![](https://blogger.googleusercontent.com/img/b/R29vZ2xl/AVvXsEjA8aEaLMscdXkvZmDXeZqbCQ6fv4eBdRmj1LPqCilYCd7k2_LwqMuFso9qRuF61rCGjVgw6MuW5TAFjozqnHjA4wwrhvK5SR0Lvf0v8sDmgKc-Tjp0Hhbaf0CUPz0vAIEE4HnnkJaagKc/s320/padana+congress3.jpg)
2005ലെ രണ്ടാം കേരള പഠനകോണ്ഗ്രസിന്റെ കാലമായപ്പോഴേക്കും കേരളത്തിന്റെ സാമ്പത്തിക വളര്ച്ച പുതിയൊരു വിതാനത്തിലേക്ക് ഉയര്ന്നു എന്നു വ്യക്തമായിരുന്നു. അഖിലേന്ത്യാ ശരാശരിയെക്കാള് വേഗതയില് നമ്മുടെ സമ്പദ്ഘടന വളര്ന്നു. ആഗോളവത്കരണ പരിഷ്കാരങ്ങള് ഉയര്ത്തിയ വെല്ലുവിളികളും സാമൂഹ്യക്ഷേമ നേട്ടങ്ങളെ ദുര്ബലപ്പെടുത്തുന്ന യുഡിഎഫ് സര്ക്കാരിന്റെ നടപടികളും പുതിയ മുന്നേറ്റത്തിനു മുന്നില് ആശങ്കകള് ഉയര്ത്തി. ഈ സാഹചര്യത്തില് സംസ്ഥാനത്തിനു മൂര്ത്തമായ ഒരു ജനകീയ വികസന അജണ്ട മുന്നോട്ടു വെയ്ക്കുന്നതിനുളള ചര്ച്ചകളാണ് രണ്ടാം പഠനകോണ്ഗ്രസില് നടന്നത്.
![](https://blogger.googleusercontent.com/img/b/R29vZ2xl/AVvXsEhL3ivst-Aey-xoelfKaaaoti0R5K2b10NG0MSjl2_1V6wurVzaoq2SgVO1YfLEp1XTWd5WBDFd-9iqQRkEQ2HtvlX9nSLcSd3VMO49699B5zGXOHNgGSkyBm3t8Q6kPlj0fmjoh6vwIsw/s320/knp.jpg)
![](https://blogger.googleusercontent.com/img/b/R29vZ2xl/AVvXsEg7e6bBgaaJWhscP3pUKfkzKRI76kDuoXj_xS3XOfeSDWKOe-EuhjVrKjt2wLVJHJXBagHEoeiURZfLMKnts19HbUtyUR7FvvFcZas61hBbZC-ClEK-oRAPZCi9S1Sd6km8gBvU3d8Cucc/s320/books.jpg)
രണ്ട്) ഏറ്റവും പ്രധാനപ്പെട്ട കാര്യം കാര്ഷിക മേഖലയിലെ മുരടിപ്പാണ്. വാണിജ്യവിളകളുടെ വിലകള് മെച്ചപ്പെട്ടതിന്റെ അടിസ്ഥാനത്തില് വരുമാന വളര്ച്ച ഗണ്യമായി ഉയരും എന്നതിനു സംശയമില്ല. പക്ഷേ, വിലത്തകര്ച്ചയുടെ ചക്രം എന്നാണിനി തിരിഞ്ഞെത്തുക എന്നു പ്രവചിക്കാനാവില്ല. ഭക്ഷ്യവിളകളുടെ പിന്നോട്ടടിക്കു വിരാമമിടാന് കഴിഞ്ഞെങ്കിലും ആവശ്യത്തിന്റെ നാലരികിലെത്താന് കഴിഞ്ഞിട്ടില്ല. 1987-88ല് സംസ്ഥാന വരുമാനത്തില് കാര്ഷിക മേഖലയുടെ വിഹിതം 5.21 ശതമാനമായിരുന്നത് ഇന്നു 1.53 ശതമാനമായി താണിരിക്കുന്നു. എന്നാല് കാര്ഷിക മേഖലയില് ഉപജീവനം നടത്തുന്നവരുടെ എണ്ണത്തില് ഗണ്യമായ കുറവുണ്ടായി എന്നു പറയാനാവില്ല. ഇത് അവരുടെ വരുമാനത്തെയും ജീവിതനിലവാരത്തെയും പ്രതികൂലമായി ബാധിക്കുന്നു.
![](https://blogger.googleusercontent.com/img/b/R29vZ2xl/AVvXsEgGW9GzksbYvaZYER8MhI-c4FRx1aQET_0tC6GbVoiRtPc-xQh9qz9StCgoP-FephCm7WxoCUP3WDeH6AO0homYVc5TLIGkdxLV5G7D8QZ2kGXTIpvva9PO8EIiP-F40SmU2c_ZG9vE60M/s320/notes.jpg)
നാല്) കേരളത്തില് ഇന്നുണ്ടായിക്കൊണ്ടിരിക്കുന്ന സാമ്പത്തിക വളര്ച്ചയുടെ ഒരു മുഖ്യദൌര്ബല്യം വേണ്ടത്ര തൊഴിലുകള് സൃഷ്ടിക്കപ്പെടുന്നില്ല എന്നുളളതാണ്. ഉദാഹരണത്തിനു 2007-08ല് നാഷണല് സാമ്പിള് സര്വെയുടെ കണക്കുപ്രകാരം സര്വെ നടത്തുന്നതിനു മുമ്പുളള ഒരു വര്ഷത്തിനിടയില് സാധാരണഗതിയില്, അതായത്, വര്ഷത്തില് കൂടുതല് ദിവസം തൊഴിലില്ലാതിരുന്നവര് കേരളത്തില് 8.5 ശതമാനവും ഇന്ത്യയില് 2.2 ശതമാനവും ആണ്. സര്വെയുടെ തലേ ആഴ്ച തൊഴില് അന്വേഷിച്ചിട്ടും ഒരുദിവസം ഒരു മണിക്കൂര്പോലും ലഭിക്കാത്തവര് കേരളത്തില് 11.4 ശതമാനവും ഇന്ത്യയില് 4.3 ശതമാനവുമാണ്. സര്വെയുടെ തലേദിവസം തൊഴില് തേടിയിട്ടും ഒരു മണിക്കൂര് പോലും തൊഴില് ലഭിക്കാത്തവരുടെ എണ്ണം കേരളത്തില് തൊഴില്സേനയുടെ 23.4 ശതമാനവും ഇന്ത്യയില് 8.9 ശതമാനവുമാണ്.
വിദ്യാഭ്യാസം കഴിഞ്ഞു വര്ഷങ്ങള് കാത്തിരുന്നാലേ ഒരു ജോലി ലഭിക്കൂ. ഈ കാത്തിരിപ്പു വേളയില് പുതിയ ഡിഗ്രിയും സര്ട്ടിഫിക്കറ്റുകളും കൈക്കലാക്കാനുളള ശ്രമത്തിലാണ് തൊഴിലില്ലാത്തവര്. ഏതു പുതിയ കോഴ്സും പഠിക്കാന് ആളുണ്ട്. പഠിത്തത്തിന് അനുസൃതമായ ജോലി ലഭിക്കുമെന്ന് പ്രതീക്ഷിക്കുന്നില്ലെങ്കിലും ഉയര്ന്ന ഡിഗ്രിയും സര്ട്ടിഫിക്കറ്റും ഉളളത് എന്തെങ്കിലും മെച്ചപ്പെട്ട ജോലി കിട്ടുന്നതിനുളള സാധ്യത വര്ദ്ധിപ്പിക്കുന്നു. അഭ്യസ്തവിദ്യരുടെ തൊഴിലില്ലായ്മ രൂക്ഷമാകുമ്പോഴും ഉന്നത വിദ്യാഭ്യാസത്തിനുളള തിക്കും തിരക്കും കൂടാന് കാരണമിതാണ്.
അനുയോജ്യമായ ജോലിക്കു വേണ്ടിയുളള കാത്തിരിപ്പിനിടയില് ഉപജീവനത്തിനായി എന്തെങ്കിലും തൊഴിലില് ഏര്പ്പെടാന് പലരും നിര്ബന്ധിതരാവും. അങ്ങനെ അഭ്യസ്തവിദ്യര്ക്കുള്ള അനൌപചാരിക തൊഴില്മേഖലകള് നിരന്തരം സൃഷ്ടിക്കപ്പെടുന്നു. പാരലല് കോളെജുകള് ഇതിനു നല്ല ഉദാഹരണമാണ്. കൂലിപ്പണിക്കു പോകാന് തയ്യാറല്ലെങ്കിലും കൂലി കുറവായ സെയില്സ് ഗേളായി ജോലി ചെയ്യാന് പെണ്കുട്ടികള് തയ്യാറാണ്.
അതേസമയം തൊഴില് തേടി കേരളത്തിലേയ്ക്കു ഒഴുകുന്ന അന്യസംസ്ഥാനക്കാരുടെ എണ്ണം പെരുകുകയാണ്. ഇവരുടെ സാന്നിദ്ധ്യം നഗരങ്ങളില് മാത്രമല്ല, നാട്ടിന്പുറത്തും ഇന്ന് സജീവമാണ്. അഭ്യസ്തവിദ്യരായ പുതിയ തലമുറ കായികാദ്ധ്വാനം ആവശ്യമുളള പരമ്പരാഗത തൊഴിലുകളില് ഏര്പ്പെടാന് വിസമ്മതിക്കുന്നതാണ് ഇതിനു കാരണം.
ഈ സ്ഥിതി വിശേഷത്തിന്റെ മുഖ്യ ഇര സ്ത്രീകളാണ്. സാധാരണഗതിയിലുളള തൊഴിലില്ലാത്തവരുടെ നിര്വചന പ്രകാരം കേരളത്തില് പുരുഷന്മാരുടെ തൊഴിലില്ലായ്മ 6.1 ശതമാനമാണ്. സ്ത്രീകളുടേത് 25 ശതമാനവും. രൂക്ഷമായ തൊഴിലില്ലായ്മ മൂലം കേരളത്തിലെ അഭ്യസ്തവിദ്യരായ സ്ത്രീകള് പോലും തൊഴിലന്വേഷണം അവസാനിപ്പിച്ച് വീട്ടില് ഒതുങ്ങുന്നു. അതുകൊണ്ടാണ് കേരളം ഏറ്റവും കുറഞ്ഞ ശതമാനം സ്ത്രീകള് തൊഴിലെടുക്കുന്ന സംസ്ഥാനമായിരിക്കുന്നത്. താരതമ്യേനെ വേതനം കുറഞ്ഞ തൊഴിലുകളാണ് സ്ത്രീകള്ക്കായി നീക്കിവെയ്ക്കപ്പെടുന്നത്.
തൊഴിലില്ലായ്മ, സാമ്പത്തിക പ്രശ്നം മാത്രമല്ല സാമൂഹ്യ സാംസ്കാരിക പ്രശ്നം കൂടിയാണ്.
![](https://blogger.googleusercontent.com/img/b/R29vZ2xl/AVvXsEjP77hQHiRtFBJo_ppbeAiib9_cvTUFipGpcFlTjR6WpjrYRltO7OrRma2F7v4ayipV8DPyLxw8DEpbhzIMuzX4Dc9-874Hs1qghjjXY8Aofci43AyyNJsI47MvF9mDLo9sShKzuI6aGg8/s320/padana+congress2.jpg)
ഈ പശ്ചാത്തലത്തില് കേരളത്തിന്റെ സമകാലിക വെല്ലുവിളികളെ താഴെ പറയുംവിധം സംക്ഷേപിക്കാം.
1. ഭൂരിപക്ഷം ജനങ്ങളും ഇന്നും ഉപജീവനം നടത്തുന്നത് കാര്ഷിക മേഖലയിലും പരമ്പരാഗത വ്യവസായങ്ങളിലുമാണ്. എന്നാല് ആഗോളവത്കരണം അവയെ തകര്ത്തുകൊണ്ടിരിക്കുകയാണ്. അവയെ സംരക്ഷിച്ചുകൊണ്ടല്ലാതെ ഭൂരിപക്ഷം ജനങ്ങളുടെ ജീവിതനിലവാരം പിടിച്ചുനിര്ത്താനാവില്ല. ഈ മേഖലകളില് ഉല്പാദനക്ഷമതയും ഉല്പാദനവും എങ്ങനെ ഉയര്ത്താം?
2. പരമ്പരാഗത മേഖലകളിലെ ഉല്പാദനം താരതമ്യേന പതുക്കെ മാത്രമെ ഉയരുകയുളളൂ. ദ്രുതഗതിയിലുളള സാമ്പത്തിക വളര്ച്ച കൈവരിക്കണമെങ്കില് നമുക്ക് അനുയോജ്യമായ, എന്നാല് അതിവേഗം വളരാന് സാധ്യതയുളള ആധുനിക വ്യവസായങ്ങള് കണ്ടെത്തി പ്രോത്സാഹിപ്പിക്കണം. ഇത്തരം വ്യവസായത്തുറകള് ഏതെല്ലാം? ഇവിടങ്ങളിലേയ്ക്ക് നിക്ഷേപം ആകര്ഷിക്കുന്നതിന് എന്തുനടപടികള് സ്വീകരിക്കണം? അനിവാര്യമായ പശ്ചാത്തലസൌകര്യങ്ങള് എങ്ങനെ സൃഷ്ടിക്കാം?
3. സ്കൂളുകളുടെയും പ്രാഥമിക ആരോഗ്യകേന്ദ്രങ്ങളുടെയും വിപുലമായ ശൃംഖല കേരളത്തിനുണ്ട്. എന്നാല് ഇവയുടെ ഗുണനിലവാരം ഗണ്യമായി ഉയര്ത്തിയേ തീരൂ. ജനങ്ങളുടെ ആവശ്യത്തിനും പ്രതീക്ഷകള്ക്കുമനുസരിച്ച് പൊതുവിദ്യാഭ്യാസവും ആരോഗ്യസംവിധാനങ്ങളും പൊതുക്ഷേമ സൌകര്യങ്ങളും ഉയരുന്നില്ല. ഈ പരിമിതി മറികടക്കേണ്ടിയിരിക്കുന്നു.
4. പൊതുവില് ജീവിതനിലവാരം മെച്ചമാണെങ്കിലും ദാരിദ്യത്തിന്റെ തുരുത്തുകള് ഇന്നും അവശേഷിക്കുന്നുണ്ട്. ദളിതര്, ആദിവാസികള്, മത്സ്യത്തൊഴിലാളികള്, പരമ്പരാഗത വ്യവസായ തൊഴിലാളികള്, അഗതികള്, അന്യസംസ്ഥാന തൊഴിലാളികള് എന്നിവരുടെ നില ഇപ്പോഴും പരിതാപകരം തന്നെയാണ്. ഇവരെ എത്രയും പെട്ടെന്ന് മുഖ്യധാരയിലേക്ക് കൊണ്ടുവരിക എന്നത് സുപ്രധാനകടമയാണ്. സമ്പൂര്ണവും സമഗ്രവുമായ സാമൂഹ്യസുരക്ഷിതത്വ പരിപാടിക്ക് എങ്ങനെ രൂപം നല്കാം?
5. പുരുഷന്മാര്ക്കൊപ്പം വിദ്യാസമ്പന്നരും ആരോഗ്യമുളളവരുമാണ് കേരളത്തിലെ സ്ത്രീകള്. ഇന്ത്യയിലെ മറ്റേതു സംസ്ഥാനത്തെയും അപേക്ഷിച്ച് അവരുടെ സ്ഥിതി മെച്ചമാണ്. എന്നാല് സാമ്പത്തിക മേഖലയിലെ സ്ത്രീകളുടെ പങ്കാളിത്തവും സാമൂഹ്യപദവിയും പരിശോധിച്ചാല് മറ്റ് സംസ്ഥാനങ്ങളിലേതു പോലെ കേരളത്തിലും സ്ത്രീകളുടെ നില പിന്നോക്കമാണ്. ജാതി അനാചാരങ്ങള് വലിയ അളവു വരെ നിര്ത്തലാക്കുകയും പാവങ്ങളുടെ ജീവിതനിലവാരം മെച്ചപ്പെടുത്തുകയും ചെയ്ത കേരളം ഏറ്റെടുക്കേണ്ട സുപ്രധാന സാമൂഹ്യചുമതല സ്ത്രീപുരുഷ സമത്വം കൈവരിക്കലാണ്.
6. വീണ്ടുവിചാരമില്ലാത്ത പ്രകൃതിവിഭവ ചൂഷണവും മലിനീകരണവും മൂലം നമ്മുടെ സംസ്ഥാനം പാരിസ്ഥിതിക തകര്ച്ച നേരിടുകയാണ്. പരിസ്ഥിതിയെ സംരക്ഷിച്ചുകൊണ്ട് ദ്രുതഗതിയിലുളള സാമ്പത്തിക വളര്ച്ച കൈവരിക്കുക എന്നതായിരിക്കണം നമ്മുടെ ലക്ഷ്യം.
![](https://blogger.googleusercontent.com/img/b/R29vZ2xl/AVvXsEiGRbB1FUEMh7T4aIZuGF2d9cT-3hcrbIEwZGAUJSjxNbYfTueOzYA-yonQkZOOtQDgk92RCh-32cWpXo3_q4ao7A3588PaJPCgfVRdo07qValqlHCTpH7d7oBJKMU59wUUerzDAQIWa6M/s320/karat.jpg)
പഠന കോണ്ഗ്രസില് അവതരിപ്പിച്ച വികസനരേഖ ചര്ച്ചകളുടെ അടിസ്ഥാനത്തില് വേണ്ട ഭേദഗതികളും കൂട്ടിച്ചേര്ക്കലുകളും നടത്തി സമ്പുഷ്ടമാക്കേണ്ടതുണ്ട്. ഈ രേഖകള് പൂര്ണ്ണമായും പഠന കോണ്ഗ്രസിന്റെ വെബ്സൈറ്റില് പ്രസിദ്ധീകരിക്കും. അവിടെയും ചര്ച്ചകള്ക്ക് അവസരമുണ്ടായിരിക്കും. അവകൂടി പരിഗണിച്ചാണ് വികസനരേഖയ്ക്ക് അവസാനരൂപം നല്കുക. ഇത് മാര്ക്സിസ്റ്റ് സംവാദത്തിന്റെ മാര്ച്ച് ലക്കം പ്രത്യേക പതിപ്പായി പ്രസിദ്ധീകരിക്കുന്നതാണ്.
![](https://blogger.googleusercontent.com/img/b/R29vZ2xl/AVvXsEh9ruaKj2B9HkfH9fgI07wzqNM2-TRIBoehZL1ePj3GgBu3WRWMZTfU28PzUZaQX8eHcG4BV4-1egIp15adPLJk6TldHTLDKC8GM7aFwwbzG5TVRwtXDuhJjHp50j5HGIyPt0iPU0xqxTc/s320/padana+congress1.jpg)
![](https://blogger.googleusercontent.com/img/b/R29vZ2xl/AVvXsEgaVR1_Fo_44U0OQ1D8IlXyjOBkXlssEOQqHf4LhoJ8QOHZJrk1B5IcwaZTG3ThtmFKrpo5lh0M85S6bg70Nlw1DL-7SiJkCEy4bDNkz53XwBp4bifwHHqqvgjeSup_6fRfN8-hhIlx35Y/s320/vs.jpg)
പഠനകോണ്ഗ്രസ് വിഭാവനം ചെയ്യുന്ന ഈ ഭാവി പരിപാടിയുടെ വിജയത്തിന്റെ നിര്ണായകമായ ഒരു മുന്നുപാധി കേരള സമൂഹത്തിന്റെ മതനിരപേക്ഷതയാണ്. മതം രാഷ്ട്രീയത്തിലും രാഷ്ട്രീയം മതത്തിലും ഇടപെടാത്ത തരത്തിലുള്ള മതനിരപേക്ഷത ഉയര്ത്തിക്കൊണ്ടുള്ള പ്രവര്ത്തനം കേരളീയ സമൂഹത്തില് കൂടുതല് ശക്തമായി നടത്തേണ്ടതുണ്ട്.
ഉപഭോക്തൃ സേവനത്തുറകളെ അടിസ്ഥാനമാക്കിയുള്ളതാണ് ഇപ്പോള് ഉണ്ടായിക്കൊണ്ടിരിക്കുന്ന വളര്ച്ച. ഉല്പാദനമേഖലകളുടെ അടിത്തറയും വളര്ച്ചയും ശക്തിപ്പെടുത്തേണ്ടതുണ്ട്. അഭ്യസ്തവിദ്യരായ യുവജനങ്ങളുടെ പ്രതീക്ഷകള്ക്കനുസൃതമായ തൊഴിലവസരങ്ങള് വേണ്ടതോതില് തുറക്കുക എന്നതും ഏറ്റവും പ്രധാനപ്പെട്ട കര്ത്തവ്യമാണ്. കൂടുതല് മത്സരശേഷിയുള്ളതും അനുയോജ്യവുമായ വിജ്ഞാനാധിഷ്ഠിത വ്യവസായങ്ങള്, സേവന പ്രധാനമായ വ്യവസായങ്ങള്, വൈദഗധ്യാധിഷ്ഠിത വ്യവസായങ്ങള്, കാര്ഷിക-ഖനിജ മൂല്യവര്ദ്ധിത ഉല്പ്പന്ന വ്യവസായങ്ങള് എന്നിവയില് ഊന്നണം. ഇതിനുവേണ്ടി മൂര്ത്തമായൊരു കര്മ്മപരിപാടി കോണ്ഗ്രസ് അംഗീകരിച്ചു.
മേല്പ്പറഞ്ഞ മേഖലകളിലെല്ലാം ഫലപ്രദമായ സര്ക്കാര് പ്രോത്സാഹനവും നേതൃത്വവും അനിവാര്യമാണ്. അതോടൊപ്പം വലിയതോതില് സ്വകാര്യ മൂലധനനിക്ഷേപം ആകര്ഷിക്കേണ്ടതുണ്ട്. കേരളത്തിലെ പൊതുമേഖലകള് മുഴുവന് ലാഭത്തിലാക്കാന് കഴിഞ്ഞതോടെ കേരളത്തില് നിക്ഷേപസൌഹൃദ അന്തരീക്ഷമില്ല എന്ന വാദം പൊളിഞ്ഞു.
![](https://blogger.googleusercontent.com/img/b/R29vZ2xl/AVvXsEhgSn2imsBwYHTj42p_0AM3y6NRoQ4Y8mIR2UXP4AvBmMd0OM55OJzvp6bvJ4_lW8rGt_Vez1vPZEk7sB7XHkYFMbDCSmS5zmQgxM1J9slU5lKUMvOU46j1PUnAruT-bnqeg-uYaLWZy7o/s320/isaac.jpg)
മേല്പ്പറഞ്ഞ വ്യവസായക്കുതിപ്പ് ഉറപ്പുവരുത്തണമെങ്കില് കേരളത്തിലെ പശ്ചാത്തല സൌകര്യങ്ങള് ദ്രുതഗതിയില് വികസിക്കേണ്ടതുണ്ട്. വല്ലാര്പ്പാടം കണ്ടയിനര് ടെര്മിനല്, എല്എന്ജി ടെര്മിനല്, പ്രകൃതിവാതക ശൃംഖല, കൊച്ചി മെട്രോ, കണ്ണൂര് എയര്പോര്ട്ട്, താപ-ജലവൈദ്യുതി നിലയങ്ങള്, വിഴിഞ്ഞം ഹാര്ബര്, ദേശീയപാതകളും സംസ്ഥാന പാതകളും നാലുവരിയാക്കല്, തെക്കു-വടക്ക് അതിവേഗ റെയില്വെ തുടങ്ങിയവ പൂര്ത്തിയാക്കേണ്ടതുണ്ട്. മേല്പ്പറഞ്ഞവയില് സ്വകാര്യ പങ്കാളിത്തമാകാമെങ്കിലും നമ്മുടെ ഗ്രാമ-ബ്ളോക്ക്-ജില്ലാ സംസ്ഥാനതല റോഡുകളുടെ അതിബൃഹത്തായ ശൃംഖല നവീകരിക്കുന്നതിന് സര്ക്കാര്തന്നെ മുതല്മുടക്കണം. ഇതിനായി അടുത്ത അഞ്ചുവര്ഷം 10,000 കോടിയോളം രൂപയുടെ നിക്ഷേപം വേണ്ടിവരും. യാഥാസ്ഥിതിക ധനനയംവെടിഞ്ഞ് വികസനോന്മുഖ ധനനയം സ്വീകരിച്ചാല് മാത്രമേ ഇതിന് ആവശ്യമായ വിഭവങ്ങള് കണ്ടെത്താന് കഴിയൂ. ഒപ്പം നിര്മ്മാണരംഗത്ത് ഇന്ന് നേരിടുന്ന പ്രശ്നങ്ങള്, വിശേഷിച്ചും നിര്മ്മാണ സാമഗ്രികളുടെ ക്ഷാമം, പരിഹരിക്കുന്നതിന് ഹ്രസ്വ-ദീര്ഘകാല പരിപാടികള് ആവിഷ്കരിക്കേണ്ടതുണ്ട്.
![](https://blogger.googleusercontent.com/img/b/R29vZ2xl/AVvXsEg6EEWZICRcRNYAhJozPf1i77GNVB_GNLq2MCwt-6gtzGe2uUnwo_BXGZwmhDE-ZRaWDrd2PQ43222l5i6m037HIsvTMa9rmnuMm5e_UTG1Z7Gb1bptgQQ2sex-kmzIPb-PoREDdnZYZTU/s320/pinarayi.jpg)
വളരുന്ന സാമ്പത്തിക അസമത്വമാണ് ഇന്നത്തെ സാമ്പത്തിക വളര്ച്ചയുടെ പ്രമുഖ ദൌര്ബല്യം. താഴേക്കിടയിലുള്ള 30 ശതമാനം ജനങ്ങളുടെ ജീവിതനിലവാരം ഭീഷണി നേരിടുകയാണ്. ഇതിന്റെ പശ്ചാത്തലത്തില് സാധാരണക്കാരെ മുഴുവന് ഉള്പ്പെടുത്തുന്ന ഒരു സമഗ്ര സാമൂഹ്യ സുരക്ഷാ പദ്ധതിക്ക് പഠന കോണ്ഗ്രസ് രൂപം നല്കി. ജനനംമുതല് മരണംവരെ സാധാരണക്കാരെ സംരക്ഷിക്കുന്ന ഒരു ക്ഷേമസമൂഹമായി കേരളം മാറണം. ഏറ്റവും അടിയന്തിരമായി ഏറ്റെടുക്കേണ്ട ഒരു കാര്യമാണിത്. ഇതുമായി ബന്ധപ്പെട്ട് ദളിതര്, ആദിവാസികള്, മത്സ്യത്തൊഴിലാളികള് തുടങ്ങിയ ദുര്ബ്ബല വിഭാഗങ്ങളുടെ പ്രശ്നങ്ങള്, ലിംഗനീതിയുടെ പ്രശ്നങ്ങള് എന്നിവ ചര്ച്ചചെയ്യപ്പെട്ടു. വ്യത്യസ്ത ശേഷികളുള്ള ജനവിഭാഗങ്ങളുടെ പ്രശ്നങ്ങളാണ് പഠനകോണ്ഗ്രസ് വിശദമായി ചര്ച്ചചെയ്ത മറ്റൊരു മേഖല. എല്ലാവര്ക്കും ഭക്ഷ്യസുരക്ഷ, ആരോഗ്യസുരക്ഷ, വീട്, കുടിവെള്ളം, വെളിച്ചം, ശുചിത്വം എന്നതാവണം കേരളത്തിന്റെ ലക്ഷ്യമെന്ന് പഠന കോണ്ഗ്രസ് വിലയിരുത്തി.
പ്രവാസി മലയാളികളുടെ ക്ഷേമത്തിനും സുരക്ഷയ്ക്കുമായി ഇതുവരെ സ്വീകരിച്ച നടപടികളുടെ പോരായ്മയും കേരളത്തിന്റെ വികസനത്തിന് പ്രവാസത്തിന്റെ സാധ്യതകള് ഉപയോഗപ്പെടുത്താന് കഴിയാത്തതിന്റെ പ്രശ്നങ്ങളും പഠനകോണ്ഗ്രസ് ചര്ച്ചചെയ്തു. നയ രൂപീകരണത്തില് ഈ രംഗത്ത് സമീപഭാവിയില്ത്തന്നെ വലിയ മാറ്റങ്ങള് അനിവാര്യമാണ്.
![](https://blogger.googleusercontent.com/img/b/R29vZ2xl/AVvXsEgCQTtjvJq6CBGL8EOCbrNAEsc2y8JPWMvZeL_KNq_1YNQOMp18E6qoRvM9n7mRbf6SSByUuX-Yf4A_z7mOTUkOyNa1eqG5-loipKdDCHUM_r2iGsCahiGNhUa2xLtMEXeJCzaR72PZ9dM/s320/rvg.jpg)
ഇന്ത്യയിലെ മൈക്രോ ഫിനാന്സ് രംഗത്തെ കോര്പ്പറേറ്റ്വത്കരണത്തിന്റെ പശ്ചാത്തലത്തില് കുടുംബശ്രീ വ്യത്യസ്തമായ ഒരു ജനകീയ മാതൃക ഉയര്ത്തിപ്പിടിക്കുന്നു. തദ്ദേശ സ്വയംഭരണ സ്ഥാപനങ്ങളോട് ബന്ധപ്പെടുത്തി സ്ത്രീ ശാക്തീകരണത്തിന് ഊന്നല്നല്കി എങ്ങനെ മൈക്രോക്രെഡിറ്റും ദാരിദ്ര്യനിര്മ്മാര്ജ്ജന പരിപാടികളും നടപ്പാക്കാം എന്നതിന് കുടുംബശ്രീ മാതൃകയാവുകയാണ്. ഇതിനകം ബാങ്കേതര ധനകാര്യ ഏജന്സിയായി രജിസ്ട്രേഷന് അപേക്ഷ സമര്പ്പിച്ചിട്ടുള്ള ജനശ്രീ തികച്ചും പ്രതിലോമകരമാണെന്ന് ആന്ധ്രയുടെ അനുഭവത്തിന്റെ പശ്ചാത്തലത്തില് പഠന കോണ്ഗ്രസ് വിലയിരുത്തി.
പരിസ്ഥിതി സൌഹൃദ സമീപനത്തിന്റെ കാര്യത്തില് കൂടുതല് ശ്രദ്ധ പതിപ്പിക്കേണ്ടതുണ്ട് എന്ന് കോണ്ഗ്രസ് വിലയിരുത്തി. ഉയര്ന്ന വളര്ച്ച സ്ഥായിയാക്കാന് ഇത് കൂടിയേതീരു. എല്ലാ മേഖലകളിലെയും ലിംഗനീതിയുടെ പ്രശ്നങ്ങളും കോണ്ഗ്രസ് ചര്ച്ചചെയ്തു. കേരളത്തില് അടുത്തതായി നടക്കേണ്ട സാമൂഹ്യമാറ്റത്തിന്റെ ഏറ്റവും പ്രധാനമായ പ്രശ്നം ലിംഗനീതിയുടേതാണ്.
![](https://blogger.googleusercontent.com/img/b/R29vZ2xl/AVvXsEge4m68p5VD0MH1Jmh9xag9mTnrqMJa7m0NDkk66FkMDpTOUUr1YxyIQwUGOMsplaqAHWNi_3OE1AplTMUXu2zMSc04KpEdK5-oLt2gjB55XU6xDGhBfUCjPav6EyRxvKZnZUqy26aHE7s/s320/collage.jpg)
മേല്പ്പറഞ്ഞ കാര്യങ്ങള് നടപ്പിലാക്കുന്നതിന് നിര്ണ്ണായക പങ്ക് സര്ക്കാരിനുണ്ട്. ഇതിന് സര്ക്കാരിന്റെ വിഭവശേഷി ഗണ്യമായിട്ടുയരണം. അതോടൊപ്പം കര്മ്മശേഷിയിലും സമൂലമാറ്റം വേണ്ടതുണ്ട്. വിവിധ ഭരണമേഖലകളിലെ പരിഷ്കാരങ്ങളെക്കുറിച്ച് കോണ്ഗ്രസ് വിലയിരുത്തി. അവയെല്ലാം സംയോജിപ്പിച്ച് ഒരു സമഗ്ര ഭരണപരിഷ്കാര സമയബന്ധിത പരിപാടി ആവിഷ്കരിക്കുകയാണ് ഇനിയുള്ള ലക്ഷ്യം. ഈ കടമ ഇനി നീട്ടിവയ്ക്കാനാകില്ല. സ്വതന്ത്ര സോഫ്റ്റ്വെയറിനെ അടിസ്ഥാനമാക്കിയുള്ള ഈ ഗവേണന്സാണ് കേരളം ലക്ഷ്യമിടേണ്ടത്. സമഗ്ര നിയമപരിഷ്കാര നടപടികള് സ്വീകരിക്കേണ്ടതിന്റെ പ്രാധാന്യവും പഠനകോണ്ഗ്രസ് വിലയിരുത്തി. ഭരണപരിഷ്കാരരംഗത്തെ ഏറ്റവും പ്രധാന കാല്വയ്പായി അധികാരവികേന്ദ്രീകരണരംഗത്തെ ഇതുവരെയുള്ള നേട്ടങ്ങളെ കണക്കാക്കണം. എന്നാല് ജനപങ്കാളിത്തം ഉറപ്പാക്കിയും ഉദ്യോഗസ്ഥ പുനര്വിന്യാസം പൂര്ത്തിയാക്കിയും വികസനവകുപ്പുകളുടെ വിവിധ തലങ്ങളിലെ ഏകോപനം സാധ്യമാക്കിയും ഈ രംഗത്തെ കടമകള് പൂര്ത്തിയാക്കേണ്ടതുണ്ട്.
ഭരണസംവിധാനംപോലെ വികസനത്തില് സുപ്രധാനപങ്ക് കേരളത്തിലെ സഹകരണ പ്രസ്ഥാനത്തിനും വഹിക്കാനുണ്ട്. വൈദ്യനാഥന് കമ്മിറ്റി റിപ്പോര്ട്ട് തിരസ്കരിക്കുമ്പോള്തന്നെ കേരളത്തിലെ സഹകരണ പ്രസ്ഥാനത്തിന്റെ പുന:സംഘടന സുപ്രധാന കടമയാണെന്ന് വിലയിരുത്തി.
![](https://blogger.googleusercontent.com/img/b/R29vZ2xl/AVvXsEiCzjHhU4gnM_kTqx9xW7dylojyadp3wr9idegS6UG7X4VVKlKOAV1BSpu-3vu-STmZkbACAGv12JNb10E1fOoluj_5x2p2mIn1vzm45qsGm_JCaU-EHK6v44r_OF2jJeNBLRfj2RggKLE/s320/padana+congress4.jpg)
പഠനകോണ്ഗ്രസ് മുന്നോട്ടുവെച്ച വികസനപരിപാടിയുടെ അടിത്തറ നിലവിലുള്ള ഇടതുപക്ഷ ജനാധിപത്യമുന്നണി സര്ക്കാര് സൃഷ്ടിച്ചുകഴിഞ്ഞു. ഇതിനുള്ള തുടര്ച്ചയാണ് ഇനി വേണ്ടത്. ഈ തുടര്ച്ച ഉറപ്പുവരുത്തുന്ന രാഷ്ടീയ പൊതുജനാഭിപ്രായം ഉണ്ടാകണം.
*
ഡോ. ടി എം തോമസ് ഐസക് കടപ്പാട്: ചിന്ത വാരിക 14 ജനുവരി 2011
ചിത്രങ്ങള്ക്ക് കടപ്പാട്: BodhiCOMMONS
1 comment:
സമീപകാലത്ത് കേരളത്തില്നടന്ന ഏറ്റവും ബൃഹത്തായ വികസന സംവാദമായ മൂന്നാം അന്താരാഷ്ട്ര കേരള പഠന കോണ്ഗ്രസ് സമാപിച്ചു. പത്തു സിമ്പോസിയങ്ങളിലും 78 സമ്മേളനങ്ങളിലുമായി എഴുന്നൂറോളം അവതരണങ്ങള് നടന്നു. അത്രതന്നെ പ്രതിനിധികള് ചര്ച്ചയിലും പങ്കെടുത്തു. മൂവായിരത്തോളം പ്രതിനിധികള് സമ്മേളനത്തില് രജിസ്റ്റര്ചെയ്തും അഞ്ഞൂറോളംപേര് അല്ലാതെയും പങ്കെടുത്തു. നാലു വാല്യങ്ങളിലായി സമീപനരേഖയും അനുബന്ധ പ്രബന്ധങ്ങളും പ്രസിദ്ധീകരിച്ചിരുന്നു. ആകെ 200 മണിക്കൂറിലേറെ വിവിധ വേദികളിലായി സംവാദം നടന്നു. കേരളത്തിന് അകത്തും പുറത്തുമുള്ള അക്കാദമിക് പണ്ഡിതന്മാര്, രാഷ്ട്രീയ നേതാക്കന്മാര്, സാമൂഹ്യ പ്രവര്ത്തകര്, വിദ്യാര്ത്ഥികള്, സര്ക്കാര് ജീവനക്കാര് എല്ലാം മൂന്നുദിവസമായി നടന്ന ഈ സംവാദത്തില് പങ്കാളികളായി.
Post a Comment