്സിഡി വെട്ടിച്ചുരുക്കി ജനങ്ങളെ ശിക്ഷിക്കുകയാണ് സര്‍ക്കാര്‍ ചെയ്യുന്നത്. സാമൂഹ്യനീതിവകുപ്പിനെ നോക്കുകുത്തിയാക്കി മാറ്റി, സാമൂഹ്യക്ഷേമപദ്ധതികള്‍ ഒന്നൊന്നായി പരിമിതപ്പെടുത്തുകയാണ്. അംഗന്‍വാടികളുടെ പ്രവര്‍ത്തനങ്ങള്‍ സര്‍ക്കാരിതര സംഘടനകളെ ഏല്‍പ്പിക്കാനുള്ള കേന്ദ്രസര്‍ക്കാര്‍ തീരുമാനത്തിന്റെ ചുവടുപിടിച്ച് കേരളത്തിലെ ആറ് ജില്ലകളില്‍ പദ്ധതി സ്വകാര്യമേഖലയ്ക്ക് കൈമാറുകയാണ്. ഇതുവഴി പിഞ്ചുപൈതങ്ങളോടുപോലും സര്‍ക്കാര്‍ ക്രൂരത കാട്ടുകയാണ്. അംഗനവാടി വര്‍ക്കര്‍, ഹെല്‍പ്പര്‍ തുടങ്ങിയ മേഖലകളില്‍ പണിയെടുക്കുന്നവരുടേയും ഭാവി ആശങ്കയിലായിരിക്കുന്നു. ക്ഷേമപദ്ധതികള്‍ കയ്യൊഴിയുന്നതിന്റെ ഭാഗമായി ക്ഷേമപെന്‍ഷനുകള്‍ കൃത്യമായി നല്‍കാന്‍ സര്‍ക്കാര്‍ തയ്യാറാവുന്നില്ല. എല്‍ഡിഎഫ് ഭരണകാലയളവില്‍ മുന്‍കൂര്‍ നല്‍കിയിരുന്ന ക്ഷേമപെന്‍ഷനുകള്‍ മാസങ്ങളായി കുടിശ്ശികയായിരിക്കുന്നു. അധികാരവികേന്ദ്രീകരണത്തിന്റെ ഉജ്ജ്വലമാതൃകകള്‍ സൃഷ്ടിച്ച കേരളത്തില്‍ തദ്ദേശസ്വയംഭരണസ്ഥാപനങ്ങളുടെ പ്രവര്‍ത്തനങ്ങള്‍ താളംതെറ്റിയിരിക്കുന്നു. ഭരണഘടനാപരമായി തദ്ദേശസ്വയംഭരണസ്ഥാപനങ്ങള്‍ക്ക് നല്‍കേണ്ട പദ്ധതിവിഹിതം യഥാസമയം അനുവദിക്കാത്തിന്റെ ഫലമായി പദ്ധതി പ്രവര്‍ത്തനങ്ങളാകെ താളംതെറ്റി. സാമ്പത്തിക വര്‍ഷം അവസാനിക്കാറാകുമ്പോഴും പദ്ധതിയുടെ മൂന്നിലൊന്നുപോലും പൂര്‍ത്തീകരിക്കാന്‍ കഴിയാത്ത സാഹചര്യമാണ് സംസ്ഥാനത്തുണ്ടായിരിക്കുന്നത്. ജനന-മരണ രജിസ്ട്രേഷന്‍ സ്വകാര്യവല്‍ക്കരിക്കുന്നതിന്റെ ഭാഗമായി തിരുവനന്തപുരം, കൊച്ചി നഗരസഭകളില്‍ ഈ ചുമതല ടാറ്റാ കണ്‍സള്‍ട്ടന്‍സി സര്‍വീസിനെ ഏല്‍പ്പിച്ചു. എല്‍ഡിഎഫ് ഭരണകാലയളവില്‍ ക്രമസമാധാനപാലനത്തില്‍ പ്രഥമസ്ഥാനം കേരളം നേടിയിരുന്നു. എന്നാല്‍ കേരളത്തില്‍ കുറ്റകൃത്യങ്ങളും വനിതകള്‍ക്കെതിരെയുള്ള അതിക്രമങ്ങളും സാമ്പത്തിക തട്ടിപ്പുകളും ഗണ്യമായി വര്‍ദ്ധിച്ചതായി നാഷണല്‍ ക്രൈം റിക്കാര്‍ഡ് ബ്യൂറോയുടെ കണക്കുകള്‍ വ്യക്തമാക്കുന്നു. സാമ്പത്തിക തട്ടിപ്പുകാര്‍ക്ക് ഭരണനേതൃത്വം തന്നെ സംരക്ഷണമൊരുക്കുകയും പോലീസ് സംവിധാനത്തെ നിര്‍ജീവമാക്കുകയും ചെയ്തു. രാഷ്ട്രീയ എതിരാളികളെ തേജോവധം ചെയ്യുന്നതിനും സര്‍ക്കാരിന്റെ അഴിമതിക്കും വികലനയങ്ങള്‍ക്കുമെതിരായ പോരാട്ടങ്ങളെ തകര്‍ക്കുന്നതിനും പോലീസിനെ ആയുധമാക്കിയ സര്‍ക്കാര്‍ പോലീസ് സംവിധാനത്തെ പൂര്‍ണ്ണമായും രാഷ്ട്രീയവല്‍ക്കരിച്ചു. ഇതേപോലെ സിവില്‍സര്‍വീസിനെയും രാഷ്ട്രീയവല്‍ക്കരിക്കാനാണ് സര്‍ക്കാര്‍ ശ്രമിക്കുന്നത്. സാമൂഹ്യസുരക്ഷാ ഉത്തരവാദിത്വങ്ങളില്‍ നിന്നും സര്‍ക്കാര്‍ പിന്‍വാങ്ങുന്ന നയത്തിന്റെ ഭാഗമായി കേരളത്തിലും പങ്കാളിത്ത പെന്‍ഷന്‍ അടിച്ചേല്‍പ്പിച്ചു. ഖജനാവിലെ പണവും ജീവനക്കാരുടെ സമ്പാദ്യവും കോര്‍പ്പറേറ്റുകളുടെ കൈകളിലെത്തിക്കാന്‍ ലക്ഷ്യമിട്ടുള്ള പങ്കാളിത്ത പെന്‍ഷന്‍പദ്ധതി കേരളത്തില്‍ നടപ്പാക്കുകയില്ലെന്ന് എല്‍ഡിഎഫ് സര്‍ക്കാര്‍ അസന്നിഗ്ധമായി പ്രഖ്യാപിച്ചിരുന്നു. 2013 ഏപ്രില്‍ 1 ന് ശേഷം സര്‍വീസില്‍ പ്രവേശിച്ച ജീവനക്കാര്‍ക്ക് പങ്കാളിത്ത പെന്‍ഷന്‍ ബാധകമാക്കിയ യുഡിഎഫ് സര്‍ക്കാര്‍ എല്ലാ ജീവനക്കാരേയും പദ്ധതിയില്‍ അകപ്പെടുത്തുന്നതിനുള്ള പരിശ്രമത്തിലാണ്. ഒന്നാം യുപിഎ ഭരണത്തില്‍ ഇടതുപക്ഷ സമ്മര്‍ദ്ദം മൂലം പാസ്സാക്കാന്‍ കഴിയാതിരുന്ന പിഎഫ്ആര്‍ഡിഎ ബില്‍ രണ്ടാം യുപിഎ സര്‍ക്കാര്‍ ബിജെപി യുടെ കൂടി പിന്തുണയോടെ നിയമമാക്കി. പാര്‍ലമെന്റില്‍ ഇടതുപക്ഷത്തിന്റെ അംഗബലം പരിമിതപ്പെട്ടതിന്റെ ഫലമായി ജീവനക്കാരുടെ പെന്‍ഷന്‍ സുരക്ഷയാണ് ഇല്ലാതായത്. പെന്‍ഷന്‍ സുരക്ഷ ഇല്ലാതായതോടെ സിവില്‍സര്‍വീസ് അനാകര്‍ഷകമായി മാറുകയാണ്. മികവും പ്രാഗത്ഭ്യവുമുള്ളവര്‍ ഈ മേഖല കയ്യൊഴിയുന്നത് സിവില്‍സര്‍വീസിന്റെ കാര്യക്ഷമതയെയും പ്രതികൂലമായി ബാധിക്കും.

സിവില്‍സര്‍വീസിനെ ദുര്‍ബലപ്പെടുത്താനുള്ള നീക്കത്തിന്റെ കൂടി ഭാഗമാണ് പെന്‍ഷനടക്കമുള്ള ആനുകൂല്യങ്ങള്‍ അനിശ്ചിതത്വത്തിലാക്കുന്ന നടപടി. എല്‍ഡിഎഫ് സര്‍ക്കാര്‍ നടപ്പിലാക്കിയ ജനപക്ഷ ബദല്‍നയങ്ങള്‍ സിവില്‍സര്‍വീസിന്റെ വ്യാപ്തി വര്‍ദ്ധിപ്പിക്കുന്നതിനും വികസനപ്രവര്‍ത്തനങ്ങളും ക്ഷേമപ്രവര്‍ത്തനങ്ങളും വ്യാപകമാക്കുന്നതിനും ഇടയാക്കി. ലോകസാമ്പത്തിക പ്രതിസന്ധിയുടെ പശ്ചാത്തലത്തിലും സംസ്ഥാനത്തെ പ്രതിസന്ധിയിലേക്ക് തള്ളിവിടാതെ സംരക്ഷിക്കുന്നതിന് എല്‍.ഡി.എഫ് സര്‍ക്കാരിന് കഴിഞ്ഞു. കാര്‍ഷിക-വ്യാവസായിക മേഖലയിലടക്കം പുത്തനുണര്‍വ്വ് സൃഷ്ടിച്ച നിരവധി പദ്ധതികള്‍ക്ക് രൂപം നല്‍കുകയും യഥേഷ്ടം പണമനുവദിക്കുകയും ചെയ്തിരുന്നു. യുഡിഎഫ് ഭരണകാലത്ത് ഏര്‍പ്പെടുത്തിയ നിയമനനിരോധനം പിന്‍വലിച്ചു. മുപ്പതിനായിരത്തിലേറെ പുതിയ തസ്തികകള്‍ സൃഷ്ടിച്ചു. മികച്ച ധനകാര്യമാനേജ്മെന്റിലൂടെ സംസ്ഥാനത്ത് സാമ്പത്തികപ്രയാസങ്ങള്‍ പരിഹരിക്കുന്നതിന് കഴിഞ്ഞു. അഞ്ചുവര്‍ഷക്കാലയളവില്‍ ഒരിക്കല്‍ പോലും ട്രഷറി നിയന്ത്രണം ഏര്‍പ്പെടുത്തുകയോ സംസ്ഥാനം ഓവര്‍ഡ്രാഫ്റ്റിലാവുകയോ ചെയ്തിരുന്നില്ല. ഭരണകാലയളവില്‍ പുതിയ നികുതികളൊന്നും തന്നെ ജനങ്ങള്‍ക്കുമേല്‍ അടിച്ചേല്‍പ്പിക്കാതെ എല്‍ഡിഎഫ് സര്‍ക്കാര്‍ അധികാരമൊഴിയുമ്പോള്‍ 3000 കോടിയിലേറെ രൂപ ട്രഷറി മിച്ചമുണ്ടായിരുന്നു. എല്‍ഡിഎഫ് സര്‍ക്കാര്‍ സൃഷ്ടിച്ച മികച്ച സാമ്പത്തിക അടിത്തറയില്‍ ഭരണമാരംഭിച്ച യുഡിഎഫ് സര്‍ക്കാര്‍ ചുരുങ്ങിയകാലത്തിനുള്ളില്‍ തന്നെ സംസ്ഥാനത്തെ കടക്കെണിയിലാക്കി. സംസ്ഥാനത്തിന്റെ നികുതിവരുമാനം കുത്തനെ ഇടിഞ്ഞു. 2010-11 ല്‍ നികുതി വരുമാനം 23% വര്‍ദ്ധിച്ചെങ്കില്‍ 2012-13 ല്‍ അത് 9 ശതമാനമായി കുറഞ്ഞു.

രണ്ട് ബജറ്റുകളിലായി രണ്ടായിരത്തി അഞ്ഞൂറ് കോടിയിലധികം നികുതി ജനങ്ങളുടെമേല്‍ അടിച്ചേല്‍പ്പിച്ചതിന് ശേഷവും നികുതിവരുമാനത്തില്‍ വര്‍ദ്ധനവുണ്ടാകാത്തത് ദുരൂഹമാണ്. കാര്യക്ഷമമായി നികുതിപിരിവിലേര്‍പ്പെട്ട ജീവനക്കാരെ സ്ഥലംമാറ്റി ദ്രോഹിച്ചും നികുതി കുടിശ്ശികയ്ക്ക് വ്യാപകമായി സ്റ്റേ നല്‍കിയും നികുതി സമാഹരണം തടസ്സപ്പെടുത്തിയ യുഡിഎഫ് സര്‍ക്കാരാണ് പ്രതിസന്ധി ക്ഷണിച്ചുവരുത്തിയത്. നികുതി കുടിശ്ശികയ്ക്ക് സ്റ്റേ നല്‍കുന്നതിന് പിന്നില്‍ വമ്പിച്ച അഴിമതിയുള്ളതായും ആക്ഷേപം ഉയര്‍ന്നിരിക്കുന്നു. അഴിമതിരഹിത വാളയാര്‍ പദ്ധതിയടക്കം നികുതി പിരിവ് ഊര്‍ജ്ജിതപ്പെടുത്തുന്നതിന് എല്‍ഡിഎഫ് സര്‍ക്കാര്‍ കൈക്കൊണ്ട എല്ലാ നടപടികളേയും അട്ടിമറിച്ചതിലൂടെ സൃഷ്ടിച്ച സാമ്പത്തികപ്രതിസന്ധി ജനങ്ങളുടെ തലയില്‍ കെട്ടിവെച്ച്, കരകയറാനുള്ള ശ്രമമാണ് യുഡിഎഫ് സര്‍ക്കാര്‍ നടത്തുന്നത്.

*
എ. ശ്രീകുമാര്‍ chintha weekly

മിനിമം പെന്‍ഷന്‍ ആയിരം രൂപ

എംപ്ലോയീസ് പ്രോവിഡന്‍റ് ഫണ്ടുമായി ബന്ധപ്പെടുത്തി 1995 മുതല്‍ നടപ്പിലാക്കിയ തൊഴിലാളി പെന്‍ഷന്‍ പദ്ധതി മിനിമം പെന്‍ഷന്‍ 1000 രൂപ ഉറപ്പാക്കുംവിധം ഭേദഗതി ചെയ്യപ്പെടും. അതോടൊപ്പം അതിന് അര്‍ഹമായ ശമ്പളത്തിന്റെ നിലവിലുള്ള ഉയര്‍ന്ന പരിധി മാസം 6500 രൂപ എന്നത് 15,000 രൂപയായി ഉയര്‍ത്തുകയും വേണം. ഫെബ്രുവരി 5ന് അടിയന്തിരമായി വിളിച്ചുചേര്‍ത്ത സെന്‍ട്രല്‍ ബോര്‍ഡ് ഓഫ് ട്രസ്റ്റീസിന്റെ (സിബിടി) മീറ്റിങ്ങിലായിരുന്നു ഇതേക്കുറിച്ചുള്ള തീരുമാനമെടുത്തത്. ഏറെ വൈകിയാണെങ്കിലും ഇപ്പോള്‍ വരുത്തിയ ഭേദഗതികളെ സിബിടിയിലെ ട്രേഡ് യൂണിയന്‍ പ്രതിനിധികളെല്ലാം സ്വാഗതം ചെയ്യകയുണ്ടായി. എന്നാല്‍ പെന്‍ഷന്‍ പദ്ധതിയുമായി ബന്ധപ്പെട്ട വിവിധ വിഷയങ്ങള്‍ ഉന്നയിക്കപ്പെടുകയും അതോടൊപ്പം മറ്റുചില നിര്‍ദ്ദേശങ്ങള്‍ മീറ്റിങ്ങില്‍ മുന്നോട്ടുവയ്ക്കപ്പെടുകയും ചെയ്തു. സിബിടിയിലെ സിഐടിയു പ്രതിനിധി എ കെ പത്മനാഭന്‍ യോഗത്തില്‍ പങ്കെടുത്തു. മിനിമം പെന്‍ഷന്‍ ഉയര്‍ത്തുകയും അതോടൊപ്പം സ്കീമില്‍ മറ്റുചില മാറ്റങ്ങള്‍ വരുത്തുകയും ചെയ്യണമെന്ന ആവശ്യം ട്രേഡ് യൂണിയനുകള്‍ ദീര്‍ഘകാലമായി ഉയര്‍ത്തിക്കൊണ്ടുവരികയായിരുന്നു. മിനിമം പെന്‍ഷന്‍ ആയിരം രൂപയായി ഉയര്‍ത്തുക എന്ന ആവശ്യം സംയുക്ത ട്രേഡ്യൂണിയന്‍ പ്രസ്ഥാനങ്ങള്‍ മുന്നോട്ടുവെച്ച 10 കാര്യങ്ങളില്‍ ഒന്നായിരുന്നു; അതിനായുള്ള പ്രക്ഷോഭങ്ങള്‍ രാജ്യവ്യാപകമായി സംഘടിപ്പിച്ചുവരികയായിരുന്നു. ഇപിഎഫ് പെന്‍ഷന്‍കാരുടെ സംഘടനകളും വിവിധങ്ങളായ പ്രക്ഷോഭങ്ങള്‍ സംഘടിപ്പിച്ചുവരികയായിരുന്നു. ദീര്‍ഘനാളായി നിലനില്‍ക്കുന്ന ഈ പ്രശ്നം സംബന്ധിച്ച് 2010ല്‍ ഒരു വിദഗ്ധകമ്മിറ്റി പഠനം നടത്തുകയുണ്ടായി. അത് സിബിടിയില്‍ ചര്‍ച്ചചെയ്തു. 2012ല്‍ വിഷയം ക്യാബിനറ്റിന് വിട്ടു. കഴിഞ്ഞ 2 വര്‍ഷമായി അതവിടെ തീരുമാനമാകാതെ ഇരിക്കുകയായിരുന്നു.

തുടക്കം

തൊഴിലാളി പെന്‍ഷന്‍ പദ്ധതി (ഇപിഎസ്) 1995 നെതിരെയുള്ള പോരാട്ടത്തിന്റെ ചരിത്രം തുടങ്ങുന്നത് അത് ആരംഭിക്കുന്നതുമുതലാണ്. രാജ്യത്തെ തൊഴിലെടുക്കുന്ന ജനത, പ്രത്യേകിച്ചും ഒരുതരത്തിലുള്ള പെന്‍ഷന്‍ പദ്ധതിയിലുമില്ലാത്തവര്‍, ഗ്രാറ്റുവിറ്റിയും പ്രോവിഡന്റ് ഫണ്ടും കൂടാതെ, ഒരു മൂന്നാം ആനുകൂല്യം എന്ന നിലയില്‍ പെന്‍ഷന്‍ വേണം എന്ന ആവശ്യം ഉന്നയിച്ചുവരികയായിരുന്നു. ഇതിനൊരു പരിഹാരം കണ്ടെത്തേണ്ടതിനുപകരം ഗവണ്‍മെന്റ്, എംപ്ലോയീസ് സ്കീം എന്ന ആശയം അടിച്ചേല്‍പ്പിച്ച്, നിര്‍ബന്ധമായും അത് നടപ്പിലാക്കുകയായിരുന്നു. പദ്ധതിയെപ്പറ്റി ആഴത്തില്‍ പഠിച്ച സിഐടിയു അനേകം പ്രശ്നങ്ങള്‍ ചൂണ്ടിക്കാണിക്കുകയും തൊഴിലാളികള്‍ക്ക് നേട്ടമുണ്ടാകത്തക്കവിധം ആയിരിക്കണം പദ്ധതി നടപ്പാക്കേണ്ടതെന്ന ആവശ്യം ഉന്നയിക്കുകയും ചെയ്തു. എന്നാല്‍ പദ്ധതി തൊഴിലാളികള്‍ക്ക് പ്രയോജനകരമാണെന്ന് "തെളിയിക്കുന്നതി"നായി ഗവണ്‍മെന്റ് അവ്യക്തമായ അനേകം വാദമുഖങ്ങള്‍ ഉന്നയിച്ചു. സുപ്രീംകോടതി പോലും ആ വാദമുഖങ്ങള്‍ അംഗീകരിക്കുകയാണുണ്ടായത്. ഈ പ്രശ്നത്തില്‍ സിഐടിയു രാജ്യവ്യാപകമായി ഒരു ദിവസത്തെ പണിമുടക്ക് നടത്തി. വര്‍ഷങ്ങള്‍ കഴിഞ്ഞപ്പോള്‍, പദ്ധതിയ്ക്കെതിരെ അന്ന് യൂണിയന്‍ ഉയര്‍ത്തിയ കാര്യങ്ങള്‍ ശരിയാണെന്നു തെളിഞ്ഞുകഴിഞ്ഞു.

തുച്ഛമായ പെന്‍ഷന്‍ തുക, തൊഴിലാളികളെ രോഷാകുലരാക്കി. ഇപ്പോള്‍പോലും 2.92 ലക്ഷം പെന്‍ഷന്‍കാര്‍ക്ക് മാസം 250 രൂപയില്‍ താഴെയാണ് കിട്ടുന്നത്. 27 ലക്ഷത്തിലേറെ പെന്‍ഷന്‍കാര്‍ക്കും മാസം 1000 രൂപയില്‍ താഴെയാണ് ലഭിക്കുന്നത്. ഇതിനിടയ്ക്ക് 2008ല്‍ ചില പ്രധാനപ്പെട്ട ആനുകൂല്യങ്ങളായ 100 മാസത്തെ മൊത്തം തുകയുടെ മൂന്നിലൊന്ന് കമ്യൂട്ടേഷന്‍ ആയി ഒന്നിച്ചു നല്‍കുന്നതും "നിക്ഷേപ ആദായ"വും ഏകപക്ഷീയമായി പിന്‍വലിക്കുകയുണ്ടായി. ഈ രണ്ട് ആനുകൂല്യങ്ങളും നിര്‍ബന്ധിത പെന്‍ഷന്‍ പദ്ധതിയ്ക്കെതിരെയുള്ള കേസില്‍ സുപ്രീംകോടതി വലിയ നേട്ടമായി ഉയര്‍ത്തിപ്പിടിച്ച കാര്യങ്ങളാണ്.

ധനകാര്യമന്ത്രാലയത്തിന്റെ ആവശ്യങ്ങള്‍

മിനിമം പെന്‍ഷന്റെ കാര്യത്തില്‍ നിലവില്‍ വരുത്തിയിട്ടുള്ള ഭേദഗതികളും വേതനപരിധി ഉയര്‍ത്തലും ജനുവരി 21ന് ധനകാര്യ മന്ത്രാലയം അംഗീകരിച്ചിരുന്നു. സിബിടിയില്‍ ജനുവരി 21ന് ധനകാര്യമന്ത്രാലയം സര്‍ക്കുലേറ്റ്ചെയ്ത കുറിപ്പിനനുസരിച്ച്, ഭേദഗതിയ്ക്കായുള്ള മേല്‍പറഞ്ഞ നിര്‍ദേശങ്ങള്‍ പരസ്പരം ബന്ധപ്പെട്ടതും സമഗ്രമായ നിര്‍ദ്ദേശങ്ങളുടെ ഒരു ഭാഗവുമാണ്. സിബിടിയില്‍ ചര്‍ച്ചചെയ്യപ്പെട്ട പ്രധാന നിര്‍ദേശങ്ങള്‍ മിനിമം പെന്‍ഷന്‍ ഉറപ്പാക്കുന്നത് ഒരു വര്‍ഷത്തേക്കു (2014-15) മാത്രമാണെന്നും അത് 2014 ഏപ്രില്‍ 1 മുതല്‍ നടപ്പിലാക്കും എന്നുമുള്ള നിര്‍ദേശം. "ഒരു വര്‍ഷം മാത്രം" എന്ന നിര്‍ദേശത്തെ സിബിടിയിലെ ട്രേഡ്യൂണിയന്‍ പ്രതിനിധികള്‍ എതിര്‍ത്തു. ഒരു വര്‍ഷത്തേക്കു മാത്രമായി പദ്ധതി ഭേദഗതി വരുത്താന്‍ കഴിയില്ല എന്ന് തൊഴില്‍ വകുപ്പിനുപോലും ബോധ്യപ്പെട്ടു. അവര്‍ ചൂണ്ടിക്കാട്ടിയ മറ്റൊരുകാര്യം, "ഒരിക്കല്‍ മാറ്റം നടപ്പാക്കിക്കഴിഞ്ഞാല്‍ അത് തിരിച്ചുകൊണ്ടുപോകാന്‍ കഴിയില്ല" എന്നതാണ്. അവസാനം തൊഴില്‍വകുപ്പ ്മന്ത്രി, ഓസ്കാര്‍ ഫെര്‍ണാണ്ടസ് ഒരു വര്‍ഷത്തിനുശേഷം വര്‍ധിപ്പിച്ച പെന്‍ഷന്‍ വെട്ടിക്കുറയ്ക്കില്ലെന്ന് ഉറപ്പുതന്നു. ധനകാര്യ മന്ത്രാലയത്തിന്റെ നിര്‍ദേശങ്ങളില്‍ മിക്കതും തൊഴിലാളികളുടെ താല്‍പര്യങ്ങളെ ഹനിക്കുന്നതായിരുന്നു. സിഐടിയുവിന്റെയും മറ്റ് ട്രേഡ്യൂണിയനുകളുടെയും പ്രതിനിധികള്‍, നിലവിലുള്ള ആനുകൂല്യങ്ങള്‍ വെട്ടിച്ചുരുക്കുകയോ കുറയ്ക്കുകയോ ചെയ്യരുതെന്ന് ശക്തമായി ആവശ്യപ്പെട്ടു. ം ഇപ്പോള്‍ പെന്‍ഷന് അര്‍ഹമായ ശമ്പളമായി കണക്കാക്കുന്നത് അവസാനത്തെ 12 മാസത്തെ ശമ്പളത്തിന്റെ ശരാശരിയാണ്. ഇത് അവസാന 60 മാസത്തെ ശമ്പളത്തിന്റെ ശരാശരി ആക്കണമെന്നതായിരുന്നു നിര്‍ദേശം. ഇത് തീര്‍ച്ചയായും പെന്‍ഷന് അര്‍ഹമായ ശമ്പളത്തെയും പെന്‍ഷന്‍ തുകയെയും കുറയ്ക്കുന്നതായിരിക്കും.

ശമ്പളത്തിന്റെ 1.6% വിഹിതം ഇന്ത്യാ ഗവണ്‍മെന്റ് ഇപിഎസിലേക്ക് മാറ്റുന്നു. ശമ്പള പരിധി ഉയര്‍ത്തിയപ്പോള്‍ ഈ വിഹിതം ചുരുക്കാന്‍ ഗവണ്‍മെന്റ് താല്‍പര്യപ്പെടുന്നു. ഉയര്‍ന്ന വേതന പരിധി കവിഞ്ഞവര്‍ സ്വമേധയാ ഇപിഎസില്‍ വിഹിതമടയ്ക്കുകയാണെങ്കില്‍ സര്‍ക്കാര്‍ ഈ 1.16 ശതമാനം അടയ്ക്കേണ്ടതില്ലെന്നും ആ വിഹിതംകൂടി തൊഴിലാളികള്‍തന്നെ അടയ്ക്കണമെന്നുമാണ് നിര്‍ദേശം. കുറഞ്ഞ ശമ്പളം വാങ്ങിയിരുന്നപ്പോള്‍ മുതല്‍ ഇപിഎസ് അംഗങ്ങളായിരുന്നവര്‍ക്കുപോലും 15,000 രൂപവരെ 1.16% എന്ന പരിധിയില്‍പെടുത്തണമെന്നതാണ് മറ്റൊരു നിര്‍ദേശം. ഉയര്‍ന്ന പരിധി 15,000 രൂപ ആയി ഉയര്‍ത്തുമ്പോഴും 6500 രപ എന്ന പരിധിയില്‍ ഉണ്ടായിരുന്ന എല്ലാ ആനുകൂല്യങ്ങളും തുടരണമെന്ന് ട്രേഡ്യൂണിയനുകള്‍ ആവശ്യപ്പെട്ടു.

സര്‍വീസില്‍നിന്നും പിരിയുന്നസമയത്ത് പെന്‍ഷന് അര്‍ഹതയുള്ള സര്‍വീസ് ഇല്ലാത്തവര്‍ക്ക് മൊത്തം തുകയും പിന്‍വലിക്കാന്‍ നിലവില്‍ കഴിയുന്നതാണ്. എന്നാല്‍ ഇങ്ങനെ പിന്‍വലിക്കുവാനുള്ള അവസരം എടുത്തുകളയണമെന്നാണ് ധനകാര്യമന്ത്രാലയം ആവശ്യപ്പെട്ടത്. ഇതിനെ തൊഴിലാളി പ്രതിനിധികള്‍ ശക്തിയായി എതിര്‍ത്തു. തൊഴില്‍ മന്ത്രാലയംപോലും പറഞ്ഞത്, ""ഇത് നീതീകരിക്കാനാകാത്തതാണ്. നിലവില്‍ തൊഴിലാളികള്‍ക്ക് സര്‍വീസിന്റെ തുടര്‍ച്ചയോ അല്ലെങ്കില്‍ ഏതെങ്കിലും മെമ്പര്‍മാര്‍ക്ക് പകരം ജോലിയോ/തൊഴിലോ ഉറപ്പുനല്‍കാന്‍പോലും കഴിയില്ലെന്നതാണ് വസ്തുത"".

മറ്റൊരു നിര്‍ദേശം പെന്‍ഷന് അര്‍ഹതയ്ക്കുള്ള പ്രായപരിധി 58ല്‍നിന്നും 60 ആയി വര്‍ധിപ്പിക്കണമെന്നതായിരുന്നു. ഭൂരിഭാഗം വ്യവസായ സ്ഥാപനങ്ങളിലും പെന്‍ഷന്‍പ്രായം സാര്‍വത്രികമായി 58 ആയിരിക്കുമ്പോള്‍, പെന്‍ഷന്‍ പ്രായം 60 ആക്കുന്നതുവരെ ഇത് അംഗീകരിക്കാന്‍ കഴിയില്ലെന്ന് ട്രേഡ് യൂണിയന്‍ പ്രതിനിധികള്‍ വ്യക്തമാക്കി. ം മറ്റൊരു നിര്‍ദേശം, റിഡക്ഷന്‍ റേറ്റ് പ്രതിവര്‍ഷം 4% എന്നത് 6% ആക്കി വര്‍ധിപ്പിക്കുക എന്നതായിരുന്നു. മുമ്പ് ഇത് 6% ആയിരുന്നതാണ്; പിന്നീട് 3% ആക്കി; ഒടുവില്‍ 2008ല്‍ 4% ആയി വര്‍ദ്ധിപ്പിക്കുകയാണുണ്ടായത്. പെന്‍ഷന്‍കാര്‍ക്ക് "നേരത്തേ പെന്‍ഷന്‍" കിട്ടുമ്പോഴാണ് ഇത് ബാധകമാകുന്നത്. നിലവിലുള്ള ആനുകൂല്യങ്ങള്‍ വെട്ടിക്കുറയ്ക്കുന്നതിന് ഇത് ഇടയാക്കും.

ഇപിഎസിലെ, നിലവിലുള്ള നിക്ഷേപ രീതിയില്‍ കാതലായ മാറ്റം വരുത്തണമെന്ന് ധനകാര്യ മന്ത്രാലയം ആവശ്യപ്പെട്ടു. ഫണ്ടുകള്‍, ഷെയര്‍മാര്‍ക്കറ്റില്‍ നിക്ഷേപിക്കണമെന്ന നിര്‍ദേശം നേരത്തേതന്നെ ട്രേഡ്യൂണിയനുകള്‍ തള്ളിക്കളഞ്ഞിരുന്നു. യൂണിയന്‍ പ്രതിനിധികള്‍ അത് വീണ്ടും നിരസിക്കുകയും നിക്ഷേപ മാര്‍ഗനിര്‍ദേശങ്ങള്‍ സിബിടിയിലൂടെ മാത്രം തീരുമാനിക്കണമെന്ന് ശഠിക്കുകയും ചെയ്തു. ം 2014 ഏപ്രില്‍ 1 മുതല്‍ റിട്ടയര്‍മെന്‍റ് സമയത്തെ വേതനത്തിന്റെ അടിസ്ഥാനത്തില്‍ മൊത്തം പെന്‍ഷന്‍ കണക്കാക്കുന്നതിനുപകരം ഒരു നിശ്ചിത പെന്‍ഷന്‍ ആയിരിക്കും കണക്കാക്കുക എന്നതായിരുന്നു മറ്റൊരു നിര്‍ദേശം. ഒരു നിബന്ധനകൂടി കൂട്ടിച്ചേര്‍ക്കാനുള്ള ഒരു നിര്‍ദേശംകൂടി മുന്നോട്ടുവെയ്ക്കപ്പെട്ടു - ""ഗവണ്‍മെന്റിന് ഈ നിയമമനുസരിച്ച് ആവശ്യമെങ്കില്‍ കുടുംബ പെന്‍ഷന്‍കാരുടെ ഏതെങ്കിലും കാറ്റഗറിയുടെയോ എല്ലാ വിഭാഗത്തിന്റെയോ ഇത്തരം സബ്സിഡി മൊത്തമായോ ഭാഗികമായോ തുടരുകയോ നിര്‍ത്തലാക്കുകയോ വര്‍ദ്ധിപ്പിക്കുകയോ കുറയ്ക്കുകയോ ചെയ്യാം"". ആനുകൂല്യങ്ങള്‍ ഇല്ലാതാക്കാന്‍ മാത്രമുതകുന്ന ഗവണ്‍മെന്റിന്റെ ഈ തീരുമാനത്തെ സിഐടിയു ശക്തമായി എതിര്‍ത്തു. തൊഴില്‍മന്ത്രി ഗവണ്‍മെന്റിന്റെ ഈ നിര്‍ദേശത്തെ ന്യായീകരിക്കുകയായിരുന്നു. കമ്യൂട്ടേഷന്‍ പെന്‍ഷന്‍ കമ്യൂട്ടുചെയ്ത് നൂറുമാസത്തിനുശേഷംപോലും കമ്യൂട്ട്ചെയ്ത നിലയിലുള്ള കുറഞ്ഞ പെന്‍ഷന്‍ കിട്ടുന്നത് പെന്‍ഷന്‍കാരെ തുടര്‍ന്നും ചൂഷണംചെയ്യുകയാണെന്ന വിഷയം സിഐടിയു പ്രതിനിധികള്‍ ഉയര്‍ത്തിക്കൊണ്ടുവന്നു. കമ്യൂട്ടുചെയ്ത തുക തിരിച്ചു ഈടാക്കി കഴിയുന്നതോടെ ഒറിജിനല്‍ പെന്‍ഷന്‍ പുനഃസ്ഥാപിക്കണമെന്നും സിഐടിയു ആവശ്യപ്പെട്ടു.

തൊഴിലുടമകളുടെ ആവശ്യങ്ങള്‍

വേതനപരിധി ഒറ്റയടിക്ക് 15,000 ആയി വര്‍ദ്ധിപ്പിക്കുന്നതിനെ തൊഴിലുടമകളുടെ പ്രതിനിധികള്‍ എതിര്‍ത്തു. ആദ്യം 10,000 മാത്രമായി ഉയര്‍ത്തുകയും പിന്നത്തെ ഘട്ടത്തില്‍ 15,000 ആക്കുകയും ചെയ്താല്‍ മതിയെന്നും അവര്‍ ആവശ്യപ്പെട്ടു. ഇതിലൂടെയുണ്ടാകുന്ന വര്‍ദ്ധിച്ച ചെലവ് ചെറുകിട-ഇടത്തരം സ്ഥാപനങ്ങളെ ബാധിക്കുന്ന പ്രശ്നവും അവര്‍ ഉന്നയിച്ചു.

മിനിമം പെന്‍ഷന്റെ വിഷയം ഗവണ്‍മെന്റ് അംഗീകരിച്ചെങ്കില്‍കൂടിയും മറ്റ് നിര്‍ദേശങ്ങളുടെ കാര്യത്തില്‍ അവര്‍ അവസാനം ചെയ്യുന്നതെന്താണെന്ന് ഗവണ്‍മെന്റിന്റെ നോട്ടിഫിക്കേഷന്‍ വരുമ്പോള്‍ മാത്രമായിരിക്കും അറിയുന്നത്. നിലവിലുള്ള ആനുകൂല്യങ്ങള്‍ വെട്ടിക്കുറയ്ക്കാതിരിക്കാന്‍ ട്രേഡ് യൂണിയനുകള്‍ ജാഗ്രത്താവേണ്ടതുണ്ട്. കാലങ്ങളായി നമ്മുടെ സമരങ്ങളില്‍ നാം ഉന്നയിക്കുന്ന ആവശ്യങ്ങളായ, എല്ലാ പെന്‍ഷന്‍കാരുടെയും പെന്‍ഷന്‍ വര്‍ദ്ധിപ്പിക്കുക, പെന്‍ഷന്‍ ജീവിത നിലവാര സൂചികയ്ക്കനുസരിച്ചായിരിക്കുക, പെന്‍ഷന്‍ കമ്യൂട്ടേഷന്‍ പുനഃസ്ഥാപിക്കുക, നിക്ഷേപ ആനുകൂല്യത്തില്‍നിന്ന് ലഭിക്കേണ്ട ആദായം എന്നിവ ഫലപ്രദമായി ഉയര്‍ത്തിക്കൊണ്ടുവരേണ്ടതുണ്ട്.

*
എ കെ പത്മനാഭന്‍ ചിന്ത വാരിക

Employees Provident Fund and related Schemes

Employees Provident Fund is in existence, as a Social Security benefit, from 15th November 1951. At first, it was implemented through an ordinance and later on through an enactment now known as Employees Provident Funds and Miscellaneous Provisions Act 1951.

The Act and the Schemes are administered by a Tri-partite Board, known as Central Board of Trustees. CBT has representatives from Central and State Governments, Employers and Employees.

The schemes under the EPF are – Employees Provident Fund Scheme (EPF), Employees Pension Scheme 1995 (EPS) and Employees Deposit linked Insurance Scheme 1976 (EDLI). These Schemes are administered by the offices of EPF. At present there are 120 EPF offices all over the country.

The Act now extends to 187 categories of establishments. Any of these establishments employing more than 19 persons automatically comes under the purview of the Act.

For any worker, enrolled as a subscriber to EPF, the employer has to contribute 12% of wage – basic pay and Dearness Allowance – and the worker also will contribute an equal amount. More than this, employers will have to pay 1.61% as administrative expenses. Jute, Beedi, Brick, Coir and Guar Gum factory establishments the rate of contribution is 10%. On what constitutes Wage and Allowance for calculating contribution, there are some differences of opinion and is under discussion. The contributions are statutorily payable upto a prescribed wage ceiling which is Rs.6500 per month. This ceiling is continuing from the year 2001.

From the contributions, the employees portion (12%) and 3.67% from employer is accounted to EPF. The balance amount of 8.67% is credited to the Pension Scheme. Govt. of India pays 1.16% to the pension fund.

From EPF, the total accumulation plus interest is paid upon retirement, resignation or death.

Partial withdrawals are allowed for specific expenses such as house construction, higher education, marriage, serious illness etc.

A worker, who is already a number of the scheme, on the event of joining another establishment can transfer his account and ensure continuity of service in the Scheme and obtain consequential benefits.

All members in EPF and for EPS have to submit nomination forms. A number can nominate one or more family members. For Pension Schemes, all details about spouse and children have to given.

Employees Pension Scheme gives monthly pension on superannuation, retirement, disability, survivor, widow(es) and children. These pensions are calculated on the basis of average salary during the preceding 12 months from date of exist from scheme and also on total years of employment. The amount is very meager and struggles are going on to ensure at least Rs.1000 per month as pension. It is estimated that if the Central Govt.’s contribution to pension fund, is raised from 1.16% to 1.79 % minimum pension of Rs.1000 can be ensured.

Employees Deposit linked Insurance Scheme is a benefit provided in case of death of an employee who was a member of the Scheme at the time of death. Family will get 20 times the average wage of the last 12 months of member. With the ceiling of R.6500 for eligibility, the maximum amount payable is 1.3 lakhs.

With computerization of accounts, a member can now view on line, status of his application, the transaction and account details.

Though considered to be one of the largest Social Security Schemes in the world, there are many a hurdles in proper implementation of schemes and ensuring benefits to workers. Many changes are required in the Schemes and also in benefits.

The demands for raising wage ceiling of Rs.6500 to at least 10,000, increase in the interest rate, and pension benefits are long pending. In the Pension Scheme, many unilateral changes taking away some benefits have been made by the Govt. Without even discussions in CBT, which is suppsed to be the administering authority. Actually, policy decisions are made by the Govt. of India though Finance Department.

It is a fact that many apprehensions raised by CITU at the time of introduction of Pension Scheme in 1995 has come true and it required more united struggles to make it a beneficial scheme.

*
AKP

Some EPF Statistics

¨ 855 lakhs of workers from 6.91 lakhs of establishments are members;
¨ There are 41 lakh pensioners under the Scheme;
¨ In the year 2011-12, EPFO received Rs.70,889 crores as contributions and Rs.26,914 crores were paid as benefits;
¨ As on 31.3.2012, a total of Rs.3583 crores was pending for recovery from employers!
¨ As on 31.3.2012, only 19828 werein employment, with 5263 existing vacancies in EPFO.

Unclaimed Dividends!

We heard about unclaimed money in Provident Fund accounts and also in the bank accounts.

Now, there are reports about huge amounts of unclaimed and unpaid dividends. 1406 companies have an amount of Rs.1101.35 crores in this heading.

The largest ten companies are Reliance Industries (112.88 crores), ITC (74.34 crores), Hindustan Unilever (49.05 crores), Hero Motor Corp. (40.22 crores), Tata Steel (38.53 crores), Lakshmi Vilas Bank (34.14 crores), ICICI Bank (19.17 crores), L&T (18.69 crores), Mangalore Refinery (14.23 Crores), IDBI Bank (13.59 crores).

Money lying in these unclaimed accounts gets transferred to Investor Education and Protection fund after 7 years and can not be claimed if transferred, says a report in an economic daily.
*
courtesy: Working Class, September 2013

പെന്‍ഷനും ചൂതാട്ടത്തിന്

തൊഴിലെടുക്കുന്നവര്‍ക്കുള്ള സാമൂഹ്യസുരക്ഷാ അവകാശങ്ങള്‍ ഒന്നൊന്നായി കവര്‍ന്നെടുക്കുകയാണ് യുപിഎ സര്‍ക്കാര്‍. സംഘടിത- അസംഘടിത മേഖലകളിലെ തൊഴിലാളികളില്‍നിന്നും സര്‍ക്കാര്‍ ജീവനക്കാരില്‍നിന്നും അവരുടെ അവകാശങ്ങള്‍ കൊള്ളയടിച്ച് കമ്പോളത്തിലെ ചൂതാട്ടത്തിനെറിഞ്ഞുകൊടുക്കുന്നത് പതിവുരീതിയായിരിക്കുന്നു. അതിന്റെ ഒടുവിലത്തെ ഉദാഹരണമാണ് യുപിഎ സര്‍ക്കാര്‍ പാര്‍ലമെന്റില്‍ അവതരിപ്പിച്ച് പാസാക്കിയ പെന്‍ഷന്‍ ഫണ്ട് റഗുലേറ്ററി വികസന അതോറിറ്റി നിയമം. ഈ നിയമത്തിലൂടെ പെന്‍ഷന്‍ രംഗത്തേക്ക് വിദേശ കുത്തകകളുടെ കടന്നുവരവിന് വഴിയൊരുക്കുകയാണ് സര്‍ക്കാര്‍. ബുധനാഴ്ച ലോക്സഭ പാസാക്കിയ ബില്‍ വെള്ളിയാഴ്ച രാജ്യസഭയും വോട്ടെടുപ്പിലൂടെയാണ് പാസാക്കിയത്. പെന്‍ഷന്‍ മേഖലയില്‍ വിദേശനിക്ഷേപം അനുവദിക്കരുതെന്ന് ആവശ്യപ്പെടുന്നതടക്കം സിപിഐ എം മുന്നോട്ടുവച്ച ഭേദഗതികള്‍ സഭ വോട്ടിനിട്ട് തള്ളുകയായിരുന്നു. ധനമന്ത്രി പി ചിദംബരം കൊണ്ടുവന്ന ബില്ലിന് ബിജെപി പൂര്‍ണപിന്തുണ നല്‍കിയതിനാല്‍ സര്‍ക്കാരിന് ഇരുസഭയിലും ബുദ്ധിമുട്ടുണ്ടായില്ല.

പെന്‍ഷന്‍ എന്ന ക്ഷേമ ആനുകൂല്യം നിയമവിരുദ്ധമാക്കിയെന്നതാണ് ഇതിന്റെ ഏറ്റവും വലിയ പ്രത്യാഘാതം. 2004 വരെ കേന്ദ്രസര്‍ക്കാര്‍ സര്‍വീസില്‍ ചേര്‍ന്നവര്‍ക്ക് റിട്ടയര്‍മെന്റ് ആനുകൂല്യമായി പെന്‍ഷന്‍ നല്‍കണമെന്നത് നിര്‍ബന്ധമായിരുന്നു. പുതിയ ബില്ലോടെ നിയമാനുസൃത പെന്‍ഷന്‍ ഇല്ലാതായി. സര്‍ക്കാര്‍ മേഖലയില്‍ ഇല്ലാത്ത പെന്‍ഷന്‍ മറ്റ് മേഖലകളിലും അവകാശപ്പെടാനാവില്ല എന്ന ഇരട്ടനേട്ടമാണ് സര്‍ക്കാരും മുതലാളിത്ത ശക്തികളും ചേര്‍ന്ന് പങ്കിടുന്നത്. ഇപ്പോള്‍ നിയമാനുസൃത പെന്‍ഷന്‍ വാങ്ങുന്നവര്‍ക്ക് ഭാവിയില്‍ അത് ലഭിക്കാതിരിക്കാനുള്ള സാധ്യതയും തള്ളിക്കളയാനാവില്ല.

പ്രോവിഡന്റ് ഫണ്ടിലും ഇഎസ്ഐ ആനുകൂല്യങ്ങളിലും കൈവച്ചശേഷമാണ് പെന്‍ഷനില്‍ പിടിമുറുക്കുന്നത്. ഇപ്പോള്‍ പാസാക്കിയ ബില്‍ നിയമമാകുന്നതോടെ 2004 മുതല്‍ നിലവിലുള്ള താല്‍ക്കാലിക പെന്‍ഷന്‍ ഫണ്ട് അതോറിറ്റിക്ക് നിയമാനുസൃതമായ അധികാരങ്ങള്‍ കൈവരും. അധ്യക്ഷനും മൂന്ന് സ്ഥിരാംഗങ്ങളും മൂന്ന് താല്‍ക്കാലിക അംഗങ്ങളും അടങ്ങുന്ന അതോറിറ്റിയില്‍ രജിസ്റ്റര്‍ചെയ്യുന്ന വിദേശസ്ഥാപനങ്ങള്‍ ഉള്‍പ്പെടെയുള്ള സ്വകാര്യ- പൊതുസ്ഥാപനങ്ങളാകും പെന്‍ഷന്‍ ഫണ്ട് കൈകാര്യംചെയ്യുക. 26 ശതമാനം വിദേശനിക്ഷേപമാണ് തുടക്കമെന്ന നിലയില്‍ പെന്‍ഷന്‍ മേഖലയില്‍ ബില്ലിലൂടെ അനുവദിക്കുന്നത്. പെന്‍ഷന്‍ വിദേശനിക്ഷേപത്തെ ഇന്‍ഷുറന്‍സ് മേഖലയുമായി ബന്ധപ്പെടുത്തിയിരിക്കുന്നതിനാല്‍ ഇന്‍ഷുറന്‍സ് മേഖലയില്‍ ഭാവിയില്‍ വിദേശനിക്ഷേപ പരിധി വര്‍ധിപ്പിച്ചാല്‍ അത് പെന്‍ഷന്‍മേഖലയിലും പ്രതിഫലിക്കും.

കേന്ദ്രസര്‍ക്കാരും കേരളമടക്കം ഇരുപതിലേറെ സംസ്ഥാനങ്ങളും നടപ്പാക്കിയ പുതിയ പങ്കാളിത്ത പെന്‍ഷന്‍ പദ്ധതി ഇനി ദേശീയ പെന്‍ഷന്‍ പദ്ധതിയെന്ന പേരില്‍ അറിയപ്പെടും. അസംഘടിതമേഖലയില്‍ പണിയെടുക്കുന്നവര്‍ക്കായി നടപ്പാക്കിയ സ്വാവലംബന്‍ പദ്ധതിയും പെന്‍ഷന്‍ അതോറിറ്റിക്ക് കീഴിലേക്ക് മാറും. പണം ഓഹരിവിപണികളില്‍ നിക്ഷേപിച്ച് ലാഭവിഹിതം പെന്‍ഷന്‍ അക്കൗണ്ടിലേക്ക് മാറ്റും. വിപണിഅധിഷ്ഠിത ഗ്യാരന്റി സംവിധാനമല്ലാതെ ആനുകൂല്യങ്ങളുടെ കാര്യത്തില്‍ വ്യക്തമോ അല്ലാത്തതോ ആയ ഉറപ്പുണ്ടാകില്ലെന്ന് ബില്ലിന്റെ 20(2) ജി വകുപ്പില്‍ വ്യക്തമായി പറഞ്ഞിട്ടുണ്ട്. വ്യക്തിഗത ഫണ്ടില്‍നിന്ന് പണം പിന്‍വലിക്കാന്‍ അനുവാദമുണ്ടാകില്ല. കര്‍ക്കശ വ്യവസ്ഥകളോടെയല്ലാതെ പിന്മാറാനുമാകില്ല.

ആരോഗ്യമുള്ള കാലത്ത് രാജ്യത്തിനുവേണ്ടി പ്രവര്‍ത്തിക്കുന്നതിന് പ്രതിഫലമായി വാര്‍ധക്യകാലത്ത് ലഭിക്കുന്ന സുരക്ഷയായിരുന്നു പെന്‍ഷന്‍. ആ ക്ഷേമസങ്കല്‍പ്പം വിപണിയുടെ വാഴ്ചയ്ക്ക് വഴിമാറുകയാണ്. പെന്‍ഷന്‍ ഫണ്ടില്‍ സൂക്ഷിക്കുന്ന തുക ഓഹരിക്കമ്പോളത്തില്‍ നിക്ഷേപിച്ച് ചൂതാടാം. അതില്‍ ജയിച്ചാല്‍ മെച്ചം, ഇല്ലെങ്കില്‍ നഷ്ടം എന്നതാണ് പുതിയ സങ്കല്‍പ്പം. പെന്‍ഷന്‍ഫണ്ടില്‍ സൂക്ഷിക്കുന്ന പണം രാജ്യത്തിന്റെ വികസനത്തിനായി വിനിയോഗിക്കുന്നതിനു പകരം ആഗോള മൂലധനശക്തികള്‍ക്ക് ചൂതാടാനായി നല്‍കുന്നുവെന്നതാണ് പുതിയ മാറ്റം. 2003 മാര്‍ച്ചിലാണ് ആദ്യം ബില്ല് അവതരിപ്പിച്ചത്. പിന്നീട് 2005ല്‍ ഒന്നാം യുപിഎ സര്‍ക്കാരിന്റെ കാലത്തും അവതരിപ്പിച്ചു. ഇടതുപക്ഷം ശക്തമായി ചെറുത്തതിനാല്‍ ബില്ലുമായി മുന്നോട്ടുപോയില്ല. പിന്‍വാങ്ങിയ യുപിഎ സര്‍ക്കാര്‍ അതിന്റെ രണ്ടാമൂഴത്തില്‍ 2011ല്‍ വീണ്ടും ബില്‍ അവതരിപ്പിച്ചു. അത് സ്റ്റാന്‍ഡിങ് കമ്മിറ്റിക്ക് വിടുകയായിരുന്നു.

2004നുശേഷം കേന്ദ്രസര്‍ക്കാര്‍ സര്‍വീസില്‍ ചേര്‍ന്നവര്‍ക്ക് സ്റ്റാറ്റ്യൂട്ടറി പെന്‍ഷന്‍ ആനുകൂല്യം നല്‍കുന്നില്ല. ഇവര്‍ക്ക് പെന്‍ഷന്‍ ഫണ്ടിലേക്ക് ശമ്പളത്തില്‍നിന്ന് ഒരു വിഹിതം സംഭാവനചെയ്യാം. വിരമിക്കുമ്പോള്‍ ഈ തുക പെന്‍ഷനായി ലഭിക്കും. ദേശീയ പെന്‍ഷന്‍ പദ്ധതിയെന്ന ഈ പദ്ധതിയില്‍ ആര്‍ക്കും ചേരാം. അവരുടെ പെന്‍ഷന്‍ ഫണ്ട് ഏത് കോര്‍പറേറ്റ് കമ്പനിക്ക് ചൂതാട്ടത്തിന് കൊടുക്കണമെന്ന് ഗുണഭോക്താവിനുതന്നെ തീരുമാനിക്കാമെന്നത് വലിയ "ആനുകൂല്യ"മായി ബില്ലില്‍ വ്യവസ്ഥചെയ്തിട്ടുണ്ട്.

52,83,212 ഗുണഭോക്താക്കളും 34,965 കോടി രൂപയുടെ ഫണ്ടുമുള്ളതാണ് ഇന്ത്യയിലെ പെന്‍ഷന്‍ മേഖല. ഈ ഫണ്ട് ആര്‍ക്കൊക്കെ വിട്ടുകൊടുക്കണമെന്ന് നിശ്ചയിക്കാനാണ് പെന്‍ഷന്‍ ഫണ്ട് റഗുലേറ്ററി ഡവലപ്പ്മെന്റ് അതോറിറ്റി. എട്ട് പെന്‍ഷന്‍ ഫണ്ട് മാനേജര്‍മാരില്‍ ഒന്നുമാത്രമാണ് പൊതുമേഖലയില്‍നിന്നുള്ളത് എന്നതാണ് വാസ്തവം. പണിയെടുക്കുന്നവന്റെ അവകാശനിഷേധത്തിനുള്ള നിയമമാണ് യുപിഎ സര്‍ക്കാര്‍ ഇപ്പോള്‍ പാര്‍ലമെന്റില്‍ പാസാക്കിയിരിക്കുന്നത്. ഈ ജനവിരുദ്ധ നിയമത്തിനെതിരെ ജീവനക്കാരും തൊഴിലെടുക്കുന്നവര്‍ ഒന്നടങ്കവും രംഗത്തുവരേണ്ടതുണ്ട്.

*
deshabhimani editorial

പെന്‍ഷന്‍ ബില്‍: ശ്രദ്ധക്ഷണിക്കുന്നത് ബദല്‍ രാഷ്ട്രീയത്തിലേക്ക്

തൊഴിലില്‍ നിന്ന് വിരമിച്ച മുതിര്‍ന്ന പൗരന്മാര്‍ക്ക് ജീവിത സായാഹ്നത്തില്‍ ആശ്രയമാവേണ്ട പെന്‍ഷന്‍ നിധി കോര്‍പ്പറേറ്റ് ഊഹക്കച്ചവടക്കാര്‍ക്ക് തുറന്നു നല്‍കുന്ന പെന്‍ഷന്‍ ബില്‍ കഴിഞ്ഞ ദിവസം ലോക്‌സഭ പാസാക്കി. ഇടതുപാര്‍ട്ടികളും രണ്ടാം യു പി എ സര്‍ക്കാരിനെ പുറമെ നിന്ന് പിന്തുണയ്ക്കുന്ന രാഷ്ട്രീയ പാര്‍ട്ടി പ്രതിനിധികളും ബി ജെ പി ഇതര പ്രതിപക്ഷവും ഉയര്‍ത്തിയ എതിര്‍പ്പിന്റെ പശ്ചാത്തലത്തില്‍ കോണ്‍ഗ്രസും ബി ജെ പിയും ഉണ്ടാക്കിയ അവിശുദ്ധ ധാരണയാണ് ബില്‍ പാസാക്കാന്‍ അവസരം ഒരുക്കിയത്. ലോക്‌സഭയെ തുടര്‍ന്ന് രാജ്യസഭയിലും സമാനമായ കോണ്‍ഗ്രസ് - ബി ജെ പി ധാരണ, അവിടെയും അത് പാസാക്കാന്‍ അവസരമൊരുക്കുമെന്ന് ധനമന്ത്രി പി ചിദംബരം ആത്മവിശ്വാസം പ്രകടിപ്പിക്കുകയുണ്ടായി. പുതിയ നിയമം പെന്‍ഷന്‍ ഫണ്ടുകളുടെ കൈകാര്യ കര്‍തൃത്വത്തില്‍ വിദേശ കോര്‍പ്പറേറ്റുകള്‍ക്ക് 26 ശതമാനം പങ്കാളിത്തം ഉറപ്പുനല്‍കും. വിദേശ കോര്‍പ്പറേറ്റ് താല്‍പര്യങ്ങള്‍ക്കുവേണ്ടി നിലകൊള്ളുന്ന ഏതു ഗവണ്‍മെന്റുകള്‍ക്കും ഭാവിയില്‍ വിദേശ ഓഹരി പങ്കാളിത്തം യഥേഷ്ടം ഉയര്‍ത്താന്‍ ഇത് അവസരം ഒരുക്കും. ഭരണമുന്നണിയിലെ തന്നെ പല ഘടകകക്ഷികളും, അതിനെ പുറമെ നിന്നു പിന്തുണയ്ക്കുന്ന കക്ഷികള്‍പോലും ബില്ലിനെതിരെ ശക്തമായ എതിര്‍പ്പ് പ്രകടിപ്പിച്ചപ്പോഴും ജീവനക്കാരുടെയും തൊഴിലാളികളുടെയും താല്‍പര്യങ്ങള്‍ അപകടത്തിലാക്കുന്ന നിയമനിര്‍മാണത്തെ പിന്തുണയ്ക്കാന്‍ ബി ജെ പി തയ്യാറായി. ഇത് സാമ്പത്തിക നയങ്ങളുടെ കാര്യത്തിലും തൊഴിലെടുക്കുന്ന വിശാല ജനവിഭാഗങ്ങളുടെ താല്‍പര്യങ്ങള്‍ക്കെതിരായ നിലപാടുകളിലും ബി ജെ പിയും കോണ്‍ഗ്രസും ഒരേ തൂവല്‍ പക്ഷികളാണെന്ന് ഒരിക്കല്‍ക്കൂടി തെളിയിച്ചു. പ്രതിപക്ഷ പാര്‍ട്ടികളില്‍ ബില്ലിന് അനുകൂലമായി നിലകൊണ്ടത് ബി ജെ പിക്കു പുറമെ ബിജു ജനതാദളും ശിവസേനയും മാത്രമായിരുന്നുവെന്നതും ശ്രദ്ധേയമാണ്. തൊഴിലാളികളുടെ സാമൂഹ്യ സുരക്ഷാനിധി ഊഹക്കച്ചവട വിപണിക്ക് തുറന്നുകൊടുക്കാന്‍ വഴിയൊരുക്കുന്ന ഈ നിയമനിര്‍മാണം രാജ്യത്തെ മുഖ്യപ്രതിപക്ഷത്തിന്റെ തനി നിറമാണ് തുറന്നുകാട്ടുന്നത്.

രാജ്യസഭ കൂടി പാസാക്കുന്നതോടെ നിയമമാവുന്ന പെന്‍ഷന്‍ ബില്‍ രാജ്യത്തെ കോടാനുകോടി വരുന്ന വൃദ്ധജനങ്ങളുടെ ജീവിത സുരക്ഷിതത്വത്തിന് കനത്ത ഭീഷണിയാണ്. ഏതാണ്ട് അഞ്ച് വര്‍ഷങ്ങള്‍ക്ക് മുമ്പ് ആരംഭിച്ച ആഗോള സാമ്പത്തിക മാന്ദ്യത്തിന്റ കെടുതികള്‍ക്ക് ഏറ്റവുമധികം ഇരകളാക്കപ്പെട്ടത് വൃദ്ധജനങ്ങളാണ്. ലോകത്തെ മികച്ച പെന്‍ഷന്‍ പദ്ധതികള്‍ നിലനിന്നിരുന്ന യു എസി ലും യൂറോപ്പിലും സാമ്പത്തിക തകര്‍ച്ചയുടെ ആദ്യ ദിനങ്ങളില്‍ തകര്‍ന്നടിഞ്ഞ ധനകാര്യ സ്ഥാപനങ്ങള്‍ ഭൂരിപക്ഷവും സ്വകാര്യ കോര്‍പ്പറേറ്റ് പെന്‍ഷന്‍ ഫണ്ടുകളാണ്. അത് ലക്ഷക്കണക്കിന് വൃദ്ധജനങ്ങളെയാണ് ജീവിത സായാഹ്‌നത്തില്‍ അവര്‍ണനീയമായ ദുരിതത്തിന്റെയും നൈരാശ്യത്തിന്റെയും ആഴക്കയങ്ങളിലേയ്ക്ക് തള്ളിനീക്കിയത്. വാര്‍ധക്യകാലത്ത് വരുമാന സുരക്ഷിതത്വം ഉറപ്പുനല്‍കിയിരുന്ന സ്റ്റാറ്റിയൂട്ടറി പെന്‍ഷന്‍ ലഭിക്കേണ്ടിയിരുന്ന ഇന്ത്യയിലെ അനേക കോടി തൊഴിലാളികളുടെയും ജീവനക്കാരുടെയും എല്ലാ പ്രതീക്ഷകളെയും അനിശ്ചിതത്വത്തിലാക്കുന്ന നിയമ നിര്‍മാണത്തിനാണ് ലോക്‌സഭ പച്ചക്കൊടി കാണിച്ചിരിക്കുന്നത്. പെന്‍ഷന്‍ ഫണ്ടിന്റെ മേല്‍ ഭരണകൂട ഒത്താശയോടെ നടക്കുന്ന കടന്നുകയറ്റത്തിനെതിരെ ഇന്ത്യയിലെ സംഘടിത തൊഴിലാളി വര്‍ഗവും ജീവനക്കാരുടെ സംഘടനകളും ശക്തമായ ചെറുത്തുനില്‍പ്പാണ് നടത്തിവരുന്നത്. കക്ഷി രാഷ്ട്രീയത്തിനും ആശയപരവും മറ്റുമായ ഭിന്നതകള്‍ക്ക് ഉപരി ഇക്കാര്യത്തില്‍ വിപുലമായ ഐക്യം ഊട്ടിഉറപ്പിക്കാനും അവര്‍ക്ക് കഴിഞ്ഞു. കോണ്‍ഗ്രസും ബി ജെ പിയും നേതൃത്വം നല്‍കുന്ന കേന്ദ്ര ട്രേഡ് യൂണിയനുകള്‍പോലും ഇക്കാര്യത്തില്‍ മറ്റെല്ലാ ട്രേഡ് യൂണിയനുകളുമായും കൈകോര്‍ക്കാന്‍ സന്നദ്ധമായിരുന്നുവെന്നത് സമീപകാലത്ത് നടന്ന ട്രേഡ് യൂണിയന്‍ പണിമുടക്ക് വിജയം സാക്ഷ്യപ്പെടുത്തുന്നു.

പെന്‍ഷന്‍ ഫണ്ടുകളുടെ സ്വകാര്യവല്‍ക്കരണം ആഗോള നവ ഉദാരീകരണ സാമ്പത്തിക അജണ്ടയുടെ അവിഭാജ്യ ഘടകമാണ്. ധനമൂലധനം ആഗോളവ്യാപകമായി നടത്തുന്ന ഊഹക്കച്ചവടത്തിന് തൊഴിലാളികളുടെയും ജീവനക്കാരുടെയും കഠിനാധ്വാനത്തിലൂടെ ആര്‍ജിച്ച സമാഹൃത ഫണ്ടുകള്‍ യഥേഷ്ടം ലഭ്യമാക്കണം. ലാഭത്തില്‍ മാത്രം കണ്ണുനട്ട് നടത്തുന്ന അത്തരം ഊഹക്കച്ചവടങ്ങളിലെ വിജയ പരാജയങ്ങള്‍ ധനവിപണിയെ ആശ്രയിച്ചുള്ള കണക്ക് കൂട്ടലുകള്‍ മാത്രമാണ്. അത്തരം കണക്കുകൂട്ടലുകളുടെ അസ്ഥിരതയാണ് സമകാലിക ആഗോളസാമ്പത്തിക മാന്ദ്യവും നമ്മുടെ രാജ്യം അഭിമുഖീകരിക്കുന്ന രൂപയുടെ മൂല്യത്തകര്‍ച്ചയടക്കം രാജ്യത്തെ പിടിച്ചുലയ്ക്കുന്ന സാമ്പത്തിക യാഥാര്‍ഥ്യങ്ങളും അനാവരണം ചെയ്യുന്നത്. അത്തരം ഒരു സാഹചര്യത്തില്‍ കരുതലോടെ നീങ്ങണമെന്ന വിവേകത്തിന്റെ ശബ്ദങ്ങളെ അപ്പാടെ നിരാകരിച്ചുകൊണ്ടാണ് യു പി എ സര്‍ക്കാര്‍ തങ്ങളുടെ ബദ്ധശത്രുക്കളെന്ന് വിശേഷിപ്പിക്കുന്ന ബി ജെ പിയുമായി കൈകോര്‍ത്തത്. രാഷ്ട്രീയ പാര്‍ട്ടികളുടെ കൊടികളുടെ നിറമോ അവര്‍ ഉയര്‍ത്തുന്ന മുദ്രാവാക്യങ്ങളോ പാര്‍ലമെന്റിനകത്തും പുറത്തും പരസ്പരം നടത്തുന്ന വെല്ലുവിളികളോ അല്ല അവരെ വ്യത്യസ്തരാക്കുന്നത്. മറിച്ച് അവര്‍ ആര്‍ക്കുവേണ്ടി നിലകൊള്ളുന്നു, അവരുടെ നയപരിപാടികള്‍ എന്ത് എന്നതാണ് മൗലിക പ്രശ്‌നം. പെന്‍ഷന്‍ ബില്ലില്‍ ലോക്‌സഭയില്‍ അരങ്ങേറിയ നാടകം ഒരിക്കല്‍ക്കൂടി ഒരു ബദല്‍ രാഷ്ട്രീയത്തിന്റെ ആവശ്യകതയിലേയ്ക്കാണ് തൊഴിലാളികളുടെയും ജീവനക്കാരുടെയും പൊതുസമൂഹത്തിന്റെയും ശ്രദ്ധ ക്ഷണിക്കുന്നത്.

*
ജനയുഗം മുഖപ്രസംഗം

മുഖ്യമന്ത്രി പിടിവാശി വെടിയണം

പണിമുടക്ക് സമരത്തിലേര്‍പ്പെട്ട സര്‍ക്കാര്‍ ജീവനക്കാരുടെയും അധ്യാപകരുടെയും സംഘടനാ നേതാക്കളെ ചര്‍ച്ചയ്ക്ക് ക്ഷണിക്കില്ല എന്ന മുഖ്യമന്ത്രി ഉമ്മന്‍ചാണ്ടിയുടെ പിടിവാശി പക്വമതിയായ ഒരു ഭരണാധികാരിക്ക് യോജിച്ചതല്ല. പാര്‍ലമെന്ററി ജനാധിപത്യവ്യവസ്ഥ നിലവിലുള്ള നാടാണ് നമ്മുടേത്. ജനഹിതമനുസരിച്ച് രാഷ്ട്രീയ പാര്‍ടികള്‍ മാറിമാറി അധികാരത്തില്‍ വരും. ഇന്ന് ഭരിക്കുന്നവര്‍ നാളെ പ്രതിപക്ഷത്തിരിക്കേണ്ടിവരും. പ്രതിപക്ഷത്തുള്ളവര്‍ മറിച്ചും. കേരളം ഇത് പലതവണ കണ്ടതാണ്. സര്‍ക്കാര്‍ ജീവനക്കാര്‍ ഭരണനിര്‍വഹണസമിതിയുടെ ഭാഗമാണ്. അതോടൊപ്പം അവര്‍ ഇന്ത്യന്‍ പൗരന്മാരുമാണ്. കൂട്ടായി വിലപേശാനുള്ള സ്വാതന്ത്ര്യം ഇന്ത്യന്‍ പൗരന്മാര്‍ക്ക് ഭരണഘടന നല്‍കുന്നുണ്ട്. ഈ സ്വാതന്ത്ര്യം ന്യായമായ സമരം നടത്താനുള്ളതാണ്. നാളിതുവരെ ജീവനക്കാരും അധ്യാപകരും അനുഭവിച്ചുപോരുന്ന ന്യായമായ അവകാശമാണ് ജോലിയില്‍നിന്ന് പിരിയുന്ന ദിവസംമുതല്‍ സ്റ്റാറ്റ്യൂട്ടറി പെന്‍ഷന്‍ ലഭിക്കുകയെന്നത്. അത് ഒരു നിശ്ചിത തീയതി മുതല്‍ സര്‍വീസില്‍ പ്രവേശിക്കുന്ന ജീവനക്കാര്‍ക്ക് നിഷേധിക്കുന്ന നില വന്നാല്‍ അവകാശബോധമുള്ളവര്‍ സമരംചെയ്യാന്‍ നിര്‍ബന്ധിതരാകും. അതോടൊപ്പം മിനിമം പെന്‍ഷന്‍ ലഭിക്കുമോ, പെന്‍ഷന്‍ തുക എവിടെ നിക്ഷേപിക്കും, അത് സ്വകാര്യ ചൂതാട്ടക്കാര്‍ക്ക് തട്ടിപ്പും വെട്ടിപ്പും നടത്താന്‍ എറിഞ്ഞുകൊടുക്കുമോ തുടങ്ങിയ ആശങ്കകള്‍ക്ക് വ്യക്തവും തൃപ്തികരവുമായ ഉത്തരം കിട്ടേണ്ടതുണ്ട്. ഇത്തരം കാര്യങ്ങള്‍ ജീവനക്കാരുടെ സംഘടനാനേതാക്കളുമായി ചര്‍ച്ച നടത്തി വ്യക്തതവരുത്തേണ്ടതുണ്ട്.

വ്യാഴാഴ്ച സമരസമിതി നേതാക്കള്‍ ധനമന്ത്രി കെ എം മാണിയുമായി സൗഹാര്‍ദപരമായ ചര്‍ച്ച നടത്തി. കൂടുതല്‍ ചര്‍ച്ച ആവശ്യമാണെന്നും ന്യായമാണെന്നും ഭരണപരിചയവും പാരമ്പര്യവുമുള്ള ധനമന്ത്രിക്ക് ബോധ്യപ്പെട്ടു. അതിനാലാണല്ലോ 13ന് രാത്രി എട്ടിന് മുഖ്യമന്ത്രി സമരനേതാക്കളുമായി ചര്‍ച്ച നടത്തുമെന്ന് മാധ്യമപ്രവര്‍ത്തകരോട് പറഞ്ഞത്. പതിമൂന്നിന് മുഖ്യമന്ത്രി നേതാക്കളെ ചര്‍ച്ചയ്ക്ക് വിളിക്കുമെന്ന് മാധ്യമങ്ങള്‍ റിപ്പോര്‍ട്ട് ചെയ്തു. എന്നാല്‍, എല്ലാ പതിവുരീതികളും തെറ്റിച്ച് സമര നേതാക്കളെ ചര്‍ച്ചയ്ക്ക് വിളിച്ചിട്ടില്ലെന്ന് മുഖ്യമന്ത്രിയുടെ ഓഫീസ് മാധ്യമങ്ങളെ അറിയിക്കുകയാണ് ചെയ്തത്. പെട്ടെന്നുള്ള മുഖ്യമന്ത്രിയുടെ ഭാഗത്തുനിന്നുള്ള നിലപാട് മാറ്റം സമരംചെയ്യുന്ന നേതാക്കളുമായി ചര്‍ച്ചയില്ലെന്ന പിടിവാശിമൂലമാണോ, സര്‍ക്കാര്‍ വിലാസം സംഘടനാ നേതൃത്വത്തിന്റെ സമ്മര്‍ദംമൂലമാണോ എന്ന് വ്യക്തമല്ല. അതെന്തായിരുന്നാലും മുഖ്യമന്ത്രി പിടിവാശി ഉപേക്ഷിച്ച് സമരനേതാക്കളുമായി ചര്‍ച്ചയ്ക്ക് തയ്യാറാകണം. പണിമുടക്ക് ഒത്തുതീര്‍പ്പാക്കാനുള്ള വഴി തുറക്കണം. അതാണ് ജനങ്ങള്‍ ആവശ്യപ്പെടുന്നത്. അതാണ് സര്‍ക്കാരിനും മുഖ്യമന്ത്രിക്കും ഭൂഷണമായിട്ടുള്ളത്.

അവകാശ സമരത്തിലേര്‍പ്പെട്ടവരോട് ശത്രുക്കളോടെന്നപോലെയാണ് ആഭ്യന്തരവകുപ്പ് പെരുമാറുന്നത്. സമരം അടിച്ചമര്‍ത്താമെന്ന വ്യാമോഹം വേണ്ട. ഇത് കേരളമാണ്. അത്യുജ്വലമായ നിരവധി പണിമുടക്ക് സമരങ്ങള്‍ കണ്ടറിഞ്ഞ നാടാണ് കേരളം. സമരം തകര്‍ക്കാന്‍ കെഎസ്യു വിദ്യാര്‍ഥികളെയും കോണ്‍ഗ്രസ് ഗുണ്ടകളെയും കയറൂരിവിട്ടതായാണ് കാണുന്നത്. മന്ത്രിമാരുടെ മൂക്കിനു താഴെയാണ് സമാധാനപരമായി പ്രതിഷേധ പ്രകടനം നടത്തിയ വനിതകളടക്കമുള്ള സര്‍ക്കാര്‍ ജീവനക്കാരുടെയും അധ്യാപകരുടെയും നേര്‍ക്ക് കെഎസ്യു സംഘം കല്ലേറ് നടത്തിയത്. കല്ലും വടിയും ഉപയോഗിച്ച് സമരം അടിച്ചമര്‍ത്താമെന്ന വ്യാമോഹം വേണ്ട. അത് തീക്കളിയാണ്. ക്യാന്‍സര്‍ രോഗിയായി മെഡിക്കല്‍ ലീവിലുള്ള ഒരു അധ്യാപികയ്ക്ക് സസ്പെന്‍ഷന്‍ നല്‍കിയ നടപടി അത്യന്തം ഹീനവും നീചവുമാണ്. സമരം നടത്തുന്നവരെ ഒറ്റപ്പെടുത്താന്‍ ശ്രമിക്കരുത്. ഇടതുപക്ഷ ജനാധിപത്യമുന്നണി നേതൃത്വം അടിയന്തരയോഗം ചേര്‍ന്ന് പണിമുടക്ക് സമരത്തിന് പിന്‍തുണ പ്രഖ്യാപിച്ചിട്ടുണ്ട്. തൊഴിലാളി സംഘടനകളും വിദ്യാര്‍ഥി യുവജനസംഘടനകളും മറ്റ് സംഘടിതവിഭാഗങ്ങളും പണിമുടക്കിന് പിന്‍തുണ പ്രഖ്യാപിച്ചിട്ടുണ്ട്. മുഖ്യമന്ത്രിയുടെ പിടിവാശിക്കും ധാര്‍ഷ്ട്യത്തിനും ഉള്ള മറുപടിയായി ഇതിനെ കാണണം.

പല കാരണങ്ങളാലും സമരത്തില്‍ അണിചേരാന്‍ കഴിയാത്ത ജീവനക്കാരും അധ്യാപകരുമുണ്ട്. പണിമുടക്ക് സമരം താല്‍ക്കാലികമായി നഷ്ടമായി തോന്നാം. പണിമുടക്കിലേര്‍പ്പെടാന്‍ കഴിയാത്തവരുടെയും മനസ്സ് പണിമുടക്കിയവരോടൊപ്പമാണെന്ന് കാണണം. ആഭ്യന്തരമന്ത്രി കള്ളക്കണക്കവതരിപ്പിച്ച് ഭൂരിപക്ഷം പണിമുടക്കിനെതിരാണെന്ന് വരുത്താന്‍ ഗീബല്‍സിന്റെ പണിയെടുക്കുന്നുണ്ട്. 16 ജീവനക്കാരുള്ള ട്രഷറിയില്‍ മൂന്ന് ജീവനക്കാര്‍മാത്രമേ ഹാജരായുള്ളൂ എന്ന് ഒരു സര്‍ക്കാരനുകൂലപത്രത്തിന് റിപ്പോര്‍ട്ട് ചെയ്യേണ്ടിവന്നു. അതും മലപ്പുറം ജില്ലയില്‍. ബഹുഭൂരിപക്ഷം ജീവനക്കാരും പണിമുടക്കിലാണെന്ന സത്യം തെളിയിക്കുന്നതാണ് വാര്‍ത്ത. കലോത്സവം മാറ്റിവയ്ക്കില്ലെന്ന് പ്രസ്താവന നടത്തിയതുകൊണ്ട് ഉത്സവം നടക്കില്ല. വിദ്യാര്‍ഥികള്‍ പണിമുടക്കിനോട് ഐക്യദാര്‍ഢ്യം പ്രകടിപ്പിച്ച് അനിശ്ചിതകാല പഠിപ്പുമുടക്ക് സമരം പ്രഖ്യാപിച്ചിട്ടുണ്ട്. സ്ഥിതിഗതികള്‍ വസ്തുനിഷ്ഠമായി വിലയിരുത്തി പിടിവാശിയും ദുരഭിമാനവും വെടിഞ്ഞ് മാന്യമായ രീതിയില്‍ പണിമുടക്കിയ ജീവനക്കാരുടെയും അധ്യാപകരുടെയും നേതാക്കളെ ചര്‍ച്ചയ്ക്ക് ക്ഷണിക്കാനും സമരം ഒത്തുതീര്‍പ്പാക്കാനും മുഖ്യമന്ത്രി തയ്യാറാകണം.

*
ദേശാഭിമാനി മുഖപ്രസംഗം 12 ജനുവരി 2013

ഹോ, ഈ ഓര്‍മ്മ വല്ലാത്ത സംഗതിയാണേ!

സര്‍ക്കാര്‍ ജീവനക്കാരുടെ പണിമുടക്കിനാധാരമായ പെന്‍ഷന്‍ നിഷേധത്തെപറ്റിയുള്ള മുഖ്യമന്ത്രിയുടെ പ്രസ്താവന കണ്ടതോടെയാണ് ഓര്‍മ്മശക്തി കുറയുകയാണല്ലോ എന്ന തോന്നല്‍ ശക്തിപ്പെട്ടത്. എവിടെയോ കേട്ട ന്യായങ്ങള്‍, വാദമുഖങ്ങള്‍, കണക്കുകള്‍. എവിടെയായിരുന്നു എന്ന് ഓര്‍ത്തെടുക്കാന്‍ പറ്റാതെ ഓര്‍മ്മശക്തിയെ ശപിച്ചുകൊണ്ടിരിക്കുകയായിരുന്നു. അതേപ്പറ്റി ഓര്‍ക്കാന്‍ തുടങ്ങിയാല്‍ അതങ്ങനെയാണല്ലോ മണലില്‍ വീണ നാണയം പോലെ അത് താഴോട്ട് താഴോട്ട് പോകും. അങ്ങിനെയിരിക്കെയാണ് ഇന്നലത്തെ പരസ്യം.  ഈ സമരം ജനങ്ങള്‍ക്കെതിരെ വായിച്ച പത്രങ്ങളിലൊക്കെ അവര്‍ത്തിച്ച് കണ്ടപ്പോഴാണ് യുറേക്കാ എന്നും പറഞ്ഞ് ഓര്‍മ്മശക്തിക്ക് ജയ് വിളിക്കാന്‍ തോന്നിയത്.

കൃത്യമായി പറഞ്ഞാല്‍ 16 വര്‍ഷം മുമ്പ് വായിച്ച ഒരു പുസ്തകത്തിലെ വാക്കുകളും വരികളും വന്നങ്ങനെ മുന്നില്‍ നൃത്തം ചെയ്യുന്നത് പോലെ. പരസ്യം നിങ്ങളും കണ്ട് കാണുമല്ലോ സാധാരണ പി.ആര്‍.ഡി.ക്കാര്‍ തയ്യാറാക്കുന്ന പരസ്യം മുഖ്യമന്ത്രി നേരിട്ട് എഴുതി യുണ്ടാക്കിയതാണ്  എന്ന് ഇന്നത്തെ കേരള കൌമുദി വായിച്ചപ്പോഴാണ് മനസ്സിലായത്. എഡിറ്റ് പേജിലെ ഉമ്മന്‍ ചാണ്ടിയുടെ ലേഖനം വായനക്കാരില്‍ ചിലരെങ്കിലും കണ്ട ുകാണുമല്ലോ

1996 ല്‍ പുറത്തിറങ്ങിയ ലസ്റര്‍ ഥറോവിന്റെ ഫ്യൂച്ചര്‍ ഓഫ് കാപ്പിറ്റലിസം എന്ന പുസ്തകത്തിലെ വരികളാണ്, വാചകങ്ങളാണ്, ആശയങ്ങളാണ് നമ്മുടെ മുഖ്യമന്ത്രിയുടെ ലേഖനത്തിലും പരസ്യത്തിലും വന്ന് നിറയുന്നത്. ലസ്റര്‍ ഥറോ മോശക്കാരനല്ല, ക്ളിന്റന്റെ പ്രധാന ഉപദേഷ്ടാവായിരുന്നു. പ്രസിഡണ്ടിന് കിട്ടാവുന്ന എല്ലാ രേഖകളും കൊത്തിപ്പെറുക്കി എടുത്ത് അദ്ദേഹം അന്നെഴുതി: “” "കിഴവന്‍മാര്‍ക്കുള്ള ക്ഷേമ പദ്ധതികള്‍ക്കും പലിശ ചെലവിനുമായി മൊത്തം നികുതി വരുമാനത്തിന്റെ 60%ആണ് ഇപ്പോള്‍ ചിലവാകുന്നത്. 2003 ആകുമ്പോള്‍ ഇത് 75% ആകും. നിയമങ്ങള്‍ മാറ്റമില്ലാതെ തുടരുന്ന പക്ഷം 2013 ഓടെ ഇത് 100% ആയിത്തീരും. പടിഞ്ഞാറന്‍ യൂറോപ്പില്‍ വൃദ്ധജനങ്ങള്‍ക്കായുള്ള പദ്ധതികള്‍ 2030 ആകുമ്പോള്‍ ജി.ഡി.പിയുടെ 50% ആയിത്തീരും. കിഴക്കന്‍ യൂറോപ്പില്‍ സ്ഥിതി ഇതിലും വഷളാണ്. വൃദ്ധ ജനങ്ങള്‍ക്ക് നല്‍കിയ വാഗ്ദാനം നിറവേറ്റുന്ന കാര്യത്തില്‍ കമ്യൂണിസ്റുകാര്‍ കൂടുതല്‍ ഉദാരമതികളായിരുന്നല്ലോ''.’’

ഇതേ കാര്യം നമ്മുടെ മുഖ്യമന്ത്രി അദ്ദേഹത്തിന്റെ ഭാഷയിലാക്കിയപ്പോള്‍ അതിങ്ങനെയായി. "2001-02 ല്‍ 1838 കേടി രൂപയായിരുന്ന പെന്‍ഷന്‍ ബാധ്യത 2012-13 ല്‍ 8178 കോടിയായി. 10 വര്‍ഷം കൊണ്ട് നാലര ഇരട്ടി വര്‍ധന. ഈ രീതി തുടര്‍ന്നാല്‍ ഭീമമായ പെന്‍ഷന്‍ ബാധ്യത അടുത്ത തലമുറക്ക് കൈമാറേണ്ടിവരും. ''

അടുത്ത തലമുറയുടെ കാര്യവും ലെസ്റര്‍ ഥറോ ഓര്‍മ്മപ്പെടുത്തുന്നുണ്ട്: വരും കാലങ്ങളില്‍, വര്‍ഗ സമരമെന്നത് ധനികര്‍ക്കെതിരെ ദരിദ്രര്‍ എന്നതിനു പകരം വൃദ്ധര്‍ക്കെതിരെ യുവജനങ്ങള്‍ എന്ന് തിരുത്തി എഴുതേണ്ടി വരും. മനുഷ്യ ചരിത്രത്തിലാദ്യമായി, നമ്മുടെ സുമാദയങ്ങളില്‍ സാമ്പത്തികമായി നിഷ്ക്രിയരായ പ്രായം ചെന്ന ധനികരുടെ ഒരു വിഭാഗം ആരോഗ്യം പോലുള്ള ചെലവേറിയ സാമൂഹിയ സേവനങ്ങള്‍ക്കായി സര്‍ക്കാറിനെ ആശ്രയിക്കുന്നുണ്ട്' എന്ന് പറഞ്ഞുകൊണ്ടാണ് ക്ളിന്റന്റെ ഉപദേശി കാര്യങ്ങള്‍ അവതരിപ്പിച്ച് തുടങ്ങുന്നത്. “"ഇപ്പോള്‍ പെന്‍ഷന്‍ കിട്ടുന്ന ഒരാളുടെ സ്ഥാനത്ത് ജോലിയെടുക്കുന്ന 4.5 തൊഴിലാളികളാണ് ഉള്ളതെങ്കില്‍ 2030 ആകുമ്പോള്‍ ഒരാള്‍ പെന്‍ഷന്‍ വാങ്ങുമ്പോള്‍ 1.7 തൊഴിലാളികളേ പണിയെടുക്കുന്നവരായി ഉണ്ടാകൂ.'' ഇതേ തരത്തിലുള്ള കണക്ക് സര്‍ക്കാറിന്റെ പരസ്യത്തിലും ഉമ്മന്‍ ചാണ്ടിയുടെ ലേഖനത്തിലും കാണാം എന്നത് യാദൃശ്ചികമല്ല. ഏതായാലും ലെസ്റര്‍ ഥറോ പറഞ്ഞത് പോലെ പച്ചക്ക് പറയുന്നില്ല നമ്മുടെ മുഖ്യമന്ത്രി. ഥറോ പറഞ്ഞ് അവസാനിപ്പിക്കുന്നത് ഇങ്ങനെയാണ്: "ഒരു സമുദായത്തിനുമാവില്ല അതിന്റെ ജനസംഖ്യയുടെ കൂടുതല്‍ കൂടുതല്‍ വിഭാഗങ്ങളെ കൂടുതല്‍ കാലത്തേക്ക് അലസന്‍മാരായി' കഴിയാന്‍ വിട്ടുകൊണ്ട്, അവര്‍ക്ക് കാശെത്തിച്ചു കൊടുക്കാന്‍ - നല്‍കുന്ന രീതി ഏതായാലും.

പത്തേ പതിനഞ്ചോ ഇരുപതോ വര്‍ഷക്കാലത്തേക്കുള്ള പെന്‍ഷനല്ലാതെ ഇനി മേല്‍ ഒരാള്‍ക്കും ദീര്‍ഘകാലത്തേക്കുള്ള റിട്ടയര്‍മെന്റ് ആനൂകൂല്യം ഉറപ്പ് നല്‍കാന്‍ അവില്ല -ആയുര്‍ദൈര്‍ഘ്യം വര്‍ധിക്കുന്നത് കൊണ്ട്'' ഇത് തന്നെയാണ് 1996 ലെ ലോകബാങ്കിന്റെ  വാര്‍ഷിക രേഖയിലും പറയുന്നത്.

" മിക്ക രാജ്യങ്ങളും പെന്‍ഷന് വേണ്ടി ചെലവാക്കുന്ന തുക വെട്ടിച്ചുരുക്കിയേ പറ്റൂ. വ്യക്തികള്‍ക്കുള്ള ആനുകൂല്യങ്ങള്‍ പരിമിതപ്പെടുത്തിക്കൊണ്ടോ, പെന്‍ഷനര്‍മാരുടെ  എണ്ണം വെട്ടിച്ചുരുക്കിക്കൊണ്ടോ- ഉദാഹരണത്തിന് പെന്‍ഷന്‍ പ്രായം വര്‍ധിപ്പിക്കുക, അവശതാപെന്‍ഷനുകള്‍ നല്‍കുന്നതിനുള്ള "തകരാറുകള്‍ പരിഹരിക്കുക'', എന്നാല്‍ പ്രസിഡണ്ട് ക്ളിന്റന്‍ തന്നെ പെന്‍ഷന്‍ ക്ഷേമ പദ്ധതികള്‍ പരിഷ്കരിക്കാന്‍ നടത്തിയ ശ്രമം പൊളിഞ്ഞ് പാളീസ്സായ കഥയും ഥറോ പറയുന്നുണ്ട്. 2030 ആകുന്നതോടെ പെന്‍ഷന്‍ ചെലവ്  എട്ടിരട്ടിയാകുമെന്നത് നേരാണെങ്കിലും  നടപ്പ് പദ്ധതിക്ക് പകരം ഒന്ന് നിര്‍ദ്ദേശിക്കാന്‍ തങ്ങള്‍ക്കാവുന്നില്ല' എന്നാണ് അതിനായി നിയുക്തമായ കമ്മിറ്റി പറഞ്ഞത്.

ലോക ബാങ്കും അന്താരാഷ്ട്ര ധനകാര്യ സ്ഥാപനങ്ങളും ആവര്‍ത്തിച്ച് ആവശ്യപ്പെട്ട് പോന്നത് പെന്‍ഷന്‍ ക്ഷേമപദ്ധതികള്‍ വെട്ടിച്ചുരുക്കാനാണ്. എന്നിട്ടും അത് അങ്ങിനെ നിന്ന് പോരുന്നതിനുള്ള ന്യായം നമ്മുടെ "മുതലാളിത്തത്തിന്റെ ഭാവി''യില്‍ തന്നെയുണ്ട്. "മാര്‍ക്സ് കരുതിയതിലും കേമന്‍മാരായിരുന്നു ധനികര്‍. തങ്ങളുടെ നിലനില്‍പ്പ് ഉറപ്പ് വരുത്തണമെങ്കില്‍ വിപ്ളവ കരമായ സാഹചര്യം ഒഴിവാക്കണമെന്ന് അവര്‍ക്ക് നല്ല ബോധ്യമുള്ളത് കൊണ്ടാണ് ക്ഷേമപദ്ധതികള്‍ ആവിഷ്കരിച്ചതെന്ന് ചൂണ്ടിക്കാട്ടിയശേഷം നമ്മുടെ ഗ്രന്ഥകാരന്‍ തറപ്പിച്ച് പറയുന്നു; മുതലാളിത്തം വെല്ലുവിളിക്കപ്പെട്ടിട്ടില്ലായിരുന്നുവെങ്കില്‍ ഇതൊന്നുംതന്നെ സംഭവിക്കില്ലായിരുന്നു.(None of these things would have happened if capitalim had not been threatened)

അപ്പോള്‍ അതാണ് കാര്യം. സോവിയറ്റ് യൂണിയനും സോഷ്യലിസ്റ് ക്യാമ്പും തകര്‍ച്ച നേരിട്ടു തുടങ്ങിയതോടെ ക്ഷേമ പദ്ധതികളും പെന്‍ഷനുകളും തകര്‍ത്തെറിയപ്പെടാന്‍ തുടങ്ങി. മാത്രവുമല്ല ധനമൂലധനം ഈ മേഖലയെക്കൂടി മേച്ചില്‍പ്പുറമായി മാറ്റാന്‍ തുടങ്ങി. പെന്‍ഷന്‍ ഫണ്ട് മാനേജര്‍മാര്‍ എന്ന പേരില്‍ കളിക്കിറങ്ങിയ ആഗോള മൂലധനനാഥന്മാര്‍ പെന്‍ഷന്‍ ഫണ്ടും തങ്ങള്‍ക്ക് കയ്യിട്ട് വാരാനാകും വിധത്തില്‍ നിയമങ്ങള്‍ നടപ്പാക്കണമെന്ന് നിഷ്കര്‍ഷിക്കാനും തുടങ്ങി. അതുകൊണ്ടാണ് പി.എഫ്.ആര്‍.ഡി.എ ബില്ലവതരണാനുമതിക്ക് വോട്ടിങ്ങ് വേണമെന്ന് ഇടതുപക്ഷം ആവശ്യപ്പെട്ടപ്പോള്‍ ഭരണ പ്രതിപക്ഷ ഭേദമെന്യേ എല്ലാ മുതലാളിത്ത പക്ഷവാദികളും ഒന്നിച്ച് നിന്ന് വോട്ട് ചെയ്തത്. അതുകൊണ്ടാണ്" ദേശീയ പെന്‍ഷന്‍ പദ്ധതികൊണ്ട് സര്‍ക്കാറിന് യാതൊരു നേട്ടവുമില്ല. മാത്രമല്ല കോടികളുടെ അധിക ബാധ്യത ഉണ്ടാക്കുന്നുണ്ട്'' എന്ന് പരിതപിക്കുന്ന ഉമ്മന്‍ചാണ്ടിക്ക് പോലും അത്തരം ഒരു പദ്ധതി പ്രഖ്യാപിക്കേണ്ടി വന്നത്. സര്‍ക്കാറിന് നേട്ടമില്ല, ജീവനക്കാര്‍ക്ക് ആവശ്യമില്ല, സമൂഹത്തിനാണെങ്കില്‍ നഷ്ടവുമാണ.് അങ്ങിനെയൊരു പെന്‍ഷന്‍പദ്ധതി പിന്നെ ആര്‍ക്കാണ് മെച്ചമാകുക?  ഈ മേഖലയിലേക്ക് കയറിവരാന്‍ തഞ്ചം കാത്ത് നില്‍ക്കുന്ന വന്‍കിട ഫണ്ട് മാനേജര്‍മാര്‍ക്ക്. (പെന്‍ഷന്‍ മേഖലയില്‍ 49% വിദേശ ഉടമസ്ഥതയാകാം എന്ന് പറയുന്നതിന്റെ കാരണവും ഇത് തന്നെ)

അങ്ങിനെ പെന്‍ഷന്‍ ഫണ്ട് മാനേജര്‍മാര്‍ക്ക്  പതിച്ച് കൊടുക്കുന്ന വന്‍തുകക്ക് എന്താണ് സംഭവിക്കുക? "കേന്ദ്രത്തിന് പിടിച്ചു നില്‍ക്കാനാവില്ല.'' (Centre cannot hold) എന്ന പേരില്‍ നോം ചോംസ്കി എഴുതിയ ഒരു ലേഖനത്തില്‍ 2010 ഫെബ്രുവരി 8 ന് ആസ്റിന്‍ ടെക്സാസിലെ റവന്യൂ ഓഫീസിന്റെ ടവര്‍ വിമാനമിടിച്ച് തകര്‍ത്ത ജോസഫ് ആന്‍ഡ്യ്രൂ സ്റാക്ക് എന്ന വൈമാനികന്റെ ആത്മഹത്യാക്കുറിപ്പിനെക്കുറിച്ച് പറയുന്നുണ്ട്. പെന്‍സില്‍വാനിയയിലെ ഉരുക്കു ശാലയിലെ തൊഴിലാളിയുടെ വിധവയായ തന്റെ അയല്‍പക്കക്കാരി അനുഭവിക്കുന്ന ദൈന്യത കണ്ട് മനം മടുത്താണ് അയാള്‍ വ്യവസ്ഥയോട് കലഹിച്ചിറങ്ങിയത്. 80 വയസ്സുള്ള  ആ സ്ത്രീയുടെ ഭര്‍ത്താവ് ജോലിയില്‍ നിന്ന് പിരിയുമ്പോള്‍ ഭാര്യക്ക് തന്റെ മരണശേഷം നന്നായി ജീവിക്കാനുള്ള സംഖ്യ പെന്‍ഷന്‍ ഫണ്ടിലുണ്ടെന്നാണ് കരുതിയിരുന്നത്. എന്നാല്‍ 2007 ലെ മുതലാളിത്ത പ്രതിസ്ന്ധിയില്‍ പെന്‍ഷന്‍ ഫണ്ടുകളാകെ പൊട്ടി പൊളിഞ്ഞപ്പോള്‍ അവര്‍ക്ക് ഗത്യന്തരമില്ലാതെ പട്ടിണി കിടക്കേണ്ടി വന്നു. ആ സ്ത്രീയുടെ ദൈന്യതകണ്ട് ഇതെങ്ങനെയാണ് ഒരു സമൂഹത്തിന് സഹിക്കാനാവുക എന്ന് ചോദിച്ചുകൊണ്ടാണ് യുവാവായ ആ വൈമാനികന്‍ റവന്യൂ ഓഫീസ് തകര്‍ത്തുകൊണ്ട് ആത്മഹത്യ ചെയ്തത്!

പെന്‍ഷന്‍ ഫണ്ടുകള്‍ ചൂതാട്ടത്തിന് എറിഞ്ഞ് കൊടുത്താല്‍ എന്താണ് സംഭവിക്കുക എന്ന് കൂടുതല്‍ പറയേണ്ടതില്ല. സര്‍ക്കാറിനും ജീവനക്കാര്‍ക്കും സമൂഹത്തിനും ഒരേപോലെ നഷ്ടം വരുത്തിവെക്കുന്ന ഈ പദ്ധതി ഫണ്ട് മാനേജര്‍മാരുടെ  സമ്മര്‍ദ്ദത്തിന് വഴങ്ങിയാണ് നടപ്പാക്കുന്നതെന്നാണ് മുഖ്യമന്ത്രി പറയാതെ പറയുന്നത്. അതിനെതിരെ പണിമുടക്കുന്നവരോട് അദ്ദേഹം ചോദിക്കുന്നത് നിങ്ങള്‍ക്ക് നഷ്ടമൊന്നുമില്ലല്ലോ എന്നാണ്. നിങ്ങള്‍ നിങ്ങളുടെ കാര്യം നോക്കിയാല്‍ പോരെ എന്ന്. ഞങ്ങള്‍ സമൂഹത്തിന്റെ കാര്യമാണ് നോക്കുന്നത് എന്നാണ് അവര്‍ കൊടുക്കുന്ന മറുപടി.

സമൂഹത്തിന്റെ കാര്യമോ, സര്‍ക്കാര്‍ ജീവനക്കാരുടെ പെന്‍ഷന്‍ എന്ന് സ്വാഭാവികമായും സംശയമുയരാം- വിശേഷിച്ച് പെന്‍ഷന്‍ പദ്ധതിക്കെതിരെ ഹൈ വോള്‍ട്ടേജ് പ്രചാരണം മുറുകി നില്‍ക്കുന്ന ഒരു ഘട്ടത്തില്‍. കോഴിക്കോട് മെഡിക്കല്‍ കോളേജിലെ ഒരു സീനിയര്‍ പ്രൊഫസര്‍ പറഞ്ഞ ഒരൊറ്റക്കാര്യം കേട്ടാല്‍ ആര്‍ക്കും അത് ബോധ്യപ്പെടും.  സംഗതി ലളിതം. ഇപ്പോള്‍ കിട്ടുന്നതിന്റെ ഇരട്ടി ശമ്പളത്തിന്റെ ഓഫറുമായി സ്വകാര്യ ആശുപത്രിക്കാര്‍ നിരന്തരം സമ്മര്‍ദ്ദം ചെലുത്തിയിട്ടും സര്‍ക്കാര്‍ സര്‍വ്വീസില്‍ തുടരുന്നത് വെറും സാമൂഹിക സേവന താല്‍പര്യം കൊണ്ടല്ല എന്ന് അദ്ദേഹം തീര്‍ത്തു പറയുന്നു. ചികിത്സിക്കാനാവാതെ വരുന്ന ഒരു ഘട്ടത്തില്‍ തന്റെ ചികിത്സക്കും ഭക്ഷണത്തിനുമുള്ള കാശ് പെന്‍ഷന്‍വഴി കിട്ടുമല്ലോ എന്നതാണ് ന്യായം. അതുകൊണ്ട് തന്നെ പെന്‍ഷന്‍ പദ്ധതി തകര്‍ക്കപ്പെടുന്ന പക്ഷം തന്റെ മകനോട് സര്‍ക്കാരാശുപത്രി വിട്ട് സ്വകാര്യ ആശുപത്രിയിലേക്ക് മാറിക്കൊള്ളാന്‍ പറയും എന്നാണ് അദ്ദേഹം പറഞ്ഞത്. നല്ല ഡോക്ടറും നല്ല എഞ്ചിനീയറും, നല്ല അധ്യാപകനും എല്ലാം സര്‍ക്കാര്‍ സര്‍വ്വീസ് വേണ്ടെന്നുവെക്കും എന്നര്‍ത്ഥം. നഷ്ടം സമൂഹത്തിന് തന്നെയാണ്.

ഇത് മാത്രമല്ല, എല്ലാ ക്ഷേമപദ്ധിതകള്‍ക്കും എതിരെയാണ് ആക്രമണം. സബ്സിഡികളൊക്കെ വന്‍കിടക്കാര്‍ക്ക്,  നികുതിയിളവൊക്കെ വമ്പന്‍മാര്‍ക്ക്. വിലക്കയറ്റവും അധിക നികുതിയും സാധാരക്കാരുടെ മേല്‍. അത്തരം ഒരു കാലത്ത് സ്റാറ്റ്യൂട്ടറി പെന്‍ഷന്‍ നിര്‍ത്തലാക്കിയാല്‍ മറ്റ് ക്ഷേമ പദ്ധതികള്‍ വളരെ അനായാസം തകര്‍ക്കാനാകും.  അത് തന്നെയാണ് ലക്ഷ്യം എന്ന് കണ്ടെത്താന്‍ പഴയ ലോകബാങ്ക് രേഖകള്‍ നോക്കിയാല്‍ മതിയാകും- അനുഭവം കൊണ്ട് പഠിക്കുന്നില്ലെങ്കില്‍.

ഇപ്പോള്‍ പെന്‍ഷന്‍ വാങ്ങുന്നവര്‍ക്ക് പ്രശ്നമില്ല എന്നാണ് മുഖ്യമന്ത്രി പറയുന്നതെങ്കിലും പി.എഫ്.ആര്‍.ഡി.എ ബില്‍ പറയുന്നത് മറ്റൊന്നാണ്. നിലവിലുള്ള ഏത് പെന്‍ഷന്‍ പദ്ധതിക്കും പകരം പുതിയ പെന്‍ഷന്‍ പദ്ധതി അടിച്ചേല്‍പ്പിക്കാന്‍ ഒരു എക്സിക്യൂട്ടീവ് ഉത്തരവ് ധാരാളം. പിന്നെങ്ങനെയാണ് നിലവിലുള്ള ജീവനക്കാര്‍ മുഖ്യമന്ത്രിയുടെ ലേഖനം വായിച്ച് സമാശ്വസിക്കുക. വേണ്ടാത്തതൊന്നും ഓര്‍ക്കേണ്ട എന്നു തന്നെയാണ് അദ്ദേഹം പറയുക. ഈ ഓര്‍മ്മ തീര്‍ച്ചയായും വല്ലാത്തൊരു സംഗതിയാണേ!

*
എ.കെ.രമേശ്

തലക്കെട്ട് റിപ്പോര്‍ട്ടര്‍ ചാനലില്‍ പ്രസിദ്ധീകരിച്ച ലേഖനത്തില്‍ നിന്ന്

പങ്കാളിത്ത പെന്‍ഷന്‍: പെന്‍ഷന്‍ പരിഷ്‌കരണവും ക്ഷാമശമ്പളവും ഉണ്ടാവില്ല

പെന്‍ഷന്‍ തൊഴിലുടമയുടെ/സര്‍ക്കാരിന്റെ സൗജന്യമോ സൗമനസ്യപ്രകടനമോ, സമ്മാനമോ, ഔദാര്യമോ അല്ല. അത് ജീവനക്കാരന്റെ/തൊഴിലാളിയുടെ വേതനത്തിന്റെ ഭാഗം തന്നെയാണ്. ജീവനക്കാരന്/തൊഴിലാളിക്ക് പ്രതിമാസം ലഭിക്കുന്ന മൊത്ത ശമ്പളം പെന്‍ഷന്റെ ഭാഗം കഴിച്ച് മാത്രമുള്ളതാണ്. ഇങ്ങനെ മാറ്റിവയ്ക്കപ്പെട്ട ശമ്പളമാണ് ജോലിയില്‍ നിന്നും വിരമിക്കുമ്പോള്‍ 'സേവനവിരാമ ശമ്പളം' (പെന്‍ഷന്‍) ആയി ജീവനക്കാര്‍ക്ക് നല്‍കുന്നത്. പെന്‍ഷന്‍ നല്‍കുന്നതിനുവേണ്ടി മാറ്റിവയ്ക്കപ്പെട്ട ശമ്പളത്തിന്റെ ഭാഗം ഒരു പ്രത്യേക നിധിയായി സൂക്ഷിക്കുന്ന രീതി ഇതുവരെ ഉണ്ടായിരുന്നില്ല. അങ്ങനെ ചെയ്യാതിരുന്നതിന് ജീവനക്കാര്‍ ഉത്തരവാദികളല്ല.

ജീവനക്കാരില്‍ നിന്നും പെന്‍ഷന്‍ വിഹിതം പണ്ടുമുതലേ പിടിക്കുന്നുണ്ട്. അവര്‍ക്ക് ലഭിക്കുന്ന മൊത്തശമ്പളം പെന്‍ഷന്‍ കഴിച്ചുള്ള തുകയാണ്. ഇത് കേരള സര്‍വീസ് റൂള്‍സില്‍ നിന്നും വ്യക്തമാണ്. കെ എസ് ആര്‍ പാര്‍ട്ട് ഒന്നിലെ ചട്ടം 146 പ്രകാരം സംസ്ഥാന സര്‍വീസില്‍ നിന്നും ഡെപ്യൂട്ടേഷനില്‍ പോകുന്ന ഉദ്യോഗസ്ഥന്റെ ശമ്പളസ്‌കെയിലിന്റെ (അടിസ്ഥാനശമ്പളത്തിന്റെ അല്ല എന്ന കാര്യം ശ്രദ്ധിക്കുക) പരമാവധിയുടെ 15 ശതമാനം പെന്‍ഷന്‍ കോണ്‍ട്രിബ്യൂഷനായി ജീവനക്കാരന്റെ സേവനം വാങ്ങിയ വകുപ്പ്/കോര്‍പ്പറേഷന്‍/ഏജന്‍സി സര്‍ക്കാരിലേക്ക് അടയ്ക്കണം. ജീവനക്കാരന് പ്രതിമാസം മൊത്തശമ്പളം നല്‍കിയതിനുശേഷമാണ് അധികമായി 15 ശതമാനം പെന്‍ഷന്‍ കോണ്‍ട്രിബ്യൂഷനായി അടയ്‌ക്കേണ്ടത്. ഇത് കാണിക്കുന്നത് പെന്‍ഷന്‍ ബാധ്യത ഇനത്തില്‍ 15 ശതമാനം അധികം തുക മാറ്റിവയ്‌ക്കേണ്ടതുണ്ട് എന്നാണല്ലോ. എന്നാല്‍ സര്‍ക്കാര്‍ ഇത് പ്രത്യേക നിധിയായി മാറ്റിവയ്ക്കുന്നില്ല. അതിന് കാരണം സര്‍ക്കാരിന്റെ എല്ലാ വരവുകളും സഞ്ചിതനിധിയില്‍ ആണ് സ്വീകരിക്കുന്നത്. എല്ലാ ചെലവുകളും ഈ നിധിയില്‍ നിന്നുമാണ് നിര്‍വഹിക്കുന്നത്. സര്‍ക്കാരിന് നിരവധി ഇനത്തില്‍ ചെലവുകളും പലതരത്തിലുള്ള വരുവുകളുമുണ്ട്. സര്‍ക്കാര്‍ വളരെ വലിയ ഒരു ഏജന്‍സിയായതുകൊണ്ട് ഒരു ചെലവിനും ഒരിക്കലും ബുദ്ധിമുട്ട് വരില്ല എന്ന സങ്കല്‍പ്പത്തിലാണ് ഇതെല്ലാം ചെയ്തിരിക്കുന്നത്. ബജറ്റ് വഴി ഒരു കൊല്ലം പ്രതീക്ഷിക്കുന്ന വരവും ചെലവും കണക്കാക്കുമ്പോള്‍ അതില്‍ പെന്‍ഷന്‍ ചെലവുമുണ്ട്. ഓരോ ചെലവിലേക്കും വേണ്ടതുക പ്രത്യേകനിധിയായി സൂക്ഷിച്ചിട്ടുണ്ടാവില്ല. എല്ലാ ചെലവുകളും സഞ്ചിതനിധിയില്‍ നിന്നാണ് നിര്‍വഹിക്കുന്നത്. ഈ സാഹചര്യത്തില്‍ ഇപ്പോള്‍ കേന്ദ്രസര്‍ക്കാരും സംസ്ഥാന സര്‍ക്കാരുകളും പെന്‍ഷനുവേണ്ടി ജീവനക്കാരില്‍ നിന്നും പിടിച്ചെടുക്കുന്ന തുക അധികമായിട്ടുള്ളതാണ്.

പെന്‍ഷന്‍കാരുടെ മാഗ്നാകാര്‍ട്ട എന്ന് വിശേഷിപ്പിക്കുന്ന നകാര കേസില്‍ സുപ്രിംകോടതി പറഞ്ഞത് ഇങ്ങനെ സംഗ്രഹിക്കാം. പെന്‍ഷന്‍ നിയമാനുസൃതമായ അവകാശമാണ്. അത് തൊഴില്‍ ദായകന്റെ ആനുകൂല്യമോ ഔദാര്യമോ അല്ല. പെന്‍ഷന്‍ ജീവനക്കാരുടെ നിഷേധിക്കാനാവാത്ത അവകാശമെന്നത് കോടതിവിധികള്‍ മാത്രമല്ല നിരവധി ശമ്പള കമ്മിഷനുകളും ആവര്‍ത്തിച്ച് വ്യക്തമാക്കിയിട്ടുണ്ട്. 1983-ലെ ജസ്റ്റിസ് ഗോപാലന്‍ നമ്പ്യാര്‍ ചെയര്‍മാനായ നാലാം ശമ്പള കമ്മിഷനും 1989-ലെ ജസ്റ്റിസ് ചന്ദ്രശേഖര മേനോന്‍ ചെയര്‍മാനായ അഞ്ചാം ശമ്പളകമ്മിഷനും പെന്‍ഷന്‍ അവകാശത്തെ കുറിച്ച് വിശദമായി പ്രതിപാദിക്കുന്നുണ്ട്.

ഇന്ത്യന്‍ ഭരണഘടനയുടെ 366 (17)-ാം വകുപ്പ് പെന്‍ഷന് നല്‍കിയിരിക്കുന്ന നിര്‍വചനം ഇങ്ങനെ-

''പെന്‍ഷന്‍'' എന്നാല്‍ ഏതെങ്കിലും ആള്‍ക്കോ ആളെ സംബന്ധിച്ചോ കൊടുക്കേണ്ട അംശാദായമോ അല്ലാത്തതോ ആയ എന്തായാലും ഏതെങ്കിലും തരത്തിലുള്ള ഒരു പെന്‍ഷന്‍ എന്ന് അര്‍ഥം ആകുന്നതും അതില്‍ അപ്രകാരം കൊടുക്കേണ്ട ഉദ്യോഗവിരാമ ശമ്പളവും അപ്രകാരം കൊടുക്കേണ്ട ഗ്രാറ്റുവിറ്റിയും ഒരു പ്രൊവിഡന്റ് ഫണ്ടിലേക്കുള്ള വരിസംഖ്യകളില്‍ മേല്‍ പലിശയോടു കൂടിയോ അല്ലാതെയോ അല്ലെങ്കില്‍ അതിനോട് മറ്റെന്തെങ്കിലും കൂട്ടിച്ചേര്‍ത്തോ മടക്കി നല്‍കുന്ന തുകയായി കൊടുക്കേണ്ട ഏതെങ്കിലും തുകയോ തുകകളോ ഉള്‍പ്പെടുന്നതുമാകുന്നു.

ഉദ്യോഗ വിരാമശമ്പളം ഇംഗ്ലീഷില്‍ റിട്ടയേര്‍ഡ് പേ, ഹിന്ദിയില്‍ സേവാ നിവൃത്തി വേതന്‍ എന്നാണ് പെന്‍ഷനെ കുറിച്ച് ഭരണഘടന പറഞ്ഞിരിക്കുന്നത്. അതില്‍ ഗ്രാറ്റുവിറ്റിയും പ്രൊവിഡന്റ് ഫണ്ടും പെന്‍ഷന് പുറമേ ഉള്‍പ്പെടുന്നുമുണ്ട്..............

പങ്കാളിത്ത പെന്‍ഷന്‍ നടപ്പിലാക്കുന്നതോടുകൂടി ഇനി ഉദ്യോഗവിരാമ ശമ്പളം ഇല്ല. അതുകൊണ്ടുതന്നെ അഞ്ചുകൊല്ലത്തിലൊരിക്കല്‍ ശമ്പള പരിഷ്‌ക്കരണത്തോടൊപ്പം പെന്‍ഷന്‍ പരിഷ്‌ക്കരണം എന്ന പ്രക്രിയ ഉണ്ടാവില്ല. പണത്തിന്റെ മൂല്യശോഷണത്തിന് ആനുപാതികമായി വില വര്‍ധനവ് നേരിടാനായി കാലാകാലങ്ങളില്‍ അനുവദിക്കുന്ന ക്ഷാമ ആശ്വാസവും ഉണ്ടാവില്ല. ഒരു വര്‍ഷത്തെ ജോലിക്ക് അരമാസത്തെ ശമ്പളം എന്ന കണക്കില്‍ സര്‍വീസില്‍ നിന്നും പിരിയുമ്പോള്‍ അനുവദിക്കുന്ന ഗ്രാറ്റുവിറ്റിയും ഉണ്ടാവില്ല. പ്രൊവിഡന്റ് ഫണ്ടിനുപകരം കേന്ദ്രത്തിന്റെ പങ്കാളിത്ത പെന്‍ഷന്‍ പദ്ധതിയില്‍ പറഞ്ഞിരിക്കുന്ന ടയര്‍ അക്കൗണ്ടില്‍ പണം വേണമെങ്കില്‍ നിക്ഷേപിക്കാം. പക്ഷെ ഇപ്പോള്‍ കേന്ദ്ര പാര്‍ലമെന്റില്‍ അവതരിപ്പിച്ചിട്ടുള്ള പെന്‍ഷന്‍ റഗുലേറ്ററി ആന്‍ഡ് ഡവലപ്‌മെന്റ് അതോറിറ്റി ബില്ല് പാസായതിനുശേഷം മാത്രമേ ടയര്‍ രണ്ട് അക്കൗണ്ട് തുടങ്ങുകയുള്ളു എന്നാണ് പ്രഖ്യാപിച്ചിരിക്കുന്നത്. ആ നിലയ്ക്ക് തല്‍ക്കാലം കേന്ദ്രത്തില്‍ പ്രോവിഡന്റ് ഫണ്ട് 1-1-2004 മുതല്‍ സര്‍വീസില്‍ പ്രവേശിച്ചവര്‍ക്ക് ഇല്ല.

2000-ലെ എ എ ഡാവെ ചെയര്‍മാനായ വാര്‍ധക്യകാല സാമൂഹ്യ ഇന്‍ഷുറന്‍സ് സരക്ഷാ റിപ്പോര്‍ട്ടും 2002-ലെ ബി കെ ഭട്ടാചാര്യ കമ്മിറ്റി റിപ്പോര്‍ട്ടും ഇന്‍ഷുറന്‍സ് റഗുലേഷന്‍സ് ആന്‍ഡ് ഡവലപ്‌മെന്റ് അതോറിറ്റി റിപ്പോര്‍ട്ടുമാണ് ഇന്ത്യയിലെ പെന്‍ഷന്‍ സെക്ടര്‍ പരിഷ്‌ക്കാരങ്ങള്‍ക്ക് അടിസ്ഥാനമായി തീര്‍ന്നത്. ഈ കമ്മിറ്റികളുടെ രൂപീകരണത്തിന് കാരണമായി തീര്‍ന്നതോ വാര്‍ധക്യകാല പ്രതിസന്ധി തടയുക എന്ന ശീര്‍ഷകത്തിലെ ലോക ബാങ്ക് റിപ്പോര്‍ട്ടുമാണ്. വാര്‍ധക്യകാല പ്രതിസന്ധി ഒഴിവാക്കാന്‍ പെന്‍ഷന്‍ മേഖലയില്‍ പരിഷ്‌ക്കരണം കൂടിയേ തീരു എന്ന ലോകബാങ്ക് നിലപാട് ഇന്ത്യയിലെ അവരുടെ ദാസന്മാര്‍ ശിരസാവഹിച്ചു. ആയുര്‍ദൈര്‍ഘ്യം വര്‍ധിച്ചതുകൊണ്ട് ഉണ്ടായ നേട്ടം പ്രയോജനപ്പെടുത്തുന്നതിന് പല വഴികളും ഉണ്ടായിരുന്നു. അതിനെക്കുറിച്ചൊന്നും ചിന്തിക്കാതെ ജീവനക്കാര്‍ക്ക് നല്‍കുന്ന പെന്‍ഷന്‍ ബാധ്യതയില്‍ നിന്ന് ഒഴിഞ്ഞുമാറുന്നതിനായി പങ്കാളിത്ത പെന്‍ഷന്‍ നടപ്പിലാക്കുകയായിരുന്നു കേന്ദ്ര സര്‍ക്കാര്‍.
ഭട്ടാചാര്യ കമ്മിറ്റിയില്‍ പറഞ്ഞിരുന്നത് അവസാനത്തെ 36 മാസത്തെ ശരാശരി ശമ്പളത്തിന്റെ പകുതി മിനിമം പെന്‍ഷനായി നല്‍കണം. 20 വര്‍ഷം സര്‍വീസ് പൂര്‍ത്തിയായവര്‍ക്ക് പെന്‍ഷന്‍ അര്‍ഹതയുണ്ടായിരിക്കും. എംപ്ലോയീസ് പ്രോവിഡന്റ് ഫണ്ടിന് നല്‍കുന്ന പലിശ നിരക്കെങ്കിലും പങ്കാളിത്ത പെന്‍ഷന്‍ നിക്ഷേപത്തിന് ഉറപ്പാക്കണം എന്നിങ്ങനെ ആയിരുന്നു. എന്നാല്‍ കേന്ദ്രം പങ്കാളിത്ത പെന്‍ഷന്‍ നടപ്പിലാക്കിയപ്പോള്‍ ഇക്കാര്യങ്ങളിലൊന്നും യാതൊരു ഗ്യാരന്റിയും നല്‍കിയില്ല. പുതിയതായി പങ്കാളിത്ത പെന്‍ഷന്‍ നടപ്പിലാക്കാന്‍ പോകുന്ന സംസ്ഥാന സര്‍ക്കാരിനും യാതൊരു ഉറപ്പും നല്‍കാന്‍ കഴിയില്ല എന്ന് ധനകാര്യ വകുപ്പുമന്ത്രി കെ എം മാണി സംസ്ഥാന നിയമസഭയില്‍ പ്രതിപക്ഷത്തുനിന്ന് സി പി ഐ പാര്‍ലമെന്ററി പാര്‍ട്ടി നേതാവ് സി ദിവാകരന്‍ എം എല്‍ എ അവതരിപ്പിച്ച അടിയന്തര പ്രമേയത്തിനു മറുപടിയായി പറയുകയുമുണ്ടായി.

പി എഫ് ആര്‍ ഡി എ ബില്ലിന്മേലുള്ള യശ്വന്ത്‌സിന്‍ഹ ചെയര്‍മാനായ ധനകാര്യ സ്റ്റാന്റിംഗ് കമ്മിറ്റിയുടെ റിപ്പോര്‍ട്ട് 2011 ഓഗസ്റ്റ് 30-ന് പാര്‍ലമെന്റില്‍ സമര്‍പ്പിച്ചു. പെന്‍ഷന്‍ ഫണ്ടില്‍ നിന്നും ഒരു മിനിമം വരുമാനം ഉറപ്പ് വരുത്തേണ്ടതാണെന്നും അത് എംപ്ലോയീസ് പ്രൊവിഡന്റ് ഫണ്ടില്‍ നിന്നും ലഭിക്കുന്ന വരുമാനത്തേക്കാള്‍ കുറയാന്‍ പാടില്ല എന്നും കമ്മിറ്റി ശുപാര്‍ശ ചെയ്തിട്ടുണ്ട്. കമ്പോളാധിഷ്ഠിതമായ വരുമാനം മാത്രമേ പങ്കാളിത്ത പെന്‍ഷണര്‍ക്ക് ലഭിക്കുകയുള്ളു എന്ന ബില്ലിലെ വ്യവസ്ഥയോട് ധനകാര്യ സ്റ്റാന്റിംഗ് കമ്മിറ്റിയും യോജിക്കുന്നില്ല.

കേന്ദ്രത്തില്‍ പങ്കാളിത്ത പെന്‍ഷന്‍ തുടങ്ങിയത് 1-1-2004 മുതലാണ്. 2008 വരെ പെന്‍ഷന്‍ നിധിയിലേക്ക് ലഭിച്ച തുകയ്ക്ക് 14.5 ശതമാനം വളര്‍ച്ചയുണ്ടായിരുന്നു. എന്നാല്‍ 2011 ഓഗസ്റ്റ് 23-ന് പാര്‍ലമെന്റില്‍ വെളിപ്പെടുത്തിയ കണക്കുപ്രകാരം പെന്‍ഷന്‍ ഫണ്ടിന്റെ വളര്‍ച്ചാനിരക്ക് 1.8 ശതമാനം മാത്രമാണ്. ഇങ്ങനെ പോയാല്‍ ചിലപ്പോള്‍ ന്യൂനവളര്‍ച്ചയും ഉണ്ടായിക്കൂടെന്നില്ല. 2008 വരെ നല്ല വളര്‍ച്ച കാണിച്ച പെന്‍ഷന്‍ ഫണ്ട് അതിനുശേഷം തകരാന്‍ തുടങ്ങിയത് ആഗോള സാമ്പത്തിക മാന്ദ്യത്തെ തുടര്‍ന്നാണ്.

പുതുതലമുറ ബാങ്കിംഗ് സ്ഥാപനങ്ങളെയാണ് പെന്‍ഷന്‍ ഫണ്ട് മാനേജേഴ്‌സ് ആയി ചുമതലപ്പെടുത്തിയിട്ടുള്ളത്. ഐ സി ഐ സി ഐ, പ്രൂഡന്‍ഷ്യല്‍ പെന്‍ഷന്‍ ഫണ്ട് മാനേജ്‌മെന്റ് കമ്പനി ലിമിറ്റഡ്, ഐ ഡി എഫ് സി പെന്‍ഷന്‍ ഫണ്ട് മാനേജ്‌മെന്റ് കമ്പനി ലിമിറ്റഡ്, കൊട്ടക് മഹീന്ദ്ര പെന്‍ഷന്‍ ഫണ്ട് ലിമിറ്റഡ്, റിലയന്‍സ് ക്യാപ്പിറ്റല്‍ പെന്‍ഷന്‍ ഫണ്ട് ലിമിറ്റഡ്, എസ് ബി ഐ പെന്‍ഷന്‍ ഫണ്ട് പ്രൈവറ്റ് ലിമിറ്റഡ്, യു റ്റി ഐ റിട്ടയര്‍മെന്റ് സെലൂഷന്‍സ് ലിമിറ്റഡ് എന്നീ സ്ഥാപനങ്ങളാണ് ഫണ്ട് മാനേജേഴ്‌സ്. പെന്‍ഷന്‍ ഫണ്ട് വരിക്കാരന് ഇവരില്‍ ആരുടെയെങ്കിലും സേവനം ഉപയോഗപ്പെടുത്താം. പെന്‍ഷന്‍ ഫണ്ട് വരിക്കാര്‍ക്ക് സേവനദാദാക്കളായി നിശ്ചയിച്ചിട്ടുള്ള 34 ഏജന്‍സികളില്‍ കേരളത്തിലെ മുത്തൂറ്റ് ഗ്രൂപ്പും ഉള്‍പ്പെടുന്നുണ്ട്.

ഏതൊരു ക്ഷേമരാഷ്ട്രത്തിന്റെയും ശക്തമായ സാമൂഹ്യ സുരക്ഷ പദ്ധതിയാണ് ആ രാജ്യങ്ങള്‍ നടപ്പിലാക്കിയിട്ടുള്ള പെന്‍ഷന്‍ സമ്പ്രദായം. ക്ഷേമരാഷ്ട്രത്തിലെ മുതിര്‍ന്ന പൗരന്മാര്‍ക്കെല്ലാം അവരുടെ ആയുസിന്റെ നല്ല കാലത്ത് ജീവിച്ചതുപോലെ ആത്മാഭിമാനത്തോടെ ജീവിക്കാനാവശ്യമായ വരുമാനം പെന്‍ഷന്‍, ആഹാരം, വസ്ത്രം, പാര്‍പ്പിടം, ആരോഗ്യരക്ഷ, പരിചരണം, സംരക്ഷണം ഇവയെല്ലാം ഉറപ്പാക്കേണ്ട ചുമതല സര്‍ക്കാരിനാണ്. വിരമിക്കുന്നവര്‍ക്ക് പെന്‍ഷന്‍ നല്‍കിവരുന്ന ബാധ്യതയില്‍ നിന്നുകൂടി ഒഴിവാകുന്നതിനാണ് സര്‍ക്കാര്‍ പങ്കാളിത്ത പെന്‍ഷന്‍ നടപ്പിലാക്കുന്നത്.

*
പി ചന്ദ്രസേനന്‍ ലേഖകന്‍ സെക്രട്ടേറിയറ്റ് സ്റ്റാഫ് അസോസിയേഷന്റെ മുന്‍ പ്രസിഡന്റാണ്.

കടപ്പാട്: ജനയുഗം

മുതലക്കണ്ണീര്‍ ആര്‍ക്കുവേണ്ടി

സംസ്ഥാന ജീവനക്കാരുടെയും അധ്യാപകരുടെയും പണിമുടക്ക് ആരംഭിച്ചതോടെ, അതിനെ അടിച്ചമര്‍ത്താനുള്ള നടപടികള്‍ക്കൊപ്പം വ്യാജപ്രചാരണങ്ങളിലൂടെ ജനങ്ങള്‍ക്കിടയില്‍ തെറ്റിദ്ധാരണ പരത്താനും സര്‍ക്കാര്‍ കൊണ്ടുപിടിച്ച് ശ്രമിക്കുകയാണ്. നാടിന്റെ പൊതുനന്മയ്ക്കും സംസ്ഥാനത്തിന്റെ സാമ്പത്തിക പ്രതിസന്ധിക്ക് പരിഹാരം കാണാനുമാണത്രെ യുഡിഎഫ് സര്‍ക്കാര്‍ പങ്കാളിത്ത പെന്‍ഷന്‍ പദ്ധതി നടപ്പാക്കുന്നത്. 2002ല്‍ ഉമ്മന്‍ചാണ്ടി യുഡിഎഫ് കണ്‍വീനറായിരിക്കെ നടപ്പാക്കാന്‍ ശ്രമിച്ച് പരാജയപ്പെട്ട പദ്ധതികളിലൊന്നാണ് പങ്കാളിത്ത പെന്‍ഷന്‍. 2002 ജനുവരി 16ന്റെ ഉത്തരവിലൂടെ പൂര്‍വകാലാടിസ്ഥാനത്തില്‍ ഇത് നടപ്പാക്കുകയായിരുന്നു ലക്ഷ്യം. അന്നും ഉമ്മന്‍ചാണ്ടിയും കൂട്ടരും പ്രചരിപ്പിച്ചത് സംസ്ഥാനത്തിന്റെ സാമ്പത്തികനില ഭദ്രമാക്കാനാണ് ഈ പദ്ധതി എന്നാണ്. അന്ന് കേന്ദ്രത്തിലോ, ഏതെങ്കിലും സംസ്ഥാനങ്ങളിലോ ഈ പദ്ധതി കൊണ്ടുവന്നിരുന്നില്ല. ലോകബാങ്കിന്റെയും ഐഎംഎഫിന്റെയും രേഖകളില്‍ മാത്രമായിരുന്നു അന്ന് ഇത് പ്രത്യക്ഷപ്പെട്ടിരുന്നത്.

2002ല്‍ പങ്കാളിത്ത പെന്‍ഷന്‍ നടപ്പാക്കാന്‍ സര്‍ക്കാരിനെ അനുവദിച്ചിരുന്നെങ്കില്‍ ഇന്ന് കേരളത്തിന്റെ സാമ്പത്തികസ്ഥിതി പാടേ അപകടത്തിലാകുമായിരുന്നു. കാരണം അന്നും ഇന്നും സര്‍ക്കാര്‍ പറയുന്നത് നിലവിലുള്ള ജീവനക്കാരെ ഇത് ബാധിക്കില്ലെന്നാണ്. അതിനര്‍ഥം ഇപ്പോഴത്തെ പെന്‍ഷന്‍കാര്‍ക്കും ഇപ്പോഴത്തെ ജീവനക്കാര്‍ക്കും നല്‍കേണ്ട പെന്‍ഷന്‍ ബാധ്യത തുടരുമെന്നാണ്. ഏകദേശം 30 വര്‍ഷത്തിനുശേഷം വിരമിക്കുന്ന ജീവനക്കാര്‍ക്ക് കൊടുക്കേണ്ട പെന്‍ഷന്‍ ബാധ്യതയില്‍നിന്നേ സര്‍ക്കാരിന് ഒഴിയാനാകൂ. മാത്രമല്ല, ഇപ്പോള്‍ സര്‍ക്കാര്‍ പറയുന്നത് ജീവനക്കാരുടെ പ്രതിമാസ ശമ്പളത്തിന്റെയും ക്ഷാമബത്തയുടെയും 10 ശതമാനം കുറവുചെയ്ത് പെന്‍ഷന്‍ ഫണ്ടില്‍ നിക്ഷേപിക്കുകയും അതിനൊപ്പം തുല്യതുക സര്‍ക്കാരും നിക്ഷേപിക്കുമെന്നുമാണ്. അതിനര്‍ഥം 2013 ഏപ്രില്‍ മുതല്‍ കേരളസര്‍ക്കാരിന്റെ പെന്‍ഷന്‍ ഇനത്തിലുള്ള ബാധ്യത വര്‍ധിക്കുമെന്നാണ്. 2002നുശേഷം കഴിഞ്ഞ പത്തുവര്‍ഷം ഈ നയം നടപ്പാക്കാതിരുന്നതുമൂലം കേരളത്തിന്റെ സാമ്പത്തികനില തകരാറിലാവുകയല്ല, മെച്ചപ്പെടുകയാണുണ്ടായതെന്ന് 2011വരെയുള്ള ബജറ്റ് രേഖ വ്യക്തമാക്കുന്നുണ്ട്. 2011 മേയില്‍ യുഡിഎഫ് അധികാരത്തില്‍ വീണ്ടും എത്തിയതുമുതല്‍ 2001 കാലയളവിലെപ്പോലെ സാമ്പത്തിക പ്രതിസന്ധിയെക്കുറിച്ചുള്ള പ്രചാരണം നടത്തുന്നതുതന്നെ ഇത്തരം നയങ്ങള്‍ നടപ്പാക്കുന്നതിനാണ്.

ഈ നയം നടപ്പാക്കുന്നതുകൊണ്ടുള്ള നേട്ടം ആര്‍ക്കാണെന്നതാണ് പ്രസക്തമായ പ്രശ്നം. ഇപ്പോള്‍ പാര്‍ലമെന്റിന്റെ പരിഗണനയിലുള്ള പിഎഫ്ആര്‍ഡിഎ ബില്ലിലെ വ്യവസ്ഥപ്രകാരം, സ്വകാര്യ പെന്‍ഷന്‍ ഫണ്ടിലേക്കാണ് ജീവനക്കാരില്‍നിന്ന് പിരിച്ചെടുക്കുന്ന തുക നിക്ഷേപിക്കുന്നത്. സര്‍ക്കാര്‍വിഹിതം- മാച്ചിങ് ഫണ്ട് (ജനങ്ങളുടെ നികുതിപ്പണമാണല്ലോ) അതും സ്വകാര്യ പെന്‍ഷന്‍ ഫണ്ടിലേക്കുതന്നെയാണ് പോകുന്നത്. പൊതുമേഖലയിലുള്ള ചില സ്ഥാപനങ്ങളും ഉള്‍പ്പെടുന്നു എന്ന ന്യായം പറഞ്ഞ് പെന്‍ഷന്‍ സ്വകാര്യവല്‍ക്കരണമല്ല ഇത് എന്നുപറയുന്നവര്‍ മറച്ചുവയ്ക്കുന്ന ഒരു വസ്തുതകൂടിയുണ്ട്. പാര്‍ലമെന്റ് ഏറ്റവും ഒടുവില്‍ പാസാക്കിയ ധന ഉദാരവല്‍ക്കരണ നിയമപ്രകാരം, ബാങ്ക്-ഇന്‍ഷുറന്‍സ്-പെന്‍ഷന്‍ ഫണ്ട് എന്നിവയിലെല്ലാം എഫ്ഡിഐ (വിദേശനിക്ഷേപം) അനുവദിക്കാനാണ് ലക്ഷ്യമിടുന്നത്. ഇപ്പോള്‍ പൊതുമേഖലയില്‍ നിലനില്‍ക്കുന്ന സ്ഥാപനങ്ങള്‍തന്നെ എത്രകാലം ആ നിലയില്‍ തുടരുമെന്ന് പ്രവചിക്കാനാവില്ല. പ്രത്യേകിച്ചും, പൊതുമേഖലയുടെ ഓഹരി വിറ്റഴിക്കലാണ് കേന്ദ്രസര്‍ക്കാരിന്റെ നയമെന്നിരിക്കെ. ബഹുരാഷ്ട്ര കോര്‍പറേറ്റുകളുടെ ലാഭം വര്‍ധിപ്പിക്കുന്നതിനായാണ് ഉമ്മന്‍ചാണ്ടി പങ്കാളിത്ത പെന്‍ഷന്‍ കൊണ്ടുവരുന്നത്. മെച്ചപ്പെട്ടതാണ് ഈ പദ്ധതിയെങ്കില്‍ പട്ടാളക്കാര്‍ക്കും ജുഡീഷ്യല്‍ ഉദ്യോഗസ്ഥര്‍ക്കും എന്തുകൊണ്ട് ഇത് ബാധകമാക്കുന്നില്ല? സ്വകാര്യമേഖലയ്ക്കും ബാധകമാണെന്നു പറയുന്ന പദ്ധതിയില്‍ ഏതെങ്കിലും കോര്‍പറേറ്റ് സ്ഥാപനങ്ങള്‍ സ്വന്തം വിഹിതംകൂടി നല്‍കി പദ്ധതി ആരംഭിച്ചിട്ടുണ്ടോ? ഇതെല്ലാം ഉത്തരം പറയേണ്ട ചോദ്യങ്ങള്‍ മാത്രമല്ല, ആശങ്ക ഉളവാക്കുന്ന സത്യവുമാണ്.

ജീവനക്കാരന്‍ വിരമിക്കുമ്പോള്‍ അയാള്‍ അടച്ച തുകയുടെ 60 ശതമാനം പിന്‍വലിക്കാമെന്ന ഉമ്മന്‍ചാണ്ടിയുടെ അവകാശവാദവും കുറുപ്പിന്റെ ഉറപ്പല്ലാതെ മറ്റൊന്നുമല്ല. സ്വകാര്യനിക്ഷേപകരുടെ കൈയില്‍ അകപ്പെടുന്ന പെന്‍ഷന്‍ഫണ്ട് തകരാതെ നില്‍ക്കുമെന്നും കൃത്യമായി പെന്‍ഷന്‍ കിട്ടുമെന്നും പറയുന്നതുതന്നെ വ്യാമോഹംമാത്രമാണ്. 2001-02 കാലത്തെ അര്‍ജന്റീനയിലെ സാമ്പത്തികത്തകര്‍ച്ചയിലും 2008നെത്തുടര്‍ന്ന് അമേരിക്കയിലും യൂറോപ്പിലുമുണ്ടായ സാമ്പത്തികത്തകര്‍ച്ചയിലും ആദ്യം പൊളിഞ്ഞത് പെന്‍ഷന്‍ ഫണ്ടുകളായിരുന്നു. സാധാരണക്കാരുടെ കോടിക്കണക്കിന് ഡോളര്‍വരുന്ന ആജീവനാന്ത നിക്ഷേപമാണ് ഫണ്ട് മാനേജര്‍മാര്‍ മുക്കിയത്. അതിലേക്കാണ് ഉമ്മന്‍ചാണ്ടി ഇപ്പോള്‍ കേരളത്തിലെ ജീവനക്കാരെയും കൊണ്ടുപോകുന്നത്. മാത്രമല്ല, മിനിമം പെന്‍ഷന്‍ ഉറപ്പാക്കാന്‍പോലും സര്‍ക്കാരിന് കഴിയുന്നില്ല. പങ്കാളിത്ത പെന്‍ഷന്‍ നിലവിലുള്ള ജീവനക്കാരെ ബാധിക്കില്ലെന്ന പ്രചാരണവും തനി തട്ടിപ്പാണ്. പിഎഫ്ആര്‍ഡിഎ ബില്ലിലെ വ്യവസ്ഥപ്രകാരം, സര്‍ക്കാരിന് എപ്പോള്‍ വേണമെങ്കിലും ഏത് വിഭാഗത്തെയും ഈ ബില്ലിന്റെ പരിധിയില്‍ കൊണ്ടുവരാവുന്നതാണ്.

ജീവനക്കാരില്‍ വ്യാമോഹം പരത്തി പണിമുടക്കില്‍നിന്ന് പിന്തിരിപ്പിക്കാന്‍ ശ്രമിക്കുന്നവര്‍ യഥാര്‍ഥത്തില്‍ ഇപ്പോള്‍ ലഭിച്ചുകൊണ്ടിരിക്കുന്ന ഏറ്റവും വലിയ സാമൂഹ്യസുരക്ഷാപദ്ധതിയുടെ സംരക്ഷണം തട്ടിയെടുക്കാന്‍ സര്‍ക്കാരിന് കൂട്ടുനില്‍ക്കുന്നവരാണ്. പെന്‍ഷന്‍ എന്ന ആശയത്തിനുതന്നെ എതിരാണ് ഉമ്മന്‍ചാണ്ടിയും കൂട്ടരും. നവലിബറല്‍ നയങ്ങളില്‍ പെന്‍ഷനോ മറ്റ് സാമൂഹ്യസുരക്ഷകള്‍ക്കോ ഒരിടവുമില്ല. അതുകൊണ്ടുതന്നെ നിലവിലുള്ള ജീവനക്കാര്‍ക്ക് ഒരു കുഴപ്പവുമുണ്ടാവില്ലെന്ന പ്രചാരണത്തില്‍ കഴമ്പില്ല. മാത്രമല്ല, ബി എ പ്രകാശ് കമ്മിറ്റി - എക്സ്പെന്‍ഡിച്ചര്‍ റിവ്യൂ കമ്മിറ്റി - പറയുന്നത് ശമ്പളപരിഷ്കരണം 10 വര്‍ഷത്തിലൊരിക്കല്‍മാത്രമേ നടപ്പാക്കാവൂ എന്നും ഭാവിയില്‍ പെന്‍ഷന്‍ പരിഷ്കരണം വേണ്ടെന്നും പെന്‍ഷനൊപ്പം ക്ഷാമബത്ത അനുവദിക്കേണ്ടതില്ലെന്നുമാണ്. ഇത് ഈ സര്‍ക്കാരിന്റെ ഉള്ളിലിരിപ്പ് വ്യക്തമാക്കുന്ന സൂചനയാണ്. നിലവിലുള്ള ജീവനക്കാരുടെ പെന്‍ഷന്‍ മാത്രമല്ല, ക്ഷേമപദ്ധതികള്‍ പ്രകാരമുള്ള പെന്‍ഷനുകള്‍പോലും അപകടത്തിലാകാനുള്ള സാധ്യതയുടെ മുന്നിലാണ് നാം ഇന്ന് നില്‍ക്കുന്നത് എന്ന് സംശയാതീതമായി വ്യക്തമാക്കുന്നതാണ് പ്രകാശ് കമ്മിറ്റി നിര്‍ദേശങ്ങള്‍.

പങ്കാളിത്ത പെന്‍ഷന്‍ പദ്ധതിയുടെ ഗുണഭോക്താക്കളായ കോര്‍പറേറ്റുകള്‍ അതിനുകൂലമായി പ്രചാരണം നടത്തുന്നതിനൊപ്പം ഭരണാധികാരികളെക്കൊണ്ട് അതിനായി തീരുമാനമെടുപ്പിക്കാന്‍ വന്‍ തോതില്‍ പണം മുടക്കുന്നുവെന്നതും രഹസ്യമല്ല. ചില്ലറ വ്യാപാരകുത്തകയായ വാള്‍മാര്‍ട്ട് ഇന്ത്യയില്‍ ലോബിയിങ്ങിന് 125 കോടി രൂപ മുടക്കി എന്ന വാര്‍ത്ത ഇത്തരുണത്തില്‍ ശ്രദ്ധേയമാണ്. ജീവനക്കാര്‍ക്കൊപ്പമാണത്രെ ഈ സര്‍ക്കാര്‍ നില്‍ക്കുന്നത്. 13,050 തസ്തിക പുതുതായി സൃഷ്ടിച്ചുവെന്ന സര്‍ക്കാര്‍ പരസ്യത്തിലെ വീമ്പുപറച്ചില്‍ ഈ നൂറ്റാണ്ടിലെ ഏറ്റവും വലിയ തമാശയായി കാണണം. എവിടെയാണ്, ഏത് വകുപ്പിലാണ് ഇത്രയും തസ്തിക സൃഷ്ടിച്ചതെന്ന് സര്‍ക്കാര്‍ വ്യക്തമാക്കേണ്ടതാണ്. തസ്തിക ഒന്നും സൃഷ്ടിച്ചില്ലെന്നു മാത്രമല്ല, ഉള്ള തസ്തികകള്‍ ഇല്ലാതാക്കുന്നതിനുള്ള നീക്കമാണ് അണിയറയില്‍ രൂപപ്പെട്ടുവരുന്നത്. പദ്ധതികള്‍ക്കു രൂപം നല്‍കല്‍ ഉള്‍പ്പെടെയുള്ള ജോലികള്‍ സ്വകാര്യ കണ്‍സള്‍ട്ടന്റുമാരെ ഏല്‍പ്പിക്കണമെന്നും ഓഫീസ് ശുചീകരണം, കാവല്‍ തുടങ്ങിയ ജോലികള്‍ കരാറുകാരെ ഏല്‍പ്പിക്കണമെന്നും പറയുന്നതാണ് ബി എ പ്രകാശ് കമ്മിറ്റി ശുപാര്‍ശ. ഇതിനര്‍ഥം റിപ്പോര്‍ട്ട് നടപ്പാക്കുന്നതോടെ ആയിരക്കണക്കിന് തസ്തികകള്‍ ഇല്ലാതാകുമെന്നാണ്. 2002ലും ഉമ്മന്‍ചാണ്ടിയും സംഘവും ശ്രമിച്ചത് ഇതിനായിരുന്നല്ലോ. അന്ന് 13,000 തസ്തിക വെട്ടിക്കുറച്ച ഉത്തരവ് പിന്നീട് എല്‍ഡിഎഫ് അധികാരത്തില്‍ വന്നപ്പോഴാണ് പിന്‍വലിച്ചത്. സ്വകാര്യഭൂമിയില്‍ റീ സര്‍വേ വേണ്ടെന്ന് ഉത്തരവിറക്കി, ഒരു വകുപ്പിലെ മൊത്തം ജീവനക്കാരുടെ ഭാവിതന്നെ ഡെമോക്ലീസിന്റെ വാള്‍ത്തലയ്ക്ക് കീഴിലാക്കിയിരിക്കയാണ് സര്‍ക്കാര്‍. ഇത്തരം ഒരു സര്‍ക്കാരില്‍നിന്ന് അനുഭാവപൂര്‍ണമായ സമീപനം ജീവനക്കാര്‍ക്കോ തൊഴില്‍രഹിതരായ യുവാക്കള്‍ക്കോ പ്രതീക്ഷിക്കാനാവില്ല.

സര്‍ക്കാര്‍ജീവനക്കാര്‍ക്ക് അവധിയാത്ര ആനുകൂല്യം (എല്‍ടിസി) ഉമ്മന്‍ചാണ്ടി സര്‍ക്കാരിന്റെ കേമത്തമായി ഉയര്‍ത്തിക്കാട്ടുന്നു. എന്നാല്‍, എല്‍ഡിഎഫ് സര്‍ക്കാരിന്റെ ശമ്പളപരിഷ്കരണ ഉത്തരവില്‍ ഉള്‍ക്കൊള്ളിച്ചതും, 2011 ഫെബ്രുവരിയില്‍ വിശദമായ ഉത്തരവ് ഇറക്കിയതുമായിരുന്നു ഇത്. എന്നാല്‍, തെരഞ്ഞെടുപ്പ് പ്രഖ്യാപിച്ച സാഹചര്യത്തില്‍ എല്‍ടിസി സംബന്ധിച്ച ഉത്തരവ് മരവിപ്പിക്കുകയായിരുന്നു. അധികാരത്തില്‍ വന്ന് രണ്ടുവര്‍ഷം അത് പൂഴ്ത്തിവച്ചിട്ട് ഇപ്പോള്‍ സമരമുഖത്ത് ജീവനക്കാരെ വ്യാമോഹിപ്പിക്കാന്‍ ശ്രമിക്കുന്നതും സ്വന്തം സൃഷ്ടിയായി പ്രചരിപ്പിക്കുന്നതും നാണംകെട്ട പണിയായിമാത്രമേ കാണാന്‍ കഴിയൂ. സംസ്ഥാനത്തിന്റെ ഉത്തമതാല്‍പ്പര്യം ഉയര്‍ത്തിപ്പിടിക്കുന്നതും ഭാവിയെ ലക്ഷ്യംവച്ച് നീങ്ങുന്നത് എന്നുംപറയുന്ന സര്‍ക്കാര്‍ ഇതുവരെ ഇത്തരത്തിലുള്ള എന്തെങ്കിലും നടപടി സ്വീകരിച്ചിട്ടുണ്ടോ? മറിച്ച് കേരളത്തിന്റെ മണ്ണും വിഭവങ്ങളും വിറ്റുതുലയ്ക്കാനാണ് ശ്രമിക്കുന്നത്. പണക്കാരുടെ കൈയില്‍നിന്ന് ലഭിക്കേണ്ട നികുതി കുടിശ്ശിക പിരിച്ചെടുക്കാനോ വരുമാന വര്‍ധനയ്ക്കോ ഒന്നും ചെയ്യുന്നില്ല. ""ജീവനക്കാര്‍മാത്രം അങ്ങനെ സുഖിക്കേണ്ട"" എന്ന് 2002ല്‍ സംസ്ഥാനത്തുടനീളം നടന്ന് പ്രചരിപ്പിച്ച ഉമ്മന്‍ചാണ്ടിയെ ജീവനക്കാരും ജനങ്ങളും മറന്നിട്ടില്ല. 2002ല്‍ മൊത്തമായി ഒറ്റയടിക്ക് നടപ്പാക്കാന്‍ ശ്രമിച്ച കാര്യങ്ങള്‍ പിന്‍വാതിലിലൂടെ ഒന്നൊന്നായി നടപ്പാക്കാനാണ് ഇപ്പോള്‍ ഉമ്മന്‍ചാണ്ടിയും സംഘവും ശ്രമിക്കുന്നത്. അത് തിരിച്ചറിഞ്ഞാണ് ജീവനക്കാര്‍ ഇപ്പോള്‍ പണിമുടക്കില്‍ ഉറച്ചുനില്‍ക്കുന്നത്.

*
കെ വരദരാജന്‍ ദേശാഭിമാനി 10 ജനുവരി 2013

സാമൂഹികവശം അവഗണിച്ച അവലോകനം

പൊതുചെലവ് അവലോകന കമ്മിറ്റിയുടെ ശുപാര്‍ശകളില്‍ പലതും പത്രങ്ങളിലും ചാനല്‍ ചര്‍ച്ചകളിലും വ്യക്തമാക്കപ്പെട്ടവയാണ്. മൊത്തം 35 ശുപാര്‍ശകളില്‍ നയപരമായ അപൂര്‍വം ചിലത് ഒഴികെ ഭൂരിഭാഗവും ഭരണ നടപടിക്രമങ്ങളില്‍ വരുത്തേണ്ട മാറ്റങ്ങള്‍ സംബന്ധിച്ചാണ്. കമ്മിറ്റിയുടെ ഒരു പരിമിതി പ്രയോജനകര്‍ത്താക്കളുമായും സംഘടനകളുമായും കൂടിയാലോചിക്കാന്‍ സാവകാശം കിട്ടിയില്ലെന്നതാണ്. അതുകൊണ്ട് ഉദ്യോഗസ്ഥതല ചര്‍ച്ചകളിലും ലഭ്യമായ സ്ഥിതിവിവരക്കണക്കുകളിലും ഊന്നേണ്ടിവന്നു. സാമൂഹികവശം പരിശോധിക്കാത്ത സാങ്കേതിക റിപ്പോര്‍ട്ട് തയ്യാറാക്കാനേ കമ്മിറ്റിക്കു കഴിഞ്ഞുള്ളു. ശ്രദ്ധിക്കേണ്ടതായ പല നിരീക്ഷണങ്ങളും റിപ്പോര്‍ട്ട് ഉള്‍ക്കൊള്ളുന്നുണ്ട്. അതിലൊന്നാണ് റവന്യൂ വരുമാനം സംബന്ധിച്ച വിശകലനം. മുന്‍ യുഡിഎഫ് സര്‍ക്കാരിന്റെ അവസാന രണ്ടുവര്‍ഷവും എല്‍ഡിഎഫ് സര്‍ക്കാരിന്റെ അഞ്ചുവര്‍ഷവുമാണ് കമ്മിറ്റി പരിശോധിച്ചത്. സംസ്ഥാനത്തിന്റെ റവന്യൂ വരുമാനം ഗണ്യമായി ഉയര്‍ത്താന്‍ (എല്‍ഡിഎഫ് എന്നു പേരെടുത്തു പറയുന്നില്ലെങ്കിലും) സര്‍ക്കാരിനു കഴിഞ്ഞു എന്ന് കമ്മിറ്റി വിലയിരുത്തി. ഇക്കാലയളവില്‍ റവന്യൂ വരുമാനം ക്രമമായി വര്‍ധിച്ചു. 2004-05ലെ 13,500 കോടി രൂപയില്‍നിന്ന് 2010-11ല്‍ 30,931 കോടിയായി വര്‍ധിച്ചു. 129 ശതമാനം വര്‍ധന. തനതുനികുതി വരുമാനമാകട്ടെ 8964 കോടിയില്‍നിന്ന് 21,722 കോടിയായാണ് വര്‍ധിച്ചത്. 142.43 ശതമാനം വര്‍ധന. നികുതിയിതര വരുമാനം 819 കോടിയില്‍നിന്ന് 1931 കോടിയായി ഉയര്‍ന്നു. 135.7 ശതമാനം വളര്‍ച്ച.

2006-07 മുതല്‍ അഞ്ചുവര്‍ഷക്കാലത്തെ നികുതിസമാഹരണം പ്രത്യേകം പരിശോധിച്ചശേഷം കമ്മിറ്റി ഇപ്രകാരം വിലയിരുത്തുന്നു: ""മിക്ക വര്‍ഷങ്ങളിലും ബജറ്റില്‍ നിര്‍ദേശിച്ചതിനേക്കാള്‍ അധികം നികുതിസമാഹരണം നടത്തി."" (പേജ് 35) ഉദാഹരണത്തിന് വില്‍പ്പന നികുതിയിനത്തില്‍ 2010-11ല്‍ 115.61 ശതമാനവും സ്റ്റാമ്പുകളിലും രജിസ്ട്രേഷനുകളിലുംനിന്ന് 101.56 ശതമാനവും നികുതി സമാഹരണം നടത്തി. വന്‍ചോര്‍ച്ചയും വെട്ടിപ്പുമാണ് നികുതി സമാഹരണത്തില്‍ സംഭവിക്കുന്നത്. 35 ശതമാനം അധികം സമാഹരിക്കാന്‍ കഴിയുമെന്ന് 2003ലെ സിഡിഎസ് പഠനം ഉദ്ധരിച്ച് കമ്മിറ്റി അഭിപ്രായപ്പെടുന്നുണ്ട്. അങ്ങനെ സമാഹരിക്കാന്‍ കഴിഞ്ഞാല്‍ സംസ്ഥാനത്തിന്റെ റവന്യൂകമ്മി പൂര്‍ണമായി ഒഴിവാക്കാന്‍ കഴിയും. രണ്ടു കാരണങ്ങളാണ് റവന്യൂ വരുമാന വര്‍ധനയ്ക്കു പിന്നില്‍. ഒന്ന്, 2005-06ല്‍ നടപ്പാക്കിയ വാറ്റ് നികുതി സമ്പ്രദായം. രണ്ട്, നികുതിപിരിവില്‍ കാണിച്ച ശുഷ്കാന്തിയും ദൃഢനിശ്ചയവും. നികുതിചോര്‍ച്ചയും നികുതി വെട്ടിപ്പും കുറയ്ക്കുന്നതില്‍ സര്‍ക്കാര്‍ വിജയിച്ചു. വാളയാര്‍ ചെക്ക്പോസ്റ്റ് പരീക്ഷണം വന്‍ വിജയമായി. നികുതി വകുപ്പ് കംപ്യൂട്ടര്‍വല്‍ക്കരണവും ചെക്ക്പോസ്റ്റുകളുടെ ഇ-ഗവേണന്‍സും നികുതി വരുമാനമുയര്‍ത്തുന്നതില്‍ പ്രധാനങ്ങളായി. ""ഓപ്പറേഷന്‍ വാളയാര്‍"" പരീക്ഷണവിജയത്തിന്റെ ഒരു ഉദാഹരണം കമ്മിറ്റി ഉദ്ധരിക്കുന്നുണ്ട്. പരീക്ഷണത്തിനുമുമ്പുള്ള മൂന്നുനാള്‍ 45.15 ലക്ഷം രൂപയായിരുന്നു കളക്ഷന്‍. പരീക്ഷണം നടന്ന 2006 സെപ്തംബര്‍ 21 മുതല്‍ 24 വരെ മൂന്നുദിവസം 129.85 ലക്ഷം രൂപ ലഭിച്ചു. 187.5 ശതമാനം വര്‍ധന. നികുതിവരുമാനം വര്‍ധിപ്പിക്കാനുള്ള സാധ്യതയിലേക്കു വഴി തുറക്കുന്നതായി ഓപ്പറേഷന്‍ വാളയാര്‍പോലുള്ള പദ്ധതികള്‍.

സംസ്ഥാന സര്‍ക്കാര്‍ തനതു നികുതി വരുമാനം ഉയര്‍ത്തുന്നതില്‍ വിജയിച്ചപ്പോള്‍, കേന്ദ്രത്തില്‍നിന്നുള്ള നികുതിവിഹിതവും ഗ്രാന്റുകളും കുറയുകയാണുണ്ടായത്. 2004-05ല്‍ സംസ്ഥാന റവന്യൂവരുമാനത്തില്‍ കേന്ദ്രവിഹിതം 27.3 ശതമാനമായിരുന്നു. 2010-11ല്‍ 23.68 ശതമാനമായി ചുരുങ്ങി. പത്താം ധനകാര്യകമീഷന്‍ അവാര്‍ഡുപ്രകാരം കേരളത്തിന് ലഭിച്ചത് 3.88 ശതമാനമായിരുന്നു. പതിനൊന്നാം ധനകാര്യകമീഷനായപ്പോള്‍ അത് 3.06 ശതമാനമായും പന്ത്രണ്ടാം ധനകാര്യകമീഷനായപ്പോള്‍ 2.67 ശതമാനമായും വെട്ടിച്ചുരുക്കി. പതിമൂന്നാം ധനകാര്യകമീഷന്‍ വീണ്ടും കുറവുവരുത്തി 2.34 ശതമാനമാക്കി. കേന്ദ്ര നികുതി വിഹിതവും ഗ്രാന്റുകളും ന്യായമായി ലഭിച്ചിരുന്നെങ്കില്‍ വായ്പ കുറച്ച് ധനകമ്മി ചുരുക്കാമായിരുന്നു. റവന്യൂകമ്മിയും ധനകമ്മിയും കുറയ്ക്കാന്‍ എല്‍ഡിഎഫ് സര്‍ക്കാരിനു കഴിഞ്ഞു. 2004-05ലെ റവന്യൂകമ്മി 3.03 ശതമാനമായിരുന്നു. 2010-11ല്‍ 1.33 ശതമാനമായി കുറഞ്ഞു. അതേപോലെ ധനകമ്മി 3.73 ശതമാനത്തില്‍നിന്ന് 2.79 ആയും കുറഞ്ഞു. ""കമ്മി കുറയ്ക്കാനുള്ള മാര്‍ഗം റവന്യൂ വരുമാനം വര്‍ധിപ്പിക്കുകയാണ്; ആയതിനാല്‍ നികുതി-നികുതിയേതര വരുമാനമുയര്‍ത്താന്‍ അടിയന്തരനടപടികള്‍ ആവശ്യമാണ്"" എന്ന് റിപ്പോര്‍ട്ട് പറയുന്നു. (പേജ് 37).

റവന്യൂ വരുമാനത്തിന്റെ വിശകലനത്തില്‍ കാണിച്ച സമീപനം ചെലവുകളുടെ കാര്യത്തില്‍ ഉപേക്ഷിക്കുന്നു. അതുകൊണ്ട് ഒരു റിപ്പോര്‍ട്ടിന് അവശ്യം വേണ്ട സമഗ്രത നഷ്ടപ്പെടുന്നു. റവന്യൂചെലവുകള്‍ സംബന്ധിച്ച് വിമര്‍ശ വിധേയമായ ഏതാനും ശുപാര്‍ശകള്‍ റിപ്പോര്‍ട്ട് മുന്നോട്ടുവയ്ക്കുന്നുണ്ട്. ഏതു ശുപാര്‍ശകളും സമ്പദ്വ്യവസ്ഥയില്‍ പ്രത്യാഘാതങ്ങള്‍ ഉണ്ടാക്കും. സാമൂഹികസന്ദര്‍ഭത്തില്‍ വിലയിരുത്താതെയുള്ള ശുപാര്‍ശകള്‍ സ്വീകരിക്കപ്പെടുകയില്ല. സാങ്കേതികതയോ കാഴ്ചപ്പാടുകളോ അല്ല റിപ്പോര്‍ട്ടുകളെ സ്വാധീനിക്കേണ്ടത്. സംസ്ഥാനത്തിന്റെ സാമ്പത്തികപ്രശ്നങ്ങള്‍ക്ക് മൂലകാരണം ശമ്പളവും പെന്‍ഷനും പലിശചെലവുകളുമാണെന്ന വിശ്വാസമാണ് റിപ്പോര്‍ട്ടിന്റെ സ്ഥായീഭാവം. അതുകൊണ്ട് അവ മൂന്നും കുറയ്ക്കേണ്ടതുണ്ടെന്ന്. പെന്‍ഷന്‍ചെലവ് ചുരുക്കുന്നതിന് പങ്കാളിത്തപെന്‍ഷന്‍ ഏറ്റെടുക്കണമെന്ന് കമ്മിറ്റി നിര്‍ദേശിക്കുന്നു. അതിന് ഉന്നയിക്കുന്ന ന്യായീകരണമാണ് ഏറെ ആശ്ചര്യകരം. റിപ്പോര്‍ട്ട് പറയുന്നു: ""നിലവിലുള്ള പ്രതിമാസ പെന്‍ഷന്‍ സമ്പ്രദായത്തില്‍നിന്നും പങ്കാളിത്ത പെന്‍ഷന്‍ പദ്ധതിയിലേക്ക് മാറാനുള്ള സര്‍ക്കാര്‍ തീരുമാനം സ്വാഗതാര്‍ഹമാണ്. പ്രസ്തുത തീരുമാനം സംസ്ഥാനത്തിന്റെ സാമ്പത്തികസ്ഥിതിയില്‍ പെട്ടെന്നു മാറ്റമുണ്ടാക്കുകയില്ലെങ്കിലും, ഭാവിയില്‍, സാമ്പത്തികസുസ്ഥിരത കൈവരിക്കാന്‍ സഹായിക്കും; ഒരുപക്ഷേ രണ്ടോ രണ്ടരയോ പതിറ്റാണ്ടുകള്‍ കഴിഞ്ഞിട്ടാകാം"". (പേജ് 51) ഈ പ്രതീക്ഷയല്ലാതെ വിശ്വസനീയമായ ഒരു തെളിവും റിപ്പോര്‍ട്ടിലില്ല. സര്‍ക്കാര്‍ കൈക്കൊണ്ട തീരുമാനത്തെ തങ്ങളുടെ ശുപാര്‍ശയുടെ രൂപത്തില്‍ അവതരിപ്പിക്കുക മാത്രമാണ് കമ്മിറ്റി ചെയ്യുന്നത്. പങ്കാളിത്ത പെന്‍ഷന്‍ നടപ്പാക്കിയാല്‍ പെന്‍ഷന്‍ ചെലവ് എത്രകണ്ട് കുറയുമെന്ന് കമ്മിറ്റി പറയണമായിരുന്നു.

വിദ്യാഭ്യാസമേഖലയിലെ ശമ്പളച്ചെലവ് പ്രത്യേകമായി വിലയിരുത്തുന്നുണ്ട്. മൊത്തം ശമ്പളച്ചെലവിന്റെ പകുതിയിലധികവും വിദ്യാഭ്യാസത്തിനാണ്. അതുകൊണ്ട് എയ്ഡഡ് മേഖലയില്‍ പുതിയ സ്ഥാപനങ്ങളും കോഴ്സുകളും അനുവദിക്കരുത്. പകരം സ്വകാര്യ എയ്ഡഡ് സ്ഥാപനങ്ങളില്‍ അണ്‍ എയ്ഡഡ് കോഴ്സുകള്‍ തുടങ്ങണം. സ്വകാര്യ വിദ്യാഭ്യാസ മാനേജ്മെന്റുകള്‍ക്ക് കനത്ത സാന്നിധ്യമുള്ള കേരളത്തില്‍ വിദ്യാഭ്യാസമേഖല കച്ചവടകേന്ദ്രങ്ങളാക്കാന്‍മാത്രമേ അത് സഹായിക്കൂ. ആ നിലയ്ക്ക് സ്വകാര്യവല്‍ക്കരണത്തെ ശക്തിപ്പെടുത്താനുതകുന്ന ശുപാര്‍ശയാണത്. ആഗോളവല്‍ക്കരണത്തിന്റെ അജന്‍ഡകളിലൊന്നാണ് തൊഴിലാളികളെ തോന്നുംപോലെ പിരിച്ചുവിടുകയും നിയമിക്കുകയും ചെയ്യത്തക്കവിധം തൊഴില്‍ നിയമങ്ങള്‍ പൊളിച്ചെഴുതുക എന്നത്. സ്ഥിരം തൊഴിലാളികളുടെ എണ്ണം വെട്ടിക്കുറച്ച് താല്‍ക്കാലിക തൊഴിലാളികളെയും കരാര്‍തൊഴിലാളികളെയും നിയമിക്കുന്ന രീതി വ്യാപകമാവുകയാണ്. സര്‍ക്കാര്‍ ജോലികളില്‍ ചിലത് പുറം കരാര്‍ നല്‍കണമെന്ന ശുപാര്‍ശ അംഗീകരിക്കപ്പെടുന്നതോടെ, തുടക്കത്തില്‍ കുറഞ്ഞ ശമ്പളതസ്തികയില്‍ ആരംഭിക്കുന്ന നീക്കം കൂടുതല്‍ വ്യാപകമാക്കും. ചെലവുകള്‍ കുറയ്ക്കാനെന്ന വ്യാജേന നടപ്പാക്കുന്ന പരിഷ്കാരം ഫലത്തില്‍ സ്വകാര്യവല്‍ക്കരണം തീക്ഷ്ണമാക്കും.

ഏറെ പ്രതിഷേധത്തിന് ഇടയാക്കുന്നതാണ് അഞ്ചിനുപകരം പത്തുവര്‍ഷത്തിലൊരിക്കല്‍ ശമ്പളപരിഷ്കരണം. ശമ്പളപരിഷ്കരണത്തിന്റെ മാനദണ്ഡം വര്‍ഷങ്ങളല്ല. വര്‍ധിക്കുന്ന ജീവിതച്ചെലവ്, സ്ഥാനക്കയറ്റത്തിനുള്ള സാധ്യതകള്‍ തുടങ്ങിയവയാണ്. വിലക്കയറ്റം നിയന്ത്രിക്കുകയും നിത്യോപയോഗസാധനങ്ങള്‍ കുറഞ്ഞ വിലയ്ക്ക് ലഭ്യമാക്കുകയുമാണ് ശമ്പളപരിഷ്കരണം നീട്ടുന്നതിനേക്കാള്‍ അഭികാമ്യം.

പതിമൂന്നാം ധനകാര്യകമീഷന്റെ സാമ്പത്തിക ക്രമീകരണ മാര്‍ഗരേഖപ്രകാരം, 2013-14 ആകുമ്പോഴേക്കും ധനകമ്മി ആഭ്യന്തരവരുമാനത്തിന്റെ മൂന്നുശതമാനമാക്കണം. 2014-15 ആവുമ്പോഴേക്കും റവന്യൂകമ്മി പൂര്‍ണമായും ഒഴിവാക്കണം. കമ്മി കുറയ്ക്കുക എന്നാല്‍ ചെലവുചുരുക്കുക എന്നാണര്‍ഥം. സര്‍ക്കാര്‍ പിന്‍വാങ്ങുക എന്നും. സംസ്ഥാനത്തിന്റെ കടം വര്‍ധിക്കുകയാണ്. 2006 മാര്‍ച്ച് അവസാനം 47,940 കോടി രൂപയായിരുന്നു കടം. 2011 മാര്‍ച്ചില്‍ അത് 78,673 കോടി രൂപയായി. നിയമസഭയില്‍ ധനമന്ത്രി വ്യക്തമാക്കിയതു പ്രകാരം കഴിഞ്ഞ സാമ്പത്തികവര്‍ഷത്തെ കടം 89418.18 കോടി രൂപയാണ്. നടപ്പുസാമ്പത്തികവര്‍ഷം (2012-13) ആദ്യത്തെ എട്ടുമാസം കടം 94354.57 കോടിയായി വര്‍ധിച്ചു. റവന്യൂകമ്മിയും (കുറഞ്ഞ റവന്യൂ വരുമാനവും കൂടിയ റവന്യൂ ചെലവും തമ്മിലെ വ്യത്യാസം) വായ്പയും ചേര്‍ന്നതാണ് ധനകമ്മി. രണ്ടിലേതെങ്കിലുമോ, രണ്ടും കൂടിയോ വര്‍ധിച്ചാല്‍ ധനകമ്മി കൂടും. കടം വര്‍ധിക്കുന്നതിനു കാരണം റവന്യൂ കമ്മി കൂടുന്നതാണ്. കടവും ധനകമ്മിയും കുറയ്ക്കാനുള്ള മാര്‍ഗം റവന്യൂകമ്മി കുറയ്ക്കുകയാണ്. അതിന് ഒന്നുകില്‍ ചെലവുചുരുക്കാം, അല്ലെങ്കില്‍ റവന്യൂവരുമാനം ഉയര്‍ത്താം. ചെലവുചുരുക്കലാണ് ആഗോളവല്‍ക്കരണ നയം. റവന്യൂ വരുമാനമുയര്‍ത്താന്‍ രണ്ടുമാര്‍ഗങ്ങളുണ്ട്. ഒന്ന്, നികുതി, നികുതിയിതര വരുമാനം ഉയര്‍ത്തുക. അതാണ് എല്‍ഡിഎഫ് സ്വീകരിച്ച നയം. രണ്ട്, കേന്ദ്ര നികുതി വിഹിതവും ഗ്രാന്റുകളും വര്‍ധിപ്പിക്കുക. റവന്യൂ വരുമാനവും കേന്ദ്രവിഹിതവും ഇടിയുമ്പോള്‍, കൂടുതല്‍ വായ്പ വാങ്ങേണ്ടിവരും. ധനകമ്മി ഉയരും. അതുതന്നെയായിരിക്കും 94,354 കോടി രൂപയുടെ കടബാധ്യത നല്‍കുന്ന സൂചന. 2012-13 ആദ്യത്തെ എട്ടുമാസം മുന്‍വര്‍ഷത്തെ അപേക്ഷിച്ച് 5935 കോടിയാണ് അധിക കടം. അഥവാ പ്രതിമാസം 742 കോടി. സാമ്പത്തികവര്‍ഷാവസാനം കടബാധ്യത 97,322 കോടിയായി ഉയരും. ധനകമ്മി എത്രയെന്നു മനസിലാക്കാന്‍ റവന്യൂ വരുമാനവര്‍ധന എത്രയെന്ന് വ്യക്തമാകേണ്ടിവരും.

*
പ്രൊഫ. കെ എന്‍ ഗംഗാധരന്‍ ദേശാഭിമാനി 05 ജനുവരി 2013

പെന്‍ഷനും സബ്സിഡിയും തകര്‍ക്കുന്നു

ആഗോളവല്‍ക്കരണ സാമ്പത്തികനയങ്ങളുടെ ഭാഗമായി സബ്സിഡികളും ക്ഷേമപെന്‍ഷന്‍ അടക്കമുള്ള ആനുകൂല്യങ്ങളും ഇല്ലാതാക്കാനുള്ള നടപടികളാണ് കേന്ദ്രസര്‍ക്കാര്‍ സ്വീകരിക്കുന്നത്. ആ നയങ്ങള്‍ കൂടുതല്‍ തീവ്രമായി നടപ്പാക്കുന്നതിനാണ് സംസ്ഥാന സര്‍ക്കാരും പരിശ്രമിക്കുന്നത്. കര്‍ഷകത്തൊഴിലാളി പെന്‍ഷനടക്കം എല്ലാ ക്ഷേമപെന്‍ഷനുകളും ബാങ്കുവഴി വിതരണം ചെയ്യാനുള്ള നീക്കം ഇത്തരം ശ്രമങ്ങളുടെ ഭാഗമാണ്. വൃദ്ധജനങ്ങളും അഗതികളും സര്‍ക്കാര്‍ ഓഫീസുകള്‍ കയറിയിറങ്ങി കഷ്ടപ്പെടാതിരിക്കാന്‍ പെന്‍ഷന്‍ വിതരണം പോസ്റ്റോഫീസുവഴിയാക്കിയിരുന്നു. എല്‍ഡിഎഫ് സര്‍ക്കാരിന്റെ ഏറ്റവും നല്ല തീരുമാനങ്ങളില്‍ ഒന്നായി ജനങ്ങള്‍ ഇതിനെ വാഴ്ത്തി.

ഈ നടപടിയെ തകിടംമറിച്ച് ഇപ്പോള്‍ എല്ലാ പെന്‍ഷനുകളും ബാങ്കുവഴിയും പോസ്റ്റാഫീസ് അക്കൗണ്ട് വഴിയും വിതരണം ചെയ്യാന്‍ യുഡിഎഫ് സര്‍ക്കാര്‍ വിജ്ഞാപനം ഇറക്കി. പാവപ്പെട്ട കര്‍ഷകത്തൊഴിലാളികള്‍ ആനുകൂല്യങ്ങള്‍ ലഭിക്കുന്നതിന് ബാങ്കിലോ പോസ്റ്റോഫീസിലോ പോയി സീറോ ബാലന്‍സ് അക്കൗണ്ട് എടുക്കേണ്ട സാഹചര്യമാണ് സൃഷ്ടിച്ചിരിക്കുന്നത്. ഒപ്പം ഫോട്ടോയും ആധാര്‍നമ്പരും ഹാജരാക്കണം.

സീറോ ബാലന്‍സ് അക്കൗണ്ട് ആരംഭിക്കാന്‍ 50 രൂപ നിര്‍ബന്ധമായും നല്‍കണമെന്നാണ് പോസ്റ്റോഫീസില്‍നിന്ന് അറിയിക്കുന്നത്. അതിനു പുറമെയാണ് മറ്റു ചെലവുകള്‍. ബാങ്കിലാണെങ്കില്‍ മിനിമം ബാലന്‍സ് 500 രൂപയും ചെക്ക് ബുക്കിന് 1000 രൂപയുമാണ് വേണ്ടത്. ആധാര്‍ നമ്പരും നിര്‍ബന്ധമാണ്. രാജ്യത്ത് എത്രപേര്‍ക്ക് ആധാര്‍ നമ്പര്‍ കിട്ടിയിട്ടുണ്ടെന്ന് ആര്‍ക്കും വ്യക്തതയില്ല. സര്‍ക്കാരിനുവേണ്ടി എന്നുപറഞ്ഞ് ഒരു ഏജന്‍സി നടത്തിയ ആധാര്‍ രജിസ്ട്രേഷനില്‍ എത്രപേര്‍ രജിസ്റ്റര്‍ചെയ്തു എന്ന് പരിശോധിച്ചാല്‍ മഹാഭൂരിപക്ഷവും ചെയ്തിട്ടില്ല എന്ന് മനസ്സിലാകും. അപ്പോള്‍പ്പിന്നെ ആധാര്‍ നമ്പര്‍ ലഭ്യമല്ലാത്തവര്‍ക്ക് പെന്‍ഷന്‍ നല്‍കാന്‍ കഴിയുമോ എന്ന് സര്‍ക്കാര്‍ വ്യക്തമാക്കണം. അതുപോലെ സീറോ ബാലന്‍സ് അക്കൗണ്ട് തികച്ചും സൗജന്യമായി നല്‍കണം. അല്ലാതെ നിര്‍ധനരും ദുരിതമനുഭവിക്കുന്നവരും 50 രൂപ വീതം നല്‍കണമെന്ന് പിടിവാശി കാണിക്കുകയല്ല വേണ്ടത്.

നിരവധി പോരാട്ടങ്ങളിലൂടെ നേടിയെടുത്ത അവകാശമാണ് കര്‍ഷകത്തൊഴിലാളി പെന്‍ഷന്‍. 1980ലെ എല്‍ഡിഎഫ് സര്‍ക്കാര്‍ കര്‍ഷകത്തൊഴിലാളി പെന്‍ഷന്‍ നടപ്പാക്കിയപ്പോള്‍ പ്രത്യുല്‍പ്പാദനപരമല്ല എന്നുപറഞ്ഞ് അതിനെ തകര്‍ക്കാനാണ് വലതുപക്ഷശക്തികള്‍ പരിശ്രമിച്ചത്. എന്നാല്‍, കര്‍ഷകത്തൊഴിലാളി യൂണിയന്റെ ശക്തമായ ചെറുത്തുനില്‍പ്പുകൊണ്ടാണ് പദ്ധതി തകര്‍ക്കാന്‍ യുഡിഎഫ് അധികാരത്തിലിരുന്ന കാലത്തുപോലും കഴിയാതിരുന്നത്. വിലക്കയറ്റംകൊണ്ട് ജനം പൊറുതിമുട്ടുന്ന ഘട്ടത്തിലാണ് ഇത്തരം നടപടികള്‍ എന്നതും കാണേണ്ടതുണ്ട്. അരി ഉള്‍പ്പെടെ നിത്യേപയോഗസാധനങ്ങളുടെ വില അനുദിനം കുതിച്ചുയരുന്നു. അരിവില സര്‍വകാല റെക്കോഡില്‍ എത്തി. രണ്ടുരൂപയ്ക്ക് അരിവിതരണവും കാര്യക്ഷമമായ പെന്‍ഷന്‍ വിതരണവുംമൂലം കര്‍ഷകത്തൊഴിലാളിക്ക് ദൈനംദിനജീവിതം പട്ടിണിയില്ലാതെ നീക്കുന്നതിനുള്ള സാഹചര്യം എല്‍ഡിഎഫ് സര്‍ക്കാര്‍ സൃഷ്ടിച്ചിരുന്നു. അതാണ് ഇപ്പോള്‍ തകര്‍ക്കുന്നത്.

രണ്ടുരൂപ നിരക്കില്‍ മാസം 35 കിലോ അരിവീതം ലഭിച്ചിരുന്നവര്‍ ഇനി കൂടിയ വില രൊക്കം നല്‍കി വാങ്ങണം. അതിന്റെ സബ്സിഡി ബാങ്കില്‍ ചെന്ന് വാങ്ങണമെന്നാണ് തീരുമാനം. രണ്ടുരൂപയുടെ സ്ഥാനത്ത് അതിന്റെ എത്രയോ ഇരട്ടി തുക കൊടുത്താലേ അരി കിട്ടൂ. മുന്‍കൂര്‍ പണം മുടക്കാന്‍ കഴിയാത്തവര്‍ അരി വാങ്ങേണ്ട എന്നതാണ് അധികാരികളുടെ നയം. ന്യായവിലയ്ക്ക് അരി നല്‍കാന്‍ തയ്യാറാകാത്തവര്‍ ഉള്ള അരി നശിപ്പിക്കുന്നതിന് എല്ലാ ഒത്താശയുംചെയ്യുന്നു. അതിന് തെളിവാണ് കഴിഞ്ഞ ദിവസം തൃശൂരില്‍ എഫ്സിഐ ഗോഡൗണില്‍ സൂക്ഷിച്ചിരുന്ന 15,000 ടണ്‍ അരി കത്തിച്ച് ചാമ്പലാക്കിയത്. ഒരു നേരത്തെ ആഹാരത്തിന് വകയില്ലാത്ത പട്ടിണിപ്പാവങ്ങളായ ആയിരങ്ങള്‍ രാജ്യത്ത് അലയുമ്പോഴാണ് ഈ ക്രൂരത. അരിയുടെ ഉല്‍പ്പാദനം ഗണ്യമായി ഉയര്‍ന്നിട്ടും അരിവില താഴ്ത്താനോ ന്യായവിലയ്ക്ക് ആവശ്യക്കാര്‍ക്ക് വിതരണംചെയ്യാനോ തയ്യാറാകുന്നില്ല. ഗോഡൗണുകള്‍ക്കു പുറത്ത് മഴയും വെയിലുമേറ്റ് അരിയും ഗോതമ്പും നശിക്കുന്നു. ഇന്ത്യയാണ് അരി കയറ്റുമതിയില്‍ ഒന്നാമത്. പൗരന്റെ ജീവന്‍ സംരക്ഷിക്കാന്‍ ബാധ്യതപ്പെട്ട സര്‍ക്കാരുകള്‍ അവന്റെ വിശപ്പടക്കാന്‍ ആവശ്യമായ അരി ന്യായവിലയ്ക്കും സൗജന്യമായും നല്‍കാതെ കയറ്റി അയക്കുകയും ശേഷിച്ചവ നശിപ്പിക്കുകയും ചെയ്യുന്നു.

അഗതി- വിധവ- വാര്‍ധക്യ പെന്‍ഷനും കര്‍ഷകത്തൊഴിലാളി പെന്‍ഷനും ഉള്‍പ്പെടെ ക്ഷേമപെന്‍ഷന്‍വിതരണം ബാങ്കുവഴിയും പോസ്റ്റോഫീസ് അക്കൗണ്ടുവഴിയും ആക്കിയ നടപടി അടിയന്തരമായും പിന്‍വലിക്കേണ്ടതുണ്ട്. പാവപ്പെട്ടവര്‍ക്കും പരസഹായമില്ലാതെ കാര്യങ്ങള്‍ നടത്താന്‍ സാധിക്കാത്തവര്‍ക്കും അവരുടെ വീടുകളിലെത്തി പെന്‍ഷന്‍ വിതരണംചെയ്യുന്നത് തുടരണം. അല്ലാതെ 50 രൂപ വീതം വാങ്ങി, ആധാര്‍ നമ്പര്‍ നിര്‍ബന്ധമാക്കി പെന്‍ഷന്‍ നല്‍കാനുള്ള തീരുമാനം പിന്‍വലിക്കണം. അതിനായി ബുധനാഴ്ച പഞ്ചായത്ത്- മുന്‍സിപ്പല്‍- കോര്‍പറേഷന്‍ ഓഫീസുകളിലേക്ക് കര്‍ഷകത്തൊഴിലാളി യൂണിയന്‍ നേതൃത്വത്തില്‍ നടത്തുന്ന മാര്‍ച്ചിലും ധര്‍ണയിലും മുഴുവന്‍ കര്‍ഷകത്തൊഴിലാളികളും പങ്കെടുക്കണമെന്ന് അഭ്യര്‍ഥിക്കുന്നു. അടിസ്ഥാന ജനവിഭാഗത്തിന്റെ ആവശ്യങ്ങളുയര്‍ത്തി നടത്തുന്ന ഈ സമരവുമായി എല്ലാ ജനങ്ങളും ഐക്യപ്പെടേണ്ടതുണ്ട്.

*
എം വി ഗോവിന്ദന്‍ ദേശാഭിമാനി 12 ഡിസംബര്‍ 2012

പെന്‍ഷനും ചൂതാട്ടത്തിന്

രാജ്യത്തെ ജനങ്ങളുടെ ജീവിതസമ്പാദ്യം ചൂതാട്ടക്കാര്‍ക്ക് തീറെഴുതുന്ന വിധത്തില്‍, പെന്‍ഷന്‍- ഇന്‍ഷുറന്‍സ് മേഖലകളില്‍ 49 ശതമാനം വിദേശനിക്ഷേപം അനുവദിക്കാന്‍ കേന്ദ്ര മന്ത്രിസഭായോഗം തീരുമാനിച്ചു. നിലവില്‍ ഇന്‍ഷുറന്‍സ് മേഖലയില്‍ 26 ശതമാനമായിരുന്ന വിദേശനിക്ഷേപ പരിധിയാണ് 49 ശതമാനമായി ഉയര്‍ത്തുന്നത്. പെന്‍ഷന്‍ മേഖലയില്‍ നിലവില്‍ വിദേശനിക്ഷേപം അനുവദിച്ചിരുന്നില്ല. കോര്‍പറേറ്റ് അനുകൂല പരിഷ്കരണ നടപടികള്‍ കൂടുതല്‍ തീവ്രമാക്കുന്നതിന്റെ ഭാഗമായാണ് വിദേശ ധനസ്ഥാപനങ്ങള്‍ക്ക് ഏറെ ഗുണകരമാകുന്ന തീരുമാനം സര്‍ക്കാരെടുത്തത്. ഇന്‍ഷുറന്‍സ്- പെന്‍ഷന്‍ ഭേദഗതികള്‍ക്ക് പാര്‍ലമെന്റിന്റെ അംഗീകാരം കൂടി ആവശ്യമുണ്ട്. ഇന്‍ഷുറന്‍സ് മേഖലയില്‍ വിദേശനിക്ഷേപ പരിധി ഉയര്‍ത്തരുതെന്ന പാര്‍ലമെന്ററി സ്റ്റാന്‍ഡിങ് കമ്മിറ്റിയുടെ നിര്‍ദേശം അപ്പാടെ തള്ളിയാണ് കേന്ദ്ര തീരുമാനം.

സ്റ്റാന്‍ഡിങ് കമ്മിറ്റിയില്‍ എല്ലാ രാഷ്ട്രീയപാര്‍ടികളും നിക്ഷേപ പരിധി ഉയര്‍ത്തുന്നതിനെ എതിര്‍ത്തിരുന്നു. വിദേശനിക്ഷേപ പരിധി ഉയര്‍ത്തണമെന്ന നിലപാടാണ് സര്‍ക്കാരിനുള്ളതെന്നും സ്റ്റാന്‍ഡിങ് കമ്മിറ്റിയോടുള്ള എല്ലാ ബഹുമാനവും നിലനിര്‍ത്തി അവരുടെ നിര്‍ദേശം തള്ളുകയാണെന്നും മന്ത്രിസഭാതീരുമാനങ്ങള്‍ അറിയിച്ച ധനമന്ത്രി പി ചിദംബരം പറഞ്ഞു. മറ്റ് രാഷ്ട്രീയ പാര്‍ടികളുമായി ഈ വിഷയത്തില്‍ കൂടിയാലോചനകള്‍ തുടരും. പാര്‍ലമെന്റില്‍ ഭേദഗതികള്‍ അംഗീകരിക്കുമെന്നാണ് പ്രതീക്ഷ. ഇന്‍ഷുറന്‍സ് കമ്പനികള്‍ക്ക് കൂടുതല്‍ മൂലധനം ആവശ്യമാണ്. അതിന് വിദേശനിക്ഷേപ പരിധി ഉയര്‍ത്തുകയല്ലാതെ മറ്റ് മാര്‍ഗമില്ല. വിപണിയെ തൃപ്തിപ്പെടുത്തുകയല്ല സര്‍ക്കാരിന്റെ ലക്ഷ്യം. മന്ത്രിസഭാതീരുമാനങ്ങളോട് വിപണി എങ്ങനെ പ്രതികരിക്കുന്നുവെന്നത് തങ്ങള്‍ക്ക് ബാധകമല്ല. പുതിയ ഭേദഗതികള്‍ ശീതകാലസമ്മേളനത്തില്‍ അവതരിപ്പിക്കുമെന്നും ചിദംബരം പറഞ്ഞു.

ചില്ലറ വ്യാപാരമേഖലയില്‍ വിദേശനിക്ഷേപം അനുവദിച്ചു കൊണ്ടാണ് സാമ്പത്തികപരിഷ്കരണം തീവ്രമാക്കുന്നതിനു രണ്ടാം യുപിഎ സര്‍ക്കാര്‍ തുടക്കമിട്ടത്. ഇതില്‍ പ്രതിഷേധിച്ച് മമതാ ബാനര്‍ജി സഖ്യം വിട്ടിരുന്നു. ഈ വിഷയത്തില്‍ രാജ്യമാകെ പ്രക്ഷോഭം കത്തിജ്വലിക്കുന്നതിനിടെയാണ് പുതിയ തീരുമാനം. ഇന്‍ഷുറന്‍സ് നിയമഭേദഗതി ബില്‍ നിലവില്‍ രാജ്യസഭയുടെ പരിഗണനയിലാണുള്ളത്. ഇന്‍ഷുറന്‍സ് റെഗുലേറ്ററി വികസന അതോറിറ്റിക്ക് കൂടുതല്‍ അധികാരങ്ങള്‍ നല്‍കുന്ന വ്യവസ്ഥകളും ഭേദഗതിയിലുണ്ട്. പൊതുമേഖലാ ജനറല്‍ ഇന്‍ഷുറന്‍സ് കമ്പനികള്‍ക്ക് 49 ശതമാനം വരെ ഓഹരിവിറ്റ് മൂലധനസമാഹരണത്തിന് വ്യവസ്ഥ ചെയ്തിട്ടുണ്ട്. 1938 ലെ ഇന്‍ഷുറന്‍സ് നിയമത്തില്‍ വ്യവസ്ഥ ചെയ്യുന്ന ഇന്‍ഷുറന്‍സ് ഏജന്റുമാരുടെ കമീഷന്‍ ഘടന എടുത്തുകളയാനും നിര്‍ദേശമുണ്ട്. ഇതുപ്രകാരം ഐആര്‍ഡിഎയാകും ഭാവിയില്‍ ഏജന്റുമാരുടെ കമീഷന്‍ ഘടനയും പെരുമാറ്റച്ചട്ടവും നിശ്ചയിക്കുക. കമീഷന് ഏര്‍പ്പെടുത്തിയിരുന്ന നിശ്ചിത പരിധി നിരക്കും എടുത്തുകളഞ്ഞു. ഇന്‍ഷുറന്‍സ് വിദേശനിക്ഷേപ പരിധി എത്രയാകുമോ അത്ര തന്നെയാകും പെന്‍ഷന്‍രംഗത്തുമെന്ന് പെന്‍ഷന്‍ ഫണ്ട് റെഗുലേറ്ററി ആന്‍ഡ് ഡെവലപ്മെന്റ് അതോറിറ്റി (പിഎഫ്ആര്‍ഡിഎ)}ബില്ലില്‍ വ്യവസ്ഥ ചെയ്യുന്നു.

പിഎഫ്ആര്‍ഡിഎയ്ക്ക് ഉപദേശനിര്‍ദേശങ്ങള്‍ നല്‍കാന്‍ പെന്‍ഷന്‍ ഉപദേശക സമിതിക്ക് രൂപം നല്‍കും. പെന്‍ഷന്‍ ഫണ്ടില്‍നിന്ന് ഉപാധികളോടെ 25 ശതമാനം തുക വരെ പിന്‍വലിക്കാന്‍ അനുവദിക്കും. പെന്‍ഷന്‍ ഫണ്ടില്‍നിന്ന് മിനിമം റിട്ടേണ്‍ താല്‍പ്പര്യപ്പെടുന്നവരെ അത്തരം ഫണ്ടുകളില്‍ നിക്ഷേപിക്കാന്‍ അനുവദിക്കും. അവധിവ്യാപാര മേഖലയ്ക്ക് കൂടുതല്‍ പ്രോത്സാഹനമേകുന്ന വിധത്തില്‍ അവധിവ്യാപാര നിയന്ത്രണനിയമത്തില്‍ ഭേദഗതി കൊണ്ടുവരാനും സര്‍ക്കാര്‍ തീരുമാനിച്ചു. അവധിവ്യാപാര മേഖലയിലെ റെഗുലേറ്റര്‍ എന്ന നിലയില്‍ അവധിവ്യാപാര കമീഷന് കൂടുതല്‍ അധികാരങ്ങള്‍ നല്‍കുന്നതാണ് ഭേദഗതി. കൂടുതല്‍ ഉല്‍പ്പന്നങ്ങള്‍ അവധിവ്യാപാര പട്ടികയിലേക്ക് സ്വന്തം നിലയില്‍ കൊണ്ടുവരാനും മറ്റും കമീഷന് സ്വാതന്ത്ര്യമുണ്ടാകും. കമ്പനി നിയമത്തില്‍ ഭേദഗതികള്‍ക്കും മന്ത്രിസഭ അനുമതി നല്‍കി. മത്സര നിയമത്തിലും ഭേദഗതി കൊണ്ടുവരും.

*
എം പ്രശാന്ത് ദേശാഭിമാനി 05 ഒക്ടോബര്‍ 2012

പങ്കാളിത്ത പെന്‍ഷന്‍ കൊടും വഞ്ചന

സാമൂഹ്യ സുരക്ഷാപദ്ധതികളില്‍ പരമപ്രധാനമായ സ്ഥാനമാണ് പെന്‍ഷന് കല്‍പ്പിക്കപ്പെട്ടിട്ടുള്ളത്. 1871ല്‍ ബ്രിട്ടീഷുകാര്‍ പെന്‍ഷന്‍ ആക്ട് നടപ്പാക്കുന്നതിലൂടെയാണ് നമ്മുടെ രാജ്യത്ത് പെന്‍ഷന്റെ ചരിത്രം ആരംഭിക്കുന്നത്. പെന്‍ഷന്‍ എന്നത് ദാതാവിന്റെ ഔദാര്യമോ സമ്മാനമോ കാരുണ്യമോ അനുഭാവമോ കൊണ്ടുമാത്രം തൊഴിലാളിക്ക് കരഗതമാകുന്ന ഒരു ആനുകൂല്യമെന്നാണ് അന്ന് വിവക്ഷിക്കപ്പെട്ടിരുന്നത്. പെന്‍ഷന്‍ തൊഴിലാളിയുടെ അവകാശമാണെന്ന് അംഗീകരിക്കപ്പെട്ടിരുന്നില്ല. നമ്മുടെ രാജ്യത്തിന്റെ സ്വാതന്ത്ര്യലബ്ധിക്കുശേഷവും പെന്‍ഷനോടുള്ള ഭരണകൂടത്തിന്റെ സമീപനത്തില്‍ മാറ്റമുണ്ടായിരുന്നില്ല. പെന്‍ഷന്‍കാരുടെ ബുദ്ധിമുട്ടുകള്‍ക്കും പരാതികള്‍ക്കും പരിഹാരം കാണാന്‍ കേന്ദ്ര സര്‍ക്കാരുകള്‍ ശ്രമിച്ചതുമില്ല. 1972ല്‍ ഗജേന്ദ്ര ഗാഡ്ഗില്‍ നിയമ കമീഷന്‍ ബ്രിട്ടീഷ് പെന്‍ഷന്‍ ആക്ടിലെ പല വ്യവസ്ഥയും ഇന്ത്യന്‍ ഭരണഘടന അനുശാസിക്കുന്നതിന് വിരുദ്ധമാണെന്ന് കണ്ടെത്തിയിരുന്നു.

1972ല്‍ തയ്യാറാക്കപ്പെട്ട സിവില്‍ സര്‍വീസ് പെന്‍ഷന്‍ ചട്ടങ്ങള്‍ക്ക് സ്റ്റാറ്റ്യൂട്ടറി പദവി നല്‍കിയത് ഇന്ത്യന്‍ ഭരണഘടനയുടെ 309, 148 (5) വകുപ്പുകളെ അടിസ്ഥാനപ്പെടുത്തിയാണ്. ജീവിതത്തിന്റെ സായംകാലത്ത് തൊഴില്‍രംഗത്തുനിന്ന് പിരിയുന്ന ജീവനക്കാര്‍ക്കും തൊഴിലാളികള്‍ക്കും പെന്‍ഷന്‍ ആനുകൂല്യം നിഷേധിക്കുന്നത് വ്യാപകമായ അസംതൃപ്തിക്കിടയാക്കി. ഈ വിഷയത്തില്‍ നിയമയുദ്ധത്തിനും കളമൊരുങ്ങി. 1971ല്‍ സര്‍വീസില്‍നിന്ന് വിരമിച്ച ഡി എസ് നഖാര എന്ന ഉദ്യോഗസ്ഥന്‍ നീതിതേടി സുപ്രീംകോടതിയിലെത്തി. നഖാര കേസില്‍ പരമോന്നത നീതിപീഠത്തിന്റെ, 1982 ഡിസംബര്‍ 17ന്റെ സുപ്രധാന വിധിന്യായം പെന്‍ഷന്‍കാരുടെ മാഗ്നകാര്‍ട്ടയായി ചരിത്രത്തിലിടം നേടി. പെന്‍ഷന്‍ തൊഴിലാളിയുടെ അവകാശമാണെന്നും അത് നല്‍കുകയെന്നത് രാജ്യത്തിന്റെ കടമയാണെന്നും അന്ന് വിധിച്ചു. പെന്‍ഷന്‍ നല്‍കുന്നതിലൂടെ വിരമിച്ച വ്യക്തിക്ക് അല്ലലില്ലാതെയും മാന്യമായും സ്വതന്ത്രമായും ആത്മാഭിമാനത്തോടെയും ശിഷ്ടകാലം ജീവിക്കാന്‍ കഴിയണമെന്നും ഒപ്പം സേവനകാലത്തേതിനുതത്തുല്യമായ ജീവിതസാഹചര്യം ഉണ്ടാകണമെന്നും ചരിത്രത്തിലെ നാഴികക്കല്ലായി മാറിയ ആ വിധിയിലൂടെ ചീഫ് ജസ്റ്റിസ് വൈ വി ചന്ദ്രചൂഡിന്റെ നേതൃത്വത്തിലുള്ള ഭരണഘടനാ ബെഞ്ച് പ്രഖ്യാപിച്ചു.

ഈ വിധിയെതുടര്‍ന്ന് നാലാം ശമ്പളകമീഷന്‍ പെന്‍ഷന്‍പരിഷ്കരണത്തിന് തുടക്കംകുറിച്ചു. ആഗോളവല്‍ക്കരണ- ഉദാരവല്‍ക്കരണ നയങ്ങള്‍ രാജ്യത്ത് നടപ്പാക്കിയതോടെ സാമൂഹ്യസുരക്ഷ എന്ന വിശാലമായ വീക്ഷണത്തിന്റെ പ്രസക്തിപോലും ചോദ്യംചെയ്യപ്പെട്ടു. 2001ല്‍ ഇന്ത്യയിലെ പെന്‍ഷന്‍പരിഷ്കരണത്തിന്റെ സാധ്യതകളുമായി ഐഎംഎഫ് പുറത്തിറക്കിയ നിര്‍ദേശപത്രിക ഇതിന്റെ ആദ്യപടിയായിരുന്നു. തുടര്‍ന്ന് രാജ്യം ഭരിച്ച ബിജെപി നേതൃത്വത്തിലുള്ള എന്‍ഡിഎ സര്‍ക്കാര്‍ പുതിയ പെന്‍ഷന്‍ പദ്ധതിയെപ്പറ്റി പഠിക്കുന്നതിന് ഉന്നതതലസമിതിയെ നിയമിച്ചു. 1991ല്‍ 3271 കോടി രൂപയില്‍നിന്ന് 2002ല്‍ എത്തുമ്പോള്‍ 22,410 കോടി രൂപ പെന്‍ഷനുവേണ്ടി സര്‍ക്കാര്‍ ചെലവിടുന്നു എന്നാണ് ഭട്ടാചാര്യകമ്മിറ്റിയെന്ന് അറിയപ്പെടുന്ന ഈ സമിതി വിലയിരുത്തിയത്. വര്‍ധിച്ചുവരുന്ന ഈ സാമ്പത്തികഭാരം സര്‍ക്കാരുകള്‍ക്ക് താങ്ങാനാകില്ലെന്ന നിഗമനത്തിലേക്ക് സമിതി എത്തി. ഇതിനുമുമ്പ് 1999ല്‍ ഡാവേ കമ്മിറ്റിയും 2001ല്‍തന്നെ ഐആര്‍ഡിഎ സമിതിയും പെന്‍ഷന്‍പരിഷ്കരണത്തിന് സമാന നിര്‍ദേശങ്ങള്‍ സമര്‍പ്പിച്ചിരുന്നു. ഐഎംഎഫ് ലോകബാങ്കിന്റെ കര്‍ശന നിബന്ധനകള്‍ക്ക് വിധേയമായി എന്‍ഡിഎ സര്‍ക്കാര്‍ 2003 ഡിസംബറില്‍ പെന്‍ഷന്‍ഫണ്ട് റഗുലേറ്ററി അതോറിറ്റിയെ നിയമിച്ചുള്ള ഓര്‍ഡിനന്‍സ് പുറപ്പെടുവിച്ചു. ഇന്ത്യന്‍ പാര്‍ലമെന്റിന്റെ അംഗീകാരത്തിനുപോലും കാത്തുനില്‍ക്കാതെ 2004 ജനുവരി ഒന്നുമുതല്‍ പങ്കാളിത്ത പെന്‍ഷന്‍പദ്ധതി സര്‍ക്കാര്‍ ഉത്തരവിലൂടെ നടപ്പാക്കി.

2005ല്‍ യുപിഎ സര്‍ക്കാര്‍ പാര്‍ലമെന്റില്‍ അവതരിപ്പിച്ച പിഎഫ്ആര്‍ഡിഎ ബില്‍ സിപിഐ എമ്മിന്റെ നേതൃത്വത്തിലുള്ള ഇടതുപക്ഷ പാര്‍ടികളുടെ ശക്തമായ എതിര്‍പ്പിന്റെയും ജീവനക്കാരുടെ ദേശവ്യാപകമായ പ്രക്ഷോഭങ്ങളുടെയും ഫലമായി പാസാക്കാന്‍ കഴിഞ്ഞില്ല. തുടര്‍ന്ന് 2011ല്‍ രണ്ടാം യുപിഎ സര്‍ക്കാര്‍ ബില്‍ വീണ്ടും അവതരിപ്പിച്ചു. പാര്‍ലമെന്റിന്റെ ഈ വര്‍ഷകാലസമ്മേളനത്തില്‍ ബില്‍ പാസാക്കാനാണ് സര്‍ക്കാര്‍ നീക്കം. ഇടതുപക്ഷത്തിന്റെ എതിര്‍പ്പ് ഒന്നുമാത്രമാണ് ബില്‍ പാസാക്കുന്നതിന് തടസ്സമായി നില്‍ക്കുന്നത്. നിശ്ചിതാനുകൂല്യം ഉറപ്പാക്കുന്ന പെന്‍ഷന്‍പദ്ധതിയില്‍നിന്ന് നിശ്ചിതവിഹിതം ഈടാക്കുന്ന പദ്ധതിയിലേക്കുള്ള പ്രതിലോമകരമായ ഒരു മാറ്റമാണ് പങ്കാളിത്ത പെന്‍ഷന്‍പദ്ധതി.

അടിസ്ഥാന ശമ്പളത്തിന്റെയും ക്ഷാമബത്തയുടെയും പത്തുശതമാനം തുക നിര്‍ബന്ധിതവിഹിതമായി ജീവനക്കാര്‍ നല്‍കണം. തത്തുല്യമായ സര്‍ക്കാര്‍വിഹിതവും ചേര്‍ത്താണ് പെന്‍ഷന്‍ഫണ്ട് രൂപീകൃതമാകുന്നത്. അമേരിക്കയടക്കമുള്ള വികസിത മുതലാളിത്ത രാജ്യങ്ങളിലെ സാമ്പത്തികമാന്ദ്യവും ആ രാജ്യങ്ങളിലെ ബാങ്കുകളുടെയും മറ്റ് സാമ്പത്തികസ്ഥാപനങ്ങളുടെയും തകര്‍ച്ചയുമാണ് മൂലധനത്തിനായി പുതിയ മേച്ചില്‍പ്പുറങ്ങള്‍ തേടാന്‍ അവരെ പ്രേരിപ്പിക്കുന്നത്. ഇന്ത്യയില്‍ ഒരു വമ്പന്‍ വിപണിയാണ് അവര്‍ ലക്ഷ്യമിടുന്നത്. കേന്ദ്ര സര്‍ക്കാര്‍ മേഖലയില്‍മാത്രം ഏതാണ്ട് 33 ലക്ഷം ജീവനക്കാരും 40 ലക്ഷം പെന്‍ഷന്‍കാരും ഉണ്ടെന്നാണ് കണക്കാക്കിയിട്ടുള്ളത്. രാജ്യത്തെ വിവിധ സംസ്ഥാന സര്‍വീസുകളില്‍ ഏകദേശം 90 ലക്ഷം ജീവനക്കാരുമുണ്ട്. കേരളത്തില്‍ നിലവില്‍ 5.5 ലക്ഷം പെന്‍ഷന്‍കാരും 5.2 ലക്ഷം ജീവനക്കാരുമുണ്ടെന്നാണ് കണക്ക്. ഇപിഎഫ് പദ്ധതിയിലാകട്ടെ നാലരക്കോടിയോളം തൊഴിലാളികള്‍ വരിക്കാരായിട്ടുണ്ട്.

ഇപിഎഫ് പെന്‍ഷന്‍കാര്‍ 18 ലക്ഷത്തിലധികംവരും. ഇതോടൊപ്പം അസംഘടിതമേഖലയിലെ 46 കോടി തൊഴിലാളികള്‍കൂടി പുതിയ പെന്‍ഷന്‍ പദ്ധതിയുടെ ഭാഗമായാല്‍ ധനമൂലധന ശക്തികള്‍ക്ക് ഭീമമായ ഒരു സാമ്പത്തികസ്രോതസ്സാണ് ലഭിക്കുക. തൊഴിലാളികളുടെയും ജീവനക്കാരുടെയും അധ്വാനത്തിന്റെ വിഹിതവും സര്‍ക്കാര്‍പങ്കും ചേര്‍ന്നുകിട്ടുന്ന പൊതുപണമാണ് ചൂതാട്ടത്തിനായി ഓഹരിക്കമ്പോളത്തിലേക്ക് ഒഴുകുന്നത്. പുതിയ പെന്‍ഷന്‍പദ്ധതിയിലൂടെ സമാഹരിക്കുന്ന ഫണ്ട് ഓഹരിക്കമ്പോളത്തില്‍ നിക്ഷേപിക്കുന്നതിനായി വിദേശ- സ്വദേശ ഫണ്ട് മാനേജര്‍മാര്‍ക്ക് കൈമാറും. പിഎഫ്ആര്‍ഡിഎ ബില്ലില്‍ മിനിമം പെന്‍ഷന്‍ ഉറപ്പുവരുത്തുന്ന വ്യവസ്ഥകള്‍ ഉള്‍പ്പെടുത്തിയിട്ടില്ല. ഒരു വിപണി ആഘാതം ഉണ്ടായാല്‍ വാര്‍ഷിക ആനുകൂല്യം ലഭിക്കുമെന്നതിന് ഉറപ്പില്ലെന്നതുമാത്രമല്ല അടച്ച മുഴുവന്‍ തുകയും നഷ്ടപ്പെടുകയും ചെയ്യും.

ഓഹരിക്കമ്പോളത്തിലെ നിക്ഷേപത്തില്‍ നഷ്ടം സംഭവിച്ചാല്‍ ഒരു ഉത്തരവാദിത്തവും പിഎഫ്ആര്‍ഡിഎ വഹിക്കുന്നതല്ലെന്നും എല്ലാ നിക്ഷേപവും വിപണിയുടെ ചേതങ്ങള്‍ക്ക് വിധേയമാണെന്നുമുള്ള മുന്നറിയിപ്പ് പങ്കാളിത്ത പെന്‍ഷനില്‍ പതിയിരിക്കുന്ന ചതിക്കുഴികളെ വ്യക്തമാക്കുന്നു. നിത്യോപയോഗസാധനങ്ങളുടെ വിലവര്‍ധനയ്ക്കനുസൃതമായി ലഭിച്ചുവരുന്ന ക്ഷാമബത്തയ്ക്ക് പുതിയ പെന്‍ഷന്‍പദ്ധതിയില്‍ അര്‍ഹതയുണ്ടാകില്ല. നിലവിലെ ജനറല്‍ പ്രോവിഡന്റ് ഫണ്ടിനും കുടുംബ പെന്‍ഷനും മാനസികവൈകല്യമുള്ള കുട്ടികള്‍ക്കും അവിവാഹിതരായ പെണ്‍മക്കള്‍ക്കും ലഭിക്കുന്ന ഉറപ്പുള്ള പെന്‍ഷനും ഇനി ഉണ്ടാകില്ല. പുതിയ പെന്‍ഷന്‍പദ്ധതിപ്രകാരം നിക്ഷേപത്തിനുള്ള സ്ഥാപനം തെരഞ്ഞെടുക്കാനുള്ള അവകാശം ഉപയോക്താവിനുണ്ടെന്ന് പറയപ്പെടുന്നുണ്ടെങ്കിലും വസ്തുത അതല്ല. നിലവില്‍ പെന്‍ഷന്‍ ലഭിക്കുന്നവര്‍ക്കും ഇപ്പോള്‍ സര്‍വീസിലുള്ള ജീവനക്കാര്‍ക്കും നിയമപരമായി നിശ്ചിത ആനുകൂല്യം ഉറപ്പാക്കുന്ന പെന്‍ഷന്‍പദ്ധതി നിഷേധിക്കാനോ മാറ്റംവരുത്താനോ സര്‍ക്കാരിന് അധികാരം നല്‍കുന്ന വ്യവസ്ഥയും ഈ ബില്ലിലുണ്ട്.

പെന്‍ഷന്‍ഫണ്ട് മാനേജര്‍മാരായി എസ്ബിഐ, ഐസിഐസിഐ പ്രുഡന്‍ഷ്യല്‍, കൊഡാക് മഹീന്ദ്ര ബാങ്ക്, റിലയന്‍സ് ക്യാപിറ്റല്‍, ഐഡിഎഫ്സി, എല്‍ഐസി എന്നീ കമ്പനികളെയാണ് ചുമതലപ്പെടുത്തിയിട്ടുള്ളത്. വിദേശ ഇന്‍ഷുറന്‍സ് കമ്പനികള്‍ക്ക് പങ്കാളിത്തമുള്ള ഇന്ത്യയിലെ വിവിധ കമ്പനികള്‍ പെന്‍ഷന്‍ഫണ്ട് വ്യവസായത്തിലേക്ക് കടന്നുവരാനായി കാത്തിരിക്കുന്നു. പെന്‍ഷന്‍മേഖലയില്‍ നേരിട്ടുള്ള വിദേശനിക്ഷേപം 26 ശതമാനത്തില്‍നിന്ന് 49 ശതമാനത്തിലേക്ക് ഉയര്‍ത്തുന്നതിനുള്ള നടപടിയും സര്‍ക്കാര്‍ സ്വീകരിക്കും. പങ്കാളിത്ത പെന്‍ഷന്‍പദ്ധതി ജീവനക്കാര്‍ക്ക് ഗുണകരമാണെന്ന പ്രചാരവേല ശുദ്ധതട്ടിപ്പാണെന്ന് വിവിധ രാജ്യങ്ങളുടെ അനുഭവങ്ങള്‍ സാക്ഷ്യപ്പെടുത്തുന്നു.

1990ന്റെ ആദ്യപാദങ്ങളില്‍തന്നെ ബ്രിട്ടനിലെ പദ്ധതിയില്‍ അംഗങ്ങളായ 20 ലക്ഷം തൊഴിലാളികള്‍ക്ക്, ഫണ്ട് മാനേജര്‍മാരുടെ തെറ്റായ ഉപദേശത്തെതുടര്‍ന്ന് പണം നഷ്ടപ്പെട്ടു. ബ്രിട്ടീഷ് പെന്‍ഷന്‍ റഗുലേറ്ററി സംവിധാനം 1993ല്‍ നടത്തിയ പഠനത്തില്‍ 91 ശതമാനം ഉപയോക്താക്കളും തെറ്റായ ഉപദേശങ്ങള്‍ക്ക് വശംവദരായതായി പറയുന്നു. 1990ല്‍ വിരമിച്ച ഒരു ബ്രിട്ടീഷ് ജീവനക്കാരന് ലഭിച്ച പെന്‍ഷന്‍ ആനുകൂല്യത്തേക്കാള്‍ 42 ശതമാനം കുറഞ്ഞ ആനുകൂല്യമാണ് 2000ല്‍ വിരമിച്ച ജീവനക്കാരന് ലഭിച്ചതെന്ന വിവരം ഞെട്ടിപ്പിക്കുന്നതാണ്. 2050ഓടെ ബ്രിട്ടനിലെ വയോജനസമൂഹത്തിന്റെ 33 ശതമാനം പട്ടിണിയുടെ ദുരവസ്ഥയിലാകും ജീവിക്കുകയെന്ന് കണക്കുകള്‍ വ്യക്തമാക്കുന്നു.

*
സി ചന്ദ്രന്‍പിള്ള ദേശാഭിമാനി 03 സെപ്തംബര്‍ 2012

ജനവിരുദ്ധനയങ്ങളിലേക്ക് ജനശ്രദ്ധ തിരിയുമ്പോള്‍

കേരളത്തില്‍ വിവാദങ്ങളുടെ പെരുമഴയ്ക്ക് കുറവൊന്നുമില്ല. യുഡിഎഫ് സര്‍ക്കാര്‍തന്നെയാണ് വിവാദങ്ങളുടെ പ്രായോജകര്‍. ജനകീയപ്രശ്നങ്ങളില്‍നിന്ന് ജനശ്രദ്ധ തിരിച്ച് ജനവിരുദ്ധനയങ്ങള്‍ അടിച്ചേല്‍പ്പിക്കുകയാണ് ഈ വിവാദങ്ങള്‍ക്ക് മറവിലെ ദുഷ്ടലാക്ക്. വിശ്വപ്രശംസനേടിയ കേരള മോഡല്‍ വികസനം നോക്കുകുത്തിയാവുകയോ ചവറ്റുകുട്ടയിലെറിയപ്പെടുകയോ ചെയ്യുകയാണ്. പ്രതീക്ഷയ്ക്ക് ഒട്ടും വകയില്ലാത്ത തരത്തിലേക്ക് നീങ്ങുകയാണ് കാര്യങ്ങള്‍.

2012 ആഗസ്ത് 16- സര്‍ക്കാര്‍ജോലിയിലേക്ക് കണ്ണുംനട്ട് പിഎസ്സി റാങ്ക്ലിസ്റ്റില്‍പ്പെട്ട പതിനായിരക്കണക്കിന് വരുന്ന യുവജനങ്ങള്‍ക്ക് മാത്രമല്ല നിലവില്‍ ജോലിചെയ്യുന്ന സര്‍ക്കാര്‍ ജീവനക്കാര്‍ക്കും അധ്യാപകര്‍ക്കും കറുത്തദിനമാണ്. സ്റ്റാറ്റ്യൂട്ടറി പെന്‍ഷന്‍സമ്പ്രദായം ഇല്ലാതാക്കി പങ്കാളിത്തപെന്‍ഷന്‍ കൊണ്ടുവരാനുള്ള തീരുമാനം പ്രഖ്യാപിക്കപ്പെട്ടത് അന്നാണ്. 2012 മുതല്‍ ജോലിയില്‍ പ്രവേശിക്കുന്നവര്‍ക്ക് മാത്രമേ ഇത് ബാധകമാകൂ എന്നാണ് മുഖ്യമന്ത്രിയുടെ ആണയിടല്‍. എന്നാല്‍, യാഥാര്‍ഥ്യം മറ്റൊന്നാണ്. പാര്‍ലമെന്റിന്റെ പരിഗണനയിലുള്ള പിഎഫ്ആര്‍ഡിഎ ബില്‍ നിയമമാകുന്നതോടെ ഇത് നിലവിലുള്ള ജീവനക്കാര്‍ക്കും ബാധകമാകും. പുതിയ പെന്‍ഷന്‍പദ്ധതി സേവനദാതാക്കളായ സര്‍ക്കാര്‍ മേഖലയുടെ ആകര്‍ഷണീയത മുഴുവനും തല്ലിക്കെടുത്തും. നിയമാനുസൃത പെന്‍ഷന്‍ സമ്പ്രദായംതന്നെയാണ് സര്‍ക്കാര്‍ജോലിയുടെ എല്ലാകാലത്തെയും വലിയ മേന്മയായി കണ്ടിരുന്നത്. എന്നാല്‍, പുതിയ പെന്‍ഷന്‍പദ്ധതി മികവുള്ളവരെ മുഴുവന്‍ പുതിയമേച്ചില്‍പ്പുറം തേടാന്‍ പ്രേരിപ്പിക്കും.

അധ്യാപക- സര്‍വീസ് മേഖലകളുടെ നിലവാരം ആകെ തകരും. നിലവിലുള്ള പെന്‍ഷന്‍ സമ്പ്രദായപ്രകാരം വിരമിക്കുന്ന ജീവനക്കാര്‍ക്ക് അവസാനം വാങ്ങിയ ശമ്പളത്തിന്റെ പകുതിയാണ് പെന്‍ഷനായി ലഭിക്കുക. എന്നാല്‍ നിര്‍ദിഷ്ട പങ്കാളിത്ത പെന്‍ഷന്‍ അത്തരത്തിലുള്ള ഒരു ഉറപ്പും നല്‍കുന്നില്ല. അടിസ്ഥാന ശമ്പളത്തിന്റെ പത്തുശതമാനം ജീവനക്കാരും അത്രയും തുക സര്‍ക്കാരും പെന്‍ഷന്‍ ഫണ്ടിലേക്ക് നിക്ഷേപിക്കും. തുടര്‍ന്ന് ഈ തുക ഓഹരി കമ്പോളത്തില്‍ നിക്ഷേപിച്ച് അതിന്റെ ലാഭമെടുത്ത് പെന്‍ഷന്‍ നല്‍കാനാണ് പദ്ധതി. പെന്‍ഷന്‍ഫണ്ട് കൂടി ഫലത്തില്‍ ഊഹക്കച്ചവടത്തിലേക്ക് കടത്തിവിടുന്നുവെന്നാണ് അര്‍ഥം; അതുവഴി സ്വദേശ- വിദേശ കുത്തകകള്‍ക്കെല്ലാം ഇഷ്ടംപോലെ ഈ പണമെടുത്ത് പെരുമാറാം. കുത്തകകള്‍ക്ക് പണംകൊണ്ട് വീര്‍ക്കാമെന്നല്ലാതെ ഇതില്‍ വേറെ കാര്യമില്ല. ഓഹരിക്കമ്പോളത്തിന്റെ കയറ്റിറക്കങ്ങള്‍ പ്രകാരമുള്ള ദാക്ഷിണ്യങ്ങള്‍ക്ക് കൈനീട്ടി നില്‍ക്കേണ്ടിവരും പാവം പെന്‍ഷന്‍കാരന്‍! നിയമാനുസൃത പെന്‍ഷന്‍ സമ്പ്രദായത്തിലെ കുടുംബപെന്‍ഷന്‍, പങ്കാളിത്ത സമ്പ്രദായത്തില്‍ പൂര്‍ണമായും അസ്തമിക്കും. ഓഹരിക്കമ്പോളത്തിന്റെ തകര്‍ച്ച ഈ സമ്പ്രദായം നടപ്പാക്കിയ രാജ്യങ്ങളിലേതുപോലെ, പെന്‍ഷന്‍തന്നെ നഷ്ടമാകുന്ന ദുരന്തത്തിലെത്തിക്കും. വിരമിച്ചവരുടെ വരുമാനം ഒറ്റ ദിവസംകൊണ്ട് നിശ്ചലമാവും; കുടുംബങ്ങളുടെ ഭാവി അനിശ്ചിതത്വത്തിലാവും. പങ്കാളിത്ത പെന്‍ഷന്‍കൊണ്ട് സര്‍ക്കാരിന് നേട്ടമൊന്നുമില്ലെന്ന് പറയുന്ന മുഖ്യമന്ത്രി, പിന്നെ എന്തിന് ഇക്കാര്യത്തില്‍ അനാവശ്യധൃതിയെന്ന ചോദ്യത്തിന് ഇപ്പോഴും നിഗൂഢമായ മൗനം ദീക്ഷിക്കുകയാണ്. ഈ മൗനത്തിന്റെ കാണാപ്പുറം കണ്ടെത്താനും ചോദ്യം ചെയ്യാനും കേരളത്തിലെ യുവനജങ്ങള്‍ക്ക് ബാധ്യതയുണ്ട്.

പെന്‍ഷന്‍സമ്പ്രദായത്തെ ലാഭനഷ്ടക്കണക്കിന്റെ ഗ്രാഫ് വരച്ച് നോക്കിക്കാണുന്നത് ജനാധിപത്യ-ക്ഷേമരാഷ്ട്ര സങ്കല്‍പ്പങ്ങള്‍ക്ക് ഭൂഷണമല്ല. ജനതയുടെ ആയുര്‍ദൈര്‍ഘ്യം വര്‍ധിച്ചതിന്റെ പേരില്‍ യുവതലമുറ അവരുടെ ജീവിതാഭിലാഷങ്ങള്‍ ബലിനല്‍കണമെന്ന് പറയുന്നത് സുതാര്യതയില്‍ ഊറ്റംകൊള്ളുന്ന ഒരു സര്‍ക്കാരിന്റെ തൊടുന്യായമായേ ജനങ്ങള്‍ കാണൂ. പെന്‍ഷന്‍ നല്‍കുന്നതോടെ പ്രായമായവരുടെ സാമൂഹ്യസുരക്ഷിതത്വം സാധ്യമാകുന്നതോടൊപ്പം അത് സമൂഹത്തിന്റെ ആകെ വാങ്ങല്‍ശേഷിയെ ത്വരിതപ്പെടുത്തുകയും വികസനത്തിന് വലിയ മുതല്‍മുടക്കാവുകയുംചെയ്യും. പെന്‍ഷന്‍ ഇല്ലാതാകുന്നതോടെ സാമൂഹ്യവികസനംതന്നെ അവതാളത്തിലാവും. വാങ്ങല്‍ശേഷി ഇടിയുന്നതോടെ റവന്യൂ വരുമാനം കുത്തനെ കുറയും. അത് റവന്യൂകമ്മി വര്‍ധിക്കുന്നതിന് ഇടയാക്കും. പങ്കാളിത്ത പെന്‍ഷന്‍പദ്ധതി അക്ഷരാര്‍ഥത്തില്‍ നിലവിലുള്ള ജീവനക്കാരെയും പുതുതായി സര്‍വീസില്‍ വരുന്നവരെയും ഭിന്നിപ്പിച്ച് നിര്‍ത്താനുള്ള ഒരു പദ്ധതിമാത്രമായി വഴിമാറും.

പങ്കാളിത്ത പെന്‍ഷനോടൊപ്പം പെന്‍ഷന്‍പ്രായം അറുപതാക്കാനുള്ള തീരുമാനത്തിന്റെ സൂചനകളും പുറത്തുവന്നുകഴിഞ്ഞു. അതിനെ സാധൂകരിക്കുന്ന തരത്തില്‍ മുഖ്യമന്ത്രിയുടെയും ധനമന്ത്രിയുടെയും പ്രസ്താവനകളും കേരളം കേട്ടുകഴിഞ്ഞു. തസ്തികകള്‍ വെട്ടിക്കുറയ്ക്കാനുള്ള തീരുമാനം മറ്റൊരുവഴിക്കും നടക്കുന്നു. കേരളത്തിന്റെ രൂക്ഷമായ തൊഴിലില്ലായ്മ പരിഗണിക്കാതെയുള്ള ഏതൊരു തീരുമാനവും ഗുരുതരമായ സാമൂഹ്യ പ്രത്യാഘാതം ക്ഷണിച്ചുവരുത്തും. 2011-ല്‍ വിവിധ തസ്തികകളിലേക്ക് പിഎസ്സിക്ക് ലഭിച്ച അപേക്ഷകളുടെ എണ്ണം 31,08,683 ആണ്. കേരളത്തിലെ അഭ്യസ്തവിദ്യരുടെ തൊഴിലില്ലായ്മയും സര്‍ക്കാര്‍ തൊഴിലന്വേഷകരുടെ എണ്ണവും മറ്റു സംസ്ഥാനങ്ങളുമായി താരതമ്യം ചെയ്യാനാകാത്തവിധം ഭീമമാണ്. പെന്‍ഷന്‍പ്രായം വര്‍ധിപ്പിക്കല്‍ സര്‍ക്കാരിന്റെ നയമല്ലെന്ന് നിയമസഭയില്‍ രേഖാമൂലം മറുപടി നല്‍കിയയാളാണ് നമ്മുടെ മുഖ്യമന്ത്രി. എന്നാല്‍, പെന്‍ഷന്‍പ്രായം 56 ആക്കി ഉയര്‍ത്തിയപ്പോള്‍ അതിന് ന്യായം പറഞ്ഞത്, ജീവനക്കാരുടെ ബുദ്ധിമുട്ടുകള്‍ ദൂരീകരിക്കാനാണെന്നാണ്. ഒടുവില്‍, പെന്‍ഷന്‍പ്രായം 60 ആക്കുകതന്നെയാണ് യുഡിഎഫ് സര്‍ക്കാരിന്റെ നയമെന്ന് തെളിഞ്ഞിരിക്കുന്നു.

യുവജനങ്ങളുടെ വികാരമുള്‍ക്കൊണ്ട് പാക്കേജ് കൊണ്ടുവരുമെന്നും ഇക്കാര്യത്തില്‍ പ്രായോഗികമായ എന്തു നിര്‍ദേശവും സ്വീകരിക്കുമെന്നും നിയമസഭയിലെ ശ്രദ്ധക്ഷണിക്കലിന് (മാര്‍ച്ച് 22) മറുപടിയായി മുഖ്യമന്ത്രി പറഞ്ഞിട്ടുണ്ട്. എന്നാല്‍, എന്ത് പാക്കേജാണ് യുവജനങ്ങള്‍ക്കു വേണ്ടി സര്‍ക്കാരിന്റെ പരിഗണനയിലുള്ളതെന്ന് ഇനിയും വ്യക്തമാക്കിയിട്ടില്ല. കൊട്ടിഘോഷിക്കപ്പെടുന്ന സംസ്ഥാനസംരംഭക മിഷന്‍ ഇപ്പോള്‍ വെറും വാഗ്ദാന മിഷന്‍മാത്രമാണ്. 2011 നവംബര്‍ ഒന്നിന് സംസ്ഥാന സ്വയംസംരംഭകകമീഷന്റെ ഉദ്ദേശലക്ഷ്യങ്ങള്‍ വിശദമാക്കുക എന്ന ചോദ്യത്തിന് മറുപടിയായി ധനമന്ത്രി പറഞ്ഞ മറുപടി ഇങ്ങനെ (നക്ഷത്ര ചിഹ്നമിടാത്ത ചോദ്യം നമ്പര്‍ 6767): ഇന്ത്യയിലെ തൊഴിലില്ലാത്തവരില്‍ 10 ശതമാനം കേരളത്തിലാണെന്ന് കണക്കുകള്‍ വ്യക്തമാക്കുന്നു. തൊഴിലില്ലാത്ത അഭ്യസ്തവിദ്യരാണ് ഇതില്‍ ഏറ്റവും കൂടുതല്‍. ഇവരുടെ തൊഴിലില്ലായ്മയ്ക്ക് പരിഹാരം ഉണ്ടാക്കുകയാണ് ഈ മിഷന്റെ പ്രവര്‍ത്തനലക്ഷ്യം. ഒരു ലക്ഷം പ്രത്യക്ഷ തൊഴിലവസരങ്ങളും, അഞ്ചുലക്ഷം പരോക്ഷ തൊഴിലവസരങ്ങളും ഉറപ്പാക്കും. എന്നാല്‍, വസ്തുത എന്താണെന്നതിന് മന്ത്രിയുടെ തന്നെ 2012 ജൂണ്‍ 18ന്റെ (നക്ഷത്ര ചിഹ്നമിടാത്ത ചോദ്യം നമ്പര്‍ 1717) മറുപടി,22 സംരംഭങ്ങള്‍ക്ക് തത്വത്തില്‍ അനുമതി നല്‍കിക്കഴിഞ്ഞിരിക്കുന്നു എന്നാണ്. മിഷന്‍ വെറും പ്രചാരണമിഷന് മാത്രമായിരുന്നുവെന്നതിന് വേറൊരു തെളിവ് ഇനി വേണ്ട. കാര്‍ഷിക വ്യാവസായിക സംരംഭം വേണ്ടത്ര വികസിച്ചിട്ടില്ലാത്ത കേരളത്തില്‍ പെന്‍ഷന്‍പ്രായം വര്‍ധിപ്പിക്കുന്നതോടെ സര്‍ക്കാര്‍ജോലി എന്ന പ്രതീക്ഷതന്നെ അസ്ഥാനത്താകും. ഏകദേശം 1400 പിഎസ്സി റാങ്ക്ലിസ്റ്റില്‍ നിയമനം കാത്തുകഴിയുന്ന പതിനായിരക്കണക്കിന് യുവജനങ്ങളുടെ സര്‍ക്കാര്‍ജോലി എന്ന സ്വപ്നം കരിഞ്ഞുണങ്ങും. രാജ്യത്തെ സംഘടിതമേഖലയിലെ തൊഴിലവസരങ്ങളില്‍ വന്ന ഇടിവ്, റെയില്‍വേ- ബാങ്കിങ് മേഖലകളിലെ തസ്തിക വെട്ടിക്കുറയ്ക്കലും ഔട്ട് സോഴ്സിങ്ങും തുടങ്ങി, മറ്റു വഴികളില്ലാതെ ഉദ്യോഗാര്‍ഥികള്‍ നെട്ടോട്ടമോടുമ്പോഴാണ് കേരള സര്‍ക്കാരിന്റെയും ഇടിത്തീയാകുന്ന തീരുമാനങ്ങള്‍! നെല്ലിയാമ്പതി വിവാദത്തിന്റെ പേരില്‍ ഊറ്റംകൊള്ളുന്ന യുഡിഎഫ് യുവ എംഎല്‍എമാര്‍ ഇക്കാര്യങ്ങളിലെല്ലാം കുറ്റകരമായ മൗനം പാലിക്കുകയാണ്.

യുവജനങ്ങളുടെ പ്രതീക്ഷയും സ്വപ്നങ്ങളും തകര്‍ക്കുന്ന സര്‍ക്കാര്‍നയങ്ങളെ അവര്‍ കണ്ടില്ലെന്ന് നടിക്കുകയാണെന്ന് മാത്രമല്ല വിവാദങ്ങള്‍ സൃഷ്ടിച്ച് സര്‍ക്കാരിന്റെ നവലിബറല്‍ അജന്‍ഡകളെ സമര്‍ഥമായി ഒളിപ്പിക്കുകയുമാണ്. സാമാന്യബുദ്ധിയുള്ളവര്‍ക്ക് ഇത് എളുപ്പം തിരിച്ചറിയാനാവും. വൈദ്യുതിചാര്‍ജ്, തോട്ടംഭൂമി ടൂറിസം ആവശ്യത്തിന് ഉപയോഗിക്കല്‍, നെല്‍വയല്‍- നീര്‍ത്തട സംരക്ഷണ നിയമങ്ങളുടെ അട്ടിമറി, ഭൂപരിഷ്കരണനിയമം ഭൂമാഫിയകള്‍ക്കുവേണ്ടി ഭേദഗതി ചെയ്യല്‍, തൊഴിലില്ലായ്മ വേതന നിഷേധം, വിദ്യാഭ്യാസ മേഖലയിലെ പ്രീണന കച്ചവട നിലപാടുകള്‍, എന്‍ഡോസള്‍ഫാന്‍ ദുരിതബാധിതര്‍ക്ക് മനുഷ്യാവകാശകമീഷന്‍ പ്രഖ്യാപിച്ച ദുരിതാശ്വാസത്തില്‍ നിന്ന് മഹാഭൂരിപക്ഷം വരുന്നവരെ ഒഴിവാക്കല്‍- ഈ ജനകീയ പ്രശ്നങ്ങളോടെല്ലാം എന്ത് നിലപാടെടുത്തു നമ്മുടെ യുവതുര്‍ക്കികള്‍ എന്ന് അന്വേഷിക്കുന്നത് നന്നായിരിക്കും. എന്തായാലും, അധികകാലം ഈ മുഖംമൂടികള്‍ക്ക് ആയുസ്സില്ലെന്ന് ജനങ്ങള്‍തന്നെ കാട്ടിക്കൊടുക്കും!

വാക്കും പ്രവൃത്തിയും ഇങ്ങനെ അജഗജാന്തരം വേറിട്ടുനില്‍ക്കുന്ന മറ്റൊരു ഭരണകൂടത്തെ കേരളം കണ്ടിട്ടുണ്ടാകില്ല. ജനസമ്പര്‍ക്കമെന്ന കണ്ണില്‍പ്പൊടിയിടലിലൂടെ സര്‍ക്കാര്‍ ജനവിരുദ്ധ നയങ്ങള്‍ ചാക്കില്‍കെട്ടി ഇറക്കുകയാണ്. കൂടാതെ ജനശ്രദ്ധ തിരിക്കാന്‍ കള്ളക്കേസുകളും ഹീനമായ വ്യക്തിഹത്യാശ്രമങ്ങളും. നേതാക്കളെ ജയിലിലടച്ച് പ്രവര്‍ത്തകരെ നിര്‍വീര്യമാക്കാമെന്ന കുടിലതന്ത്രമാണ് പയറ്റുന്നത്. വാദികളും പ്രതികളുമായി വിവാദങ്ങളുടെ സ്പോണ്‍സേര്‍ഡ് നാടകങ്ങള്‍ വേറൊരുഭാഗത്ത്. അതിലെ നായക- ഉപനായക വേഷങ്ങളായി യുവ എംഎല്‍എമാരുടെ വേറെ പ്രകടനങ്ങള്‍. എല്ലാം എല്ലാകാലത്തേക്കുമായി കണ്ടുനില്‍ക്കാന്‍ ഈ കേരളത്തിനു കഴിയില്ല. ഇവിടത്തെ പ്രബുദ്ധരായ യുവജനം പോരാട്ടവീറില്‍ ആളിക്കത്തുക തന്നെചെയ്യും.

*
ടി വി രാജേഷ് ദേശാഭിമാനി 01 സെപ്തംബര്‍ 2012

പങ്കാളിത്ത പെന്‍ഷന്‍ ആര്‍ക്കുവേണ്ടി?

സംസ്ഥാനത്ത് അടുത്ത സാമ്പത്തിക വര്‍ഷം മുതല്‍ സര്‍ക്കാര്‍ സര്‍വീസില്‍ പ്രവേശിക്കുന്നവര്‍ക്കും അധ്യാപകര്‍ക്കും പങ്കാളിത്ത പെന്‍ഷന്‍ നടപ്പാക്കി ഉത്തരവിറങ്ങിക്കഴിഞ്ഞു. ഇങ്ങനെയൊരുത്തരവുണ്ടാകാതിരിക്കാന്‍ സര്‍ക്കാര്‍ ജീവനക്കാരുടേയും അധ്യാപകരുടേയും സംഘടനകള്‍ ഏറെ നാളായി പ്രക്ഷോഭവും പ്രതിരോധവും സൃഷ്ടിക്കാന്‍ ശ്രമിച്ചിട്ടുണ്ട്. അതുകൊണ്ട് തന്നെയാകണം, മുഖ്യമന്ത്രി സ്ഥിരം ശൈലിയില്‍ വളരെ കൗശലപൂര്‍വം മാധ്യമങ്ങള്‍ക്ക് മുന്നില്‍ പോലും തുറന്നുപറയാതെയും സംഘടനകളുമായി ആലോചിക്കാതെയും കഴിഞ്ഞ ഓഗസ്റ്റ് 8 ന് ഏകപക്ഷീയമായി ഉത്തരവ് പുറപ്പെടുവിച്ചത്.

ജീവനക്കാരെയും പൊതുമേഖലയില്‍ പണിയെടുക്കുന്നവരെയും ഈ ഉത്തരവ് വലിയ ആശങ്കയിലേക്കാഴ്ത്തിയിട്ടുണ്ട്. നാളെ, സര്‍ക്കാര്‍ സര്‍വീസില്‍ ഒരു തൊഴില്‍ എന്ന സ്വപ്‌നം  പേറി നടക്കുന്ന യുവജനങ്ങളില്‍ നിരാശയും പ്രതിഷേധവും സൃഷ്ടിക്കാനും ഉത്തരവിടയാക്കി. സംസ്ഥാനത്തെ എല്ലാ അധ്യാപക സര്‍വീസ് സംഘടനകളും യോജിച്ച് ഈ ഉത്തരവിനെതിരെ അണിചേരുകയും സംയുക്ത പണിമുടക്കിന് ആഹ്വാനം ചെയ്യുകയും ചെയ്തപ്പോള്‍ മാത്രമാണ് കൂടി#ാലോചനയ്ക്ക് മുഖ്യമന്ത്രി സന്നദ്ധനായത്.  എന്നാല്‍, കുടിയാലോചനായോഗത്തിലും കേവലം രാഷ്ട്രീയ നിഷ്പക്ഷത പുലര്‍ത്തുന്ന സര്‍വീസ് സംഘടനകളെപ്പോലും പ്രകോപിപ്പിക്കും വിധം, പങ്കാളിത്ത പെന്‍ഷന്‍ ആര് എതിര്‍ത്താലും യു ഡി എഫ് സര്‍ക്കാര്‍ നടപ്പാക്കുമെന്ന പ്രഖ്യാപനം നടത്താന്‍ മാത്രമാണ് അദ്ദേഹം തയ്യാറായത്. ഇതു സംബന്ധിച്ച ആശങ്കകളേയും ആവലാതികളേയും അദ്ദേഹം തിരിച്ചറിയാന്‍ ശ്രമിച്ചു കണ്ടില്ല. യുവജന സംഘടനകളുമായി ഈ വിഷയം ചര്‍ച്ചയ്ക്കു വിധേയമാക്കിയിട്ടില്ല. എന്തിന് ഒന്നരമാസം നീണ്ടു നിന്ന കേരള നിയമസഭ സമ്മേളനത്തില്‍ പോലും പങ്കാളിത്തപെന്‍ഷന്‍ പദ്ധതി ചര്‍ച്ചയ്ക്കു വിധേയമാകാതെ പോയതെന്തുകൊണ്ടെന്ന ചോദ്യം ഇപ്പോഴും ബാക്കി നില്‍ക്കുകയാണ്.

2002 ന്റെ ആവര്‍ത്തനം

2002 ജനുവരി 16 ന് അന്നത്തെ യു ഡി എഫ് സര്‍ക്കാര്‍ ഇറക്കിയ ജീവനക്കാരുടേയും അധ്യാപകരുടേയും ആനുകൂല്യങ്ങള്‍ കവര്‍ന്നെടുക്കുന്ന ഉത്തരവിന്റെ തനിയാവര്‍ത്തനം പത്തുവര്‍ഷങ്ങള്‍ക്ക് ശേഷം സംഭവിക്കുകയാണ്. പങ്കാളിത്ത പെന്‍ഷന്‍ അന്നേ നടപ്പിലാക്കാന്‍ ഉദ്യമിച്ചിരുന്നതാണ്. ജീവനക്കാരുടെ എണ്ണം വെട്ടിക്കുറയ്ക്കല്‍, ലീവ് സറണ്ടര്‍ ആനുകൂല്യം നിഷേപിക്കല്‍, നിയമനനിരോധനം, സ്‌കൂള്‍ അടച്ചുപൂട്ടല്‍ തുടങ്ങി ഒരു പാക്കേജ് ആയിരുന്നു അന്നത്തെ ഉത്തരവ്. കേരളത്തിന്റെ സമരചരിത്രത്തില്‍ സര്‍ക്കാര്‍ ജീവനക്കാരുടേയും അധ്യാപകരുടേയും സമാനതകളില്ലാത്ത പ്രക്ഷോഭകൊടുങ്കാറ്റാണ് അന്ന്, ആ ഉത്തരവില്‍ നിന്ന് പിന്മാറാന്‍ സര്‍ക്കാരിന് താക്കീതായത്. എന്നാല്‍ 2012 ലാകട്ടെ ഒരു വെട്ടിന് എല്ലാം കൂടി മുറിച്ചുകളയാമെന്നല്ല, ആനുകൂല്യങ്ങളും സാമൂഹിക ക്ഷേമനടപടികളും ഓരോന്നായി പിഴുതെറിയാമെന്നാണ് നിലപാട്. അതുകൊണ്ട്, പങ്കാളിത്ത പെന്‍ഷന്‍ ഉത്തരവ്, നിലവില്‍ ജോലി ചെയ്യുന്നവര്‍ക്ക് ബാധകമല്ലെന്നും വരും തലമുറയെ മാത്രമേ ബാധിക്കൂ എന്നും മികച്ചതാണെന്നും പറഞ്ഞ് സമരാവേശം തണുപ്പിച്ച് എതിര്‍പ്പുകൂടാതെ  നടപ്പാക്കാമെന്നും കരുതുന്നത് ചിന്താശേഷിയുള്ളവര്‍ തിരിച്ചറിയുകതന്നെ വേണം. അല്ലെങ്കില്‍ മറ്റ് ഓരോ അവകാശങ്ങള്‍ക്കുമേല്‍ കത്തിവെക്കുമ്പോഴും അവര്‍ക്ക് നിസ്സംഗരായി നോക്കി നില്‍ക്കേണ്ടി വരും  എന്ന് തീര്‍ച്ച. കഴിഞ്ഞ കാലങ്ങളിലെ എത്രയോ ഉജ്ജ്വലമായ പ്രക്ഷോഭങ്ങളിലൂടെ നേടിയെടുക്കുകയും സംരക്ഷിക്കുകയും ചെയ്ത കവര്‍ന്നെടുക്കാന്‍ അനുവദിക്കില്ലെന്ന് ഐക്യബോധത്തോടെ ഇന്നേ പറയുന്നത്, നാളെകള്‍ക്കു വേണ്ടിക്കൂടിയാണെന്ന് തിരിച്ചറിയണം.

എന്തിനാണ് ചുവടുമാറ്റം?

നാളിതുവരെ ലഭിച്ചുകൊണ്ടിരുന്ന സ്റ്റാറ്റിയൂട്ടറി പെന്‍ഷന്‍ എന്തിന് അട്ടിമറിക്കണം? സാമ്പത്തിക പണ്ഡിതര്‍ സര്‍ക്കാരിനുവേണ്ടി നിരന്തരം പത്രമാധ്യമങ്ങളില്‍ ലേഖനങ്ങളെഴുതി ഒത്താശ ചെയ്തുകൊടുക്കുന്നു. ലക്ഷങ്ങള്‍ മുടക്കി മാധ്യമങ്ങളില്‍ പരസ്യം നല്‍കുന്നു. സംസ്ഥാനത്തിന്റെ റവന്യൂ വരുമാനത്തിന്റെ മുക്കാല്‍ പങ്കും പെന്‍ഷനും ആനുകൂല്യങ്ങള്‍ക്കുമായി മാറ്റിവെക്കേണ്ടി വരുന്നതിനാല്‍, ക്ഷേമപദ്ധതികള്‍ നടപ്പാക്കാന്‍ കഴിയുന്നില്ലെന്നാണ് പൊതുവെ ഉയരുന്ന വാദം. പങ്കാളിത്ത പെന്‍ഷന്‍ നടപ്പാക്കിയും പെന്‍ഷന്‍ പ്രായം ഉയര്‍ത്തിയും മാത്രമേ ഈ സ്ഥിതി മറികടക്കാന്‍ സാധിക്കൂ എന്നും പറയുന്നു. തികച്ചും ന്യായമെന്നു തോന്നാവുന്നതാണ് വാദം. യഥാര്‍ഥത്തില്‍ ഇതിനു പരിഹാരമായി നമ്മുടെ ആഭ്യന്തര ഉല്‍പാദനം വര്‍ധിപ്പിക്കുന്നതിനല്ലേ സര്‍ക്കാര്‍ ശ്രദ്ധ തിരിക്കേണ്ടത്? അതിനുള്ള ഉപാധി ഒരു പണ്ഡിതനും വിശദീകരിക്കുന്നുമില്ല. അതല്ലാതെ ഒരാളുടെ കണ്ണില്‍ കുത്തി ആ വെള്ളം കൊണ്ട് വേറൊരാളുടെ ദാഹം തീര്‍ക്കാമെന്ന് കരുതുന്നത് ക്രൂരതയും അന്യായവുമാണ്. വരുമാനം വര്‍ധിപ്പിക്കേണ്ട കാര്‍ഷിക വ്യാവസായിക മേഖലകളെയും ചെറുകിട വ്യാപാര മേഖലയെ പോലും പക്ഷേ സര്‍ക്കാര്‍ തളര്‍ത്തുന്ന നടപടി സ്വീകരിക്കുന്നു. ഈ പിടിപ്പുകേട് പങ്കാളിത്ത പെന്‍ഷന്‍ പദ്ധതിയിലൂടെ മറയ്ക്കാനാണ് ശ്രമം. കേരളം പോലെ ഒരു സംസ്ഥാനത്ത് ആയുര്‍ദൈര്‍ഘ്യം കൂടുതലാണല്ലോ. ഇവിടെ വാര്‍ധക്യം ഒട്ടേറെ പ്രയാസങ്ങളേയും പ്രതിസന്ധികളേയും നേരിടുന്നുണ്ട്. വര്‍ധിച്ചുവരുന്ന ചികിത്സാചെലവു തന്നെ ഒരുദാഹരണം. വാര്‍ധക്യകാലത്ത്, സ്വാഭിമാനത്തോടെ ജീവിക്കാന്‍ ഇന്ന് ലഭിക്കുന്ന പെന്‍ഷന്‍ നല്‍കുന്ന ആത്മവിശ്വാസം, കേരളത്തിന്റെ ഉദാത്തമായ സാമൂഹിക സുരക്ഷാപദ്ധതിയാണ്. ലഭിച്ച ശമ്പളത്തേക്കാള്‍ കൂടിയ തുക പെന്‍ഷനായി വാങ്ങുന്നു എന്നെല്ലാമുള്ള  വാദങ്ങള്‍ ചിലര്‍ ഉന്നയിക്കുന്നുണ്ട്. പണത്തിന്റെ മൂല്യതകര്‍ച്ച മൂലം സംഭവിച്ചു പോകുന്ന സംഗതി മാത്രമാണത്. തന്റെ കുട്ടികളെല്ലാം ജീവിതത്തിന്റെ പന്ഥാവില്‍, അവരുടെ പ്രാരാബ്ധങ്ങളില്‍പ്പെട്ടുഴലുമ്പോഴും തന്റെയോ ഭാര്യയുടേയോ ജീവിതാവശ്യങ്ങള്‍ക്ക് ആരെയും ആശ്രയിക്കാതെയും എന്നാല്‍ മറ്റുള്ളവര്‍ക്ക് സഹായഹസ്തം നീട്ടിയും ജീവിക്കാനിടയാക്കുന്ന ഇന്നത്തെ അവസ്ഥ തല്ലിതകര്‍ക്കണമെന്നു കരുതുന്നത് ദോഷൈകദൃഷ്ടി കൊണ്ടുമാത്രം സംഭവക്കുന്നതാണ്.

ഓഹരി കൂറ്റന്മാര്‍ക്ക് നല്ല കാലം

കൊട്ടിഘോഷിക്കുന്ന പങ്കാളിത്ത പെന്‍ഷന്റെ യഥാര്‍ഥ ഗുണഭോക്താവ്, മറ്റാരുമല്ല, ഓഹരിക്കമ്പോളമായിരിക്കും. പങ്കാളിത്ത പെന്‍ഷന്‍ പദ്ധതിയിലൂടെ, ഒരു ജീവനക്കാരന്റെ ശമ്പളത്തിന്റെയും ക്ഷാമബത്തയുടേയും നിശ്ചിത ശതമാനവും സര്‍ക്കാര്‍ വിഹിതവും പെന്‍ഷന്‍ ഫണ്ട് മാനേജ്‌മെന്റ് കമ്പനിയെ ഏല്‍പ്പിക്കാനാണ് പരിപാടി. പെന്‍ഷന്‍ ഫണ്ട് മാനേജ്‌മെന്റ് ഇത് ഷെയര്‍മാര്‍ക്കറ്റില്‍ നിക്ഷേപിക്കുമത്രേ. അപ്പോള്‍ വികസന ഓഹരി വിപണിയുടെ ഇടിവും സാമ്പത്തികമാന്ദ്യവുമെല്ലാം പെന്‍ഷന്‍ ലഭിക്കുന്നതിനുള്ള ഘടകങ്ങളായി മാറാന്‍ പോവുകയാണ്. പങ്കാളിത്ത പെന്‍ഷന്‍ പദ്ധതി പ്രകാരം ഇന്നു ലഭിക്കുന്നതുപോലെ, സുതാര്യവും കൃത്യതയുമുള്ള ഒരു പെന്‍ഷന്‍ പദ്ധതി ഉറപ്പാക്കാനാവുമെന്ന് മുഖ്യമന്ത്രിപോലും ഉറപ്പിച്ചു പറയുന്നില്ല. മാത്രമല്ല പങ്കാളിത്ത പെന്‍ഷന്‍ അടുത്ത സാമ്പത്തികവര്‍ഷം ആരംഭിച്ചാല്‍ തന്നെ 30 വര്‍ഷങ്ങള്‍ക്ക് ശേഷമേ പ്രായോഗികമാവൂ എന്നും അതുവരെ പ്രതിമാസവിഹിതം പെന്‍ഷന്‍ ഫണ്ടിലേക്കു നല്‍കുക എന്ന സാമ്പത്തിക ബാധ്യതയാണ് സര്‍ക്കാരിനുണ്ടാക്കുക എന്നും പറയുന്നു. ഈ ദീര്‍ഘവീക്ഷണവും ഔദാര്യവും ആര്‍ക്കു വേണ്ടിയാണ്! പക്ഷേ, ജീവനക്കാരുടെ വിയര്‍പ്പിന്റെ വിഹിതവും സാമ്പത്തിക പ്രയാസത്തില്‍ നില്‍ക്കുന്ന സര്‍ക്കാരിന്റെ സാമ്പത്തിക വിഹിതവും നല്ലനാളേക്കു വേണ്ടി എന്ന് പറഞ്ഞ് വന്‍കിട കുത്തകകളെ ഏല്‍പ്പിക്കാന്‍ പുറപ്പെടുന്നതിന്റെ പിന്നില്‍ ഹിഡന്‍ അജണ്ടയുണ്ടെന്ന് പറയാതെ വയ്യ. ഓഹരി കമ്പോളമല്ലാതെ, സര്‍ക്കാര്‍ സ്ഥാപനത്തില്‍ വേണമെങ്കിലും പെന്‍ഷന്‍ ഫണ്ട് നിക്ഷേപിക്കാന്‍, ഓപ്ഷനുണ്ടെന്ന് പറയുന്നു. എന്നാല്‍ ലഭിക്കുന്ന ആദായം എങ്ങനെയായിരിക്കുമെന്ന് കണ്ടറിയണം.

21 ലെ പണിമുടക്ക് വിജയിപ്പിക്കുക

സര്‍ക്കാര്‍ ജീവനക്കാര്‍ക്കും അധ്യാപകര്‍ക്കും ക്ഷാമബത്തയ്‌ക്കോ ശമ്പളപരിഷ്‌കരണത്തിനോ മറ്റാനുകൂല്യങ്ങള്‍ക്കോ വേണ്ടി ഒരു തരത്തിലുള്ള സമരവും വേണ്ടി വന്നില്ല, കഴിഞ്ഞ ഇടതുമുന്നണി ഭരണകാലത്ത്. എന്നാല്‍ ഒരു ഭരണമാറ്റം എന്തുവലിയ ആശങ്കകളാണ് ഈ മേഖലയിലേക്ക് ക്ഷണിച്ചുകൊണ്ടു വന്നിരിക്കുന്നത്? സാധാരണക്കാരനേയും സര്‍ക്കാര്‍ ജീവനക്കാരനേയും തമ്മിലടിപ്പിച്ച് ഭരിക്കാമെന്ന് കരുതുന്നത് ഉചിതമല്ല. ജീവനക്കാരും അധ്യാപകരും ഈ നാടിന്റെ സമ്പത്താണെന്നും അവരെ അവകാശ സമരങ്ങളിലേക്കും ആശങ്കകളിലേക്കും തള്ളിവിടരുതെന്നും എന്തുകൊണ്ടാണ് മുഖ്യമന്ത്രി ഓര്‍ക്കാത്തത്? അത് ഓര്‍മ്മിപ്പിക്കാനും ജനവിരുദ്ധ ഉത്തരവില്‍ നിന്ന് പിന്തിരിയാനും ആവശ്യപ്പെട്ടുകൊണ്ടാണ് ഓഗസ്റ്റ് 21 ന്റെ സൂചനാ പണിമുടക്ക്.

*
എന്‍ ശ്രീകുമാര്‍ (ലേഖകന്‍ എകെഎസ്ടിയു സംസ്ഥാന പ്രസിഡന്റാണ്)

ജനയുഗം